The Phnom Penh Post Search

Search form




Logo of Phnom Penh Post newspaper Phnom Penh Post - ក្រុម​សមាជិកសភា​នៃ​អ្នកនយោបាយ​ស្ត្រី​ កំពុង​បន្តធ្វើ​​យុទ្ធនាការ​បណ្តុះ​គំនិត​ភាព​ជា​អ្នកដឹកនាំ​ដល់​នារី​វ័យក្មេង




ក្រុម​សមាជិកសភា​នៃ​អ្នកនយោបាយ​ស្ត្រី​ កំពុង​បន្តធ្វើ​​យុទ្ធនាការ​បណ្តុះ​គំនិត​ភាព​ជា​អ្នកដឹកនាំ​ដល់​នារី​វ័យក្មេង

Content image - Phnom Penh Post
ក្រុម​សមាជិក​សភា​ស្ត្រី​ក្នុង​វេទិកា​នៅ​ខេត្តក្រចេះ​កាលពី​ថ្ងៃទី​ ១០ ខែ​មករា ឆ្នាំ​ ២០២១​។ រូបថត រដ្ឋសភា

ក្រុម​សមាជិកសភា​នៃ​អ្នកនយោបាយ​ស្ត្រី​ កំពុង​បន្តធ្វើ​​យុទ្ធនាការ​បណ្តុះ​គំនិត​ភាព​ជា​អ្នកដឹកនាំ​ដល់​នារី​វ័យក្មេង

ភ្នំពេញៈ ក្រុម​សមាជិក​សភាជាតិ​កម្ពុជា​នៃ​អ្នកនយោបាយ​ស្ត្រី​កំពុង​បន្តធ្វើ​យុទ្ធនាការ​ទៅលើ​ «​នារី​វ័យក្មេង​ឆ្ពោះទៅ​ភាពជា​អ្នកដឹកនាំ Girl2Leader Cambodia» ដើម្បី​ចែករំលែក​បទពិសោធ ចំណេះដឹង និង​បណ្តុះ​គំនិត ភាព​ជា​អ្នកដឹកនាំ អ្នកសម្រេចចិត្ត និង​ស្ដ្រី​ជា​អ្នកដឹកនាំ​ក្នុង​វិស័យ នយោបាយ​ដល់​យុវតី​វ័យក្មេង​នៅតាម​បណ្ដា​រាជធានី-ខេត្ដ​។

លោកស្រី ឡោក ខេង ប្រធាន​គណៈកម្មការ​សុខាភិបាល​សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាល​វិជ្ជាជីវៈ និង​កិច្ចការនារី​នៃ​រដ្ឋសភា និង​ជា​អគ្គរាជទូត​អ្នកដឹកនាំ​នយោបាយ​ជា​ស្ត្រី​ថ្លែង​ប្រាប់​ភ្នំពេញ​ប៉ុស្ដិ៍ នៅ​ថ្ងៃទី​ ១១ ខែ​មករា ថា យុទ្ធនាការ​នេះ​បានធ្វើ​ចំនួន​ ៤ លើក​ហើយ កាលពី​អំឡុង​ឆ្នាំ​ ២០២០ ​ក្នុងនោះ​ធ្វើ​នៅ​រាជធានី​ភ្នំពេញ​ចំនួន​ ៣ ​លើក​នៅ​ខេត្ដ​កណ្ដល​ ១ ​លើក និង​ឆ្នាំនេះ​ ១ ​លើក​ធ្វើ​នៅ​ខេត្ដ​ក្រចេះ​កាលពី​ថ្ងៃទី​ ១០ ​ខែមករា​។

លោកស្រី​ថ្លែងថា​៖ «​គោលដៅ​សំខាន់​នៃ​យុទ្ធនាការ​នេះ​យើង​សំដៅ​ទៅ​យុវតី​ដែល​កំពុង​រៀន​នៅ​ថ្នាក់​វិទ្យាល័យ​ដើម្បី​ត្រួសត្រាយ​ផ្លូវ​ពួកគេ​លើ​ការបណ្ដុះ​គំនិត ក្ដី​សុបិន ជ្រើសរើស​មុខរបរ អាជីព ទៅ​ថ្ងៃ​អនាគត​។ យើង​បំផុស​គំនិត​ដល់​ពួកគេ​ឱ្យមាន​សេចក្ដីក្លាហាន​ក្លាយខ្លួនជា​អ្នកដឹកនាំ​ដូចជា​បុរសៗ​ដែរ​»​។

បើតាម​លោកស្រី ឡោក ខេង វត្ដមាន​ស្ដ្រី​នៅក្នុង​ការដឹកនាំ​ទាំង​ក្នុង​ស្ថាប័ន​ជាតិ និង​វិស័យ​ឯកជន​គឺ​មាន​សារៈសំខាន់​ណាស់​ពិសេស​ការដឹកនាំ​ក្នុង​វិស័យ​នយោបាយ​ និង​គោលនយោបាយ​ជាតិ ព្រោះ​ស្ដ្រី​អាចជួយ​ដោះស្រាយ​បញ្ហា​ប្រឈម​ដែល​កើតមាន​ចំពោះ​ស្ដ្រី​បានល្អ​។

លោក​ស្ត្រី​ថ្លែងថា​៖ «​តាម​ផែនការ​គឺ​យើង​ធ្វើ​យុទ្ធនាការ​នេះ​នៅ​គ្រប់​ខេត្ដ​ទាំងអស់ ដូច្នេះ​នៅ​អំឡុង​ខែមីនា ឆ្នាំ​ ២០២១ ​នេះ​យើង​នឹង​ទៅធ្វើ​នៅ​ខេត្ដ​តាកែវ​។ ពេលធ្វើ​យុទ្ធនាការ​នេះ​ម្ដងៗ មាន​យុវតី​វ័យក្មេង ជា​សិស្ស​វិទ្យាល័យ​ចូលរួម​ប្រមាណ​ពី​ ២០០ ​ទៅ​ ២៥០ ​នាក់​»​។

