.jpg)
លោក កឹម សុខា។ ហុង មិនា
ភ្នំពេញៈ អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិដែលមានទំនោរទៅរកលោក កឹម សុខា រួមទាំងកូនស្រីលោក កឹម សុខា ផងបានប្រកាសមិនទទួលស្គាល់សន្និសីទពិភពលោករបស់អតីតបក្សប្រឆាំង ដែលតែងតាំងលោក សម រង្ស៊ី ជា «ប្រធានស្ដីទី» ដោយចោទថាជា «បក្សប្រហារជាអ្វីដែលអតីតមន្ត្រីដែលស្និទ្ធនឹងលោក សម រង្ស៊ី ចាត់ទុកការចោទប្រកាន់នេះថាធ្វើឡើងពីមនុស្សដែលមានបំណង «បំបែកបំបាក់» គណបក្សសង្គ្រោះជាតិប៉ុណ្ណោះ។
ការខ្វែងគំនិតគ្នារវាងថ្នាក់ដឹកនាំបក្សដែលមានទំនោរទៅរកលោក កឹម សុខា និងលោក សម រង្ស៊ី នេះបានផ្ទុះឡើងនៅពេលដែលលោក សម រង្ស៊ី ប្រធានចលនាសង្គ្រោះជាតិ (CNRM) ត្រូវបានអនុម័តដោយសន្និសីទនៃអតីតគណបក្សប្រឆាំងនៅក្រៅប្រទេសសម្រេចជ្រើសរើសលោកជា «ប្រធានស្ដីទី» គណបក្សរហូតដល់លោក កឹម សុខា ដែលកំពុងស្ថិតក្រោមការត្រួតពិនិត្យតាមផ្លូវតុលាការលើសំណុំរឿង «ក្បត់ជាតិ» មានសេរីភាពពេញលេញឡើងវិញ។ សន្និសីទដែលធ្វើឡើងលើទឹកដីអាមេរិកកាលពីសប្ដាហ៍មុន មានការចូលរួមពីថ្នាក់ដឹកនាំបក្សនៅទូទាំងពិភពលោក ប៉ុន្តែអ្នកដែលគាំទ្រលោក កឹម សុខា បានធ្វើពហិការ។
លោក ម៉ៅ មុនីវណ្ណ អតីតតំណាងរាស្ត្រអតីតគណបក្សប្រឆាំងថ្លែងប្រាប់ភ្នំពេញប៉ុស្តិ៍កាលពីម្សិលមិញពីក្រៅប្រទេសមកថា លោកនឹងមិនទទួលស្គាល់ការតែងតាំងលោក សម រង្ស៊ី ជាប្រធានស្ដីទីគណបក្សតាមរយៈសន្និសីទនៅអាមេរិកនោះទេ ដោយសារតែធ្វើឡើង «រំលោភលើលក្ខន្តិកៈគណបក្ស»។
លោកថ្លែងថា៖ «នៅក្នុងបក្សនីមួយៗមានច្បាប់មានក្រឹត្យក្រម មានលក្ខន្តិកៈ និងបទបញ្ជាផ្ទៃក្នុងដូច្នេះការធ្វើអ្វីក៏ដោយត្រូវផ្អែកទៅលើលក្ខន្តិកៈ និងបទបញ្ជាផ្ទៃក្នុងរបស់គណបក្ស។ ការធ្វើដែលខុសឆ្គងខ្ញុំមិនគាំទ្រទេ។ យើងអាចថ្លឹងថ្លែងមែនទែនទៅការរំលោភច្បាប់ រំលោភលក្ខន្តិកៈអាហ្នឹងបើសិនជាប្រទេសពេលមិនគោរពរដ្ឋធម្មនុញ្ញគេហៅថា រដ្ឋប្រហាររដ្ឋធម្មនុញ្ញ បើយើងមិនគោរពច្បាប់បក្សគេហៅថា បក្សប្រហារ»។
លោកបន្ថែមថា៖ «ខ្ញុំជឿជាក់ថា អ្នកដែលទៅចូលរួមហ្នឹងក៏ដោយ បើគាត់ថ្លែង គាត់យកបទបញ្ជាផ្ទៃក្នុងលក្ខន្តិកៈយកទៅសិក្សាមើលទៅគឺឃើញច្បាស់ទាំងអស់គ្នាថា វារំលោភលក្ខន្តិកៈ និងបទបញ្ជាផ្ទៃក្នុង ដូច្នេះយើងមិនអាចធ្វើអ៊ីចឹងទេ។ នៅក្នុងប្រទេសយើងត្រូវគោរពច្បាប់ គោរពរដ្ឋធម្មនុញ្ញហើយនៅក្នុងបក្ស យើងត្រូវគោរពលក្ខន្តិកៈ និងបទបញ្ជាផ្ទៃក្នុងបក្ស»។
លោក មុនីវណ្ណ ថាបើមានការសម្របសម្រួលស្ថានការណ៍នយោបាយនៅកម្ពុជាឲ្យមានលក្ខណៈដូចដើមវិញដូចមុនការរំលាយអតីតគណបក្សសង្គ្រោះជាតិគឺជា «មោទនភាពរបស់ជាតិ»។
