ភ្នំពេញៈ ឧត្តមក្រុមប្រឹក្សាពិគ្រោះ និងផ្តល់យោបល់បានលើកសំណើជិត ២០ ចំណុច ដើម្បីឲ្យកែប្រែចំណុចខ្លះក្នុងសេចក្តីព្រាងច្បាប់ស្តីពីសំណង់ ខណៈក្រសួងរៀបចំដែនដីថាសេចក្តីព្រាងច្បាប់នេះនឹងបញ្ជូនទៅគណៈរដ្ឋមន្ត្រីឆាប់ៗនេះ ដោយមានកែប្រែចំណុចមួយចំនួនតាមការស្នើសុំ ប៉ុន្តែមួយចំនួនទៀតត្រូវបានបដិសេធ។
សេចក្តីប្រកាសព័ត៌មានរបស់ឧត្តមក្រុមប្រឹក្សាពិគ្រោះ និងផ្តល់យោបល់កាលពីថ្ងៃសុក្របានបង្ហាញលទ្ធផលស្តីពីកិច្ចប្រជុំពិគ្រោះឆ្លងសេចក្តីព្រាងច្បាប់ស្តីពីសំណង់ក្នុងក្របខ័ណ្ឌឧត្តមក្រុមប្រឹក្សាពិគ្រោះ និងផ្តល់យោបល់ជាមួយក្រសួងរៀបចំដែនដី នគរូបនីយកម្ម និងសំណង់ បន្ទាប់ពីកិច្ចប្រជុំបានធ្វើឡើងកាលពីសប្តាហ៍មុននៅវិមានសន្ដិភាព។
ក្នុងកិច្ចប្រជុំនោះ ឧត្តមក្រុមប្រឹក្សាពិគ្រោះ និងផ្តល់យោបល់បានស្នើទៅក្រសួងរៀបចំដែនដី រួមទាំងបានបង្ហាញក្តីកង្វល់លើចំណុចជិត ២០ ក្នុងនោះរួមមាន ចង់ឲ្យមានការកំណត់ឲ្យបានច្បាស់ជុំវិញជំពូកពាក់ព័ន្ធនឹងការធ្វើអធិការកិច្ច បញ្ហាការសាងសង់បន្ថែមលើសំណង់ចាស់ៗ ការទទួលខុសត្រូវរបស់ក្រុមហ៊ុនសំណង់ បើទោះជាគ្មាននីតិសម្បទា បញ្ហាការរក្សាការងារដល់អ្នកជំនាញខ្មែរក្នុងវិស័យនេះរួមទាំង ភាពចាំបាច់នៃកម្រិតវិជ្ជាជីវៈជំនាញជាដើម។
ក្រៅពីសំណើទាំងនេះ ឧត្តមក្រុមប្រឹក្សាក៏បានបញ្ជាក់ដែរថា៖ «គួររកគន្លឹះបញ្ហាកម្សោយនៃប្រសិទ្ធភាពអនុវត្តច្បាប់កន្លងមក ដើម្បីបញ្ញត្តិបន្ថែមក្នុងសេចក្តីព្រាងច្បាប់ថ្មីនេះឲ្យកាន់តែមានប្រសិទ្ធភាពថែមទៀត។
ព្រោះពេលបច្ចុប្បន្នកម្ពុជាមានច្បាប់ និងលិខិតបទដ្ឋានគតិយុត្តស្តីអំពីសំណង់ព្រមទាំងមានយន្តការថ្នាក់ជាតិ ថ្នាក់ក្រោមជាតិរួមទាំងក្រុមការងារអធិការកិច្ចចំពោះមុខដែលត្រូវបង្កើតឡើងជាបន្តបន្ទាប់ ប៉ុន្តែពុំសូវមានប្រសិទ្ធភាព»។
តាមសេចក្ដីព្រាងច្បាប់ស្ដីពីសំណង់ដែលកំពុងស្ថិតក្នុងដំណាក់កាលពិភាក្សានៅក្រសួងរៀបចំដែនដីបានចែងថា សេចក្តីព្រាងច្បាប់នេះមានគោលបំណងធានាគុណភាព សន្តិសុខ សុវត្ថិភាពសំណង់ ការពារទ្រព្យសម្បត្តិ និងសុខុមាលភាពរបស់ម្ចាស់សំណង់ អ្នកប្រើប្រាស់ និងសាធារណជន និងមានគណនេយ្យភាព និងប្រសិទ្ធភាពក្នុងការប្រកបការងារ និងការប្រកបវិជ្ជាជីវៈក្នុងវិស័យសំណង់ផងដែរ។
សេចក្តីព្រាងច្បាប់ដែលមាន ១១៣ មាត្រា និង ២២ ជំពូកបានចែងបញ្ញត្តិអំពីបច្ចេកទេសនានានៃសំណង់ ឧបករណ៍ដែលអាចប្រើប្រាស់ក្នុងវិស័យសំណង់ នីតិវិធីនៃការគ្រប់គ្រង តួនាទីរបស់មន្ត្រីមានសមត្ថកិច្ច និងការធ្វើសវនកម្ម រួមទាំងការទទួលខុសត្រូវរបស់ក្រុមវិជ្ជាជីវៈ និងអ្នកពាក់ព័ន្ធក្នុងវិស័យនេះផងដែរ។
