.jpg)
កូនក្រពើត្រីហែលក្នុងបឹងធម្មជាតិត្រូវបានប្រទះឃើញនៅខេត្តកោះកុង។ រូបថត WCS
កោះកុង៖ កូនសត្វក្រពើត្រីចំនួន ១៥ ក្បាល ត្រូវបានក្រុមការងារជំនាញនៃនាយកដ្ឋានអភិរក្សជលផល និងអង្គការសមាគម អភិរក្សសត្វព្រៃនៅកម្ពុជា (WCS) និងប្រជាសហគមន៍ប្រទះឃើញ ខណៈពួកគេដើរល្បាតជាប្រចាំក្នុងតំបន់បឹងធម្មជាតិមួយស្ថិតនៅ ស្រុកស្រែអំបិល ខេត្តកោះកុង។ សត្វក្រពើទាំងនេះ អ្នកជំនាញអះអាងថា ជាប្រភេទសត្វក្រពើត្រីដែល ជិតផុតពូជនៅលើសកលលោក។
លោក សោម ស៊ីថា ប្រធានគម្រោងអភិរក្សប្រចាំខេត្តកោះកុង និងមេគង្គនៃអង្គការ WCS ថ្លែងពីថ្ងៃទី ២២ កញ្ញា ថា កូនសត្វក្រពើត្រីចំនួន ១៥ ក្បាល ដែលបានរកឃើញដោយក្រុមការងារជំនាញរបស់អង្គការ WCS និងប្រជាសហគមន៍នេះ បន្ទាប់ពីពួកគាត់បានដើរល្បាតជាប់ជាប្រចាំក្នុងព្រៃអភិរក្ស។ ពេលនោះក៏បានប្រទះឃើញប្រភេទសត្វកម្រនេះនៅក្នុងបឹងធម្មជាតិមួយស្ថិតនៅស្រុកស្រែអំបិល ខេត្តកោះកុង។
បើតាមលោក ស៊ីថា ក្រុមការងារបានសហការជាមួយអាជ្ញាធរមូលដ្ឋានបង្កើនកិច្ចការពារអភិរក្ស លើសត្វក្រពើត្រីទាំងនេះ ដោយតាមដានជាប់ជាប្រចាំ ដើម្បីធានាឱ្យការរស់នៅរបស់វាមានសុវត្ថិភាព ព្រោះវាជាប្រភេទសត្វកម្រ ស្ថិតក្នុងបញ្ជីក្រហមរបស់អង្គការ IUCN ហើយក៏ជាប្រភេទសត្វដែលជិតផុតពូជនៅលើសកលលោកទៀតផង។ តាមការសិក្សាស្រាវជ្រាវកន្លងមក នៅកម្ពុជាមានវត្តមានសត្វក្រពើត្រីប្រភេទនេះប្រហែល ៥ ០០០ ក្បាល ដែលចាត់ទុកថា ជាចំនួនមួយច្រើនជាងប្រទេសដទៃទៀត។
លោកបញ្ជាក់ថា៖ «សត្វក្រពើត្រីនេះ បច្ចុប្បន្នកំពុងប្រឈមទៅនឹងកត្តាគំរាមកំហែងជាច្រើន ដូចជាការបាត់បង់ទីជម្រក ការប្រមាញ់ខុសច្បាប់របស់ជនល្មើសតាមរយៈប្រើប្រាស់ឧបករណ៍ឆក់ និងការប្រមូលយកកូនតូចៗ និងពងរបស់វាទៅលក់ឱ្យកសិដ្ឋានចិញ្ចឹមក្រពើនៅក្នុងប្រទេសកម្ពុជា វៀតណាម និងប្រទេសថៃ ជាដើម»។
ប្រជាសហគមន៍នេសាទរស់នៅស្រុកស្រែអំបិល ខេត្តកោះកុង លោក យុក ថៃ ឱ្យដឹងនៅថ្ងៃទី ២២ កញ្ញា ថា លោក និងប្រជានេសាទជាច្រើននាក់ទៀតតែងតែ ចូលរួមក្នុងប្រតិបត្តិការចុះល្បាតជាមួយមន្ត្រីជំនាញរបស់អង្គការ WCS នៅតាមតំបន់ព្រៃអភិរក្ស និងតំបន់បឹងធម្មជាតិជាច្រើនកន្លែងនៅក្នុងស្រុកស្រែអំបិលខេត្តកោះកុង។ ការចុះល្បាតនេះត្រូវចំណាយពេល ២ ឬ ៣ ថ្ងៃក្នុង ១ សប្ដាហ៍ ដើម្បីដើរស្រាវជ្រាវបង្ក្រាបបទល្មើសសត្វព្រៃ និងតាមដានសកម្មភាពការរស់នៅរបស់សត្វព្រៃផងដែរ។
