ភ្នំពេញៈ ក្រសួងយុត្ដិធម៌កំពុងរៀបចំយន្តការជាមួយអង្គភាពពាក់ព័ន្ធដើម្បីដាក់វិធានការទប់ស្កាត់បញ្ហាអំពើពុករលួយចក្នុវិស័យយុត្ដិធម៌ ក្រោយពីលោកនាយករដ្ឋមន្ដ្រី ហ៊ុន សែន បានបញ្ជាឲ្យរដ្ឋមន្ដ្រីក្រសួងយុត្ដិធម៌ចុះពិនិត្យបញ្ហាមិនប្រក្រតីនៅក្នុងប្រព័ន្ធតុលាការកម្ពុជាកាលពីចុងខែមុន។
លោក ជិន ម៉ាលីន អ្នកនាំពាក្យក្រសួងយុត្ដិធម៌បានប្រាប់ភ្នំពេញ-ប៉ុស្ដិ៍កាលពីថ្ងៃទី ៤ ខែកញ្ញា ថា កាលពីថ្ងៃទី ៣ ខែកញ្ញា នៅទីស្តីការក្រសួងយុត្តិធម៌ លោកអង្គវង្ស វឌ្ឍនា រដ្ឋមន្ត្រីក្រសួងយុត្តិធម៌បានដឹកនាំ កិច្ចប្រជុំផ្ទៃក្នុងពិភាក្សាស្តីពីបញ្ហាពុករលួយរវាងមេធាវី និងមន្ត្រីតុលាការព្រមទាំងការពង្រឹងអភិបាលកិច្ចល្អនៅក្នុងប្រព័ន្ធតុលាការផងដែរ។
លោកថ្លែងថា កិច្ចប្រជុំនេះក៏មានការចូលរួមពីថ្នាក់ដឹកនាំ មន្ត្រីជាន់ខ្ពស់ផ្សេងៗទៀតនៃក្រសួងយុត្តិធម៌ ដើម្បីពិនិត្យ ពិភាក្សាអំពីបញ្ហាប្រឈម និងរកដំណោះស្រាយដ៏មានប្រសិទ្ធភាពក្នុងការពង្រឹងអភិបាលកិច្ចល្អក្នុងប្រព័ន្ធតុលាការស្របតាមអនុសាសន៍របស់លោកនាយករដ្ឋមន្ដ្រី ហ៊ុន សែន។
លោកបន្ថែមថា៖ «កិច្ចប្រជុំនេះ គឺដើម្បីពង្រឹងអភិបាលកិច្ចផ្ទៃក្នុងរបស់យើង និងភាពស្អាតស្អំ តម្លាភាពក្នុងប្រព័ន្ធយុត្ដិធម៌របស់យើង និងរៀបចំវិធានការធ្វើកិច្ចសហការជាមួយភាគីពាក់ព័ន្ធដទៃទៀតដើម្បីទប់ស្កាត់នូវអំពើពុករលួយ។ យន្តការរបស់យើង គឺដាក់ចេញវិធានការពង្រឹងការងារអធិការកិច្ច ដើម្បីធ្វើម៉េចឲ្យការងារអធិការកិច្ចរបស់យើងមានភាពម៉ឺងម៉ាត់ និងមានប្រសិទ្ធភាព»។
មន្ត្រីនាំពាក្យរូបនេះបញ្ជាក់ថា៖ «មន្ដ្រីតុលាការណាប្រព្រឹត្ដបំពានទៅនឹងក្រមសីលធម៌វិជ្ជាជីវៈ បំពានច្បាប់ត្រូវទទួលខុសត្រូវតាមផ្លូវច្បាប់។ នេះជាយន្តការផ្ទៃក្នុងរបស់យើង។ សម្រាប់យន្តការមួយចំនួនទៀតយើងបានរៀបចំនូវយន្តការជាកញ្ចប់ដែលត្រូវអនុវត្ដរួមគ្នាជាមួយអង្គភាពប្រឆាំងអំពើពុករលួយជាមួយឧត្ដមក្រុមប្រឹក្សាអង្គចៅក្រមក៏ដូចជាជាមួយគណៈមេធាវី»។
