ភ្នំពញៈ ក្រុមមេធាវីស្ម័គ្រចិត្តលោកនាយករដ្ឋមន្ត្រី ហ៊ុន សែន ដាក់ពាក្យស្នើទៅតុលាការ ឲ្យទម្លាក់ការចោទប្រកាន់លើកញ្ញា មាន ពេជ្ររីតា ជុំវិញករណីដែលលោក ហេង សៀ បានចោទប្រកាន់នាងពីបទលួច ខណៈក្រុមមេធាវីកំពុងរងចាំចំណាក់ការរបស់តុលាការ លើពាក្យបណ្តឹងរបស់កូនក្តី ពីបទរំលោភសេពសន្ថវៈ។
លោកស្រី មាស ស៊ីថន សហមេធាវីការពារក្តីកញ្ញា មាន ពេជ្ររីតា បានប្រាប់ភ្នំពេញប៉ុស្តិ៍នៅថ្ងៃទី ៣០ ឧសភាថា ក្រុមមេធាវីបានដាក់ពាក្យស្នើសុំទៅតុលាការនៅក្នុងសប្តាហ៍នេះ ដើម្បីស្នើសូមឱ្យទម្លាក់ការចោទប្រកាន់លើកញ្ញា មាន ពេជ្ររីតា ពីបទចោទប្រកាន់ ដែលលោក ហេង សៀ បានប្តឹងថានាងបានលួចទូរស័ព្ទ។
ការដាក់ពាក្យស្នើសុំនេះ ដោយសារតែក្រុមមេធាវីមានភស្តុតាងជាក់ស្តែង ដែលបង្ហាញថា កញ្ញា រីតា មិនបានប្រព្រឹត្តទង្វើដូចដែលលោក ហេង សៀ បានចោទប្រកាន់នោះទេ។ កញ្ញា មាន ពេជ្យរីតា គឺជាជនរងគ្រោះក្នុងរឿងក្តីនៃការរំលោភសេពសន្ថវៈ។
លោកស្រី បញ្ជាក់ថា៖ «សួរថា មានភស្តុតាងអ្វី មានសំអាងហេតុអ្វីនោះ គឺធម្មតាទេ គឺយើងផ្អែកទៅលើអង្គហេតុអង្គច្បាប់ហើយ។ យើងបានដឹងហើយថា កញ្ញា រីតា គាត់បានបដិសេធរាល់ការចោទប្រកាន់ ព្រោះមើលទៅលើជីវភាពរបស់គាត់ និងស្ថានភាពរបស់គាត់ គាត់មិច នឹងអាចទៅលួចទូរស័ព្ទរបស់គេបាន»។
ជាមួយនឹងការរៀបរាប់នឹងស្ថានភាពកញ្ញា រីតា ដែលកំពុងវិលត្រឡប់មករកស្ថានភាពប្រក្រតីវិញ បន្ទាប់ពីត្រូវបានឃុំខ្លួន និងប៉ះពាល់ដល់ស្ថានភាពផ្លូវចិត្ត លោកស្រី មាស ស៊ីថន ឱ្យដឹងថា ក្រុមមេធាវីក៏ពុងតាមដានសំនុំរឿង ដែលក្រុមមេធាវីបានដាក់ពាក្យបណ្តឹងប្តឹងលោក ហេង សៀ ពីបទរំលោភសេពសន្ថវៈកាលពីពេលកន្លងទៅផងដែរ។
លោកស្រី បញ្ជាក់ថា៖ «តាមការអះអាងរបស់កូនក្តីយើង គឺជារឿងមួយផ្សេង។ ប៉ុន្តែតាមការអះអាងរបស់លោក ហេង សៀ គឺជារឿងមួយផ្សេងទៀត ។ ដូច្នេះ យើងមិនអាចឆ្លើយបានទេ ថា ករណីដែលលោក ហេង សៀ កំពុងរងរបួសនេះ គឺពិតឬអត់ទេ? ហើយចំណាក់ការលើបុគ្គល ហេង សៀ យ៉ាងណា ចំពោះពាក្យបណ្តឹងយើង គឺយើងមិនទាន់ដឹងទេយើងតាមដានបន្តទៀត»។