បន្ថែមលើនេះកញ្ញា កឹម មនោវិទ្យា កូនស្រីច្បងលោក កឹម សុខា និងជាអតីតអនុប្រធានផ្នែកកិច្ចការសាធារណៈរបស់អតីតគណបក្សសង្គ្រោះជាតិក្នុងបទសម្ភាសជាមួយវិទ្យុបារាំង អន្តរជាតិ (RFI) កាលពីថ្ងៃព្រហស្បតិ៍ក៏បានជំទាស់ និងសម្តែងការសោកស្ដាយផងដែរ។ កញ្ញាបន្តថាក្រោយលោក កឹម សុខា ជាប់ឃុំ គណបក្សបានបង្កើតគណៈកម្មាធិការចំពោះកិច្ចមួយដែលអនុម័តដោយគណៈកម្មាធិការអចិន្រៃ្តយ៍គណបក្សរួចទៅហើយ ដើម្បីចាត់ចែងការងារបក្ស។ កញ្ញាចាត់ទុកសន្និសីទពិភពលោកដែលតែងតាំងលោក សម រង្ស៊ី ជាប្រធានស្ដីទីគណបក្សគឺជាការធ្វើ «បក្សប្រហារ»។ កញ្ញាសង្កត់ធ្ងន់ថា៖ «គឺវាច្បាស់ណាស់ នៅពេលណាដែលយើងមានការផ្លាស់ប្ដូរថ្នាក់ដឹកនាំនៅក្នុងអង្គភាពណាមួយដោយមិនធ្វើតាមលក្ខន្តិកៈរបស់អង្គភាពនោះ ឬក៏ស្ថាប័ននោះ នោះហើយបើរដ្ឋគឺគេហៅថារដ្ឋប្រហារនៅក្នុងបក្សគឺបក្សប្រហារពីព្រោះយើងសោកស្ដាយដែលអត់ធ្វើទៅតាមលក្ខន្តិកៈ»។
ប៉ុន្តែលោក ហៃ វណ្ណា ប្រធានចលនាសង្គ្រោះជាតិប្រចាំប្រទេសជប៉ុនបានជំទាស់ថា ការលើកឡើងពីការ «ធ្វើបក្សប្រហារ» របស់អតីតមន្ត្រីបក្សប្រឆាំងមួយចំនួននោះគឺជារឿងដែល «គួរឲ្យអស់សំណើច»។
លោកថ្លែងថា៖ «ខ្ញុំយល់ឃើញថាការវិលត្រឡប់មកដឹកនាំគណបក្សសង្គ្រោះជាតិក្នុងនាមជាប្រធានស្ដីទី ដើម្បីកំណត់យុទ្ធសាស្ត្រធ្វើសកម្មភាពដើម្បីឲ្យមានការដោះលែងលោកប្រធាន កឹម សុខា និងធ្វើឲ្យគណបក្សសង្គ្រោះជាតិរស់ឡើងវិញមានការបោះឆ្នោតសាជាថ្មីឡើងវិញ។ល។ នេះគឺជាប្រការដែលចាំបាច់ត្រូវតែធ្វើ ហើយវាជាកាតព្វកិច្ច និងជាការទទួលខុសត្រូវរបស់លោក សម រង្ស៊ី ដែលជាស្ថាបនិកគណបក្ស»។ លោកបន្តថាលោកក៏មិនអាចទទួលយកបានដែរនូវទង្វើបំបែកបំបាក់របស់ជនទាំងឡាយណាដែលមិនគាំទ្រសន្និសីទដែលពួកគេមានបំណង «បំបែកបំបាក់» គណបក្សសង្គ្រោះជាតិ ពួកគេនឹងមិនត្រូវបានទទួលស្គាល់ទៀតទេ។
លោកបន្ថែមថា៖ «ពួកគេត្រូវតែបណ្តេញចេញពីគណបក្សសង្គ្រោះជាតិ។ ម្យ៉ាងវិញទៀតថ្វីដ្បិតគណបក្សសង្គ្រោះជាតិត្រូវបានរំលាយពាក់ព័ន្ធនឹងច្បាប់ស្រុកខ្មែរគណបក្សសង្គ្រោះជាតិពិតជារលាយមែន ដូច្នេះលក្ខន្តិកៈរបស់គណបក្សមិនអាចអនុវត្តបានទាំងស្រុងទេ»។ លោកបញ្ជាក់ថាគណបក្សសង្គ្រោះជាតិមិនទាន់ស្លាប់ទេ មិនទាន់រលាយទេក្នុង «បេះដូងប្រជាពលរដ្ឋខ្មែរ» ដែលជាអ្នកគាំទ្រ។ ប្រជាពលរដ្ឋចង់បានការរួបរួម ហើយស្អប់បំផុតជនទាំងឡាយណាដែលចង់បំបែកបំបាក់ការរួបរួម។ លោកសង្កត់ធ្ងន់ថា៖ «ជាចុងក្រោយ ខ្ញុំសូមផ្ដាំផ្ញើដល់ប្រជាពលរដ្ឋខ្មែរដែលគាំទ្រគណបក្សសង្គ្រោះជាតិទាំងអស់ កុំខ្វាយខ្វល់ជាមួយពួកដែលចង់បំបែកបំបាក់គណបក្សសង្គ្រោះជាតិអី ព្រោះ កឹម សុខា និង សម រង្ស៊ី ជាមនុស្សតែមួយបើ កឹម សុខា ត្រូវបានដោះលែងទទួលបានសេរីភាពពេញលេញអាចចេញក្រៅប្រទេសបាន ហើយគាត់ថាឈប់រួបរួមគ្នាជាមួយ សម រង្ស៊ី ចាំយើងគិតថាគណបក្សសង្គ្រោះជាតិបែកបាក់តែពេលនេះមិនបែកបាក់ទេ»៕
