The Phnom Penh Post Search

Search form




Logo of Phnom Penh Post newspaper Phnom Penh Post - ក្រុម​សហជីព​ទទូច​ឲ្យ​សភា​ទទួល​យក​សំណើ​របស់​ខ្លួន

ក្រុម​សហជីព​ទទូច​ឲ្យ​សភា​ទទួល​យក​សំណើ​របស់​ខ្លួន

មេដឹកនាំ​សហជីព​ពេល​ដាក់​ញត្តិ​ទៅ​រដ្ឋសភា​កន្លង​មក​។
មេដឹកនាំ​សហជីព​ពេល​ដាក់​ញត្តិ​ទៅ​រដ្ឋសភា​កន្លង​មក​។ ផា លីណា

ក្រុម​សហជីព​ទទូច​ឲ្យ​សភា​ទទួល​យក​សំណើ​របស់​ខ្លួន

ភ្នំពេញៈ ក្រុម​សហជីព និង​អង្គការ​សង្គម​ស៊ីវិល​ជាង ២០ ស្ថាប័ន​ដែល​តាមដាន និង​តស៊ូ​មតិ​លើ​សេចក្តី​ព្រាង​ច្បាប់​​ស្តី​ពី​​សហជីព​ដ៏​ចម្រូង​ចម្រាស​បាន​ស្នើ​ជាថ្មី​ម្តង​ទៀត​ឱ្យ​​រដ្ឋសភា​ទទួល​យក​សំណើ​របស់​ពួកគេ​ដាក់​បញ្ជូល​ទៅក្នុង​សេចក្តី​ព្រាង​ច្បាប់​ខណៈ​រដ្ឋសភា​បាន​កំណត់​បើក​សិក្ខា​សាលា​ជា​លើក​ចុង​ក្រោយ​ត្រឹម​តែ​មួយ​ព្រឹក​ដើម្បី​ពិភាក្សា​លើ​សេច​ក្តី​ព្រាង​ច្បាប់​នេះ​នៅ​ថ្ងៃ​ពុធ​ខាន​ស្អែក​​។

សេចក្តី​ថ្លែងការណ៍​រួម​របស់​សហជីព និង​សង្គមស៊ីវិល​ចំនួន ២១ ចេញ​ផ្សាយ​កាលពី​ម្សិលមិញ​បាន​លើក​ឡើង​ថា​រដ្ឋសភា​បាន​គ្រោង​រៀបចំ​សិក្ខាសាលា​ពិគ្រោះ​យោបល់​រយៈពេល​តែ​មួយ​ព្រឹក​លើ​សេចក្តី​ព្រាង​ច្បាប់​ស្តីពី​សហជីព​ដែល​នឹង​ប្រព្រឹត្ត​ទៅ​នៅ​ថ្ងៃ​ទី ៩ មីនា​ឆ្នាំ ២០១៦ ដែល​នៅក្នុង​របៀបវារៈ​នេះ​ផ្តល់​ពេលវេលា​ត្រឹម​តែ​កន្លះ​ម៉ោង​ប៉ុណ្ណោះ​ដើម្បី​ឱ្យ​ភាគពី​ពាក់ព័ន្ធ​សួរ​សំណួរ​។ សង្គម​ស៊ីវិល និង​សហជីព​យល់​ឃើញ​ថា​សិក្ខាសាលា​ពិគ្រោះ​យោបល់​នោះ​ហាក់បី​ដូចជា​គ្មាន​អត្ថន័យ​ក្នុង​ការ​ពិគ្រោះ​យោបល់​ទាល់​តែ​សោះ។

តាមរយៈ​សេចក្តី​ថ្លែងការណ៍​ពួកគេ​​ឲ្យ​ស្នើ​រដ្ឋសភា «ផ្តល់​ពេលវេលា​គ្រប់គ្រាន់​សម្រាប់​សហជីព​ផ្តល់​យោបល់​លើ​សេចកក្តី​ព្រាង​ច្បាប់​ស្តីពី​សហជីព​ឱ្យ​បាន​គ្រប់​ជ្រុងជ្រោយ​ទទួល​យក​សំណើ​របស់​សហជីព​ដាក់​បញ្ចូល​ក្នុង​សេចក្តី​ព្រាង​ច្បាប់​ដើម្បី​ឱ្យ​ច្បាប់​នេះ​ធានា​ដល់​ការ​រៀបចំ និង​ចូលរួម​សកម្មភាព​របស់​កម្មករ​ និយោជិត នា​ពេល​អនាគត​»។

