.jpg)
ក្រុមស្ត្រីជាជនសង្ស័យស៊ីឈ្នួលពពោះជំនួសក្នុងពេលសមត្ថកិច្ចឃាត់ខ្លួនកន្លងទៅ។ ផា លីណា
ភ្នំពេញៈ ព្រះរាជអាជ្ញាសាលាដំបូង រាជធានីភ្នំពេញ កាលពីថ្ងៃទី ២៨ ខែមិថុនានេះ បានសម្រេចចោទប្រកាន់ស្ត្រីជនជាតិចិនម្នាក់ និង ស្ត្រីខ្មែរ ចំនួន ៤ នាក់ពីបទជួញដូរមនុស្សនិងសម្របសម្រួលសម្រាប់ឲ្យមានករណីស៊ីឈ្នួលពពោះជំនួស ខណៈមន្ត្រីរដ្ឋាភិបាលថា ស្ត្រីស៊ីឈ្នួលពពោះជំនួសក៏អាចប្រឈមនឹងការចោទប្រកាន់ផងដែរ។
កាលពីថ្ងៃទី ២១ ខែមិថុនា នគរបាលប្រឆាំងការជួញដូរមនុស្ស បានចាប់ខ្លួនមនុស្ស ៥ នាក់នៅខណ្ឌ ឫស្សីកែវ រាជធានីភ្នំពេញ ពីបទបង្កើតភ្នាក់ងារស៊ីឈ្នួលពពោះជំនួសខុសច្បាប់ ហើយក្នុងពេលចុះបង្ក្រាបនោះ នគរបាលក៏បានរកឃើញស្ត្រីចំនួន៣៣នាក់នៅទីនោះ ខណៈពួកគេកំពុងស្ថិតនៅក្នុងដំណាក់កាលមានផ្ទៃពោះផ្សេងៗគ្នា។ ស្ត្រីទាំង៣៣នាក់នោះត្រូវបានគេជឿថា ជាអ្នកស៊ីឈ្នួលពពោះជំនួសជនជាតិចិន។
ព្រះរាជអាជ្ញា គួច គឹមឡុង បានថ្លែងថា លោកបានបញ្ជូនរបាយការណ៍ទៅការិយាល័យចៅក្រមស៊ើបអង្កេតរួចហើយ។
លោក សួស វិទ្យារ៉ាន់ឌី អនុប្រធានរដ្ឋបាលសាលាដំបូងរាជធានីភ្នំពេញ បានឲ្យដឹងថា ព្រះរាជអាជ្ ញាបានចោទប្រកាន់អ្នកទាំង ៥ នាក់នោះនៅក្រោមមាត្រា ១៦ នៃច្បាប់ស្តីពីការបង្ក្រាបអំពើជួញដូរមនុស្ស និង កេងប្រវ័ញ្ចផ្លូវភេទនិងមាត្រា ៣៣២ នៃក្រមព្រហ្មទណ្ឌ។
យោងតាមមាត្រា ១៦ អ្នកទាំង៥នោះ អាចប្រឈមនឹងការជាប់ពន្ធនាគាររហូតដល់ ២០ ឆ្នាំពីព្រោះ «បទល្មើសត្រូវបានប្រព្រឹត្តដោយក្រុមដែលមានការរៀបចំ»។
តាមមាត្រា ៣៣២ នៃក្រមព្រហ្មទណ្ឌអំពើប្រព្រឹត្តនៅក្នុងគោលបំណងចង់បានកម្រៃធ្វើជាអន្តរការីរវាងបុគ្គលម្នាក់ ឬ ប្តីប្រពន្ធដែលចង់សុំកូនយកមកចិញ្ចឹមនិងស្ត្រីម្នាក់យល់ព្រមពពោះដើម្បីប្រគល់កូននោះទៅឲ្យអ្នកសុំត្រូវផ្តន្ទាទោសដាក់ពន្ធនាគារពី ១ ខែទៅ ៦ ខែ។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃនិងអនុប្រធានអចិន្ត្រៃយ៍នៃ គណៈកម្មាធិការជាតិប្រយុទ្ធប្រឆាំងការជួញដូរមនុស្សថ្លែងថា ស្ត្រីដែលមានផ្ទៃពោះទាំង ៣៣ នាក់នោះត្រូវទទួលខុសត្រូវចំពោះ ការចិញ្ចឹមកូនទាំងនោះទោះបីជាពួកគេមិនមានហ្សែនទាក់ទងគ្នាក៏ដោយ។ លោកស្រី ប៊ុនអេង បញ្ជាក់ថា ស្ត្រីទាំងនោះអាចប្រឈមនឹងការចោទប្រកាន់ផងដែរ។
នៅពេលសួរថា តើការទទួលខុសត្រូវរបស់ស្ត្រីទាំងនោះ អាចជាអ្វី ប្រសិនបើពួកគេរំលូតកូន លោកស្រីថ្លែងថា៖ «ខ្ញុំមិនដឹងថា តើតុលាការនឹងនិយាយដូចម្តេចទេ។ ប្រសិនបើពួកគេគ្រាន់តែស្វែងរកការរំលូតកូនដើម្បីលុបភ័ស្តុតាង ដើម្បីឱ្យរួចខ្លួនពីសំណាញ់ច្បាប់យើងនឹងមិនអនុញ្ញាតឱ្យធ្វើបែបនោះទេ»។
លោកស្រីបញ្ជាក់ថា៖«យើងយល់ថាវាសំខាន់ណាស់សម្រាប់ស្ត្រីទាំងនោះក្នុងការទទួលខុសត្រូវចំពោះទារកដែលកំពុងនៅក្នុងផ្ទៃរបស់ពួកគេ»។
លោកស្រីបន្ថែមថា៖«នៅក្រោមច្បាប់កម្ពុជាស្ត្រីគឺជាមាតារបស់ទារកនៅក្នុងផ្ទៃរបស់ពួកគេ។ ដោយសារតែអ្នកក្រីក្រមិនមែនមានន័យថាអ្នកមិនត្រូវគិតអំពីជីវិតរបស់អ្នកដទៃនោះទេ»។
អ្នកនាំពាក្យក្រសួងកិច្ចការនារីលោក ផុន ពុទ្ធបុរី មិនអាចទាក់ទងសុំការបំភ្លឺបានទេ៕ NS
