កំពតៈ ក្រុមការងារដែលចាត់តាំងដោយរដ្ឋបាលខេត្តកំពតកំពុងចុះទៅពិនិត្យ និងធ្វើអត្តសញ្ញាណដីនៅឃុំកោះតូច និងឃុំបឹងទូកក្នុងស្រុកទឹកឈូ បន្ទាប់ពីមានប្រជាពលរដ្ឋប្រមាណជាង ១៦០ គ្រួសារ ប្តឹងជំទាស់ទៅនឹងការបិទផ្សាយជាសាធារណៈនូវឯកសារនៃការវិនិច្ឆ័យដីធ្លី ដោយអះអាងថា ពួកគាត់មានដីនៅទីនោះដែរ។
តាមរយៈសេចក្តីជូនដំណឹងនៅថ្ងៃទី ២ ខែមីនា លោក ជាវ តាយ អភិបាលខេត្តកំពតបានចាត់ឲ្យមានក្រុមការងារចំនួន ៣ ចុះពិនិត្យ និងធ្វើអត្តសញ្ញាណកម្មទីតាំងដីរបស់ប្រជាពលរដ្ឋ ដែលបានដាក់ពាក្យប្តឹងជំទាស់ ចាប់ពីថ្ងៃទី ៣ ដល់ថ្ងៃទី ១៩ ខែ មីនា ឆ្នាំ ២០២១។
សេចក្តីជូនដំណឹងបញ្ជាក់ថា៖ «ក្នុងករណីដែលបងប្អូនប្រជាពលរដ្ឋមិនបានចូលរួមតាមកាលបរិច្ឆេទនេះទេ រដ្ឋបាលខេត្តនឹងមិនទទួលខុសត្រូវលើការបាត់បង់ផលប្រយោជន៍ និងសុំធ្វើការប្រកាសបដិសេធមិនទទួលស្គាល់ទីតាំងរបស់បងប្អូនប្រជាពលរដ្ឋឡើយ»។
លោក ឡេង វិបុល ប្រធានក្រុមទី១ ទទួលបន្ទុកក្បាលដីក្នុងភូមិព្រែកចេក និងភូមិគីឡូ ១២ ឃុំកោះតូច បានឲ្យដឹងថា មានពលរដ្ឋចំនួន ៩១ គ្រួសារ ប្តឹងជំទាស់ ការបិទផ្សាយជាសាធារណៈនូវឯកសារនៃការវិនិច្ឆ័យដីធ្លីដែលក្នុងនោះនៅភូមិព្រែកចេកមាន ៥០ គ្រួសារ និងភូមិគីឡូ ១២ មានចំនួន ៤១ គ្រួសារ។ លោក វិបុល ប្រាប់ថា ក្រុមការងារកំពុងធ្វើការជាមួយប្រជាពលរដ្ឋមិនទាន់មានលទ្ធផលនៅឡើយទេ។
លោកបញ្ជាក់ថា៖ «តាមការចុះពិនិត្យជាក់ស្តែងនៅថ្ងៃនេះ (៣ មីនា) ជារួម មិនទាន់ឃើញមានចម្ការដំណាំអីជារបស់ប្រជាពលរដ្ឋទេ ហើយជុំវិញកិច្ចការនេះ ក្រុមការងារកំពុងតែបន្តអនុវត្តនីតិវិធី ដែលរដ្ឋបាលខេត្តប្រគល់ជូន។ យើងកំពុងតែធ្វើការងារជាមួយប្រជាពលរដ្ឋ អ៊ីចឹងខ្ញុំអត់អាចបរិយាយបែបណាបានទេ»។
ចំណែកលោក អ៊ុក ចាន់ឌីណា ប្រធានក្រុមទី ២ ទទួលបន្ទុកក្បាលដីក្នុងភូមិរលួស និងភូមិកែបថ្មី ឃុំបឹងទូក ថ្លែងថា មានពលរដ្ឋ ២៤ គ្រួសារបានប្តឹងជំទាស់ការបិទផ្សាយជាសាធារណៈនូវឯកសារនៃការវិនិច្ឆ័យដីធ្លីក្នុងនោះ ភូមិរលួសមាន ១០ គ្រួសារ និងភូមិកែបថ្មីមាន ១៤ គ្រួសារ។