លោករីករាយចំពោះការចូលរួមជាមួយអង្គការ WCS ដែលបានរកឃើញកូនក្រពើត្រីនេះ។ ការរកឃើញនេះ គឺជាកិច្ចសហការគ្នារវាងមន្ត្រីអង្គការ និងមន្ត្រីរដ្ឋបាលជលផលនៃក្រសួងកសិកម្មរុក្ខាប្រមាញ់ និងនេសាទ ដែលបានចូលរួមការពារទីជម្រកក៏ដូចជាស្វែងរកជម្រក ឬសម្បុក និងដានផ្សេងៗជារៀងរាល់ឆ្នាំ។
លោកនិយាយថា៖ «ខ្ញុំតែងតែចូលរួមចុះល្បាត គឺយើងបានចូលទៅក្នុងព្រៃ ចុះល្បាតម្ដង ២ ឬ ៣ ថ្ងៃ ទើបត្រឡប់មកផ្ទះវិញ។ ពេលចុះល្បាតហ្នឹង យើងជិះទូក ៤ ឬ ៥ គ្រឿង ហើយទៅដល់កន្លែងដីគោក គឺយើងនាំគ្នាចុះដើរថ្មើរជើងតែម្ដង។ ខ្ញុំសប្បាយរីករាយដែលបានចូលរួមជាកម្លាំង តិចតួចជួយការពារសត្វព្រៃ សត្វកម្រនៅប្រទេសយើង»។
តាមសេចក្ដីប្រកាសព័ត៌មានរបស់អង្គការ WCS កាលពីថ្ងៃទី ២២ កញ្ញា ថាក្រុមការងារខាងលើបានប្រទះឃើញកូនក្រពើត្រីចំនួន ១៥ ក្បាល ដែលកូនក្រពើនីមួយៗមានប្រវែងប្រហែល ៣០ សង់ទីម៉ែត្រ កំពុងហែលក្នុងបឹងធម្មជាតិមួយដែលជាតំបន់ដីសើម ជាទីជម្រកដ៏សំខាន់មួយរបស់ក្រពើប្រភេទនេះ។ ក្រុមការងារកត់សម្គាល់ឃើញថា ដោយសារក្នុងឆ្នាំនេះមានភ្លៀងធ្លាក់តិច បឹងនៅក្នុងតំបន់ដីសើមនេះកាន់តែរាក់ទៅៗ ដែលធ្វើឱ្យប៉ះពាល់ដល់ទីជម្រករបស់វាក្នុងរយៈពេលប៉ុន្មានឆ្នាំកន្លងមកនេះ។
លោក អ៊ិន ហ៊ុល អនុប្រធាននាយកដ្ឋានអភិរក្សជលផលនៃរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទថ្លែងពីម្សិលមិញថា ក្រុមកាងាររដ្ឋបាលជលផលខេត្តកោះកុង មន្រ្តីជំនាញ WCS និងប្រជាសហគមន៍បានចុះទៅល្បាត ហើយក៏ប្រទះឃើញកូនក្រពើត្រីទាំង ១៥ ក្បាលនេះ។ ក្រុមការងារបានតាមដានការរស់នៅរបស់វា និងជំរុញការចុះល្បាតបន្ថែមទៀត ដើម្បីថែរក្សាកូនៗក្រពើត្រីទាំងនេះ។
លោក ហ៊ុល បានបញ្ជាក់ថា៖ «យើងមានការព្រួយបារម្ភចំពោះហានិភ័យជាច្រើនទៅលើជីវចម្រុះ ក៏ដូចជាកូនក្រពើនេះ ព្រោះកត្តារាំងស្ងួត និងកត្តាបរបាញ់ខុសច្បាប់ពីសំណាក់ព្រានព្រៃតាមរយៈការដាក់សន្ទូច មង និងការដាក់អន្ទាក់នានា។ ដូច្នេះយើងបង្កើនការចុះល្បាតឱ្យបានញឹកញាប់ជាងនេះ ចៀសវាងការបាត់បង់ធម្មជាតិយើង»៕
