.jpg)
ក្រុមការងារអន្តរក្រសួងនៅពេលចុះពិនិត្យដីមានវិវាទនៅខេត្តមណ្ឌលគិរី។ រូបថត ក្រសួងបរិស្ថាន
មណ្ឌលគិរីៈ ក្រុមការងារអន្តរក្រសួងកំពុងរៀបចំរបាយការណ៍ដាក់ទៅថ្នាក់ដឹកនាំរាជរដ្ឋាភិបាលសម្រេច បន្ទាប់ពីបានបញ្ចប់ការចុះសិក្សាស្រាវជ្រាវ លើករណីកាប់រានទន្ទ្រានកាន់កាប់ដីព្រៃខុសច្បាប់ក្នុងខេត្តមណ្ឌលគិរី កាលពីចុងសប្តាហ៍មុន ខណៈសង្គមស៊ីវិលចង់ឱ្យមានការអនុវត្តច្បាប់តឹងរ៉ឹងចំពោះមន្ដ្រីមានអំណាចដែលពាក់ព័ន្ធលើករណីនេះ។
នេះបើយោងតាមលោក នេត្រ ភក្ត្រា រដ្ឋលេខាធិការក្រសួងបរិស្ថាន និងជាអនុប្រធាន «ក្រុមការងារអន្តរក្រសួង ដើម្បីចុះសិក្សាស្រាវជ្រាវ លើករណីកាប់រាន ទន្ទ្រានកាន់កាប់ដីព្រៃខុសច្បាប់ក្នុងតំបន់ការពារធម្មជាតិក្នុងខេត្តមណ្ឌលគិរី» បានថ្លែងប្រាប់ភ្នំពេញប៉ុស្ដិ៍កាលពីម្សិលមិញ។
លោក ភក្ត្រា ថ្លែងថា៖ «ក្រុមការងារអន្តរក្រសួងបានបញ្ចប់បេសកកម្មរបស់ខ្លួននៅលើទឹកដីខេត្តមណ្ឌលគិរីហើយនៅត្រឹមថ្ងៃទី ៣១ ខែកក្កដាកន្លងទៅនេះ។ ក្រុមការងារបានធ្វើការស៊ើបអង្កេត ក៏ដូចជាស្រាវជ្រាវលើឯកសារពាក់ព័ន្ធមួយចំនួន និងចុះទៅត្រួតពិនិត្យនៅតំបន់មួយចំនួន ដែលមានការជាប់ពាក់ព័ន្ធ»។
លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកាលពីថ្ងៃទី ២២ ខែកក្កដាបានចេញសេចក្តីសម្រេចស្តីពី «ការបង្កើតក្រុមការងារអន្តរក្រសួង ដើម្បីចុះសិក្សាស្រាវជ្រាវលើករណីការកាប់រាន ទន្ទ្រានកាន់កាប់ដីព្រៃខុសច្បាប់ក្នុងតំបន់ការពារធម្មជាតិក្នុងខេត្តមណ្ឌលគិរី»។ សេចក្ដីសម្រេចបង្កើតក្រុមការងារ អន្តរក្រសួងនេះលោក ស ខេង បានយោងតាមចំណាររបស់លោកនាយករដ្ឋមន្ដ្រី ហ៊ុន សែន ចុះកាលពីថ្ងៃទី ៨ កក្កដា ២០២០។
តាមរយៈសេចក្ដីសម្រេចនេះលោក ស ខេង បញ្ជាក់ថា ក្រុមការងារនេះមានតួនាទី ភារកិច្ចចុះសិក្សាស្រាវជ្រាវលើករណីនីមួយៗនៃការកាប់រានទន្ទ្រានកាន់កាប់ដីព្រៃខុសច្បាប់ក្នុងតំបន់ការពារធម្មជាតិស្ថិតក្នុងខេត្តមណ្ឌលគិរី តាមរបាយការណ៍របស់ទីស្តីការគណៈរដ្ឋមន្ត្រីចុះថ្ងៃទី ១២ ខែ មិថុនា ឆ្នាំ ២០២០ ឱ្យបានជាក់ស្តែង និងប្រមូលឯកសារ និងភ័ស្តុតាងនានាពាក់ព័ន្ធជាមួយមន្ត្រី និងអ្នកពាក់ព័ន្ធសកម្មភាពទាំងនោះ។ លោក នេត្រ ភក្ត្រា បញ្ជាក់បន្ថែមថា៖ «បន្ទាប់ទៅនេះ យើងនឹងរៀបចំរបាយការណ៍ ដើម្បីដាក់ជូនទៅថ្នាក់ដឹកនាំរបស់យើងក្នុងការសម្រេច»។
