.jpg)
ក្រុមមេធាវីរបស់លោក កឹម សុខា នាពេលកន្លងមក។ ហ្វេសប៊ុក
ភ្នំពេញៈ ក្រុមមេធាវីលោក កឹម សុខា ប្រធានអតីតគណបក្សសង្គ្រោះជាតិ បានរិះគន់លោក សម រង្ស៊ី ជាថ្មីម្តងទៀត ចំពោះការយកលោក កឹម សុខា មកភ្នាល់ ដែលពួកគេថា ទំនងនឹងចាញ់ក្នុងការភ្នាល់នេះ។
មេធាវីការពារក្តី ៣ នាក់ ក្នុងចំណោម ៤ នាក់របស់លោក កឹម សុខា កាលពីម្សិលមិញបានរិះគន់លោក សម រង្ស៊ី ប្រធានស្តីទីនៃអតីតគណបក្សសង្គ្រោះជាតិ ចំពោះភាពទំនងជាមិនវិលត្រឡប់មកប្រទេស កម្ពុជា វិញនៅពេលដល់កាលកំណត់នៃការភ្នាល់គ្នា។ ពួកគេបានរិះគន់លោក សម រង្ស៊ី ចំពោះការយកលោក កឹម សុខា ទៅភ្នាល់ជាមួយលោកនាយករដ្ឋមន្រ្តី ហ៊ុន សែន។
លោកស្រីមេធាវី ម៉េង សុភារី បានសរសេរនៅលើហ្វេសប៊ុករបស់លោកស្រី កាលពីម្សិលមិញដោយចោទសួរថា ហេតុអ្វីលោក រង្ស៊ី ផ្តួចផ្តើមឲ្យមានការភ្នាល់នេះ។ លោកស្រីបានថ្លែងថា មេធាវីរបស់លោក កឹម សុខា បានដឹងរួចហើយ តាំងពីដំបូងអំពីលទ្ធផលនៃការភ្នាល់នេះ ដែលបានជំរុញពួកគេ សរសេរលិខិតអំពាវនាវកុំឲ្យមានការភ្នាល់នេះ។
លោកស្រីបន្តថា ការអំពាវនាវឲ្យមានការលុបចោលការភ្នាល់នេះ ធ្វើឡើងដោយមានគោលបំណងជួយលោក រង្ស៊ី ឲ្យចៀសផុតពីការស្លាប់ ឬជាប់ពន្ធនាគារ ខណៈលោក សម រង្ស៊ី កាលពីពេលថ្មីៗនេះ បានអះអាងថា លោកនឹងប្រឈមមុខ ប្រសិនបើលោកត្រឡប់មកវិញ ហើយវានឹងមិនធ្វើឲ្យមានផលប៉ះពាល់ណាមួយលើលោក កឹម សុខា ទេ។ ប៉ុន្តែលោកស្រី សុភារី បានថ្លែងថា អ្នកគាំទ្រមួយចំនួនរបស់លោក សម រង្ស៊ី មិនយល់អំពីចេតនានោះ ប៉ុន្តែបែរជាប្រមាថក្រុមមេធាវី។
លោកស្រីបានសរសេរថា បើថាស្លាប់ និងជាប់គុក វាអត់ប្រយោជន៍ «តើខំប្រឹងភ្នាល់យ៉ាងខែងរែងអី ម្ល៉េះ។ មេធាវីលោក សុខា ដឹងពីលទ្ធផលការភ្នាល់ជាមុនស្រេចហើយ ទើបបានចេញលិខិតសុំឲ្យលុបចោលការភ្នាល់ គឺដើម្បីផ្តល់កិត្តិយសជូនលោក មិនចង់ឲ្យលោកក្លាយជាមនុស្សក្បត់សន្យា មិនចង់ឲ្យលោកស្លាប់ ឬជាប់គុកនិងមិនចង់ឲ្យប៉ះពាល់ដល់សិទ្ធិរបស់លោក កឹម សុខា តែមនុស្សផ្កាប់មុខរបស់លោក (សម រង្ស៊ី ) មិនយល់ការណ៍ និងមិនយល់ពីចេតនាល្អនេះសោះ មានតែជេរប្រទេច»។