យ៉ាង​ណា​ក៏ដោយ​សហជីព និង​សង្គម​ស៊ីវិល​កត់សម្គាល់​ថា​ក្រោយ​ពី​គណៈកម្មការ​ចំពោះ​កិច្ច​នៃ​គណបក្ស​នយោបាយ​​ទាំង​ពីរ​បាន​ពិភាក្សា​ជាច្រើន​លើក​លើ​សេចក្តី​ព្រាង​ច្បាប់​នេះ​ពុំ​ឃើញ​មាន​ការ​កែប្រែ​អ្វី​ជា​ដុំ​កំភួន​នោះ​ទេ​។

ប្រធាន​គណៈកម្មការ​នីតិកម្ម និង​យុត្តិធម៌​នៃ​រដ្ឋសភា​លោក ប៉ែន បញ្ញា បាន​ប្រាប់​ភ្នំពេញ​ប៉ុស្តិ៍​ថា​ការ​បើក​សិក្ខាសាលា​នៅ​ថ្ងៃ​ទី ៩ មីនា ជា​ដំណាក់​កាល​ចុងក្រោយ​ដើម្បី​ឱ្យ​សហជីព និង​សង្គម​ស៊ីវិល​បាន​ផ្តល់​យោបល់​បន្ថែម​ទៀត។

យ៉ាង​ណា​ក៏ដោយ​ លោក​ថា​ ច្បាប់​នេះ​មិន​អាច​ពន្យារ​ពេល​ទៅ​មុខ​ទៀត​បាន​ទេ។ លោក​បញ្ជាក់​ថា៖ «រយៈពេល​បី​ឆ្នាំ​ហើយ​យើង​គ្មាន​ពេលណា​ទៀត​ទេ​គឺ​ត្រូវ​តែ​ឈាន​ដល់​ការ​សម្រេច​ចិត្ត​មួយ​អ្វី​ដែល​ត្រូវ​ថែម​អ្វី​ដែល​ត្រូវ​បន្ថយ»។

លោក​ឱ្យ​ដឹង​ដែរ​ថា​ សិក្ខាសាលា​​លើ​សេចក្តី​ព្រាង​ច្បាប់​ស្តីពី​សហជីព​នឹង​មាន​​អ្នក​ចូលរួម​ប្រមាណ ៣៥០ នាក់​មកពី​គ្រប់​ភាគី​ទាំងអស់​រួមមាន​គណបក្ស​ប្រជាជន​ បក្ស​សង្គ្រោះ​ជាតិ សហជីព និង​សង្គម​ស៊ីវិល​ក្រោម​អធិបតីភាព​ប្រធាន​រដ្ឋសភា​លោក ហេង សំរិន។

ប្រធាន​សហព័ន្ធ​សហជីព​ចលនា​កម្មករ​លោក ប៉ាវ ស៊ីណា បាន​ថ្លែង​ថា​អ្វី​ដែល​សហជីព​ធ្លាប់​ស្នើ​រដ្ឋសភា​ឱ្យ​មាន​ការ​កែប្រែ​ខ្លឹមសារ​ខ្លះ​ចំនួន ១៨ មាត្រា​នា​ពេល​កន្លង​មក​គឺ​ពុំ​ទទួល​បាន​ផ្លែផ្កា​អ្វី​ឡើយ​ផ្ទុយ​ទៅ​វិញ​រដ្ឋសភា​បែរ​ជា​បើក​សិក្ខាសាលា​យ៉ាង​តក់ក្រហល់​។​

លោក​ថា៖ ​«អ្វី​ដែល​យើង​ចង់​បាន​​គឺ​ការ​ដក ឬ​លុប​នូវ​មាត្រា​ខ្លះ​ប៉ុន្តែ​ផ្ទុយ​ទៅ​វិញ​យើង​ឃើញ​អត់​មាន​អី​កែប្រែ​សោះ​ដែល​នៅ​ក្នុង​មាត្រា​ដែល​យើង​ព្រួយបារម្ភ​មាន​មាត្រា ៣- ១២- ១៣- ១៤- ១៥- ១៧ និង​មាត្រា​ ១៩ សុទ្ធតែ​ប៉ះពាល់ និង​រឹតត្បិត​សេរីភាព​កម្មករ»។

