.jpg)
កិច្ចប្រជុំក្រុមប្រឹក្សាពិគ្រោះ និងផ្ដល់យោបល់ ពីថ្ងៃ ៣០ មិថុនា។ រូបថត ហ្វេសប៊ុក
ភ្នំពេញ៖ ឧត្តមក្រុមប្រឹក្សាពិគ្រោះ និងផ្តល់យោបល់ កាលពីថ្ងៃទី ៣០ មិថុនា បានបើកកិច្ចប្រជុំប្រចាំខែ ដើម្បីវាយតម្លៃប្រសិទ្ធភាពការងារក្នុងរយៈពេល ១ ខែរបស់ខ្លួន ខណៈលោក ចាន់ យ៉េត ប្រធានប្តូរវេនប្រចាំខែមិថុនា មកពីគណបក្សនគរប្រជាធិបតេយ្យបារម្ភពីការមិនសហការរបស់មន្ត្រីថ្នាក់ក្រោមជាតិ បន្ទាប់ពីសមាជិកម្នាក់ក្នុងស្ថាប័ននេះត្រូវបានដកពីតំណែង។
លោក ឈឹម ផលវរុណ ប្រធានលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់ បានប្រាប់ភ្នំពេញប៉ុស្តិ៍ថា កិច្ចប្រជុំដែលធ្វើឡើងនៅទីស្តីការគណៈរដ្ឋមន្ត្រីនេះ គឺដើម្បីពិនិត្យពីសកម្មភាពរបស់សមាជិកឧត្តមក្រុមប្រឹក្សានីមួយៗ បន្ទាប់ពីបានចុះបំពេញការងាររបស់ខ្លួនក្នុងរយៈពេល ១ ខែ។ លោកបន្តថា ក្នុងកិច្ចប្រជុំនោះ ក៏មានការផ្ទៀងផ្ទាត់របាយការណ៍ថវិកាប្រចាំខែ និងគុណសម្បត្តិ គុណវិបត្តិរបស់ឧត្តមក្រុមប្រឹក្សាផងដែរ។
លោកបញ្ជាក់ថា៖ «លទ្ធផល គឺសម្រេចបានទៅតាមការយល់ឃើញរបស់ប្រតិភូគណបក្សនីមួយៗលើការងាររបស់ខ្លួន។ យើងប្រជុំដើម្បីវាយតម្លៃទៅលើការងាររបស់យើង ហើយយើងត្រូវបង្ហាញការគោរពទៅតាមឆន្ទានុសិទ្ធិរបស់គណបក្សនីមួយៗ»។
យ៉ាងណាក្ដី លោក ចាន់ យ៉េត ប្រធានប្តូរវេនប្រចាំខែមិថុនា នៃឧត្តមក្រុមប្រឹក្សាពិគ្រោះ និងផ្តល់យោបល់ មកពីគណបក្សនគរប្រជាធិបតេយ្យបានប្រាប់ភ្នំពេញប៉ុស្តិ៍ កាលពីថ្ងៃអង្គារថា បន្ទាប់ពីសមាជិកម្នាក់នៃស្ថាប័ននេះ ត្រូវបានដកពីតំណែងមកសកម្មភាពនៃការចុះមូលដ្ឋានរបស់សមាជិកនៃឧត្តមក្រុមប្រឹក្សា គឺហាក់មិនទទួលបានកិច្ចសហការពីអាជ្ញាធរមូលដ្ឋានទេ បើទោះជាមានលិខិតបេសកកម្មក៏ដោយ។
