.jpg)
ក្រុមការងារ មូលនិធិកម្ពុជាប្រឆាំងកូវីដ ១៩ ចុះចែកអំណោយជូនប្រជាពលរដ្ឋនៅខណ្ឌសែនសុខ កាលពីថ្ងៃទី ០២ ខែ ឧសភា។ រូបថត ហ្វេសប៊ុក
ភ្នំពេញ៖ ក្រុមតេឡេក្រាមឈ្មោះ កម្ពុជាប្រឆាំងកូវីដ ១៩ បានប្រមូលផ្ដុំគ្នាដោយស្ម័គ្រចិត្តធ្វើសកម្មភាពមនុស្សធម៌សម្រាប់ចូលរួមចំណែកជាមួយរាជរដ្ឋាភិបាលក្នុងសកម្មភាពផ្គត់ផ្គង់ស្បៀងអាហារ និងសម្ភារការពារ ការចម្លងមេរោគកូវីដ ១៩ ដែលប្រជាពលរដ្ឋក្រីក្រមួយចំនួនកំពុងតែប្រឈមនូវភាពខ្វះខាត។
នៅថ្ងៃទី ១១ ខែឧសភា ក្រុមនេះបានបន្តសកម្មភាពចែកស្បឿងទៅដល់ប្រជាពលរដ្ឋចំនួន ១ ២៥០ គ្រួសារ ដូចជាអង្ករម្នាក់ ២៥ គីឡូ រួមទាំង មី ត្រីខ ស្ករ ទឹកត្រី ទឹកស៊ីអ៊ីវ ប្រេងឆា និងបញ្ចប់ថ្នាំព្យាបាលបឋមនៅតំបន់មួយចំនួនក្នុងខណ្ឌច្បារអំពៅ ខណ្ឌ ៧ មករា ខណ្ឌឫស្សីកែវ ខណ្ឌសែនសុខ និងខណ្ឌទួលគោក។
លោក ហោ សេរីវឌ្ឍន៍ ប្រធានមូលនិធិ និងជាប្រធានក្រុមនេះ បានថ្លែងឱ្យដឹងថា៖ «ខ្ញុំនឹងរៀបចំចុះចែកអំណោយសប្បុរសជន (នៅថ្ងៃ ១១ ខែឧសភា) មូលនិធិយើងខ្ញុំសម្របសម្រួលជាមួយអាជ្ញាធរខណ្ឌ ដើម្បីចែកជូនប្រជាពលរដ្ឋ»។
ចាប់តាំងពីឆ្នាំ ២០២០ មក ក្រុមតេឡេក្រាម AntiCovid19Cambodia បានធ្វើសកម្មភាពសប្បុរសធម៌ខ្លះដូចជា ផលិតជារបាំងសុវត្ថិភាពមួយចំនួនផ្ដល់ជូនអ្នកមកទទួលវ៉ាក់សាំង ក្រុមគ្រូពេទ្យចាក់វ៉ាក់សាំង និងកងរាជអាវុធហត្ថរាជធានីភ្នំពេញ និងសម្ភារមួយចំនួនផ្សេងទៀត ផ្ដល់ទៅដល់មន្ទីរពេទ្យរដ្ឋដូចជា ស្រោមដៃចំនួន ៥ ពាន់គូ បង់បិទមុខរបួសចំនួន ១ ម៉ឺនបន្ទះ ម៉ាស់ សាប៊ូ។
ក្រុមតេឡេក្រាមនេះ គឺជាក្រុមមួយដែលត្រូវបានបង្កើតឡើងក្នុងអំឡុងខែ មេសា ឆ្នាំ ២០២១ ដើម្បីធ្វើសកម្មភាពមនុស្សធម៌ផ្សេងៗ ក្នុងការចូលរួមជាមួយរាជរដ្ឋាភិបាលប្រយុទ្ធប្រឆាំងនឹងការរីករាលដាលនៃជំងឺកូវីដ ១៩ ដែលកើតចេញពីព្រឹត្តិការណ៍សហគមន៍ ២០ កុម្ភៈ។
រហូតមកដល់ពេលនេះ មូលនិធិកម្ពុជាប្រឆាំងកូវីដ ១៩ បានទទួលជំនួយពីសប្បុរសជនមកពីគ្រប់ទិសទី ដែលមានដូចជាប្រជាពលរដ្ឋ ក្រុមហ៊ុនឯកជន និងសមាគម អង្គការផ្សេងៗ ដើម្បីរៀបចំជាសម្ភារ គ្រឿងឧបភោគបរិភោគសម្រាប់ផ្តល់ជូនពលរដ្ឋខ្វះខាតក៏ដូចជាផ្តល់ជូនជាសម្ភារចាំបាច់ជូនដល់កម្លាំងសមត្ថកិច្ច និងក្រុមគ្រូពេទ្យជួរមុខក្នុងការប្រយុទ្ធប្រឆាំងនឹងជំងឺកូវីដ ១៩៕