លោក ចាន់ឌីណា បញ្ជាក់ថា នៅថ្ងៃដំបូងនៃការចុះពិនិត្យផ្ទៀងផ្ទាត់ជាមួយប្រជាពលរដ្ឋជាក់ស្តែងមានប្រជាពលរដ្ឋចំនួន ១០ គ្រួសារ មកចូលរួមក្នុងនោះក្រុមការងាររកឃើញថា មិនមានអ្នកពាក់ព័ន្ធក្នុងការបិទផ្សាយនោះទេ។
លោកបញ្ជាក់ថា៖ «យើងមិនទាន់ពិនិត្យអស់ទេ ដោយសារតែអ្នកមួយចំនួនមិនទាន់បានដឹង និងមកចូលរួម។ ប៉ុន្តែក្រុមការងារនឹងធ្វើការបន្តបន្ទាប់ទៀត រហូតដល់ថ្ងៃ ១៩ មីនាបានចប់។ ថ្ងៃនេះ (៣ មីនា) តាមការពិនិត្យជាមួយពលរដ្ឋឃើញថាដីគាត់ គ្រាន់តែនៅក្បែរៗហ្នឹងមិនមានពាក់ព័ន្ធក្នុងដីបរិស្ថាននោះទេ»។
លោក អ៊ឹម ប៉ុណ្ណា ប្រធានក្រុមទី ៣ ទទួលបន្ទុកក្បាលដី ក្នុងភូមិទទឹងថ្ងៃ ឃុំបឹងទូក ថ្លែងថា ក្នុងភូមិទទឹងថ្ងៃមានពលរដ្ឋ ៥០ គ្រួសារ ប្តឹងជំទាស់ការបិទផ្សាយជាសាធារណៈនូវឯកសារនៃការវិនិច្ឆ័យដីធ្លី។ តាមការពិនិត្យជាក់ស្តែង ពលរដ្ឋភាគច្រើនដែលប្តឹងមួយចំនួនធំ មិនមានការពាក់ព័ន្ធនឹងការបិទផ្សាយដែលចេញបណ្ណទៅក្រសួងបរិស្ថាននោះទេ។
លោកថ្លែងថា៖ «ពួកគាត់នៅក្រៅតំបន់ហ្នឹង ប៉ុន្តែគាត់បារម្ភ អ៊ីចឹងគាត់ក៏ធ្វើពាក្យប្តឹង គាត់ផ្តិតមេដៃតវ៉ាអ៊ីចឹងទៅ តែពេលយើងចុះពិនិត្យទៅឃើញមិនមានការពាក់ព័ន្ធ អ៊ីចឹងក៏ជម្រាបថា ដីរបស់ពូមីងមិនពាក់ព័ន្ធជាមួយការស្នើសុំចុះបញ្ជីហ្នឹងទេអីចឹងទេឲ្យគាត់ត្រឡប់ទៅវិញទៅ»។
លោក សេង អាន ប្រជាពលរដ្ឋនៅភូមិរលួស ឃុំបឹងទូក ថ្លែងថាការដាក់ពាក្យប្តឹងជំទាស់ការបិទផ្សាយនេះដោយសារតែលោកមានដីចម្ការស្វាយចន្ទីនៅទីនោះ។ លោកបញ្ជាក់ថា៖ «ខ្ញុំមានដីនៅទីនោះតែ ២ ហិកតាទេ ហើយបានអាស្រ័យផលយូរឆ្នាំដែរហើយតាំងពីឆ្នាំ ១៩៩២ មក»។
លោក យន់ ផល្លី អ្នកសម្របសម្រួលសមាគមអាដហុកប្រចាំខេត្តកំពតថ្លែងថា លោកមិនទាន់បានទទួលព័ត៌មាននេះទេ។
លោកបន្តថា៖ «ខ្ញុំនឹងធ្វើការស្រាវជ្រាវករណីហ្នឹង ព្រោះពេលនេះខ្ញុំអត់ទាន់ទទួលបានព័ត៌មានហ្នឹងដែរ។ ប៉ុន្តែដីនៅទីនោះបើសិនស្ថិតនៅលើថ្នល់រទេះភ្លើងគឺវាស្ថិតនៅក្នុងដីគម្របព្រៃឈើ»៕