.jpg)
ស្ត្រីនគរបាលដែលបំបៅដោះកូនពេលចុះបំពេញការងារតាមផ្លូវ។ រូបថត ហ្វេសប៊ុក
ភ្នំពេញៈ ក្រុមការងារយេនឌ័រ ក្រសួងមហាផ្ទៃបានសម្តែងការសោកស្តាយជាខ្លាំង ដែលអធិការនគរបាលស្រុកសៀមប៉ាង ខេត្តស្ទឹងត្រែងបានធ្វើការព្រមានលោកស្រីអនុសេនីយ៍ទោម្នាក់ ករណីបំបៅដោះកូននៅក្នុងពេលបំពេញបេសកកម្មតាមផ្លូវ បន្ទាប់ពីសាធារណជនជាច្រើនបានធ្វើការរិះគន់យ៉ាងខ្លាំងពីបញ្ហានេះនៅពេញបណ្តាញសង្គមហ្វេសប៊ុក។
ប្រតិកម្មទាំងនេះបានកើតឡើងបន្ទាប់ពីលោកស្រីអនុសេនីយ៍ទោ ស៊ីថុង សុខា បានបង្ហោះរូបភាពបំបៅដោះកូនកាលពីថ្ងៃទី ២ ខែមីនា ឆ្នាំ ២០២១ ដោយសរសេរថា៖ «ព្រោះតែពាក្យថាម្តាយ មិនថាក្នុងកាលៈទេសៈណាទេ ដើម្បីកូនភ្លេចអស់ហើយភាពអៀនខ្មាស (នេះហើយជីវិតពិត)»។
បន្ទាប់មកនៅថ្ងៃទី ៦ ខែមីនា គេឃើញលោកស្រីនគរបាលរូបនេះបានបង្ហោះសារថ្មីមួយទៀត ដោយពោលពាក្យថា «នាងខ្ញុំអនុសេនីយ៍ទោ ស៊ីថុង សុខា អត្តលេខ 71655 សូមចេញមុខសុំទោសជាសាធារណៈក្នុង Facebook ចំពោះការផូស្តរូបភាពបំបៅដោះកូននៅកន្លែងធ្វើការ និងស្លៀកឈុតឯកសណ្ឋានកាលពីថ្ងៃទី 02/03/2021 កន្លងមកនេះ»។
លុះនៅថ្ងៃទី ៩ មីនា លោកស្រី សុខា ត្រូវបានអញ្ជើញឱ្យទៅកាន់អធិការដ្ឋាននគរបាលស្រុកសៀមប៉ាង ដើម្បីបង្ហាញខ្លួន និងធ្វើកិច្ចសន្យាជាលាយលក្ខណ៍អក្សរដោយក្នុងកិច្ចសន្យានោះ មានខ្លឹមសារថា៖ «នាងខ្ញុំ អនុសេនីយ៍ទោ ស៊ីថុង សុខា សូមធ្វើកិច្ចសន្យាដូចខាងក្រោម នាងខ្ញុំគ្មានបំណងផូស្ត Facebook ដែលមិនសមរម្យ ដែលធ្វើឱ្យប៉ះពាល់ដល់កិត្តិយសអង្គភាពនគរបាល ព្រមទាំងប៉ះពាល់ដល់កិត្តិយសស្ត្រីខ្មែរទេ។ ប្រសិនបើនាងខ្ញុំ មិនគោរពពាក្យសន្យាខាងលើ នាងខ្ញុំសូមទទួលខុសត្រូវចំពោះមុខច្បាប់ជាធរមាន»។
ក្រុមការងារយេនឌ័រ ក្រសួងមហាផ្ទៃ និងគណៈកម្មាធិការជាតិប្រយុទ្ធប្រឆាំងការជួញដូរមនុស្សនៅថ្ងៃទី ១០ ខែមីនា បានចេញលិខិតមួយផ្ញើជូនគណៈអភិបាលខេត្តស្ទឹងត្រែង ដោយសម្តែងការសោកស្តាយជាខ្លាំងពីបញ្ហានេះ។
