.jpg)
លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ។ ហ៊ាន រង្សី
ភ្នំពេញៈ ក្រុមការងារតាមដានអំពីការដោះស្រាយមតិយោបល់ ឬសំណូមពរពលរដ្ឋតាមហ្វេសប៊ុកលោក ស ខេងរដ្ឋមន្ដ្រីក្រសួងមហាផ្ទៃ បន្តទទួលបានសំណើចំនួន ៥៤ ករណីទៀត សម្រាប់ខែមេសាឆ្នាំនេះ ក្នុងនោះបានដោះស្រាយបញ្ចប់ ២០ករណី ហើយបូករួមទាំងសំណើដែលនៅសល់កាលពីឆ្នាំមុន គឺមានចំនួនសរុប ៤៣៨ ករណីហើយពេលនេះ កំពុងបន្តដោះស្រាយ ដែលភាគច្រើនជាករណីវិវាទដីធ្លីនៅមូលដ្ឋាន។ នេះបើតាមសេចក្ដីប្រកាសព័ត៌មានរបស់ក្រសួងមហាផ្ទៃ។
លោក ជា សុគន្ធាប្រធានក្រុមការងារដោះស្រាយមតិយោបល់ ឬសំណូមពរពលរដ្ឋតាមហ្វេសប៊ុកលោកស ខេង បានថ្លែងប្រាប់ភ្នំពេញប៉ុស្ដិ៍ នៅថ្ងៃទី១៨ ខែឧសភានេះថា ទោះបីស្ថានភាពនៃការរីករាលដាលជំងឺកូវីដ១៩ នៅបន្តរីករាលដាលខ្លាំងក្នុងប្រទេស ប៉ុន្ដែក្រុមការងារនៅបន្តទទួលដោះស្រាយ មតិយោបល់ឬសំណូមពរពលរដ្ឋ ដែលបានផ្ញើមកដដែល ប៉ុន្ដែករណីភាគច្រើន បន្តដោះស្រាយតាមអនឡាញ។
លោកបានថ្លែងថា៖«ចាប់តាំងពីបង្កើតក្រុមការងារដោះស្រាយមតិយោបល់ ឬសំណូមពរពលរដ្ឋតាមហ្វេសប៊ុកសម្ដេចក្រឡាហោមសខេង កាលពីខែកក្កដាឆ្នាំ ២០២០ រហូតមក ក្រុមការងារបានដោះស្រាយមតិយោបល់ និងសំណូមពរពលរដ្ឋជាប្រចាំ មិនដែលអាក់ខានឡើយ។ ប៉ុន្ដែយើងមានសំណុំរឿងមួយចំនួន ជាសំណុំរឿងវិវាទដីធ្លីនៅមូលដ្ឋាន គឺយើងបានស្នើសុំគោលការណ៍ពីថ្នាក់ដឹកនាំ ផ្ទេរទៅឱ្យមន្រ្ដីមូលដ្ឋានជាអ្នកដោះស្រាយ»។
លោកជាសុគន្ធា បានឱ្យដឹងថា សម្រាប់ខែមេសា ឆ្នាំ២០២១នេះ ក្រុមកាងារបានទទួលសំណុំរឿងសរុបចំនួន ៥៤ ករណី ក្នុងនោះបានដោះស្រាយរួចរាល់ចំនួន ២០ករណី។
ប៉ុន្ដែនៅសល់មតិយោបល់ និងសំណូមពរពលរដ្ឋចំនួន ៤៣៨ ករណី ទៀតដែលក្រុមការងារកំពុងដោះស្រាយ ដែលសំណុំរឿងសេសសល់នេះ គឺសរុបតាំងពីចាប់ផ្ដើមបង្កើតក្រុមការងាររហូតមក។
លោក ស ខេង កាលពីថ្ងៃទី១៧ ខែឧសភានេះ បានបង្ហាញរបាយការណ៍បូកសរុបស្ដីពីការទទួលមតិ យោបល់ និងសំណូមពរ របស់ប្រជាពលរដ្ឋលើហ្វេសប៊ុករបស់លោក ដែលលោកបានលើកឡើងពីការ ខំប្រឹងប្រែង និងកិច្ចសហការគ្នាល្អរវាងថ្នាក់ដឹកនាំ និងមន្ត្រីអង្គភាពចំណុះក្រសួងមហាផ្ទៃ ស្ថាប័នពាក់ព័ន្ធនៅថ្នាក់ជាតិ និងថ្នាក់ក្រោមជាតិ ជាមួយក្រុមការងារគេហទំព័រហ្វេសប៊ុករបស់លោក ក្នុងការដោះស្រាយបញ្ហាជូនប្រជាពលរដ្ឋ ទោះជាការបំពេញភារកិច្ចមានការលំបាកក្នុងអំឡុងពេលនៃការរីករាលដាលជំងឺកូវីដ១៩ក៏ដោយ។
លោកបានថ្លែងថា៖«សូមថ្លែងអំណរគុណ បងប្អូនជនរួមជាតិដែលបានលើកមតិយោបល់ និងសំណូមពរ តាមរយៈទំព័រហ្វេសប៊ុករបស់ខ្ញុំដើម្បីរួមគ្នាដោះស្រាយបញ្ហា និងអភិវឌ្ឍន៍សង្គមជាតិ ហើយក៏សូមការយល់យោគអធ្យាស្រ័យចំពោះករណីមួយចំនួនទៀតដែលមិនទាន់បានដោះស្រាយ អាស្រ័យលើករណីខ្លះ ទាមទារពេលវេលា និងធ្វើទៅតាមនីតិវិធី»។
លោក អំ សំអាត នាយករងអង្គការសិទ្ធិមនុស្ស លីកាដូលើកឡើងថា ការបង្កើតឱ្យមានការទទួលបណ្តឹងនិងសំណូមពររបស់ពលរដ្ឋតាមបណ្តាញសង្គមផ្ទាល់ របស់លោក ស ខេង គឺជាការជួយសម្រួលដោយមិនចាំបាច់ឱ្យពលរដ្ឋចំណាយពេលធ្វើដំណើរ និងថវិកាច្រើន ហើយពលរដ្ឋក៏អាចលើកពីបញ្ហាអសកម្ម និងការព្រងើយកន្តើយពីមន្ត្រីមូលដ្ឋានខ្លះផងដែរ។
លោកបញ្ជាក់ថា៖«តាមលទ្ធផលនេះឃើញថា ក្រុមការងាររបស់សម្តេចក្រឡាហោម ស ខេង បាននិងកំពុងដោះស្រាយនិងឆ្លើយតបបណ្តឹងនិងសំណូមពរ របស់ពលរដ្ឋបានមួយចំនួន។ ប៉ុន្តែបញ្ហាជាច្រើន ក៏មិនទាន់អាចដោះស្រាយនិងឆ្លើយតបបានដែរ ទាក់ទងករណីធំៗ ដូចជាករណីទំនាស់ដីធ្លី តាមបណ្តាខេត្តនិងរាជធានី»៕