តាមរយៈ​យុទ្ធនាការ​នេះ សមាជិក​សភា​ស្ត្រី និង​តំណាង​ស្ថាប័ន​ពាក់ព័ន្ធ​បាន​លើក​ពី​ប្រធានបទ​ផ្សេងៗ​គ្នា​ចែករំលែក​ពីបទ​ពិសោធ​ការងារ​ផ្ទាល់ខ្លួន​កន្លងមក​រហូត​បាន​ក្លាយជា​សមាជិកា​រដ្ឋសភា ព្រឹទ្ធសភា និង​ក្លាយជា​អ្នកធ្វើ​សេចក្តីសម្រេច​នៅក្នុង​ស្ថាប័ន​អង្គភាព​របស់ខ្លួន និង​បញ្ហា​ប្រឈម​ក្នុង​ភាព​ជា​អ្នកដឹកនាំ​ជាដើម​។

យុទ្ធនាការ​នេះ​ធ្វើឡើង​ក្រោម​គំនិត​ផ្តួចផ្តើម​របស់​ក្រុម​សភាជាតិ​កម្ពុជា​នៃ​អ្នកនយោបាយ​សភា​ស្ត្រី សហការ​រៀបចំ​ដោយ​អគ្គលេខាធិការដ្ឋាន​រដ្ឋសភា វិទ្យាស្ថាន​សភា​កម្ពុជា​ និង​លេខាធិការដ្ឋាន​ក្រុម​សភាជាតិ​កម្ពុជា​នៃ​អ្នកនយោបាយ​សភា​ស្ត្រី​។

លោកស្រី​ ចក់ សុភាព នាយិកា​ប្រតិបត្តិ​នៃ​មជ្ឈមណ្ឌល​សិទ្ធិមនុស្ស​កម្ពុជា ថ្លែងថា យុទ្ធនាការ​នេះ​គឺជា​គំនិត​ផ្គួចផ្ដើម​មួយ​អាច​ចូលរួមចំណែក​ក្នុង​ការជ្រោមជ្រែង​លើក​កម្ពស់​សកម្មភាព​ផ្នែក​យេនឌ័រ ជាពិសេស​ការលើកកម្ពស់​ផ្នែក​តំណាង​ភាពជា​អ្នកដឹកនាំ​របស់​ស្ដ្រី​ក្នុងសង្គម​កម្ពុជា​។

លោកស្រី​ថា​៖ «​កិច្ចការ​ទាំងអស់​នេះ​ជា​ផ្នែក​មួយ​ដែល​កន្លងមក ទាំង​ស្ថាប័នរដ្ឋ​និង​អង្គការ​សង្គមស៊ីវិល​យើង​បាន​បន្ត​ក្នុង​ការធ្វើ​ការងារ​នេះ​។ ប៉ុន្ដែ​អ្វីដែល​ចាំបាច់​បន្ថែម​ទៀត​នោះ គឺ​ការធានា​ឱ្យបាន​នូវ​គោលនយោបាយ​មួយ​ជាពិសេស​នីតិវិធី​ច្បាប់​ដែល​ធានា​នូវ​សមភាព​យេនឌ័រ​ពិតប្រាកដ​»​។

លោកស្រី​ ចក់ សុភាព បាន​លើក​ឧទាហរណ៍​ករណី​ ១ ​កាលពី​ឆ្នាំកន្លងមក ដែល​រាជរដ្ឋាភិបាល​បាន​ដាក់​ចេញ​នូវ​សេចក្ដី​ព្រាងច្បាប់​ពាក់ព័ន្ធ​នឹង​សណ្ដាប់ធ្នាប់​សាធារណៈ​ដែលមាន​មាត្រាមួយ​បាន​លើក​ឡើង​ជាច្រើន ដោយ​កំហិត​ទៅ​លើ​សេរីភាព​ស្វ័យសម្រេច​របស់​ស្ដ្រី​។ «​ដូច្នេះ​គឺ​ទាមទារ​នូវ​គោលនយោបាយ​នីតិវិធី​ច្បាប់ ដែល​ធានា​នូវ​សមភាព​យេនឌ័រ និង​សេរីភាព​របស់​ស្ត្រី​ក្នុង​ការធ្វើការ​សម្រេច​ចិត្ដ​»​។

លោក ប៉ា ច័ន្ទរឿន ប្រធាន​វិទ្យាស្ថាន​ប្រជាធិបតេយ្យ​កម្ពុជា​កត់សម្គាល់​ឃើញ​យុទ្ធនាការ​នេះ​ល្អ ដែល​អាច​ផ្ដល់​បទពិសោធ ជំនាញ ចំណេះដឹង និង​លើកកម្ពស់​ការចាប់អារម្មណ៍​ពី​ស្ដ្រី​វ័យក្មេង​កម្ពុជា​ក្នុង​ការចូលរួម​សកម្មភាព សេដ្ឋកិច្ច សង្គម និង​នយោបាយ​។ លោក​ថ្លែង​ថា​៖ «​សកម្មភាព​នេះ​អាចឱ្យ​ស្ដ្រី វ័យក្មេង​កម្ពុជា​ក្លាយ​ជា​អ្នកដឹកនាំ​ស្ដ្រី​ និង​បង្កើន​ចំនួន​ស្ដ្រី​ជា​អ្នកដឹកនាំ​នៅក្នុង​សង្គម​កម្ពុជា​ដែល​បច្ចុប្បន្ន​កំពុងតែ​មាន​ការខ្វះខាត​»៕

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