មណ្ឌលគិរីៈ ក្រុមការងារអន្តរក្រសួងសរុបប្រមាណ ៥៥០ នាក់ នឹងចុះទៅអនុវត្ដផែនការចុះបញ្ជីដីធ្លី និងដោះស្រាយបញ្ហាវិវាទដីធ្លី ដើម្បីគាំទ្រដល់ការរៀបចំផែនការប្រើប្រាស់ដីក្នុងភូមិសាស្ដ្រខេត្ដមណ្ឌលគិរី។ នេះបើយោងតាមសេចក្ដីប្រកាសព័ត៌មានរបស់ក្រសួងរៀបចំដែនដីនគរូបនីយកម្ម និងសំណង់កាលពីថ្ងៃទី ២៨ ខែកក្កដា។
សេចក្តីប្រកាសនេះបានធ្វើឡើង ក្រោយពីបញ្ចប់កិច្ចប្រជុំស្ដីអំពីការផ្សព្វផ្សាយ និងអនុវត្តផែនការចុះបញ្ជីដីធ្លី ការដោះស្រាយវិវាទដីធ្លី និងគាំទ្រការរៀបចំផែនការប្រើប្រាស់ដីនៅខេត្តមណ្ឌលគិរី។ កិច្ចប្រជុំដែលធ្វើឡើងនៅខេត្តមណ្ឌលគិរីនេះ ដឹកនាំដោយលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងចូលរួមដោយលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក សាយ សំអាល់ រដ្ឋមន្ត្រីក្រសួងបរិស្ថាន និងលោក ស្វាយ សំអ៊ាង អភិបាលខេត្តមណ្ឌលគិរីរួមនឹងក្រុមការងារអន្តរក្រសួងសរុបប្រមាណ ៥៥០ នាក់ទៀត។
សេចក្ដីប្រកាសព័ត៌មានស្ដីពីកិច្ចប្រជុំអន្តរក្រសួងនេះបញ្ជាក់ថា៖ «ក្រុមការងារអន្តរក្រសួងសរុបប្រមាណ ៥៥០ នាក់ក្នុងនោះក្រុមការងារវាស់វែងរបស់ក្រសួងរៀបចំដែនដីប្រមាណ ៣០០ នាក់ក្រុមការងារក្រសួងកសិកម្ម ៥០ នាក់ និងក្រុមការងារក្រសួងបរិស្ថានប្រមាណ ២០០ នាក់»។
សេចក្ដីប្រកាសដដែលថា ក្រុមការងារនឹងប្រើប្រាស់ ឧបករណ៍វាស់វែងដីធ្លី T 300 Plus GNSS ដែលមានភាពជាក់លាក់ខ្ពស់ក្នុងការវាស់វែងតាមរយៈការចាប់យកទិន្នន័យពីផ្កាយរណប។ ក្រុមការងាររបស់ក្រសួងរៀបចំដែនដីនឹងធ្វើការវាស់វែង និងចុះបញ្ជីដីរដ្ឋដែលនៅសេសសល់តាមការចង្អុលបង្ហាញព្រំដីរបស់ក្រសួងកសិកម្ម និងក្រសួងបរិស្ថានដែលជាអាជ្ញាធរកាន់កាប់ដីរដ្ឋ។
សេចក្ដីប្រកាសព័ត៌មាននេះថា៖ «ក្រុមការងារនឹងវាស់វែង និងប្រមូលទិន្នន័យដី ដែលប្រជាពលរដ្ឋកាន់កាប់ជាក់ស្ដែងក្នុងទីតាំងដីរដ្ឋចុះបញ្ជីដីប្រជាពលរដ្ឋដែលកាន់កាប់ និងអាស្រ័យផលយូរមកហើយ ដែលនៅសេសសល់តាមភូមិ និងដីសហគមន៍ជនជាតិដើមភាគតិច ព្រមទាំងដោះស្រាយវិវាទដីធ្លី និងគាំទ្រការរៀបចំផែនការប្រើប្រាស់ដីក្នុងខេត្តនេះ»។
លោក សេង ឡូត និងលោក ឡោ ដាវុធ អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់មិនអាចសុំការបញ្ជាក់បន្ថែមជុំវិញកិច្ចប្រជុំខាងលើនេះបានទេកាលពីថ្ងៃទី ២៨ ខែកក្កដាដោយសារទូរស័ព្ទរបស់លោកទាំង ២ គ្មានអ្នកទទួល។
ប៉ុន្ដែលោក ជាក់ ម៉េងហ៊ាង អភិបាលរង និងជាអ្នកនាំពាក្យរដ្ឋបាលសាលាខេត្ដមណ្ឌលគិរីបានថ្លែងថា កិច្ចប្រជុំដែលបានដឹកនាំដោយលោក ជា សុផារ៉ា បានដាក់ចេញនូវយន្តការមួយចំនួនដូចជាចុះអនុវត្ដការចុះបញ្ជីដីធ្លីជូនប្រជាពលរដ្ឋ ចុះបញ្ជីដីរបស់រដ្ឋកំណត់ផែនការរៀបចំដីក្នុងខេត្ដមណ្ឌលគិរី និងដោះស្រាយបញ្ហាវិវាទដីធ្លីជាដើម។