កញ្ញា មាន ពេជ្ររីតា ដែលជាពិធីការិនីទូរទស្សន៍ My TV និងជាអតីតបេក្ខនារី Miss Grand Cambodia វ័យ ២០ ឆ្នាំ ត្រូវបានលោក ហេង សៀ ដែលមានអាយុជិត ៦០ ឆ្នាំ មានងារជាឧញ្ញា ហើយជាថៅកែក្រុមហ៊ុនកញ្ចក់មួយ នៅក្នុងប្រទេសកម្ពុជាបានប្តឹង ពីបទលួចមានស្ថានទម្ងន់ទោស។
បន្ទាប់មក នាង ក៏ត្រូវបានតុលាការចោទប្រកាន់ និងបញ្ចូនទៅឃុំខ្លួន កាលពីថ្ងៃទី ១១ ឧសភា ហើយនៅថ្ងៃទី ១៣ ឧសភា តុលាការ ក៏សម្រេចដោះលែងរូបនាងឲ្យនៅក្រៅឃុំបណ្តោះអាសន្ន តាមពាក្យបណ្តឹងរបស់មេធាវីលោកនាយករដ្ឋមន្ត្រី ហ៊ុន សែន ចំនួន ៣ រូប។
លោក ប្លង់ សុផល អ្នកនាំពាក្យតំណាងអយ្យការអមសាលាដំបូងរាជធានីភ្នំពេញបានប្រាប់ភ្នំពេញប៉ុស្តិ៍នៅថ្ងៃទី ៣០ ឧសភាថា ការស្នើសុំឲ្យទម្លាក់ការចោទប្រកាន់លើកញ្ញា មាន ពេជ្ររីតា គឺជាសិទ្ធិសម្រេចរបស់ចៅក្រមស៊ើបសួរ ព្រោះសំនុំរឿងនេះស្ថិតក្នុងនីតិវិធីរបស់ចៅក្រមស៊ើបសួរ។
លោកមិនមានមតិយបល់យ៉ាងណាក្នុងករណីនេះនោះទេ ស្របពេលដែលលោកបានអះអាងថា វិវាទរបស់ភាគីទាំង ២ ដែលបានប្តឹងគ្នាទៅវិញទៅមកនេះ គឺកំពុងស្ថិតក្នុងដៃតុលាការ។
លោកបញ្ជាក់ថា៖ «រឿងស្នើសុំទម្លាក់ការចោទប្រកាន់នេះ គឺស្ថិតនៅលើសិទ្ធិសម្រេចរបស់ចៅក្រមស៊ើបសួរ ។ ខ្ញុំមិនបានឃើញសំណុំរឿង និងមិនបានដឹងថា មានភស្តុតាងអ្វីខ្លះពាក់ព័ន្ធនឹងករណីទាំងនេះ។ ជានិតិវិធីរបស់តុលាការ លោក នឹងសម្រេចហើយក្នុងពេលខាងមុខ»។
ភ្នំពេញប៉ុស្តិ៍មិនអាចស្វែងរកប្រភពទាក់ទងមេធាវីការពារក្តីលោក ហេង សៀ ដើម្បីសុំការអត្ថាធិប្បាយជុំវិញករណីទាំងនេះបានទេនៅថ្ងៃទី ៣០ ឧសភានេះ។
ប៉ុន្តែបើតាមលោក ស្រី មាស ស៊ីថន រហូតមកដល់ពេលនេះ ក្រុមមេធាវីលោកស្រីមិនដែលធ្លាប់បានជួបមេធាវីលោក ហេង សៀ នោះទេចាប់តាំងពីរឿងនេះត្រូវបានផ្ទុះឡើង៕
វីដេអូ៖