លោក​យល់​ថា​កិច្ចពិគ្រោះ​យោបល់​ទៅលើ​​ច្បាប់​មួយ​ដែល​ដាក់​ពេលវេលា​ត្រឹមតែ​បី​ម៉ោង និង​ការ​ផ្តល់​ឱកាស​ឱ្យ​ភាគី​ពាក់ព័ន្ធ​សួរ​សំណួរ​ត្រឹម​កន្លះ​ម៉ោង​ហាក់បី​ដូចជា​តក់ក្រហល់​នឹង​ពុំ​មាន​ប្រសិទ្ធភាព​ទេ​។

លោក​ថា៖ «ប្រសិន​បើ​យើង​នៅ​តែ​ប្រើប្រាស់​ពេលវេលា​ដ៏ខ្លី បង្ខំ​ចិត្ត​ក្នុង​ការ​ជំរុញ​ឱ្យ​ច្បាប់​នេះ​ចេញ​​កាន់​តែ​ឆាប់​អនុម័ត​ដោយ​មិន​បាន​ពិគ្រោះ​យោបល់​គ្រប់​ជ្រុងជ្រោយ​មាន​ន័យ​ថា​រដ្ឋសភា​កំពុង​តែ​ធ្វើ​ឱ្យ​ច្បាប់​នេះ​រំលោភ​ទៅ​នឹង​អនុសញ្ញា​របស់​អង្គការ ILO ដែល​រដ្ឋសភា​ធ្លាប់​ផ្តល់​សច្ចាប័ន»។

តំណាងរាស្ត្រ​គណបក្ស​សង្គ្រោះ​ជាតិ​ដែល​ជា​សមាជិក​នៃ​គណៈកម្មការ​ចំពោះ​កិច្ច​លោក សុន ឆ័យ បាន​យល់​ស្រប​ទៅ​​នឹង​ការ​លើក​ឡើង​របស់​សហជីព​ថា​ការ​ពិភាក្សា​កន្លង​មក​ពុំ​មាន​អ្វី​កែប្រែ​ជា​ដុំ​កំភួន​ទេ​។

លោក​ថា៖ «យើង​បាន​កែប្រែ​តិចតួច​តែ​ការងារ​ធំៗ​អត់​ទាន់​បាន​សម្រេច​ខ្ញុំ​មិន​ទាន់​ដឹង​យ៉ាង​ណា​ទេ​ព្រោះ​គណៈកម្មការ​ចំពោះ​កិច្ច​បាន​ផ្តល់​ភារកិច្ច​ទៅ​ប្រធាន​គណៈកម្មការ​នីតិកម្ម និង​យុត្តិធម៌​លោក ប៉ែន បញ្ញា ទៅ​ពិគ្រោះ​យោបល់​​ជាមួយ​តំណាង​រដ្ឋាភិបាល»។

យ៉ាង​ណា​ក៏​ដោយ​លោក​ថា​លោក​​នឹង​តាម​ឃ្លាំ​មើល​លើ​សេចក្តី​ព្រាង​ច្បាប់​នេះ​បន្ត​ទៀត​នឹង​រង់ចាំ​បញ្ចប់​ការ​បើក​សិក្ខា​សាលា​នៅ​ថ្ងៃ​ ៩ មីនា សិន។

បើ​តាម​លោក ឆ័យ នៅ​ម៉ោង​ ២ ​ថ្ងៃ​នេះ​គណៈកម្មការ​ចំពោះ​កិច្ច​នឹង​បើក​កិច្ចប្រជុំ​ទាក់ទង​នឹង​របៀបវារៈ​នៃ​សិក្ខាសាលា​ហើយ​លោក​​ថា​នឹង​ទាមទារ​មិន​ឱ្យ​សមាជិក​សភា​និយាយ​ច្រើន​ពេក​ទេ​ទុក​ឱ្យ​តំណាង​សហជីព​លើក​ពី​កង្វល់​​ឱ្យ​បាន​​ច្រើន​៕

អត្ថបទគួរចាប់អារម្មណ៍