ភ្នំពេញៈ ទន្តបណ្ឌិត ទន្តពេទ្យ និងក្រុមនិស្សិតពេទ្យធ្មេញជិត ២០០ នាក់តំណាងឱ្យ ១០៤០ នាក់កាលពីម្សិលមិញបានដាក់ញត្តិទៅលោកនាយករដ្ឋមន្ត្រីដើម្បីសុំធ្វើវិសោធនកម្មមាត្រាមួយនៃច្បាប់ស្តីពីការគ្រប់គ្រងអ្នកប្រកបវិជ្ជាជីវៈសុខាភិបាលដែលច្បាប់នេះអនុញ្ញាតឱ្យទន្តគិលានុបដ្ឋាក (ជំនួយការពេទ្យធ្មេញរៀនបានបីឆ្នាំ) មានសិទ្ធិបើកបន្ទប់ថែទាំជំងឺមាត់ធ្មេញឯកជនបានដោយពួកគេបារម្ភថានឹងធ្វើឱ្យវិស័យទន្តសាស្ត្រធ្លាក់ចុះ និងប៉ះពាល់សុខភាពមាត់ធ្មេញរបស់ពលរដ្ឋ។
ពួកគេបានប្រមូលផ្តុំនៅទីស្តីការគណៈរដ្ឋមន្ត្រីនៅម៉ោងជាង ៩ ព្រឹកដោយលើកបដា និងបានចម្លងញត្តិដាក់ទៅរដ្ឋសភា និងក្រសួងសុខាភិបាលដើម្បីឱ្យពិនិត្យពីលទ្ធភាពក្នុងការធ្វើវិសោធនកម្មច្បាប់ស្តីពីការគ្រប់គ្រងអ្នកប្រកបវិជ្ជាជីវៈសុខាភិបាល។
ក្នុងញត្តិដែលស្នើទៅលោកនាយករដ្ឋមន្ត្រី ហ៊ុន សែន តាមរយៈទីស្តីការគណៈរដ្ឋមន្ត្រីនោះបានលើកឡើងថា «យើងខ្ញុំទាំងអស់គ្នាយល់ឃើញថាមាត្រា ៤ នៃច្បាប់ស្តីពីការគ្រប់គ្រងអ្នកប្រកបវិជ្ជាជីវៈសុខាភិបាលអនុញ្ញាតឱ្យទន្តគិលានុបដ្ឋាកមានសិទ្ធិបើកបន្ទប់ថែទាំជំងឺមាត់ ធ្មេញ ឯកជននឹងធ្វើឱ្យវិស័យទន្តសាស្ត្រយើងមានឱនភាពដែលផ្ទុយពីទិសដៅរបស់រាជរដ្ឋាភិបាលក្នុងការពង្រឹង និងអភិវឌ្ឍវិស័យសុខាភិបាល»។
«យើងខ្ញុំស្នើដោយទទូចសូមសម្តេចនាយករដ្ឋមន្ត្រីមេត្តាធ្វើវិសោធនកម្មមាត្រា ៤ នៃច្បាប់នេះ»។
ក្នុងញត្តិបន្តថាការអនុញ្ញាតឱ្យទន្តគិលានុបដ្ឋាកបើកបន្ទប់ថែទាំមាត់ធ្មេញបង្ហាញពីភាពអយុត្តិធម៌ដល់និស្សិតទន្តសាស្ត្រទាំងអស់ដែលពួកគាត់ត្រូវឆ្លងកាត់ការប្រឡងប្រកួតប្រជែងថ្នាក់ជាតិជាប់និទ្ទេសល្អរៀនរយៈពេល ៧ ឆ្នាំធ្វើនិក្ខេបបទឱ្យបានជោគជ័យ និងមានចុះឈ្មោះក្នុងគណៈទន្តពេទ្យកម្ពុជាទើបមានសិទិ្ធបើកបន្ទប់ព្យាបាលឯកជនបាន។