លោកស្រី ជូ ប៊ុនអេង រដ្ឋលេខាធិការ និងជាប្រធានក្រុមការងារយេនឌ័រ ក្រសួងមហាផ្ទៃ និងក៏ជាអនុប្រធានអចិន្រៃ្តយ៍នៃគណៈកម្មាធិការជាតិ ប្រយុទ្ធប្រឆាំងការជួញដូរមនុស្សបានលើកឡើងនៅក្នុងលិខិតថា ការប្រើឥរិយាបថ ដោយកោះហៅលោកស្រីនគរបាលដែលគាត់បំបៅដោះកូននៅតុការងារតាមផ្លូវ ដើម្បីទៅព្រមាន និងឱ្យធ្វើកិច្ចសន្យាបញ្ឈប់បំបៅដោះកូនបែបនេះ ដោយមិនបានវែកញែកឱ្យច្បាស់ពីកំហុស និងគុណសម្បត្តិពីសំណាក់លោកអធិការស្រុកសៀមប៉ាងគឺជារឿងសោកស្តាយយ៉ាងខ្លាំង។ «ក្នុងស្ថានភាពជាស្ត្រីដែលមានភារកិច្ចទទួលខុសត្រូវទ្វេដងលើសពីបុរស គឺបំពេញការងារស្នូលក្នុងអង្គភាពស្ថាប័នផង និងត្រូវចិញ្ចឹមបីបាច់ថែទាំកូន តាំងពីក្នុងផ្ទៃរហូតដល់កើត....។ នេះជាទង្វើដែលខ្ញុំជាស្ត្រីម្នាក់ សូមកោតសរសើរនូវឆន្ទៈដ៏មោះមុតក្នុងការបំពេញភារកិច្ចរបស់មន្ត្រីជាស្ត្រី ទោះជាប្រឈមនឹងការលំបាកយ៉ាងណាក៏ដោយ»។
លោកស្រីគូសបញ្ជាក់ថា៖ «លោកអធិការ គួរតែសម្តែងនូវការកោតសរសើរ លើកទឹកចិត្ត និងរិះរកមធ្យោបាយឱ្យមន្ត្រីស្រី្តបែបនេះទទួលបាននូវការយកចិត្តទុកដាក់ និងឱ្យគាត់មានឱកាសគ្រប់គ្រាន់ថែទាំកូនដូចម្តាយលោកថែទាំលោកកាលពីនៅទារក និងភរិយាលោកថែទាំកូនលោកដូចគ្នាដែរ»។ លោកស្រី ជូ ប៊ុនអេង បានស្នើឱ្យអភិបាលខេត្ត និងស្នងការខេត្តស្ទឹងត្រែងរិះរកវិធីលើកទឹកចិត្តស្ត្រីដែលជាមន្ត្រីនគរបាលបំបៅដោះកូននេះ និងស្ត្រីជាមន្ត្រីរាជការដទៃទៀត តាមដែលអាចធ្វើទៅបាន ដើម្បីកុំឱ្យបាក់ទឹកចិត្ត ជាពិសេសក្នុងទិវាអន្តរជាតិនារីខួបលើកទី ១១០ ឆ្នាំ ២០២១ នេះ។
ជាច្រើនថ្ងៃមកហើយ មហាជនជាច្រើនបានផ្ទុះការរិះគន់ទៅលើចំណាត់ការនៃថ្នាក់ដឹកនាំនៃស្នងការដ្ឋាននគរបាលខេត្តស្ទឹងត្រែងថា៖ «មិនត្រឹមតែមិនលើកសរសើរ វាទៅជាមានទោស»។ «តាមខ្ញុំយល់នេះជាវីរភាពរបស់អ្នកម្តាយ ហើយប្រហែលក៏គ្មានច្បាប់ណាដាក់ទោសទៅលើម្តាយចិញ្ចឹមកូនទេ» ។ «គ្រាន់តែបំបៅដោះកូនសោះ ក៏ខុសដែរ?»។ «បំបៅដោះកូនក្នុងម៉ោងធ្វើការ មិនខុសទេ?»។
លោកស្រី ស៊ីថុង សុខា ថ្លែងប្រាប់ភ្នំពេញប៉ុស្តិ៍ពីម្សិលមិញថាការដែលលោកស្រីបង្ហោះរូបភាពបំបៅដោះកូន គឺពុំមានចេតនាធ្វើឱ្យប៉ះពាល់ដល់អង្គភាព និងកិត្តិយសរបស់ស្ត្រីខ្មែរនោះទេគឺលោកស្រីគ្រាន់ចង់បង្ហាញពីទឹកចិត្តរបស់ម្តាយប៉ុណ្ណោះ។ «បច្ចុប្បន្នខ្ញុំមានកូន ២ នាក់ កូនដែលខ្ញុំបំបៅដោះនោះជាកូនប្រុសមានអាយុ ១ ខួប ២ ខែ តែមិនទាន់ផ្តាច់ដោះទេគឺត្រូវបំបៅដោះរាល់ថ្ងៃ។ និយាយរួមខ្ញុំយកទៅតាមធ្វើការរាល់ថ្ងៃលើកលែងតែខ្ញុំមកប្រជុំនៅខេត្ត ខ្ញុំផ្ញើនៅជាមួយបងស្រីខ្ញុំ»។ «ខ្ញុំផូស្ត ខ្ញុំអត់មានចេតនាអីធ្វើឱ្យប៉ះពាល់ដល់អង្គភាព ឬប៉ះពាល់ដល់ស្ត្រីខ្មែរទេ ខ្ញុំផូស្តគ្រាន់តែចង់ឆ្លុះបញ្ចាំងទឹកចិត្តម្តាយជាមួយកូនថា ស្ថិតក្នុងកាលៈទេសៈណាក៏ដោយ ក៏ម្តាយមិនចោលកូនដែរ»។
