.jpg)
ត្រីផ្សោតនៅទន្លេមេគង្គក្នុងខេត្តក្រចេះកាលពីពេលកន្លងមក។ រូបថត WWF
ភ្នំពេញៈ អត្រាងាប់នៃសត្វផ្សោតទន្លេមេគង្គនៅកម្ពុជាក្នុងឆ្នាំ ២០១៩ ត្រូវបានគេកត់ត្រាថា មានការកើនឡើងខ្ពស់ជាងឆ្នាំមុនៗ ប៉ុន្តែក៏មានកូនផ្សោតដែលទើបនឹងកើតមានការកើនឡើងផងដែរ។ ទោះយ៉ាងណាចំនួនសត្វផ្សោតងាប់ ដែលមានការកើនឡើងបង្កឲ្យមានក្ដីបារម្ភជាថ្មីសម្រាប់ក្រុមអ្នកអភិរក្ស។
លោក អ៊ុក វិបុល ប្រធាននាយកដ្ឋានអភិរក្សធនធានជលផលនៃរដ្ឋបាលជលផលបានថ្លែងកាលពីថ្ងៃអង្គារថា៖ «ជាមួយមោទនភាពនៃអត្រាកូនផ្សោតទើបកើតថ្មីក្នុងឆ្នាំ ២០១៩ ដែលមានរហូតដល់ ១៣ ក្បាល យើងក៏មានក្ដីព្រួយកង្វល់ផងដែរចំពោះអត្រាស្លាប់របស់សត្វផ្សោតនៅក្នុងឆ្នាំដដែលនេះ ដែលមានរហូតដល់ ៦ ក្បាល។ វាជាអត្រាដ៏ខ្ពស់បំផុត បើធៀបទៅនឹងឆ្នាំមុនៗ»។
បើតាមលោក វិបុល ក្នុងឆ្នាំ ២០១៧ អត្រាងាប់នៃសត្វផ្សោតទន្លេមេគង្គ ត្រូវបានគេកត់ត្រាមានចំនួនត្រឹម ២ ក្បាលខណៈអត្រាកូនផ្សោតទើបកើតថ្មី មានចំនួន ១០ ក្បាល។ ចំណែកនៅឆ្នាំ ២០១៨ អត្រាងាប់នៃសត្វផ្សោតមាន ៥ ក្បាល និងកូនផ្សោតទើបកើតមាន ៩ ក្បាល។
លោកថ្លែងថា យោងតាមការសិក្សាស្រាវជ្រាវ និងការធ្វើកោសល្យវិច័យវិទ្យាសាស្ត្រលើសត្វផ្សោតដែលបានងាប់ទាំងនោះបង្ហាញថា ៩០ ភាគរយបានងាប់ដោយសារជាប់មងអ្នកនេសាទ និង ១០ ភាគរយទៀត ងាប់ដោយសារវ័យចំណាស់ និងដោយការវាយប្រហារពីសត្វផ្សោតឈ្មោល។
ជុំវិញការងើបឡើងវិញនៃអត្រាងាប់សត្វផ្សោតទន្លេមេគង្គនេះ លោក ខៀវ មុត សមាជិកព្រឹទ្ធសភាបានជំរុញឲ្យមន្ត្រីជំនាញ និងអាជ្ញាធរពាក់ព័ន្ធ ព្រមទាំងប្រជាសហគមន៍នេសាទដែលរស់នៅជុំវិញតំបន់អភិរក្សអន្លង់ផ្សោតរួមសហការគ្នាឲ្យបានល្អដោយបង្កើនការចុះល្បាតបន្ថែមទៀត។
លោក ខៀវ មុត បានថ្លែងនៅក្នុងកិច្ចប្រជុំព្រឹទ្ធសភាស្តីពីការផ្តល់យោបល់លើសេចក្តីព្រាងច្បាប់ពាក់ព័ន្ធនឹងការគ្រប់គ្រងអភិរក្សផលស្តុកត្រីកាលពីថ្ងៃទី ៣ ខែមករាថា៖ «ផ្សោតទន្លេមេគង្គបានចូលរួមយ៉ាងសកម្មក្នុងការលើកកម្ពស់វិស័យទេសចរណ៍នៅកម្ពុជា ដោយបានជួយបង្កើតការងារជាច្រើនដល់ប្រជាសហគមន៍មូលដ្ឋានដើម្បីលើកស្ទួយជីវភាពរស់នៅរបស់ពួកគេឲ្យបានសមរម្យ និងបានជួយបង្កើនចំណូលថវិកាជាតិផងដែរ ដូច្នេះយើងត្រូវពង្រឹង និងបង្កើនការអភិរក្សឲ្យមានប្រសិទ្ធភាពដើម្បីធានារក្សាកំណើនសត្វផ្សោតរបស់យើងបន្ថែមទៀត»។