លោក ម៉ាលីន ថ្លែងថាបច្ចុប្បន្នក្រសួងយុត្ដិធម៌មិនទាន់អាចផ្សព្វផ្សាយនូវយន្តការជាកញ្ចប់នេះបានទេ។ ព្រោះត្រូវជួបជាមួយគណៈមេធាវី អង្គភាពប្រឆាំងអំពើពុករលួយ ឧត្ដមក្រុមប្រឹក្សានៃអង្គចៅក្រម ដើម្បីពិភាក្សាគ្នាបន្ថែមនឹងដាក់អនុវត្ដជាផ្លូវការនូវយន្តការជាកញ្ចប់នេះ ក្នុងការទប់ស្កាត់នូវអំពើពុករលួយតាមរយៈមេធាវី មន្ដ្រីក្នុងវិស័យតុលាការ និងមន្ដ្រីយុត្ដិធម៌ជាដើម។
កាលពីជួបប្រជុំជាមួយឧត្តមក្រុមប្រឹក្សាពិគ្រោះ និងផ្តល់យោបល់កាលពីថ្ងៃទី ២៨ ខែសីហា នា វិមានសន្តិភាព លោកនាយករដ្ឋមន្ត្រី ហ៊ុន សែន បានប្រកាសអនុវត្តអភិក្រមទី ៥ គឺវះកាត់មន្ត្រីណាដែលប្រព្រឹត្តទង្វើមិនប្រក្រតីក្នុងតួនាទី។ លោក ហ៊ុន សែន ក៏បានបញ្ជាឱ្យលោក អង្គវង្ស វឌ្ឍនា រដ្ឋមន្ត្រីក្រសួងយុត្តិធម៌ចុះត្រួតពិនិត្យមើលអំពើពុករលួយក្នុងប្រព័ន្ធតុលាការ។
លោកមេធាវី សុក សំអឿន បានថ្លែងថា ក្រុមមេធាវីគួរងាកមកតស៊ូតាមផ្លូវច្បាប់ ចៀសវាងការសូកប៉ាន់ និងការប្រើងារជាឯកឧត្ដមក្នុងការអនុវត្ដនីតិវិធីច្បាប់របស់ខ្លួននោះវិស័យច្បាប់នឹងដើររលូនថែមមួយកម្រិតទៀតមិនខាន។
ចំណែកលោក អំ សំអាត ប្រធានគ្រប់គ្រងផ្នែកអង្កេតសិទ្ធិមនុស្សនៃអង្គការលីកាដូបានរំឭកថា ក្រុមសង្គមស៊ីវិលធ្លាប់បានលើកឡើងច្រើនដងជាយូរមកហើយ ចំពោះការលុបបំបាត់អំពើពុករលួយក្នុងប្រព័ន្ធតុលាការនេះលើរូបភាពមួយចំនួន ដូចជាបក្ខពួកនិយម និងការសូកប៉ាន់ជាដើម។
លោកថ្លែងថា៖ «យើងឃើញថា កន្លងមកស្ថាប័នយុត្ដិធម៌មិនទាន់យកចិត្ដទុកដាក់ទេ។ ប៉ុន្ដែក្រោយពេលសម្ដេចនាយករដ្ឋមន្ដ្រីលើកឡើងខាងក្រសួងពាក់ព័ន្ធទើបចាប់ផ្ដើមធ្វើ។ ជាការកត់សម្គាល់របស់ខ្ញុំ អ្វីក៏ដោយប្រសិនជាសម្ដេចគាត់លើកជាអនុសាសន៍ រាល់ក្រសួងគាត់ខ្វែងដៃខ្វែងជើងក្នុងការដោះស្រាយ។ ដូច្នេះបញ្ហានេះយើងចង់ឱ្យមានដំណោះស្រាយយន្តការជាស្ថិរភាព ជាលក្ខណៈប្រព័ន្ធដើម្បីធានាលុបបំបាត់អំពើពុករលួយ»។
លោក សំអាត បានលើកឡើងថា សង្គមស៊ីវិលចង់ឱ្យមានដំណោះស្រាយជាយន្តការ ជាលក្ខណៈប្រព័ន្ធឲ្យមានស្ថិរភាព ដើម្បីធានាលុបបំបាត់អំពើពុករលួយចេញតែម្ដង ដែលតម្រូវឱ្យយន្តការនេះឲ្យមានប្រសិទ្ធភាព៕