.jpg)
លោក កឹម សុខា នៅសាលាដំបូងរាជធានីពីខែមុន។ ហេង ជីវ័ន
ភ្នំពេញៈ ក្រុមមេធាវីលោក កឹម សុខា បានស្នើឱ្យក្រុមប្រឹក្សាជំនុំជម្រះ ច្រានចោលភ័ស្ដុតាងថ្មីដែលបានដាក់ដោយព្រះរាជអាជ្ញា ខណៈពួកគេអះអាងថា ការដាក់ភ័ស្ដុតាងនេះគឺធ្វើឡើងខុសនីតិវិធី។ ព្រះរាជអាជ្ញាបានដាក់ភ័ស្ដុតាងដើម្បីឆ្លើយតបទៅនឹងភ័ស្ដុតាងវីដេអូដោះបន្ទុករយៈពេល ១ ម៉ោង ដែលបានដាក់មកតុលាការដោយមេធាវីលោក កឹម សុខា កាលពីពេលកន្លងមក។
កាលពីថ្ងៃ ២៦ ខែកុម្ភៈ តំណាងអយ្យការបានដាក់ភ័ស្ដុតាងដែលជាឃ្លីបវីដេអូខ្លីៗចំនួន ៧ រួមទាំងប្រតិចារិកទៅឱ្យក្រុមប្រឹក្សាជំនុំជម្រះពិចារណាទទួលយក។ វីដេអូភ័ស្ដុតាងទាំងនេះភាគច្រើនត្រូវបានតំណាងអយ្យការប្រកាសនៅក្នុងសវនាការថា គឺបង្ហាញពីការកៀរគរកម្លាំងធ្វើបាតុកម្មនៅទីលានប្រជាធិបតេយ្យ និងនៅលើផ្លូវវេងស្រេងដែលមានបំណងផ្ដួលរំលំរដ្ឋាភិបាល រួមទាំងវីដេអូបង្ហាញពីការត្រូវរ៉ូវគ្នាជាមួយបរទេសជាដើម។
ទោះជាយ៉ាងណាក្រុមមេធាវីការពារក្ដីឱ្យលោក កឹម សុខា បាននាំគ្នាជំទាស់ការដាក់ភ័ស្ដុតាងនេះដោយអះអាងថា យោងតាមមាត្រា ៣២១ នៃក្រមព្រហ្មទណ្ឌគឺនៅពេលសំណុំរឿងចូលដល់ដំណាក់កាលជំនុំជម្រះគឺមានន័យថា សំណុំរឿងនោះត្រូវមានការស៊ើបអង្កេត និងមានភ័ស្ដុតាងគ្រប់គ្រាន់ហើយដោយមិនមានវិមតិសង្ស័យទៀតទេ ដូចនេះមិនមានច្បាប់ណាមួយចែងថា តំណាងអយ្យការអាចដាក់ភ័ស្ដុតាងបន្ថែមឡើយ។
លោក ចាន់ ចេន មេធាវីម្នាក់របស់លោក សុខា លើកឡើងថា ភ័ស្ដុតាងដែលបញ្ជូនមកជំនុំជម្រះគឺត្រូវឱ្យមានលើសពីវិមតិសង្ស័យ ហើយប្រសិនបើសំណុំរឿងនៅមានវិមតិសង្ស័យ គឺមានន័យថា លោក កឹម សុខា គ្មានពិរុទ្ធ ហើយតុលាការត្រូវលើកលែងការចោទប្រកាន់មកលើលោក កឹម សុខា។
លោកថា៖ «ខ្ញុំទើបតែឮថា ព្រះរាជអាជ្ញាដាក់ភ័ស្ដុតាងនៅពេលជំនុំជម្រះ។ អត់ដែលមានអយ្យការដាក់ភ័ស្ដុតាងអ៊ីចឹងទេ! អយ្យការមកការពារដីកាសន្និដ្ឋានស្ថាពររបស់ខ្លួន មិនមែនមកតាមដាក់ភ័ស្ដុតាងបន្ថែមទេ»។
ចំណែកលោកស្រី ម៉េង សុធាវី មេធាវីម្នាក់ទៀតរបស់លោក សុខា បានលើកឡើងដែរថា ព្រះរាជអាជ្ញាមិនមែនជាភាគីនៅក្នុងសំណុំរឿងឡើយ ប៉ុន្តែព្រះរាជអាជ្ញារួមទាំងក្រុមប្រឹក្សាជំនុំជម្រះគឺគ្រាន់តែជាសមាសភាពនៅក្នុងការជំនុំជម្រះប៉ុណ្ណោះ។ លោកស្រីបន្តថា តាមក្រមព្រហ្មទណ្ឌមាត្រា ៣២១ គឺមានតែភាគីជនជាប់ចោទ ឬជនរងគ្រោះប៉ុណ្ណោះ ទើបមានសិទ្ធិដាក់ភ័ស្ដុតាងសម្រាប់ដោះបន្ទុក។