ហ្វេសប៊ុកលោកស្រីសរសេរបន្តទៀតថា៖ «ពួកយើងខ្ញុំខិតខំអត់ធ្មត់ណាស់សូមចាំថា ការអត់ធ្មត់មានដែនកំណត់ ហើយការឈឺចាប់ នឹងធ្វើឲ្យមនុស្សលែងដូចដើម។ ដល់វេលាត្រូវអនុវត្តសន្យា មិនហ៊ានមក បែរជានិយាយបន្តុះបង្អាប់ការលះបង់របស់អ្នកដទៃ ដើម្បីលើកតម្លៃខ្លួនឲ្យខ្ពស់ និងដើម្បីឲ្យពលរដ្ឋភ្លេចសន្យារបស់លោក។ ចង់ខ្ពស់ក៏ខ្ពស់ចុះ ខ្ញុំអបអរសាទរ តែរហូតមកទេ ប៉ុន្តែកុំជាន់គេ ដើម្បីឡើងខ្ពស់ខ្លួនឯង អាណិតអ្នកស្លូតត្រង់ផង»។
សារដដែលសរសេរទៀតថា ឥឡូវ ដើម្បីកុំឲ្យគេថា លោកសម រង្ស៊ី អន់ និងដើម្បីកុំឲ្យអ្នកគាំទ្រការភ្នាល់របស់លោកអស់សង្ឃឹម ដែលខំប្រឹងជេរក្រុមមេធាវីលោក កឹម សុខា ដើម្បីការពារការភ្នាល់នោះ លោក រង្ស៊ី អាចអនុវត្តការសន្យារបស់លោកបាន «បើទោះបីជាលោកត្រូវស្លាប់ ឬជាប់គុក ខ្ញុំនិងពលរដ្ឋជាច្រើនអតិបរមានឹងចាត់ទុកលោកជាវីរបុសស្នេហាជាតិ មិនដូចលោកគិតទៅលើការលះបង់របស់អ្នកដទៃនៅពេលនេះទេ»។
លោក ផាន់ ច័ន្ទស័ក្តិ ដែលជាមេធាវីម្នាក់ទៀត ក៏បានថ្លែងនៅក្នុងហ្វេសប៊ុកធ្វើការវាយប្រហារលោក សម រង្ស៊ី ផងដែរ ដោយសរសេរថា៖ «បើអណ្តាតលោក មានពិសរបៀបនេះ តើថ្ងៃក្រោយ យើងអាចអង្គុយមើលមុខគ្នាបានដោយរបៀបណា? តើមានមនុស្សណាខ្លះ ដែលមានកម្លាំងកាយកម្លាំងចិត្តហ៊ានលះបង់ធ្វើការងារ ឲ្យគណបក្សកើត?»។
លោក ច័ន្ទស័ក្តិ ដែលជាមនុស្សម្នាក់ក្នុងចំណោមមនុស្ស ១១៨ នាក់ ដែលត្រូវបានតុលាការដាក់បម្រាមធ្វើនយោបាយបានថ្លែងថា ប្រសិនបើលោក រង្ស៊ី មិនទទួលខុសត្រូវចំពោះការភ្នាល់នេះ លោកនឹងត្រូវគេដាក់ឈ្មោះថា ជាអ្នកនយោបាយគ្មានតម្លៃ។
លោកបានចោទសួរថា៖ «តើ សម រង្ស៊ី និង កឹម សុខា ជាមនុស្សតែមួយស្អីទៅ បើការលះបង់របស់ កឹម សុខា ត្រូវលោក សម រង្ស៊ី មើលមិនឃើញហើយថែមទាំងជាន់ចោលទៀតមិនឲ្យតម្លៃស្មើការរត់របស់លោកផងហ្នឹង! បើថាមនុស្សតែមួយ ទាល់តែអ្វីៗទាំងអស់ ឲ្យតម្លៃស្មើគ្នា»។
លោក ចាន់ ចេន មេធាវីម្នាក់ទៀត របស់លោក សុខា ក៏មានទស្សនៈស្រដៀងគ្នា ដោយរិះគន់លោក សម រង្ស៊ី ចំពោះការភ្នាល់នេះ។ លោកបានថ្លែងថា លោកមិនគាំទ្រការផ្តួចផ្តើមឲ្យមានបញ្ហាម្តងហើយម្តងទៀតទេ។ កម្ពុជាត្រូវតែរួបរួមគ្នា ស្វែងរកដំណោះស្រាយ សម្រាប់ជាតិនិងកសាងអនាគតសម្រាប់មនុស្សជំនាន់ក្រោយ។
លោកថ្លែងថា៖ «តាំងពីដំបូង យើងជាមេធាវី មិនគាំទ្រការភ្នាល់នេះទេ។ កូនក្តីរបស់ខ្ញុំ មិនគួរជាកម្មវត្ថុនៃការភ្នាល់គ្នាទេ។ ទី១ វាប៉ះពាល់សេរីភាព និងកិត្តិយសរបស់គាត់។ កូនក្តីរបស់ខ្ញុំ មិនមែនជាមាន់ ឬវត្ថុសម្រាប់ភ្នាល់ទេ»។
