.jpg)
រថយន្តដែលបង្កគ្រោះថ្នាក់ចរាចរណ៍បណ្តាលឲ្យនិស្សិតស្រីឌុំ រីដា ស្លាប់ កាលពីថ្ងៃទី ២៦។ សហការី
ភ្នំពេញៈ ក្រោយការស្រាវជ្រាវរយៈពេល ២ ថ្ងៃ និងឈានដល់ស៊ើបសួរម្ចាស់រថយន្តបង្កគ្រោះថ្នាក់ចរាចរណ៍ ឈ្មោះយិន ង្គិច រួចមក ពីម្សិលមិញនេះ ក្រុមមន្ត្រីនគរបាលជំនាញបានកំណត់អំពីអត្តសញ្ញាណអ្នកបើកបររថយន្តបង្កហេតុនោះហើយ ស្របពេលក្រុមមេធាវីស្ម័គ្រចិត្តរបស់លោកនាយករដ្ឋមន្ត្រីហ៊ុន សែន កំពុងរៀបចំបណ្ដឹងប្រឆាំងនឹងអ្នកបើកបររូបនោះទៅតុលាការ ដើម្បីស្វែងរកយុត្តិធម៌ដល់ជនរងគ្រោះ។
មន្ត្រីនគរបាលជាន់ខ្ពស់ម្នាក់នៅស្នងការដ្ឋាននគរបាលរាជធានីភ្នំពេញ ប្រាប់ភ្នំពេញប៉ុស្តិ៍នៅថ្ងៃព្រហស្បតិ៍ ក្នុងលក្ខខណ្ឌមិនបញ្ចេញឈ្មោះថា អ្នកបើកបររថយន្តបង្កហេតុគ្រោះថ្នាក់ចរាចរណ៍បណ្ដាលឲ្យនិស្សិតស្រីឈ្មោះឌុំ រីដា ស្លាប់កាលពីរសៀលថ្ងៃទី ២៦ ខែមីនា ឆ្នាំ ២០១៩ នោះ ត្រូវបានកម្លាំងសមត្ថកិច្ចកំណត់អត្តសញ្ញាណបានហើយ គឺឈ្មោះ «យិន ម៉ាណា» អាយុ ១៧ ឆ្នាំ ជាកូនស្រីរបស់លោក យិន ង្គិច ម្ចាស់រថយន្តបង្កហេតុម៉ាក Range Rover ពាក់ស្លាកលេខភ្នំពេញ 2AF-777 នោះតែម្ដង។
មន្រ្តីនគរបាលជាន់ខ្ពស់រូបនោះបានបញ្ជាក់ថា៖ «ក្រោយពីការស៊ើបសួរអស់រយៈពេលជាច្រើនម៉ោង កាលពីថ្ងៃទី ២៧ ខែមីនា ឆ្នាំ ២០១៩ លោកយិន ង្គិច បានយល់ព្រមប្រាប់ការពិតថា កូនស្រីរបស់គាត់ឈ្មោះយិន ម៉ាណា ជាអ្នកយករថយន្តនោះទៅបើកបរ ដឹកមិត្តភក្ដិរបស់នាងដើរលេង។ ប៉ុន្តែគាត់មិនបានបញ្ជាក់ប្រាប់ថានៅពេលនេះ កូនស្រីរបស់គាត់នៅទីណានោះទេ»។
ទោះយ៉ាងណាក៏ដោយ ក្រុមសមត្ថកិច្ចកំពុងបន្តនីតិវិធី ក្នុងការស្រាវជ្រាវស្វែងរកជនសង្ស័យឈ្មោះយិន ម៉ាណា ដើម្បីឲ្យចូលខ្លួនមកឆ្លើយបំភ្លឺ នៅក្នុងសំណុំរឿងនេះ។
ដោយឡែកក្រុមមេធាវីស្ម័គ្រចិត្តរបស់លោកនាយករដ្ឋមន្ត្រីហ៊ុន សែន នៅព្រឹកថ្ងៃព្រហស្បតិ៍ ម្សិលមិញ បានរៀបចំពាក្យ បណ្ដឹងប្រឆាំងនឹងអ្នកបើកបររថយន្តបង្កគ្រោះថ្នាក់ចរាចរណ៍ខាងលើនេះទៅតុលាការ ដើម្បីស្វែងរកយុត្តិធម៌ជូនជនរងគ្រោះ និងក្រុមគ្រួសាររបស់នាងទៅតាមផ្លូវច្បាប់។
តំណាងក្រុមមេធាវីស្ម័គ្រចិត្តរបស់លោកនាយករដ្ឋមន្ត្រីហ៊ុន សែនម្នាក់ ដែលត្រូវបានក្រុមគ្រួសារនិស្សិតស្រីរងគ្រោះ ឌុំ រីដា ផ្ដល់សិទ្ធិនៅក្នុងការការពារក្ដីក្នុងសំណុំរឿងគ្រោះថ្នាក់ចរាចរណ៍នេះ គឺ លោកសុខ អួង បានប្រាប់ភ្នំពេញប៉ុស្តិ៍ថា៖ «នៅពេលនេះយើងបានរៀបចំពាក្យបណ្ដឹងរួចរាល់ហើយ។ យើងនឹងដាក់វាទៅតុលាការក្រោយពីក្រុមគណៈកម្មការប្រតិបត្តិរបស់យើងពិភាក្សាអំពីខ្លឹមសារច្បាប់និងអនុម័តរួច»។
លោកអ៊ាង សុផល្លែត ប្រធានកិត្តិយសសាកលវិទ្យាល័យ ផារ៉ាហ្គន (អតីតសាកលវិទ្យាល័យហ្សាមេន) ដែលកំពុងបំពេញបេសកកម្មការងារនៅក្នុងរដ្ឋធានីប៉េកាំងប្រទេសចិន បានប្រាប់បណ្ដាញសារព័ត៌មាន Fresh News កាលពីថ្ងៃពុធថា លោកមានក្ដីក្ដុកក្តួលជាពន់ពេក បន្ទាប់ពីទទួលបានដំណឹងអំពីមរណភាពរបស់ កញ្ញាឌុំ រីដា ដែលជានិស្សិតឆ្នើមប្រចាំសាកលវិទ្យាល័យ «ផារ៉ាហ្គន» ដែលបង្កឡើងដោយអ្នកបើកបររថយន្តទំនើបខាងលើនោះ។
លោក សុផល្លែត បានថ្លែងថា៖ «មរណភាពរបស់កញ្ញា ឌុំ រីដា មិនត្រឹមតែជាការបាត់បង់កូនជាទីស្រឡាញ់ ប្រកបដោយគន្លងធម៌របស់ក្រុមគ្រួសារទេ តែក៏ជាការបាត់បង់និស្សិតដ៏ល្អរបស់សាលា និងបាត់បង់កុលធីតាជាធនធានដ៏ថ្លៃថ្លារបស់ជាតិផងដែរ»។
ជាមួយគ្នានេះ លោកក៏បានអំពាវនាវ ដល់គ្រប់សមត្ថកិច្ចពាក់ព័ន្ធទាំងអស់ ស្វែងរកជនបង្កគ្រោះថ្នាក់ពិតប្រាកដ ហើយយកមកផ្តន្ទាទោសទៅតាមច្បាប់ ដើម្បីផ្ដល់យុត្តិធម៌ដល់ជនរងគ្រោះ និងក្រុមគ្រួសាររបស់នាង៕