ច្បាប់ស្តីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាលត្រូវបានព្រះមហាក្សត្រឡាយព្រះ ហស្តលេខា និងប្រកាសឱ្យប្រើនៅថ្ងៃទី ៣ វិច្ឆិកា ២០១៦ ដែលមាន ៩ ជំពូក និង ៣៥ មាត្រា។ ក្នុងមាត្រា ៤ ចែងថាអ្នកវិជ្ជាជីវៈសុខាភិបាលសំដៅដល់គ្រូពេទ្យ ទន្តពេទ្យ ឆ្មប គិលានុបដ្ឋាក ឱសថការី អ្នកបច្ចេកទេសមន្ទីរពិសោធន៍អ្នកព្យាបាលដោយចលនា ទន្តគិលានុបដ្ឋាក អ្នកបច្ចេកទេសវិទ្យាសាស្រ្ត និងអ្នកវិជ្ជាជីវៈសុខាភិបាលផ្សេងទៀតដែលទទួលបានការចុះបញ្ជីជាមួយគណៈវិជ្ជាជីវៈសុខាភិបាលពាក់ព័ន្ធ។
ទន្តបណ្ឌិត និងជាតំណាងឲ្យពេទ្យធ្មេញដែលបានចូលរួមតវ៉ាលោក ទៀង ឆ្នើម យល់ឃើញថាទន្តគិលានុបដ្ឋាកពុំមានបច្ចេកទេស និងជំនាញគ្រប់គ្រាន់ដែលនឹងធ្វើឱ្យប៉ះពាល់សុខភាពមាត់ធ្មេញប្រជាពលរដ្ឋហើយនឹងអាចប៉ះពាល់ដល់កិត្តិយសពួកគាត់ដែលបញ្ចប់ការសិក្សារយៈពេល ៧ ឆ្នាំ។
លោកថា៖ «សព្វថ្ងៃនេះកម្ពុជាមានមុខមាត់ដោយមានប្រជាជនមកពីក្រៅប្រទេសជិះយន្តហោះមកធ្វើធ្មេញនៅស្រុកខ្មែរអ៊ីចឹងការដែលច្បាប់អនុញ្ញាត (ឱ្យទន្តគិលានុបដ្ឋាកបើកបន្ទប់ថែទាំធ្មេញ) ធ្វើឱ្យគេយល់ច្រឡំថាគុណភាពធ្វើធ្មេញនៅស្រុកខ្មែរឥឡវអន់ជាងមុនខ្លាំងម្ល៉េះធ្វើទៅម៉េចចេះតែមានបញ្ហាអត់មានប្រសិទ្ធភាពដែលធ្វើឱ្យគេក៏ដូចជាពលរដ្ឋក្នុងស្រុកបាត់ទំនុកចិត្ត»។
កញ្ញា ស្រី ពិន បញ្ចប់ការសិក្សាផ្នែកពេទ្យធ្មេញរយៈពេល ៧ ឆ្នាំនៅសាកលវិទ្យាល័យវិទ្យាសាស្រ្តសុខាភិបាលបានថ្លែងថាគាត់មិនពេញចិត្តនឹងការអនុញ្ញាតឱ្យអ្នករៀនពេទ្យធ្មេញ ៣ ឆ្នាំទៅបើកបន្ទប់ថែទាំធ្មេញទេដោយបារម្ភថាប៉ះពាល់ពលរដ្ឋដែលទទួលសេវានេះ។
កញ្ញាថា៖ «ពួកគេរៀនទើបបានបីឆ្នាំចំណេះវិជ្ជាអត់ទាន់មានគ្រប់គ្រាន់អ៊ីចឹងពេលបើកទៅគាត់អាចធ្វើអ្វីហួសពីសមត្ថភាពព្រោះផ្នែកធ្មេញក៏អាចធ្វើឱ្យមនុស្សស្លាប់បានដែរអ៊ីចឹងទាក់ទងនឹងជីវិតមនុស្សកាលណាធ្វើធ្មេញធ្វេសប្រហែសធ្វើឱ្យបាត់បង់ជីវិតមនុស្ស»។
