.jpg)
ទិដ្ឋភាពនៃកិច្ចប្រជុំនៅក្នុងទីក្រុងហ្សឺណែវប្រទេសស៊្វីស នាពេលកន្លងមក។ រូបថត ហ្វេសប៊ុក
ភ្នំពេញៈ ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ ត្រូវបានគេរំពឹងថា នឹងស្តាប់ការរិះគន់ដ៏ខ្លាំងក្លាទៅលើរដ្ឋាភិបាលកម្ពុជានៅឯកិច្ចប្រជុំនាថ្ងៃព្រហស្បតិ៍នេះនៅទីក្រុងហ្សឺណែវ ខណៈដែលមានក្ដីបារម្ភចំពោះការកើនឡើងនៃការបង្ក្រាបអ្នកនយោបាយនិងលើអង្គការសង្គមស៊ីវិលផងនោះ។
ជាទូទៅ UNបើកកិច្ចប្រជុំស្តីអំពីជំនួយបច្ចេកទេសនិងការកសាងសមត្ថភាពដើម្បីបញ្ជាក់ពីវឌ្ឍនភាពនៅក្នុងប្រទេសជាក់លាក់មួយចំនួន។ លោកស្រី Laila Matar អនុប្រធានអង្គការឃ្លាំមើលសិទិ្ធមនុស្ស Human Rights Watch ទទួលបន្ទុកការឃ្លាំមើលរបស់អង្គការសហប្រជាជាតិ បានថ្លែងថា គេក៏នឹងលើកយកបញ្ហាធ្លាក់ចុះលទ្ធិប្រជាធិបតេយ្យនៅកម្ពុជានាប៉ុន្មានខែមកនេះផងដែរ។
លោកស្រីថ្លែងតាមរយៈអ៊ីមែលថា៖«ពួកគេនឹងនិយាយអំពីវិធានការរបស់រដ្ឋាភិបាលលោក ហ៊ុន សែន នៅមុនការបោះឆ្នោតជាតិនាខែកក្កដាខាងមុខ រួមទាំងការចាប់ខ្លួនមេដឹកនាំគណបក្សប្រឆាំង ការរំលាយគណបក្សប្រឆាំងដ៏ធំ និងការធ្វើទុក្ខបុកម្នេញឬការចាប់ដាក់ពន្ធនាគារចំពោះអ្នកការពារសិទ្ធិមនុស្សនិងអ្នកនយោបាយក៏ដូចជាការបិទប្រព័ន្ធផ្សព្វផ្សាយឯករាជ្យ»។
នៅក្នុងរយៈពេលប៉ុន្មានខែកន្លងមកនេះ អាជ្ញាធរ បានចាប់ខ្លួនមេដឹកនាំគណបក្សប្រឆាំងលោក កឹម សុខា ហើយបន្ទាប់មកគណបក្សសង្គ្រោះជាតិរបស់គាត់ក៏ត្រូវបានរំលាយដែរ។ សមាជិកគណបក្សប្រឆាំងជាច្រើននាក់បានរត់ភៀសខ្លួនចេញពីប្រទេសដោយសារភ័យខ្លាចការចាប់ខ្លួន ខណៈតុលាការបានតម្រង់គោលដៅទៅរកអ្នកគាំទ្រសិទិ្ធមនុស្សជាអ្វីដែលត្រូវបានគេគិតថាជារឿងនយោបាយ។
កាសែតឯករាជ្យ Cambodia Daily បានបិទទ្វារកាលពីខែកញ្ញា បន្ទាប់ពីទទួលបានវិក្កយបត្រដែលត្រូវបង់ពន្ធ៦,៣លានដុល្លារហើយក្រសួងព័ត៌មាន បានបិទស្ថានីយវិទ្យុជាច្រើនដែលផ្សាយវិទ្យុសំឡេងសហរដ្ឋអាមេរិក និងវិទ្យុអាស៊ីសេរី។
