.jpg)
ក្រុមជនសង្ស័យ និងវត្ថុតាង ដែលសមត្ថកិច្ចចាប់បានកាលពីពេលថ្មីៗនេះ។ រូបថត នគរបាល
ភ្នំពេញៈ ជនសង្ស័យជាក្រុមចោរប្លន់ និងជួញដូរគ្រឿងញៀនចំនួន ៦ នាក់ ត្រូវបញ្ជូនទៅសាលាដំបូងរាជធានីភ្នំពេញនៅថ្ងៃនេះ បន្ទាប់ពីសមត្ថកិច្ចនៃនាយកដ្ឋាននគរបាលព្រហ្មទណ្ឌឃាត់ខ្លួនបានកាលពីថ្ងៃទី ២៩ ឧសភា នៅភូមិកណ្តាល ១ សង្កាត់ច្បារអំពៅ ២ ខណ្ឌច្បារអំពៅ រាជធានីភ្នំពេញ។
លោក ហេង សុភា នាយការិយាល័យព្រហ្មទណ្ឌកម្រិតធ្ងន់ប្រាប់ពីម្សិលមិញថា ករណីជនសង្ស័យចំនួន ៦ នាក់ ដែលមានឈ្មោះ ភាង ភ័ណ្ឌ អាយុ ៤៦ ឆ្នាំ ហុក ណារិន អាយុ ២៩ ឆ្នាំ ហ៊ាន ប្រិមប្រិយ អាយុ ១៨ ឆ្នាំ ហ៊ុយ សុខា អាយុ ៦៣ ឆ្នាំ ជា រ៉ាន់ អាយុ ៤៥ ឆ្នាំ និង ឈ្មោះ ទឹក សាអ៊ុ អាយុ ៥២ ឆ្នាំ ត្រូវសមត្ថកិច្ចបញ្ជូនទៅសាលាដំបូងរាជធានីភ្នំពេញនៅថ្ងៃទី ១ មិថុនា នេះហើយ។
លោកប្រាប់ថា៖ «ក្រុមជនសង្ស័យទាំង ៦ នាក់ ថ្ងៃស្អែកនេះសមត្ថកិច្ចរបស់ខ្ញុំនឹងបញ្ជូនទៅតុលាការហើយ។ ពួកគេជាប់ពាក់ព័ន្ធនឹងថ្នាំញៀនម៉ាទឹកកកចំនួនជាង ៤ ខាំទៀត»។
ពាក់ព័ន្ធនឹងការចាប់ខ្លួននេះដែរ លោក មុំ ចេក ប្រធានការិយាល័យរដ្ឋបាលនៃនាយកដ្ឋានព្រហ្មទណ្ឌក្រសួងមហាផ្ទៃឲ្យដឹងពីម្សិលមិញដែរថា ក្រុមជនសង្ស័យទាំងនេះត្រូវបានសមត្ថកិច្ចនៃនាយកដ្ឋានព្រហ្មទណ្ឌបង្ក្រាបបានកាលពីថ្ងៃទី ២៩ ឧសភា។ បន្ទាប់មកសមត្ថកិច្ចនាយកដ្ឋានបានប្រគល់ទៅឲ្យស្នងការដ្ឋាននគរបាលរាជធានីភ្នំពេញភ្លាមៗក្រោយពីធ្វើកំណត់ហេតុរួចរាល់។
លោកបានថ្លែងថា៖ «ក្រុមជនសង្ស័យទាំង ៦ នាក់ ខាងសមត្ថកិច្ចរបស់ខ្ញុំប្រគល់ទៅឲ្យខាងស្នងការដ្ឋាននគរបាលរាជធានីភ្នំពេញហើយទាំងវត្ថុតាង និងសំណុំរឿង»។
ពាក់ព័ន្ធនឹងប្រតិបត្តិការបង្ក្រាបក្រុមចោរប្លន់នេះដែរ មន្ត្រី ១ រូបនៃនាយកដ្ឋានព្រហ្មទណ្ឌបានប្រាប់ក្នុងលក្ខខណ្ឌមិនឲ្យបញ្ចេញឈ្មោះថា មុនសមត្ថកិច្ចធ្វើប្រតិបត្តិការគឺបក្ខពួកក្រុមចោរប្លន់បានធ្វើសកម្មភាពឆក់កាបូបអ្នកដំណើរកាលពីថ្ងៃទី ១៤ ខែឧសភា។ បន្ទាប់មកសមត្ថកិច្ចកំណត់មុខសញ្ញាបាន និងឈានទៅបង្ក្រាបក្រុមជនសង្ស័យកាលពីថ្ងៃទី ២៩ ខែឧសភា នៅចំណុចផ្ទះលេខ 392 ផ្លូវលេខ 367 ភូមិ-សង្កាត់ខាងលើ។
មន្ត្រីដដែលបន្តថា ក្នុងប្រតិបត្តិការនោះសមត្ថកិច្ចប្រើប្រាស់ជំនាញដោយធ្វើការចាប់ខ្លួនក្រុមជនល្មើសបានចំនួន ៦ នាក់ ដែលសុទ្ធតែជាមនុស្សប្រុស។ ក្រោយចាប់ខ្លួន សមត្ថកិច្ចបានឆែកឆេរ និងដកហូតបានវត្ថុតាងរួមមាន អាវុធខ្លីម៉ាក K59 ចំនួន ២ ដើម ម៉ូតូចំនួន ៣ គ្រឿង ទូរស័ព្ទចំនួន ៥ គ្រឿង និងម្សៅក្រាមពណ៌សចំនួន ៥ កញ្ចប់ធំ។
មន្ត្រីរូបនោះបន្តទៀតថា ក្រុមជនល្មើសមិនត្រឹមតែប្រព្រឹត្តបទល្មើសប្លន់ប៉ុណ្ណោះទេ ថែមទាំងប្រព្រឹត្តអំពើជួញដូរគ្រឿងញៀនមានចំនួនច្រើនទៀតផង។ ក្រុមជនសង្ស័យជាប់ពាក់ព័ន្ធនឹងបទល្មើសឧក្រិដ្ឋដល់ទៅ ២ ករណី។ ហេតុនេះពួកគេនឹងប្រឈមចំពោះមុខច្បាប់៕