ទាក់ទងនឹងករណីរំលោភយកដីរដ្ឋក្នុងខេត្ដមណ្ឌលគិរីពីសំណាក់អ្នកមានអំណាចនេះលោក សេង សុវណ្ណារ៉ា អតីតអនុរដ្ឋលេខាធិការក្រសួងយុត្តិធម៌ និងបក្ខពួក ៣ នាក់ទៀតត្រូវបានចៅក្រមស៊ើបសួរសាលាដំបូងរាជធានីភ្នំពេញចេញដីកាឃុំខ្លួនជាបណ្តោះអាសន្ន ដោយចោទប្រកាន់ចំនួន ៤ បទល្មើសពាក់ព័ន្ធនឹងករណីរំលោភយកដីរដ្ឋប្រមាណ ១ ០០០ ហិកតានៅខេត្តមណ្ឌលគិរី ក្រោយបញ្ចប់ការសាកសួរ ដោយតំណាងអយ្យការកាលពីថ្ងៃទី ២៧ ខែមិថុនា ឆ្នាំ ២០២០។
លោក អ៊ាង ម៉េងលី មន្ដ្រីសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តមណ្ឌលគិរីបានថ្លែងថា កន្លងមកគណៈរដ្ឋមន្ដ្រីបានបង្ហាញឈ្មោះមន្ដ្រីដែលពាក់ព័ន្ធលើករណីរំលោភបំពានយកដីរដ្ឋនេះទៅក្រសួងមហាផ្ទៃរួចហើយ ដូច្នេះក្រុមការងារអន្តរក្រសួង និងថ្នាក់ដឹកនាំរដ្ឋាភិបាលត្រូវតែមានការអនុវត្ដច្បាប់ ចំពោះមន្ដ្រីពាក់ព័ន្ធទាំងនោះ ដើម្បីឱ្យមានប្រសិទ្ធភាព ចៀសវាងការរំលោភបំពានដីរដ្ឋបែបនេះបន្តកើតឡើងទៀត។
លោកថ្លែងថា៖ «ការអនុវត្ដច្បាប់ត្រូវតែធ្វើទៅឱ្យមានប្រសិទ្ធភាព ដើម្បីការពារដីរដ្ឋ។ ខ្ញុំជំរុញឱ្យថ្នាក់ដឹកនាំរដ្ឋាភិបាលអនុវត្ដច្បាប់បែបនេះ។ បើការអនុវត្ដច្បាប់មានការខ្វះចន្លោះ ហើយមិនអនុវត្ដចំពោះបុគ្គល ឬក៏បក្ខពួកនិយមដែលជាមន្ដ្រីខិលខូចនោះ វាជារូបភាពមួយដែលអាក្រក់បំផុត»។
លោក គ្រើង តុលា សកម្មជនការពារព្រៃឈើក្នុងខេត្តមណ្ឌលគិរីបានជំរុញឱ្យក្រុមការងារអន្តរក្រសួងថ្នាក់ជាតិដែលចុះទៅស្រាវជ្រាវ ករណីកាប់រាន ទន្ទ្រានយកដីព្រៃរបស់រដ្ឋនេះធ្វើឱ្យបានស៊ីជម្រៅថែមទៀត ព្រោះលោកសង្កេតឃើញថា ក្នុងខេត្ដនេះការរំលោភយកដីរដ្ឋជាលក្ខណៈទ្រង់ទ្រាយធំ គឺកើតឡើងដោយអ្នកមានអំណាច។ លោកថ្លែងថា៖ «មានតែមន្ដ្រីជំនាញនេះទេ ដែលពួកគាត់អាចដឹងថា ដីនៅចំណុចណាខ្លះដែលរងផលប៉ះពាល់។ ចំណែកពលរដ្ឋ គឺរំពឹងលើមន្ដ្រីជាអ្នកអនុវត្ដច្បាប់»៕