លោកបានបញ្ជាក់ថា៖ «ថ្ងៃមួយ នៅពេលខ្ញុំចុះទៅបន្ទាយមានជ័យ មានអភិបាលរងខេត្ត ខ្ញុំមិនបញ្ចេញចំឈ្មោះទេ គាត់ថា (និយាយមកកាន់លោក) ឯកឧត្តម ចុះមកប្រយ័ត្នខ្លួន ដូចលោក វីល្លៀម [សុវណ្ណ វឌ្ឍនាសាប៊ុង] ដែលមានការទិតៀនខ្លះពីសំណាក់អាជ្ញាធរ។ ប៉ុន្តែឧត្តមក្រុមប្រឹក្សាមិនខ្វល់ពីបញ្ហានេះទេ យើងនៅតែចុះធ្វើសកម្មភាពបន្តទៀត ដើម្បីសន្តិភាពហើយយើងមិនមែនចុះទៅកាត់ក្តីទេ គឺយើងចុះទៅស្វែងរកតម្រុយ ដើម្បីធ្វើរបាយការណ៍ដាក់ជូនសម្ដេចឲ្យលោកអ្នកកាត់ក្តី»។
ក្នុងនាមប្រធានប្តូរវេនប្រចាំខែមិថុនា លោក ចាន់ យ៉េត ស្នើដល់លោកនាយករដ្ឋមន្ត្រី ហ៊ុន សែន សូមធានាដល់សកម្មភាពស្របច្បាប់ដូចបានចែងក្នុងច្បាប់ដែលបានផ្តល់ភារកិច្ចដល់សមាជិកនៃឧត្តមក្រុមប្រឹក្សាពិគ្រោះ និងផ្តល់យោបល់គ្រប់រូបបានបំពេញការងាររបស់ខ្លួនដោយមានកិច្ចសហការពីមន្ត្រីគ្រប់ជាន់ថ្នាក់ ដើម្បីបានចូលរួមបម្រើផលប្រយោជន៍សង្គមផងដែរ។
លោក សេង សុខេង ប្រធានគណបក្សសញ្ជាតិកម្ពុជា បានប្រាប់ភ្នំពេញប៉ុស្តិ៍ពីថ្ងៃ ៣០ មិថុនា ថា ក្នុងកិច្ចប្រជុំនោះ គណបក្សនីមួយៗបានលើកពីសកម្មភាពចុះមូលដ្ឋានរបស់ខ្លួន ដើម្បីប្រមូលរបាយការណ៍ដាក់ជូនលោកនាយករដ្ឋមន្ត្រី ហ៊ុន សែន។
លោកបានបន្តថា ដោយសារវិបត្តិនៃជំងឺកូវីដ ១៩ ជាពិសេស ដើម្បីគោរពតាមគោលការណ៍នៃការរក្សាគម្លាតរបស់ក្រសួងសុខាភិបាលបានធ្វើឲ្យសកម្មភាពនៃការចុះមូលដ្ឋានរបស់គណបក្សលោកជួបប្រទះនូវបញ្ហា។រីឯករណីជម្លោះដីធ្លីក៏ហាក់មិនសូវបានលើកឡើងក្នុងអង្គប្រជុំនោះដែរដោយលោកអះអាងថា គណបក្សរបស់លោកហាក់មិនសូវទទួលបានពាក្យបណ្តឹងដូចកាលពីមុនទេ។
លោកបានបញ្ជាក់ថា៖ «នៅក្នុងកិច្ចប្រជុំរបស់ក្រុមប្រឹក្សានេះប្រសិទ្ធភាពអត់មានខុសប្លែកពីខែមុនៗទេក្នុងការបញ្ចេញយោបល់របស់ឧត្តមក្រុមប្រឹក្សានោះ។ យើងបានលើកយោបល់ក្នុងន័យស្ថាបនា និងក្នុងន័យត្រង់ទៅត្រង់មក ដើម្បីរកដំណោះស្រាយ។ កិច្ចនេះ គឺដំណើរការដូចធម្មតា»។
ទោះយ៉ាងណា លោក សេង សុខេង បានលើកឡើងពីផលវិបាកដែលលោកបានជួបប្រទះកន្លងមកនៅពេលចុះទៅស្រាវជ្រាវនៅតាមមូលដ្ឋានមួយចំនួន ប៉ុន្តែពុំមានកិច្ចសហការពីមន្ត្រីថ្នាក់ក្រោមជាតិ៕