លោកថ្លែងថា៖ «តាមផែនការដែលបានដាក់ចេញរបស់ឯកឧត្តមឧបនាយករដ្ឋមន្ដ្រី ជា សុផារ៉ា គឺឱ្យអនុវត្ដការងារនេះចាប់ពីថ្ងៃទី ២៩ ខែកក្កដាទៅតែម្ដង និងប្រើរយៈពេល ១៨ ថ្ងៃដើម្បីចុះស្រង់ទិន្នន័យ និងកំណត់អត្តសញ្ញាណពលរដ្ឋរស់នៅជាក់លាក់ឱ្យបានចប់រួចរាល់តាមផែនការកំណត់»។
លោក ម៉េងហ៊ាង បានឱ្យដឹងថា ការងារនេះក្រុមការងារអន្តរក្រសួងថ្នាក់ជាតិសហការជាមួយអាជ្ញាធរដែនដីនៅមូលដ្ឋាននឹងចុះស្រង់ទិន្នន័យ កំណត់អត្តសញ្ញាណប្រជាពលរដ្ឋទើបយកលទ្ធផលប្រគល់ទៅក្រុមការងារថ្នាក់ជាតិជាអ្នកសម្រេចលើការកំណត់ចំពោះការបែងចែកដីធ្លី ឬដោះស្រាយបញ្ហាយ៉ាងណា។
ក្រោយកិច្ចប្រជុំកាលពីថ្ងៃទី ២៨ ខែកក្កដា លោក វេង សាខុន រដ្ឋមន្ត្រីក្រសួងកសិកម្មបានបង្ហាញរបាយការណ៍លើហ្វេសប៊ុករបស់ក្រសួងថា កិច្ចប្រជុំអន្តរក្រសួងនេះបានពិភាក្សាស្វែងរកយន្តការដោះស្រាយឲ្យបានច្បាស់លាស់ត្រឹមត្រូវពិតប្រាកដសមស្របតាមនីតិវិធីច្បាប់ និងនីតិវិធីរដ្ឋបាលក្នុងការគ្រប់គ្រង និងចុះបញ្ជីដីរដ្ឋ ដីឯកជនរបស់ប្រជាពលរដ្ឋ និងដីសហគមន៍ជនជាតិដើមភាគតិចជាដើម។
លោកបានថ្លែងថា៖ «តាមការសិក្សាស្រាវជ្រាវជាបន្តបន្ទាប់របស់រដ្ឋបាលព្រៃឈើបង្ហាញថា ការទន្ទ្រានកាន់កាប់ដីព្រៃឈើនៅតែបន្តកើតមានក្រោមហេតុផលកង្វះដីបង្កបង្កើនផល និងពង្រីកលំនៅឋានជាដើម។ កត្តាទាំងនេះ បានជះឥទ្ធិពលដល់ដីព្រៃឈើរបស់រដ្ឋ ហើយបង្កើតចលនានៃការរំលោភដីព្រៃឈើ»។
លោក សាខុន បានបន្ថែមថា ចលនានៃការរំលោភដីព្រៃឈើនេះកើតឡើងតាមរូបភាពដូចជា អ្នកខ្វះខាតដីពិតប្រាកដបានកាប់រានដីព្រៃឈើ អ្នកកាប់រានដីព្រៃឈើហើយលក់រួចកាប់រានបន្តទៀត ការបញ្ជាក់លើលិខិតទិញ-លក់ដីព្រៃឈើ និងការឃុបឃិតគ្នាកាប់រាន និងហ៊ុមព័ទ្ធដីព្រៃឈើជាដើម។
លោក អ៊ាង ម៉េងលី មន្ត្រីសម្របសម្រួលអង្គការសមាគមអាដហុកប្រចាំខេត្តមណ្ឌលគិរីបានឲ្យដឹងថា វិវាទដីធ្លីក្នុងខេត្ដភាគច្រើនបង្កឡើងដោយក្រុមហ៊ុនធំៗដែលទទួលបានសិទ្ធិវិនិយោគ និងក្រុមមន្ត្រីមានអំណាច ដោយមានការសហការគ្នាជាមួយនឹងអាជ្ញាធរមូលដ្ឋាន ទើបអាចមានការចេញលិខិតស្នាមទិញ-លក់ដីធ្លីរបស់រដ្ឋបាន។
លោកបញ្ជាក់ថា៖ «ការអនុវត្ដច្បាប់ត្រូវតែអនុវត្ដចំពោះបុគ្គល ឬអាជ្ញាធរដែលឃុបឃិតគ្នានោះ ត្រូវតែអនុវត្ដច្បាប់។ កុំឱ្យមានការរើសអើង។ បើសិនជាមានការរើសអើងបែបនេះ គឺបញ្ជាក់ថាប្រទេសយើងត្រូវតែសង្កត់ធ្ងន់មកលើបញ្ហាមន្ដ្រីខូចខិលនេះ»។
បើតាមលោក ម៉េងលី នៅក្នុងខេត្ដមណ្ឌលគិរី «យើងឃើញមានច្រើនទាក់ទងទៅនឹងការចេញលិខិតស្នាមទិញ-លក់ដីធ្លីរបស់រដ្ឋនេះ»៕