កាលពីម្សិលមិញក្រសួងកិច្ចការនារីបានចេញសេចក្តីថ្លែងការណ៍មួយដោយជំរុញឲ្យអង្គភាព ឬស្ថាប័នត្រូវបង្កលក្ខណៈងាយស្រួល និងបង្កើតឲ្យមានកន្លែងសម្រាប់ស្ត្រីបំបៅដោះកូន និងបានសម្តែងនូវការកោតសរសើរដល់លោកស្រី ស៊ីថុង សុខា ដែលបានបង្ហាញអំពីការទទួលខុសត្រូវខ្ពស់ទាំងក្នុងការបំពេញភារកិច្ចជូនស្ថាប័ន និងតួនាទីជាម្តាយដ៏ល្អក្នុងការចិញ្ចឹមបីបាប់ និងផ្តល់ភាពកក់ក្តៅដលកូន។ «ករណីនេះគឺជាទង្វើល្អ និងបង្ហាញនូវឆន្ទះខ្ពស់ក្នុងការចូលរួមការងារសង្គមផង និងផ្តល់អាហារូបត្ថម្ភជាចាំបាច់សម្រាប់កូនផង»។
ភ្នំពេញ ប៉ុស្តិ៍ មិនអាចស្វែងរកប្រភពទាក់ទងដើម្បីសុំការបញ្ជាក់ពីបញ្ហានេះពីអធិការស្រុកសៀមប៉ាងបានទេ ខណៈអភិបាលខេត្តស្ទឹងត្រែងលោក ម៉ុម សារឿន បានថ្លែងថា លោកជាប់រវល់ប្រជុំ។
ប៉ុន្តែក្រោយពីមានការរិះគន់ស្នងការដ្ឋានគរបាលខេត្តស្ទឹងត្រែងបានបង្ហោះសារនៅលើទំព័រហ្វេសប៊ុករបស់ខ្លួនពីម្សិលមិញថា៖ «ដោយមានការយកចិត្តទុកដាក់ពីថ្នាក់ដឹកនាំ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិបានឧបត្ថម្ភថវិកាចំនួន ៥០ ម៉ឺនរៀល ផ្លែឈើ និងភេសជ្ជៈមួយចំនួនដល់លោកស្រី អធិការរងទទួលការងារចរាចរណ៍នៃអធិការដ្ឋាននគរបាលស្រុកសៀមប៉ាងដែលបានយកកូនទៅបំបៅនៅតុដែលកំពុងចុះរឹតបន្តឹងច្បាប់ចរាចរណ៍ផ្លូវគោក»។
នាយិកានៃអង្គការយេនឌ័រ និងអភិវឌ្ឍន៍ដើម្បីកម្ពុជា លោកស្រី រស់ សុភាព ថ្លែងថា លោកស្រីសោកស្តាយថា ការដែលអធិការស្រុកសៀមប៉ាងក្នុងនាមជាថ្នាក់ដឹកនាំមិនបានយល់អំពីគោលការណ៍នៃសិទ្ធិមនុស្សជាមូលដ្ឋាន។ «មិនមែនជាកំហុសរបស់ស្ត្រីទេ ព្រោះវាចាំបាច់។ សម្រាប់ខ្ញុំលើកទឹកចិត្តដល់ស្ត្រី និងកោតសរសើរដែលគាត់យកតួនាទី ឬពេលវេលារបស់គាត់ ដើម្បីបំបៅដោះកូន ព្រោះនេះជាអាយុជីវិតក្មេងសិទ្ធិក្នុងការទទួលបានរបបអាហារ វាចាំបាច់ បើនិយាយពីសិទ្ធិកុមារ សិទ្ធិមនុស្ស»៕
វីដេអូ៖
