ភ្នំពេញៈ និស្សិត និងពលរដ្ឋមួយក្រុមនឹងធ្វើបាតុកម្មដោយអហិង្សានៅសប្តាហ៍ក្រោយ ដើម្បីទាមទាររកយុត្តិធម៌សង្គម និងសុំឱ្យដោះលែងលោក រ៉ុង ឈុន លោក សួង សុភ័ណ្ឌ និងយុវជន ៣ រូបទៀតដែលត្រូវបានចាប់ខ្លួន ឃុំឃាំងពាក់ព័ន្ធនឹងការថ្លែងរឿងព្រំដែន។ ការតវ៉ានេះនឹងធ្វើឡើងរយៈពេល ៩ ថ្ងៃ នៅទីលានប្រជាធិបតេយ្យក្នុងខណ្ឌឫស្សីកែវ។
លោក មាន ព្រហ្មមុនី អាយុ ៣៥ ឆ្នាំ ជានិស្សិតនៃសាកលវិទ្យាល័យ ឯកជនមួយក្នុងទីក្រុងភ្នំពេញប្រាប់ភ្នំពេញប៉ុស្តិ៍កាលពីថ្ងៃអាទិត្យថា លោក និងយុវជនផ្សេងទៀតរួមគ្នាធ្វើបាតុកម្មដោយអហិង្សាតវ៉ារកយុត្តិធម៌សង្គម និងសិទ្ធិមូលដ្ឋាន និងទាមទារឱ្យអាជ្ញាធរដោះលែងលោក រ៉ុង ឈុន និងមនុស្ស ៤ នាក់ផ្សេងទៀត ដែលត្រូវបានអាជ្ញាធរចាប់ឃុំខ្លួនដោយអយុតិ្តធម៌។ ពួកគេគ្រាន់តែសម្តែងមតិពីព្រំដែន បញ្ចេញមតិទាមទារឱ្យមានសេរីភាពលើការឃុំខ្លួនមួយដែលអយុត្តិធម៌ប៉ុណ្ណោះ។
លោកថ្លែងថា៖ «នេះជាការជូនដំណឹងលើកទី ២ នៃការធ្វើបាតុកម្មរបស់យើងទៅសាលាក្រុងដែលពីមុនយើងគ្រោងធ្វើរយៈពេល ១ ខែពេញ។ ប៉ុន្តែដោយសារប៉ះពាល់ថ្ងៃបុណ្យជាតិទើបយើងធ្វើការសម្រួលមកធ្វើតែ ៩ ថ្ងៃវិញ គឺពីថ្ងៃទី ៧ ដល់ថ្ងៃទី ១៥ ខែកញ្ញា។ យើងបានសម្រេចចិត្តថា យើងមិនបាច់ធ្វើកំណត់ហេតុ លក្ខខណ្ឌ ឬកិច្ចព្រមព្រៀងអីជាមួយនឹងសាលាក្រុងដូចមុនទៀតទេ»។
លោកថា៖ «យើងនៅតែធ្វើ ទោះបីជាអាជ្ញាធរព្រមានចាត់វិធានការយ៉ាងណាក៏ដោយ ដោយសារដើម្បីស្វែងរកយុត្តិធម៌សង្គម និងសិទ្ធិជាមូលដ្ឋានរបស់ប្រជាពលរដ្ឋ»។
មនុស្ស ៥ រូបដែលត្រូវបានឃុំខ្លួន គឺមានលោក រ៉ុង ឈុន ប្រធានសហភាពសហជីពកម្ពុជាលោក សួង សុភ័ណ្ឌ ប្រធានបក្សខ្មែរឈ្នះ យុវតី ឈឿន ដារ៉ាវី យុវជន ហ៊ុន វណ្ណៈ និងយុវតី ស កន្និកា។
លោក មាន ព្រហ្មមុនី បន្ថែមថា ការតវ៉ាទាមទារដោយការសម្តែងមតិ មិនមែនជាការខុសច្បាប់ទេ ដោយសារជាការស្នើឱ្យមានការអនុវត្តច្បាប់ឱ្យបានត្រឹមត្រូវ និងការសម្តែងមតិស្របទៅតាមច្បាប់នៃរដ្ឋធម្មនុញ្ញ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ មិនធ្វើអត្ថាធិប្បាយលម្អិតទេ ដោយប្រាប់ពីម្សិលមិញថា ក្រុមមន្ត្រី និងនិស្សិតកំពុងពិភាក្សាគ្នា។
អ្នកនាំពាក្យក្រសួងយុត្តិធម៌លោក ជិន ម៉ាលីន ថ្លែងថា ការតវ៉ា ការជួបជុំដោយសន្តិវិធី គឺជាសិទ្ធិសេរីភាពរបស់ពលរដ្ឋ។ ប៉ុន្តែដើម្បីទទួលបានការការពារតាមផ្លូវច្បាប់ ត្រូវអនុវត្តទៅតាមនីតិវិធី និងបែបបទដែលមានបញ្ញត្តិនៅក្នុងច្បាប់ដែលមានជាធរមាន។
លោក ស៊ឹង សែនករុណា មន្ត្រីអ្នកនាំពាក្យសមាគមការពារសិទ្ធិមនុស្ស (អាដហុក) ថ្លែងថា ការតវ៉ារបស់ពលរដ្ឋ គឺជាសិទ្ធិសេរីភាពក្នុងសង្គមប្រជាធិបតេយ្យ នៅពេលពួកគេយល់ថា អ្វីដែលកើតឡើងដោយភាពអយុត្តិធម៌។
លោកថ្លែងថា៖ «យើងមានការព្រួយបារម្ភចំពោះការតវ៉ានេះ ព្រោះកន្លងមកការទាមទារតវ៉ាតែងធ្វើឡើងដោយមិនមានភាពរលូនទេ គឺតែងតែមានការបង្ក្រាបពីអាជ្ញាធររបស់រដ្ឋាភិបាល»៕