ចំពោះមាត្រា ៩២ ដល់មាត្រា ១០៦ នៃសេចក្តីព្រាងច្បាប់នេះបានចែងពីទោសបញ្ញត្តិរួមមាន ការព្រមាន ព្យួរ ឬការដកហូតអាជ្ញាប័ណ្ណ រហូតដល់ដំណាក់ការរឹបអូស រុះរើ រួមទាំងមានជាទោសពិន័យ និងទោសដាក់ពន្ធនាគារ ដែលភាគច្រើនយោងតាមក្រមព្រហ្មទណ្ឌ ដែលជនប្រព្រឹត្តខុសនឹងច្បាប់នេះ អាចជាប់ពន្ធនាគារដល់ទៅជាង ១០ ឆ្នាំផងដែរ។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានប្រាប់ភ្នំពេញប៉ុស្តិ៍កាលពីម្សិលមិញថា ក្រោយពិភាក្សាចប់ជាមួយក្រសួងស្ថាប័នពាក់ព័ន្ធ សេចក្តីព្រាងច្បាប់ស្តីពីសំណង់នេះនឹងបញ្ជូនទៅទីស្តីការគណៈរដ្ឋមន្ត្រីក្នុងពេលឆាប់ៗ ខណៈសំណើសុំអនុញ្ញាតដើម្បីដាក់បញ្ចូលក្នុងអង្គប្រជុំគណៈរដ្ឋមន្ត្រីគ្រោងនឹងស្នើឡើង និងរង់ចាំការសម្រេចពីរដ្ឋាភិបាល។
អ្នកនាំពាក្យរូបនេះបានបញ្ជាក់ថា ចំពោះសំណើនានាគឺមានមួយចំនួនត្រូវបានក្រសួងទទួលយកមកបំពេញបន្ថែម ដើម្បីធានាឲ្យច្បាប់នេះមានគុណភាព។ ចំណែកចំណុចមួយចំនួនលោកអះអាងថានឹងមិនត្រូវទទួលយកមកពិចារណា ឬកែប្រែតាមការស្នើសុំនោះទេ។
លោក សេង ឡូត បញ្ជាក់ថា៖ «យើងបានប្រជុំជាអន្តរក្រសួងរួចហើយ ដោយច្បាប់នេះរៀបចំមកមានការថ្លឹងថ្លែងហ្មត់ចត់ណាស់។ យើងបានជម្រាបឧត្តមក្រុមប្រឹក្សាអំពីខ្លឹមសារនៃច្បាប់ ហើយគាត់មានមតិយោបល់ពាក់ព័ន្ធនឹងសិទ្ធិរបស់គាត់។ ប៉ុន្តែក្រសួងផ្អែកលើអ្វីដែលបានពិគ្រោះយោបល់ និងពិនិត្យមើលទៅតាមចំណុចហ្នឹង ហើយការគិតគូរកន្លងមកនេះមានការថ្លឹងថ្លែងខ្ពស់ ដូច្នេះយោបល់ខ្លះក៏លើកមកពិចារណា ចំណែកយោបល់ណាដែលមិនអាចទៅរួចយើងក៏មិនទទួលដែរ»។
លោក គង់ មុនីកា ប្រធានគណបក្សឆន្ទៈខ្មែរ និងជាប្រធានប្តូរវេននៃឧត្តមក្រុមប្រឹក្សាពិគ្រោះ និងផ្តល់យោបល់ក្នុងការដឹកនាំកិច្ចពិភាក្សាលើសេចក្តីព្រាងច្បាប់នេះបានសាទរដែលក្រសួងទទួលយកសំណើមួយចំនួនទៅពិចារណា បើទោះជាមតិមួយចំនួនទៀតមិនទាន់ត្រូវបានគិតគូរក៏ដោយ។ ប៉ុន្តែលោករំពឹងថានៅក្នុងដំណាក់កាលពិភាក្សានៅគណៈដ្ឋមន្ត្រីក៏ដូចជានៅរដ្ឋសភា ព្រឹទ្ធសភា ខាងមុខចំណុចខ្វះខាតដទៃទៀតដែលឧត្តមក្រុមប្រឹក្សាបានលើកឡើងនឹងត្រូវបានដាក់បញ្ចូល។
លោក គង់ មុនីកា បញ្ជាក់ថា៖ «ច្បាប់នេះយើងឃើញថាល្អហើយ ប៉ុន្តែអ្វីដែលជាការបារម្ភធំបំផុតរបស់ខ្ញុំផ្ទាល់ក៏ដូចឧត្តមក្រុមប្រឹក្សាគឺការអនុវត្តច្បាប់ហ្នឹង។ តើវាមានភាពច្បាស់លាស់ឬទេ? នៅពេលឃើញកើតមានអំពើពុករលួយដើរគោះលុយអ្នកសាងសង់ពីមន្ត្រីពាក់ព័ន្ធហ្នឹង។ ជាក់ស្តែងអំពើពុករលួយជាប្រព័ន្ធហ្នឹងរុញឲ្យសំណង់ហ្នឹងអត់មានគុណភាព ដូច្នេះហើយយើងមានការបារម្ភ និងជំរុញឲ្យលុបបំបាត់អំពើពុករលួយឲ្យបានក្នុងជួរមន្ត្រីជាមុនសិន»៕