លោកស្រីថា៖ «ដីកាសន្និដ្ឋានស្ថាពរគឺមានន័យថា ការស៊ើបអង្កេតគ្រប់គ្រាន់ហើយ និងមានភ័ស្ដុតាងគ្រប់គ្រាន់ហើយសម្រាប់ដាក់បន្ទុកលើលោក កឹម សុខា គឺគ្មានវិមតិសង្ស័យទៀតទេ ហើយបើអយ្យការដាក់ភ័ស្ដុតាងនៅពេលជំនុំជម្រះនេះមានន័យថា ការចោទប្រកាន់លើលោក កឹម សុខា នៅមានវិមតិសង្ស័យដែលត្រូវតែទម្លាក់បទចោទប្រកាន់វិញ»។
ប៉ុន្តែលោក ប្លង់ សុផល ព្រះរាជអាជ្ញាបានឆ្លើយតបថា តាមមាត្រា ៣២១ គឺបានប្រើពាក្យ «គេ» ដែលអាចដាក់ភ័ស្ដុតាងដោយសេរី ហើយមិនបានសរសេរបញ្ជាក់ថា ព្រះរាជអាជ្ញាមិនអាចដាក់ភ័ស្ដុតាងនោះឡើយ។ លោកបញ្ជាក់ថា ការដាក់ភ័ស្ដុតាងនេះគឺដើម្បីឆ្លើយតបទៅនឹងភ័ស្ដុតាងដោះបន្ទុក ដែលមិនមាននៅក្នុងសំណុំរឿងដែលត្រូវបានចៅក្រមស៊ើបសួរបានបញ្ជូនមកជំនុំជម្រះប៉ុណ្ណោះ។
លោកថា៖ «មេធាវីមិនដែលធ្វើជាព្រះរាជអាជ្ញាទេ។ អ៊ីចឹង! មិនបាច់មកបង្រៀនព្រះរាជអាជ្ញាទេ។ មាត្រា ៣២១ គឺភាគីអាចដាក់ភ័ស្ដុតាងដោយសេរី ប៉ុន្តែអត់មានសរសេរថា ព្រះរាជអាជ្ញាមិនអាចដាក់ឯណា! ក្រុមមេធាវីការពារក្ដីឱ្យជនជាប់ចោទ កឹម សុខា ធ្វើការបកស្រាយលើសពីច្បាប់»។
ជាមួយគ្នានេះលោក លី ច័ន្ទតុលា មេធាវីដើមបណ្ដឹងរដ្ឋប្បវេណីរដ្ឋាភិបាលក៏បានអះអាងដែរថា នៅក្នុងដំណាក់កាលជំនុំជម្រះគឺភាគីមេធាវីការពារក្ដីឱ្យរដ្ឋាភិបាល មេធាវីការពារក្ដីឱ្យជនជាប់ចោទ និងព្រះរាជអាជ្ញា គឺមានសិទ្ធិដាក់ភ័ស្ដុតាងស្មើភាពគ្នា។
ជុំវិញបញ្ហានេះលោក កុយ សៅ ប្រធានក្រុមប្រឹក្សាជំនុំជម្រះបានប្រកាសនៅក្នុងសវនាការរយៈពេល ១ ព្រឹកកាលពីថ្ងៃម្សិលមិញថា ក្រុមប្រឹក្សានឹងប្រកាសនៅពេលសវនាការលើកក្រោយថា តើទទួល ឬមិនទទួលភ័ស្ដុតាងនេះ ហើយថា តើការដាក់ភ័ស្ដុតាងដោយក្រុមព្រះរាជអាជ្ញាស្របច្បាប់ ឬមិនស្របច្បាប់។
លោក កុយ សៅ ក៏បានប្រកាសដែរថា សវនាការសំណុំរឿងសន្ទិដ្ឋភាពជាមួយបរទេសរបស់លោក សុខា ដែលពិភាក្សាឈានដល់អង្គហេតុការរួបរួមគ្នារវាងលោក កឹម សុខា និងលោក សម រង្ស៊ី ដើម្បីបង្កើតអតីតគណបក្សសង្គ្រោះជាតិនឹងបន្តធ្វើនៅសប្ដាហ៍ទី ២ ខែមីនា គឺនៅថ្ងៃទី ១១ ដល់ថ្ងៃទី ១២៕