កញ្ញាបន្ថែមថាប្រសិនបើរដ្ឋាភិបាលមិនអើពើលើបញ្ហានេះនឹងធ្វើវិស័យទន្តសាស្ត្រធ្លាក់ចុះដូចវិស័យសុខាភិបាលដែរ។
កញ្ញាថា៖ «ទន្តសាស្ត្រនឹងធ្វើឱ្យចុះខ្សោយដូចវេជ្ជសាស្ត្ររាល់ថ្ងៃអ៊ីចឹងដែលប្រជាជនយើងសុខចិត្តយកលុយទៅចំណាយព្យាបាលនៅស្រុកគេវិញ»។
ទីប្រឹក្សាអមទីស្តីការគណៈរដ្ឋមន្ត្រីលោក សេង សាវន ដែលបានចេញមកទទួលញត្តិបានថ្លែងថាលោកនឹងបញ្ជូនញត្តិទាំងនេះទៅមន្ត្រីជំនាញដើម្បីពិនិត្យបន្ទាប់មកនឹងបញ្ជូនទៅនាយករដ្ឋមន្ត្រីដើម្បីសម្រេច។ ចំណែកមន្ត្រីរដ្ឋបាលនៅសភាដែលបានទទួលញត្តិថានឹងដាក់ទៅថ្នាក់លើដើម្បីពិនិត្យ និងជូនដំណឹងពេលក្រោយ។
ដោយឡែកប្រធានសមាគមទន្តពេទ្យកម្ពុជា និងជាទន្តបណ្ឌិតកញ្ញា យ៉ាំ សូលីតា ថ្លែងថាច្បាប់ចាស់មិនអនុញ្ញាតឱ្យទន្តគិលានុបដ្ឋាកបើកបន្ទប់ថែទាំមាត់ធ្មេញបានទេខណៈច្បាប់ថ្មីដែលទើបអនុម័តថ្មីៗនេះបែរជាអនុញ្ញាតទៅវិញ។
កញ្ញាសង្កត់ធ្ងន់ថា៖ «គាត់មិនទាន់មានសមត្ថភាពគ្រប់គ្រាន់ក្នុងការធ្វើរោគវិនិច្ឆ័យទោះជាគាត់ធ្វើតាមដែនកំណត់ដែលក្រសួងកំណត់ឱ្យតែពលរដ្ឋនឹងបាត់បង់ឱកាសយល់ដឹងពីសុខភាពមាត់ធ្មេញគាត់ពិតប្រាកដដោយសារទន្តគិលានុបដ្ឋាកអត់បានរៀនច្បាស់លាស់ពីរឿងស៊ីជម្រៅផ្សេងទៀតឧទាហរណ៍គាត់ចេះថែទាំ និងដកធ្មេញពុកខ្លាំង និងប៉ះធ្មេញ...តែគាត់ធ្វើលើសពីនេះ»។
យ៉ាងណាក៏ដោយ កញ្ញាសង្ឃឹមថា នាយករដ្ឋមន្រ្តី ហ៊ុន សែន និងអន្តរាគមន៍ទៅលើបញ្ហានេះដើម្បីផ្តល់ភាពយុត្តិធម៌ដល់អ្នកផ្សេងដែលបានបញ្ចប់ការសិក្សារយៈពេល ៧ ឆ្នាំ។
ភ្នំពេញប៉ុស្តិ៍មិនអាចសុំការអត្ថាធិប្បាយបន្ថែមពីរដ្ឋមន្ត្រីក្រសួងសុខាភិបាលលោក ម៉ម ប៊ុនហេង ខណៈអះអាងថាជាប់រវល់។ ថ្មីៗនេះក្រុមតំណាងរាស្ត្រគណបក្សសង្គ្រោះជាតិក៏បានអញ្ជើញលោក ម៉ម ប៊ុនហេង តាមរយៈប្រធានរដ្ឋសភាលោក ហេង សំរិន ដើម្បីសាកសួរសំណួរផ្ទាល់មាត់ទាក់ទងវិស័យសុខាភិបាលធ្លាក់ចុះ និងភាពមិនប្រក្រតីមួយចំនួនដែរ៕