លោក Matt Pollard ដែលនឹងតំណាងឱ្យគណៈកម្មាធិការអន្តរជាតិនៃអ្នកច្បាប់នៅឯកិច្ចប្រជុំនោះបានថ្លែងថា អគ្គលេខាធិការUN និងឧត្តមស្នងការទទួលបន្ទុកសិទ្ធិមនុស្សបានបារម្ភយ៉ាងជ្រាលជ្រៅរួចហើយចំពោះការរឹតត្បិតលទ្ធិប្រជាធិបតេយ្យនិងការបង្ក្រាបអង្គការសង្គមស៊ីវិលនៅកម្ពុជា។
លោកបញ្ជាក់ថា៖«ការពិភាក្សានៅក្នុងសប្តាហ៍នេះ គឺជាឱកាសដ៏សំខាន់មួយសម្រាប់សហគមន៍អន្តរជាតិដើម្បីផ្ញើសារដ៏ខ្លាំងក្លាមួយទៅរដ្ឋាភិបាលកម្ពុជាថា ត្រូវតែស្តារឡើងវិញនូវការគោរពសិទ្ធិមនុស្សឲ្យបានឆាប់រហ័ស តាមរយៈសកម្មភាពជាក់ស្តែងហើយថា ការបោះឆ្នោតនៅខែកក្កដាខាងមុខ នឹងមិនអាចចាត់ទុកថា គួរឱ្យទុកចិត្តបានទេ លើកលែងតែករណីទាំងនេះត្រូវបានស្តារឡើងវិញ»។
អង្គការលើកលែងទោសអន្តរជាតិ Amnesty International ក៏ត្រូវបានគេរំពឹងថានឹងនិយាយផងដែរលើករណីទាំងនេះ។
នៅក្នុងរបាយការណ៍របស់ខ្លួន អ្នកនាំពាក្យអង្គការលើកលែងទោសអន្តរជាតិលោក Olof Blomqvist បានថ្លែងថា អង្គការអាចនឹងលើកឡើងនៅក្នុងកិច្ចប្រជុំនោះអំពីការរិះគន់ការបង្ក្រាបគួប្រជែងនយោបាយនិងការវាយប្រហារលើអង្គការសង្គមស៊ីវិលនិងប្រព័ន្ធផ្សព្វផ្សាយ។ ពួកគេស្នើឱ្យមានការជជែកវែកញែកជាបន្ទាន់នៅក្នុងក្រុមប្រឹក្សានោះដើម្បីដោះស្រាយនូវអ្វីដែលពួកគេបានពណ៌នាថា«ស្ថានភាពសិទ្ធិមនុស្សកាន់តែយ៉ាប់យ៉ឺននៅកម្ពុជា»។
អង្គការ Amnesty International បញ្ជាក់ថា៖«កិច្ចប្រជុំលើកទី៣៧នេះផ្តល់នូវឱកាសចុងក្រោយ សម្រាប់ក្រុមប្រឹក្សានេះដើម្បីដោះស្រាយស្ថានភាពសិទ្ធិមនុស្សដែលកំពុងតែយ៉ាប់យ៉ឺននៅមុនពេលបោះឆ្នោតក្នុងប្រទេសកម្ពុជាដែលគ្រោងនឹងធ្វើឡើងនៅថ្ងៃទី២៩ខែកក្កដាឆ្នាំ២០១៨ខាងមុខ»។
ឧត្តមស្នងការជាន់ខ្ពស់ផ្នែកសិទ្ធិមនុស្សរបស់អង្គការសហប្រជាជាតិលោក Kate Gilmore ត្រូវបានគេរំពឹងថា នឹងបង្ហាញរបាយការណ៍របស់អគ្គលេខាធិការស្តីពីកម្ពុជាដែលសម្គាល់អំពី«ស្ថានភាពនយោបាយតានតឹងបន្តកើនឡើងនិងការកាត់បន្ថយសកម្មភាពរបស់អង្គការសង្គមស៊ីវិលចាប់តាំងពីខែកក្កដាមក៕ NS
