ភ្នំពេញៈ ក្រុមយុវជននៃសមាគមសម្ព័ន្ធនិស្សិតបញ្ញវន្តខ្មែរនៅតែអះអាងថា នឹងទៅដាក់កម្រងផ្កានៅស្ថានីយប្រេងឥន្ធនៈ កាល់តិចជិតស្ដុបបូកគោរាជធានីភ្នំពេញនាថ្ងៃខួបគម្រប់ ៣ ឆ្នាំ នៃឃាតកម្ម លោក កែម ឡី ថ្ងៃទី ១០ ខែ កក្កដា ខាងមុខ បើទោះបីមានបម្រាមពីសាលារាជធានីភ្នំពេញក៏ដោយ។ នេះបើតាមលោក មួង សូនី ប្រធានសមាគមសម្ព័ន្ធនិស្សិតបញ្ញវន្តខ្មែរកាលពីម្សិលមិញ។
លោក មួង សូនី បានថ្លែងថា ការទៅដាក់កម្រងផ្កានៅកន្លែងគេធ្វើឃាត លោក កែម ឡី នេះគឺដើម្បីរំឭកខួបគម្រប់៣ឆ្នាំនេះ មិនធ្វើឲ្យប៉ះពាល់សណ្ដាប់ធ្នាប់សាធារណៈ បំផ្លាញអ្នកនេះ បំផ្លាញអ្នកនោះ ទេ។
លោកបន្តថា៖ «វាធម្មតាមែនទែន ហើយគ្នាយើងដែលគ្រោងទៅចូលរួមដាក់កម្រងផ្កានេះមានមិនច្រើនទេ តែ ៣-៤ នាក់ប៉ុណ្ណោះ ហើយប្រើពេលតែ ១៥ នាទីប៉ុណ្ណោះ។ អ៊ីចឹងពួកខ្ញុំគឺនៅតែទៅ ហើយពេលចេញពីដាក់កម្រងផ្កា យើងនឹងបន្ដទៅធ្វើបុណ្យជូនលោកគ្រូ កែម ឡី នៅស្រុកកំណើត ដោយនិមន្តព្រះសង្ឃ ៦ អង្គ»។
ជុំវិញការបដិសេធពីសាលារាជធានីភ្នំពេញមិនឲ្យជួបជុំគ្នានេះ លោក មួង សូនី បានអះអាងថា ខាងអាជ្ញាធរលើកហេតុផលថា ជាកន្លែងសាធារណៈឯកជនដែលនេះជារឿងមិនសមហេតុផល។
លោកថា៖ «បើហ្គារ៉ាស់សាំងនោះ ជាកន្លែងសាធារណៈឯកជន សាលារាជធានីភ្នំពេញមិនគួរមានសិទ្ធិសម្រេច ឬមិនសម្រេចទេ។ ព្រោះកន្លែងនេះ ជាកន្លែងឯកជន សាលារាជធានីភ្នំពេញគួរតែនិយាយថា ឲ្យពួកយើងទៅសុំម្ចាស់ហ្គារ៉ាស់សាំងនោះដោយខ្លួនឯង វាសមហេតុផលជាង។ប៉ុន្ដែបើប្រើភាសាមិនអនុញ្ញាតទៅហើយនោះ វាមិនស៊ីគ្នាជាមួយហេតុផលដែលគាត់លើកឡើងទេ»។
កាលពីថ្ងៃទី ១ ខែ កក្កដា សមាគមមួយនេះ បានដាក់លិខិតមួយទៅសាលារាជធានីភ្នំពេញដោយស្នើសុំជួបជុំគ្នាចំនួន ១០ នាក់ ដើម្បីដាក់កម្រងផ្កាជូនវិញ្ញាណក្ខន្ធលោក កែម ឡី នៅស្ថានីយប្រេងឥន្ធនៈកាល់តិច នៅថ្ងៃទី ១០ ខែ កក្កដា ឆ្នាំ ២០១៩ នាវេលាម៉ោង ៩ ព្រឹក នឹងបញ្ចប់វិញនៅម៉ោង ១១ ព្រឹក។
ប៉ុន្តែ៣ថ្ងៃក្រោយមក គឺនៅថ្ងៃទី ៤ ខែ កក្កដា សាលារាជធានីភ្នំពេញបានចេញលិខិតបដិសេធដោយលើកហេតុផលថា ទីតាំងនោះ ស្ថិតក្រោមការគ្រប់គ្រងរបស់ឯកជន។ ប៉ុន្ដែបានតម្រូវឲ្យក្រុមយុវជនទៅធ្វើពិធីនេះនៅផ្ទះគ្រួសារសពឬនៅស្នាក់ការរបស់ខ្លួនវិញ។
