.jpg)
លោក អោ អាន ដែលមានឈ្មោះក្នុងសំណុំរឿង ០០៤/0២។ រូបថត CD CAM
ភ្នំពេញៈ ក្រុមមេធាវីការពារក្ដីរបស់ជនត្រូវចោទ អោ អាន ស្នើឲ្យមានការរំលត់សំណុំរឿង ០០៤/០២ នៅសាលាក្ដីកាត់ទោសមេដឹកនាំខ្មែរក្រហមជាបន្ទាន់ បន្ទាប់ពីអង្គជំនុំជម្រះវិសាមញ្ញក្នុងតុលាការកម្ពុជា ឬសាលាក្ដីខ្មែរក្រហម (អ.វ.ត.ក) មិនអាចរកសំឡេងគាំទ្រគ្រប់គ្រាន់ដើម្បីចេញសាលដីកាផ្អែកលើសំអាងហេតុរួមគ្នាលើអង្គសេចក្ដី។
ក្រុមមេធាវីការពារលោក អោ អាន បានចេញសេចក្ដីប្រកាសព័ត៌មានកាលពីសប្ដាហ៍មុនបន្ទាប់ពី (អ.វ.ត.ក) ចេញសេចក្ដីសម្រេចលើបណ្ដឹងឧទ្ធរណ៍ប្រឆាំងនឹងដីកាដំណោះស្រាយទាំង ២ របស់ចៅក្រមស៊ើបជាតិ និងអន្តរជាតិ។ ក្រុមមេធាវីការពារ អោ អាន និយាយថា ចៅក្រមភាគច្រើនបានបញ្ជាក់អំពីការលើកលែងការចោទប្រកាន់លើលោក អោ អាន។
ក្រុមមេធាវីនិយាយថា៖ «ថ្ងៃនេះចៅក្រមអង្គបុរេជំនុំជម្រះបានទទួលយកនូវការទាញហេតុផលរបស់មេធាវីការពារដោយថាសំណុំរឿងនេះគួរតែត្រូវបានលើកលែងការចោទប្រកាន់ដោយសារតែខ្វះយុត្តាធិការបុគ្គល។ ចៅក្រមភាគច្រើនយល់ឃើញថាលោក អោ អាន មិនមែនជាមេដឹកនាំកំពូល ឬអ្នកដែលទទួលខុសត្រូវខ្ពស់បំផុតនៃឧក្រិដ្ឋកម្មនៅសម័យខ្មែរក្រហមទេ ដូច្នេះគាត់មិនអាចត្រូវបានកាត់ទោសដោយសាលាក្ដីខ្មែរក្រហមទេ»។
សាលាក្ដីខ្មែរក្រហមបានប្រកាសថាកាលពីខែសីហា ឆ្នាំ ២០១៨ ចៅក្រមស៊ើបជាតិបានចេញដីកាចោទប្រកាន់បញ្ជូន អោ អាន និងបញ្ជូនទៅជំនុំជម្រះ ប៉ុន្តែនៅថ្ងៃដដែលនោះចៅក្រមស៊ើបជាតិបានចេញដីកាលើកលែងការចោទប្រកាន់លើរូបលោក អាន បន្ទាប់ពីការស៊ើបអង្កេតរយៈពេល ១០ ឆ្នាំ។
សាលាក្ដីខ្មែរក្រហមសរសេរថា៖ «ជាលើកដំបូងនៅក្នុងប្រវត្តិតុលាការអង្គបុរេជំនុំជម្រះត្រូវប្រឈមនឹងដីកាដំណោះស្រាយ ២ ផ្ទុយគ្នាចេញពីការិយាល័យតុលាការតែមួយ»។ (អ.វ.ត.ក) បញ្ជាក់បន្ថែមថា អង្គបុរេជំនុំជម្រះបានសន្និដ្ឋានថា ការចេញដីកាដំណោះស្រាយផ្ទុយគ្នាក្នុងពេលដំណាលគ្នារវាងចៅក្រមស៊ើបអង្កេតជាតិ និងអន្តរជាតិគឺមិនត្រឹមត្រូវតាមច្បាប់ និងជាការរំលោភលើមូលដ្ឋានគ្រឹះនៃក្របខ័ណ្ឌគតិយុត្តរបស់ (អ.វ.ត.ក)។
ក្រុមមេធាវីការពារលោក អោ អាន បាននិយាយថា ការបញ្ជូនរឿងទៅជម្រះនៅពេលចៅក្រមភាគច្រើនមិនយល់ព្រមនោះជាការរំលោភយ៉ាងធ្ងន់ធ្ងរដល់គោលការណ៍សន្មតទុកជាមុនថាគ្មានទោស។ ភាពមិនប្រាកដប្រជានេះគឺជាការរំលោភទៅលើសិទ្ធិក្នុងការទទួលបានការកាត់ទោសដោយយុត្តិធម៌របស់ អោ អាន ហើយជាការរំលោភលើគោលការណ៍ប្រាកដប្រជានៃច្បាប់។
ក្រុមមេធាវីសរសេរថា៖ «ការសម្រេចរបស់អង្គបុរេជំនុំជម្រះនេះបញ្ជាក់ម្ដងទៀតថា គោលការណ៍របស់ (អ.វ.ត.ក )មិនស្របទៅនឹងគោលបំណង (របស់អ.វ.ត.ក) ទេ។ [ដូច្នេះ] សំណុំរឿង ០០៤/០២ ត្រូវតែរំលត់ចោលដោយមានសុពលភាពភ្លាមៗ»។
ប៉ុន្តែលោក ហុង គឹមសួន សហមេធាវីការពារជនរងគ្រោះបានលើកឡើងថា វាជារឿងធម្មតាទេដែលក្រុមមេធាវីការពារលើកឡើងដើម្បីផលប្រយោជន៍នៃសំណុំរឿងរបស់ពួកគេ។ លោកថា បើទោះបីជាអង្គបុរេជំនុំជម្រះមិនអាចទទួលបានសំឡេងគាំទ្រយ៉ាងតិច ៤ រូប សម្រាប់ចេញដីសាលដីកាផ្អែកលើសំអាងហេតុរួមគ្នាលើអង្គសេចក្ដីក៏ដោយ ក៏សំណុំរឿងនេះនឹងបន្តទៅមុខទៀត។
លោកពន្យល់ថា៖ «នៅអង្គជំនុំជម្រះវិសាមញ្ញក្នុងតុលាការកម្ពុជា មានចៅក្រម ៥ ភាគីអន្តរជាតិ ២ និងភាគីជាតិ ៣ នៅគ្រប់ដំណាក់កាលជំនុំជម្រះទាំងអស់តាំងពីអង្គបុរេជំនុំជម្រះ អង្គជំនុំជម្រះ និងតុលាការកំពូល។ វាចាំបាច់មានសំឡេងយ៉ាងហោចណាស់ ៤ សំឡេងក្នុងការលើកលែងការចោទប្រកាន់ និងមិនឲ្យមានការបញ្ជូនរឿងទៅជំនុំជម្រះ។ ដូច្នេះក្នុងចំណោមចៅក្រម ៥ រូប ចាំបាច់ត្រូវមានយ៉ាងហោចណាស់ចៅក្រម ១ រូបដែលជំទាស់នឹងការបញ្ជូនរឿងទៅជម្រះ»៕
