កណ្ដាលៈ អយ្យការអមសាលាដំបូងខេត្តកណ្តាលបានចោទនិងបញ្ជូនបុរសសង្ស័យ ៣ នាក់ទៅឃុំខ្លួននៅពន្ធនាគារខេត្តពីម្សិលមិញ ប៉ុន្មានម៉ោងបន្ទាប់ពីសមត្ថកិច្ចបញ្ជូនខ្លួនរឿងលួចបដិមាស្ពាន់ ១១១ អង្គ។
លោក សូ សារិន អ្នកនាំពាក្យនៃសាលាដំបូងខេត្តកណ្តាលបានប្រាប់ភ្នំពេញប៉ុស្តិ៍ពីម្សិលមិញថាជនសង្ស័យទាំងនោះទី១-ឈ្មោះ ឃុន ម៉េងហាក់ អាយុ១៧ ឆ្នាំ ទី២-ឈ្មោះ រុន សុភាព ហៅភើម អាយុ ១៧ ឆ្នាំ និងទី៣-ឈ្មោះ អេង សុភ័ក្រ អាយុ ២៦ ឆ្នាំត្រូវបានតុលាការឃុំខ្លួនល្ងាចមិញ (ថ្ងៃទី ៣១ មីនា)។
លោកថ្លែងថា៖ «ជនទាំង ៣ នាក់ត្រូវចៅក្រមស៊ើបសួរលោក ទី សំណាង ចោទប្រកាន់ហើយបង្គាប់ឲ្យឃុំនៅពន្ធនាគារខេត្តផងដែរ។ចំពោះរូបបដិមាទាំងនោះបើតាមខាងវត្តមិនបញ្ជាក់ពីចំនួនពិតប្រាកដទេ»។
លោក ឡាក់ ម៉េងធី ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្តាលប្រាប់ថា ក្រុមជនសង្ស័យត្រូវបានចាប់ខ្លួនកាលពីថ្ងៃទី ២៩ មីនា បន្ទាប់ពីមានករណីបាត់ពុទ្ធបដិមា កាលពីថ្ងៃ ២៨ ខែ មីនា នៅវត្តព្រែកហូរ ភូមិ បត្តាជី ១ សង្កាត់ព្រែកហូរ ក្រុងតាខ្មៅខេត្តកណ្តាល។ រីឯព្រះពុទ្ធរូបដែលសមត្ថកិច្ចប្រមូលបានវិញមាន ១១១ ព្រះអង្គធ្វើពីស្ពាន់៕