លោក សៀន គិន ប្រធានខណ្ឌរដ្ឋបាលជលផលខេត្តក្រចេះបានប្រាប់ភ្នំពេញប៉ុស្តិ៍ថា ក្នុងឆ្នាំ ២០១៩ ក្រុមឆ្មាំទន្លេបានសហការជាមួយប្រជាសហគមន៍នេសាទ និងអាជ្ញាធរមូលដ្ឋានចុះបង្ក្រាបចាប់រឹបអូស និងដុតបំផ្លាញចោលនូវវត្ថុតាងមួយចំនួនរួមមានមងចំនួន ៣២៣ ត្បូងស្មើ ២០០៣០ ម៉ែត្រ សន្ទូចរនងចំនួន ១១៥ ខ្សែមានផ្លែសន្ទូច ១២៥០០ ផ្លែដែលត្រូវបានជនប្រព្រឹត្តបទល្មើសលួចធ្វើសកម្មភាពក្នុងតំបន់ស្នូលនៃតំបន់អភិរក្សអន្លង់ផ្សោតកាំពី។
លោក គិន ថា៖ «ក្នុងឆ្នាំ ២០១៩ ក្រុមឆ្មាំទន្លេបានចាប់ឃាត់ខ្លួនជនប្រព្រឹត្តបទល្មើសនេសាទក្នុងតំបន់ការពារ និងអភិរក្សអន្លង់ផ្សោតកាំពីបាន ៦ នាក់ និងរឹបអូសវត្ថុតាងមានទូកម៉ាស៊ីនចំនួន ៣ គ្រឿង និងដុំឆក់ត្រជាក់ ៣ គ្រឿងបញ្ជូនទៅឲ្យតុលាការខេត្តក្រចេះ ហើយតុលាការបានសម្រេចផ្ដន្ទាទោសពួកគេដាក់ពន្ធនាគារក្នុងម្នាក់ៗពី ១ ឆ្នាំ ដល់ ៣ ឆ្នាំ»។
ក្រៅពីការងារចុះល្បាតតាមដងទន្លេ ក្រុមការងាររបស់លោកបានរួមសហការជាមួយប្រជានេសាទ និងអាជ្ញាធរមូលដ្ឋាន ចុះស្រាវជ្រាវ និងបង្ក្រាបបទល្មើសតាមដងស្ទឹង បឹង ព្រែក មួយចំនួនទៀតដោយបង្ក្រាបបទល្មើសបានជាច្រើនករណី។
លោកថា៖ «បទល្មើសភាគច្រើនកើតឡើងនៅពេលយប់ ធ្វើឲ្យក្រុមឆ្មាំទន្លេរបស់យើងដែលមានគ្នាចន្លោះពី ២ ទៅ ៦ នាក់ក្នុង ១ ប៉ុស្តិ៍ មិនអាចចេញល្បាតដោយប្រថុយប្រថាន ដោយគ្មានការចូលរួមពីអាជ្ញាធរមូលដ្ឋាន និងប្រជាសហគមន៍បានទេ។ ចំណែកកញ្ចប់ថវិកាសម្រាប់ការងារចុះល្បាតនេះ ក៏នៅមានកម្រិតផងដែរ»។
ជុំវិញការត្អូញត្អែរនេះលោក អ៊ុក វិបុល ថ្លែងថាកន្លងមកនេះក្រសួងកសិកម្មក៏បានពិចារណាអំពីការជ្រើសរើសក្រុមឆ្មាំទន្លេបន្ថែមផងដែរ ដើម្បីពង្រឹងដល់ការងារចុះល្បាតការពារ និងអភិរក្សសត្វផ្សោតទន្លេមេគង្គឲ្យមានប្រសិទ្ធភាពខណៈបច្ចុប្បន្នក្រុមឆ្មាំទន្លេមានត្រឹមតែ ៧២ នាក់។ ប៉ុន្តែដោយសារកញ្ចប់ថវិកាមានកម្រិតការជ្រើសរើសឆ្មាំទន្លេបន្ថែមនោះត្រូវបានអាក់ខាន។ «យ៉ាងណាក៏ដោយក្រសួងបានបង្កើនកញ្ចប់ថវិកាមួយចំនួនបន្ថែមទៀតដល់ក្រុមឆ្មាំទន្លេសម្រាប់ការបង្កើនកម្មវិធី ចុះល្បាតត្រួតពិនិត្យបទល្មើសក្នុងតំបន់ការពារ និងអភិរក្សអន្លង់ផ្សោតទាំង ៩ ទីតាំងដែលរាប់ចាប់ពីអន្លង់កាំពីក្នុងខេត្តក្រចេះដល់ខេត្តស្ទឹងត្រែងជាប់ព្រំប្រទល់ដែនទឹកប្រទេសឡាវ»៕