ក្រៅពីលិខិតបដិសេធនេះ លោក ម៉េត មាសភក្ដី អ្នកនាំពាក្យសាលារាជធានីភ្នំពេញ បានបញ្ជាក់ប្រាប់ភ្នំពេញប៉ុស្ដិ៍កាលពីម្សិលមិញថា៖ «ក្នុងការធ្វើពិធីសាសនាក្នុងន័យសម្រាប់រំឭកឬក្នុងន័យសម្រាប់ឧទ្ទិសអីផ្សេងៗយើងមានទីតាំងវត្ដអារាមសម្រាប់ធ្វើពិធីទាំងនេះ»។
តាមលិខិតបដិសេធរបស់សាលារាជធានីភ្នំពេញបញ្ជាក់ថា៖ «ក្នុងករណីមានការជួបជុំរៀបចំពិធី នៅទីតាំងខាងលើ ឬតាមដងផ្លូវសាធារណៈដែលបណ្ដាលឲ្យប៉ះពាល់ដល់សន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ ឬធ្វើសកម្មភាពខុសពីគោល បំណងនៃការប្រារព្ធពីធីខាងលើនោះលោកប្រធាន (សមាគមសម្ព័ន្ធនិស្សិតបញ្ញវន្តខ្មែរ) ត្រូវទទួលខុសត្រូវចំពោះមុខច្បាប់ជាធរមាន»។
អ្នកវិភាគនយោបាយ និងសង្គម លោក ឡៅ ម៉ុងហៃ កាលពីម្សិលមិញបានបដិសេធបកស្រាយពីបម្រាមរបស់សាលារាជធានីភ្នំពេញ ប៉ុន្ដែលោកបានប្រាប់ថា លោកនឹងទៅចូលរួមប្រារព្ធខួបនេះ ដោយមានការធ្វើកែវអនុស្សាវរីយ៍ដែលមានភ្ជាប់ជាមួយរូបថតលោក កែម ឡី សម្រាប់ប្រារព្ធខួបនេះផងដែរ។
លោកបន្តថា៖ «ខ្ញុំផ្ទាល់ បានធ្វើកែវអនុស្សាវរីយ៍ លោបណ្ឌិត កែម ឡី នៅបុណ្យខួបនេះ។ កែវនេះ ដាក់លក់ដើម្បីយកលុយទៅចូលបុណ្យ កែវ ១ តម្លៃ ៦ ដុល្លារ ដោយមានរូបលោកបណ្ឌិត កែម ឡី ភ្ជាប់ជាមួយ។ ខ្ញុំនឹងទៅចូលរួមបុណ្យខួបជាមួយក្រុមញាតិគាត់នៅស្រុកកំណើតលោក កែម ឡី នៅថ្ងៃរសៀលទី ១០ ខែ កក្កដា។ ខ្ញុំគ្រោងនិយាយផ្ទាល់បង្ហោះតាមហ្វេសប៊ុកអំពីគុណសម្បត្តិរបស់លោក បណ្ឌិត កែម ឡី ទំនាក់ទំនងរវាងគាត់ជាមួយខ្ញុំ និងដំណើរការរកយុត្តិធម៌ជូនគាត់»។
គួរបញ្ជាក់ថា លោក កែម ឡី ត្រូវបានខ្មាន់កាំភ្លើងបាញ់សម្លាប់នៅហាងស្តាម៉ាតក្នុងស្ថានីយប្រេងឥន្ធនៈកាល់តិចជិតស្តុបបូកគោ កាលថ្ងៃទី ១០ ខែ កក្កដា ឆ្នាំ ២០១៦។ ក្រោយមានឃាតកម្មនេះ បុរសម្នាក់ ឈ្មោះ អឿត អាង ហៅ «ជួបសម្លាប់» ត្រូវបានចាប់ខ្លួន ហើយ ក្រោយមក ត្រូវតុលាការកាត់ទោសឱ្យជាប់ពន្ធនាគារ ១ ជីវិត៕