លោកបន្ថែមថា លើសពីនេះ វាក៏ធ្វើឲ្យប៉ះពាល់នីតិវិធីរបស់តុលាការផងដែរ។
លោកបន្តថា៖ «ប្រសិនបើគាត់ចង់ខ្ពស់យើងឲ្យតម្លៃ ប៉ុន្តែគាត់ មិនគួរជាន់ក្បាលអ្នកដទៃ ពន្លិចក្នុងភក់ និងធ្វើឲ្យខ្លួនឯងខ្ពស់ទេ។ ប៉ុន្តែនៅទីបំផុត មិនទទួលខុសត្រូវ»។
អ្នកវិភាគនយោបាយ លោក ឡៅ ម៉ុងហៃ ថ្លែងថា លោក សម រង្ស៊ី បរាជ័យមួយទៀតហើយ ក្នុងការគោរពតាមការសន្យារបស់គាត់។
លោកបន្តថា៖ «មានការសង្ស័យតិចតួច ដែលលោក កឹម សុខា មិនសប្បាយចិត្ត ចំពោះការភ្នាល់អំពីសេរីភាពរបស់គាត់។ ការភ្នាល់នេះត្រូវបានរិះគន់ពីថ្ងៃដែលនាយករដ្ឋមន្រ្តីរបស់យើងបានចូលរួម»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិ នៅរាជបណ្ឌិត្យសភាកម្ពុជា បានថ្លែងថា លោក រង្ស៊ី មានប្រវត្តិរត់គេចពីនីតិវិធីតុលាការ។ ប៉ុន្តែគាត់តែងតែមិនគោរពតាមការសន្យាត្រឡប់មកកម្ពុជាវិញ។
លោកថ្លែងថា មិនមែនតែមេធាវីរបស់លោក កឹម សុខា ទេ ដែលខកចិត្ត ប៉ុន្តែអ្នកគំាទ្រមួយចំនួនរបស់លោក រង្ស៊ី ក៏មានអារម្មណ៍ដូចគ្នាដែរ។ ពួកគេតាមគាត់តាំងពីឆ្នាំ ១៩៩៥ ហើយអ្នកខ្លះប្រឈមនឹងបញ្ហា ហើយនៅទីបំផុត លោកសម រង្ស៊ី បានចាកចេញពីពួកគេដោយគេចខ្លួនទៅបរទេស។
លោក ភា ក៏បានចោទជាសំណួរអំពីលោក រង្ស៊ី យកជំហានផ្សេងគ្នាពីអតីតនាយករដ្ឋមន្រ្តីថៃ លោក ថាក់ស៊ីន ស៊ីណាវ៉ាត្រា និងប្អូនស្រី យីងឡាក់ ស៊ីណាវ៉ាត្រា ដែលមិនដែលអំពាវនាវឲ្យសហគមន៍បរទេសដាក់សម្ពាធលើប្រទេស ថៃ។
លោកថ្លែងថា៖ «ប្រសិនបើយើងនិយាយអំពីគ្រួសារស៊ីណាវ៉ាត្រា ទំាងបងប្រុស និងប្អូនស្រី បានឈ្នះឆ្នោតហើយយោធាបានបំផ្លាញពួកគេម្តងហើយម្តងទៀត។
ប៉ុន្តែពួកគេមិនដែលអំពាវនាវឲ្យអន្តរជាតិដាក់សម្ពាធលើប្រទេសរបស់ពួកគេទេហើយពួកគេមិនដែលនិយាយអាក្រក់អំពីប្រទេសរបស់ពួកគេដូចលោក សម រង្ស៊ី ដែរ។ ប្រតិកម្មរបស់មេធាវីលោក កឹម សុខា ពិតណាស់ ស្រាល»។
លោកបានថ្លែងថា៖ «ចំពោះមនុស្សដូចគាត់ ខ្ញុំមិនដឹងយកពាក្យអ្វីស័ក្តិសមនឹងគាត់ចំពោះអំពើរបស់គាត់»។
លោក ភា បន្តថា ពាក្យ «សម រង្ស៊ី និង កឹម សុខា ជាមនុស្សតែមួយ» ត្រូវបានប្រើដើម្បីបិទបាំងការបែកបាក់របស់គណបក្សសង្គ្រោះជាតិ រវាងក្រុមលោក កឹម សុខា និងក្រុម លោក សម រង្ស៊ី។
លោកបានថ្លែងថា៖ «កឹម សុខា និង សម រង្ស៊ី ជាមនុស្សផ្សេងគ្នា ហើយពួកគេមានយុទ្ធសាស្រ្តផ្សេងគ្នា និងទិសដៅផ្សេងគ្នា»៕
