.jpg)
ជនសង្ស័យ (៣ នាក់កណ្ដាល) ក្រោយពេលចាប់ខ្លួន។ រូបថត ប៉ូលិស
ភ្នំពេញៈ សមត្ថកិច្ចនៃមន្ទីរប្រឆាំងគ្រឿងញៀនកំពុងរៀបចំសំណុំរឿងបញ្ជូនបុរស ៣ នាក់ ទៅសាលាដំបូងរាជធានីភ្នំពេញនៅថ្ងៃនេះ បន្ទាប់ពីត្រូវបានចាប់ខ្លួនជាមួយគ្រឿងញៀនជាង ១៤ គីឡូក្រាមកាលពីថ្ងៃទី ៧ មករា នៅសង្កាត់ទឹកល្អក់ ៣ ខណ្ឌទួលគោក រាជធានីភ្នំពេញ ខណៈមេខ្លោងនៃបទល្មើសនេះសមត្ថកិច្ចកំពុងស្រាវជ្រាវដើម្បីកំណត់អត្តសញ្ញាណ ។
លោក មាស វីរិទ្ធ អគ្គលេខាធិការនៃអាជ្ញាធរជាតិប្រឆាំងគ្រឿងញៀនប្រាប់កាលពីម្សិលមិញថា បុរសជាជនសង្ស័យនៃការជួញដូរគ្រឿងញៀនទាំងនោះរួមមាន ទី១- ឈ្មោះ ម៉េង ឌី អាយុ ២២ ឆ្នាំ ទី២- ឈ្មោះ ប៊ុនធឿនធានី អាយុ ២៣ ឆ្នាំ និងទី៣- ឈ្មោះ ជា ភារុណ អាយុ ២១ ឆ្នាំ។ ពួកគេកំពុងត្រូវបានសមត្ថកិច្ចកសាងសំណុំរឿងគ្រោងបញ្ជូនទៅសាលាដំបូងរាជធានីភ្នំពេញនៅថ្ងៃទី ៩ មករា ប៉ុន្តែបើបំពេញនីតិវិធីមិនទាន់ទេអាចនៅថ្ងៃទី ១០ មករា។
លោកបន្តថា៖ «បញ្ហានេះដោយសារសមត្ថកិច្ចត្រូវការធ្វើកំណត់ហេតុ និងត្រូវធ្វើការស្រាវជ្រាវស៊ើបអង្កេតឲ្យបានល្អិតល្អន់ ប៉ុន្តែទោះយ៉ាងណាជនសង្ស័យទាំង ៣ នាក់ នឹងត្រូវតែបញ្ជូនទៅសាលាដំបូងរាជធានីភ្នំពេញហើយ ដើម្បីចាត់ការតាមច្បាប់ ពួកគេត្រូវបានចាប់នៅក្នុងក្លិបខារ៉ាអូខេ» ។
ដោយឡែកលោកឧត្តមសេនីយ៍ត្រី អ៊ិន សុង នាយករងមន្ទីរប្រឆាំងគ្រឿងញៀនក្រសួងមហាផ្ទៃទទួលបន្ទុកផ្នែករដ្ឋបាលបានប្រាប់ពីម្សិលមិញដែរថា ពាក់ព័ន្ធនឹងការចាប់ខ្លួនជនសង្ស័យខាងលើគឺសមត្ថកិច្ចបានអនុវត្តតែ ១ ទីតាំងប៉ុណ្ណោះ គឺនៅចំណុចខារ៉ាអូខេផ្ទះលេខ ៥៦ ផ្លូវលេខ ២៣០ សង្កាត់ទឹកល្អក់ ៣ ខណ្ឌទួលគោក រាជធានីភ្នំពេញ។ នៅថ្ងៃនេះ (ថ្ងៃទី ៩ មករា) ជនសង្ស័យទាំង ៣ នាក់នោះ លោកកំពុងរៀបចំសំណុំរឿង ហើយគ្រោងបញ្ជូនទៅតុលាការពេលបំពេញនីតិវិធីចប់ ។
លោកបានបញ្ជាក់ថា៖ «ជនសង្ស័យទាំង ៣ នាក់ ខាងលើគ្រាន់តែជាបណ្តាញរបស់គេ ឯមេខ្លោងគឺសមត្ថកិច្ចកំពុងតាមប្រមាញ់...យើងមិនទាន់បញ្ជូនពួកគេទៅតុលាការ ដោយសារយើងបន្តស្រាវជ្រាវទៀត ព្រោះយើងបានកំណត់អត្តសញ្ញាណមេខ្លោងពួកគេបានហើយ» ។
បើតាមលោក សុង វត្ថុតាងគ្រឿងញៀនដែលសមត្ថកិច្ចរបស់លោករឹបអូសបានរួមមាន សារធាតុញៀនសរុបជាង ១៤ គីឡូក្រាម ក្នុងនោះប្រភេទមេតំហ្វេតាមីន (ICE) ម៉ាទឹកកកទម្ងន់សុទ្ធ ៥ ២២២,៨៣ ក្រាម, នីមេតាហ្សេប៉ាមទម្ងន់ ៨ ៨២៩,៧២ ក្រាម ស្មើនឹង ៤៩ ០៥៤ គ្រាប់ ដែលរបៀបប្រើរបស់វាគឺគេយកទៅផ្សំជាមួយប្រភេទថ្នាំអិចស្តាហ្ស៊ី៕
