ភ្នំពេញ៖ ក្រុមស្រ្ដីជាច្រើននាក់មកពីសមាគម និង អង្គការសង្គមស៊ីវិលនានា ត្រូវបានកងកម្លាំងរបស់សាលារាជធានីភ្នំពេញរារាំង និង មិនអនុញ្ញាតឲ្យពួកគេដើរដង្ហែរក្បួនចេញពីស្ដាតអូរឡាំពិក យកញត្តិទៅដាក់នៅទីស្ដីការគណៈរដ្ឋមន្រ្តី នាថ្ងៃប្រារព្ធទិវាសិទ្ធិនារីអន្តរជាតិ ៨ មីនានោះទេ កាលពីថ្ងៃទី ៨ មីនា។ ប៉ុន្តែខាងអាជ្ញាធរលើកឡើងថា ដោយសារតែពួកគេមិនគោរពតាមសេចក្ដីសម្រេចក្នុងកិច្ចប្រជុំ ថាឲ្យប្រារព្ធនៅតាមទីតាំងរៀងៗខ្លួន។
ក្រុមកងកម្លាំងស្លៀកពាក់ឯកសណ្ឋានជាប៉ូលិស ស៊ីវិល និងប្រជាការពារប្រហែល ២០០ នាក់ បាននាំគ្នាឈរពាំងទប់ស្កាត់ក្រុមស្រ្ដីដែលមានបំណងដើរដង្ហែរញត្តិចេញពីក្នុងស្ដាតអូឡាំពិក យកទៅកាន់ទីស្ដីការគណៈរដ្ឋមន្រ្តី ដើម្បីស្នើសុំដំណោះស្រាយមួយចំនួនពីរដ្ឋាភិបាល ជុំវិញបញ្ហានានាដែលពួកគេជាស្រ្ដីកំពុងជួបប្រទះសព្វថ្ងៃ។
អ្នកស្រី អ៊ូ ទេពផល្លីន ប្រធានសហព័ន្ធសហជីពកម្មករចំណីអាហារ និង សេវាកម្មលើកឡើងថា ភាគច្រើននៃអ្នកចូលរួមហែរញត្តិនេះ គឺជាស្រ្ដី ដែលមានគ្នាជាង ៤០០ នាក់ មានទាំងយុវជន អ្នកប្រកបរបរផ្លូវភេទ អ្នកបម្រើការងារផ្នែកសេវាកម្មកម្សាន្ត កម្មករកាត់ដេរ កម្មករសេដ្ឋកិច្ចក្រៅប្រព័ន្ធ អ្នកធ្វើការងារតាមផ្ទះ កសិករ និងស្រ្ដីមានបញ្ហាដីធ្លី។
អ្នកស្រីបន្តថា នៅពេលចាប់ផ្ដើមនាំគ្នាដើរចេញពីស្ដាតអូរឡាំពិក ក៏ត្រូវអាជ្ញាធររារាំង និង ព្យាយាមបំបែកក្រុមអ្នកចូលរួមជាពីរផ្នែក ហើយក្រោយមកអាជ្ញាធរក៏បានសម្រុះសម្រួលទទួលញត្តិដោយសន្យាយកទៅប្រគល់ឱ្យទីស្ដីការគណៈរដ្ឋមន្រ្តីជំនួសវិញ។
អ្នកស្រីថ្លែងថា «យើងគិតថា យើងសោកស្ដាយចំពោះការរារាំងហ្នឹង ព្រោះប្រទេសយើង គឺជាប្រទេសប្រជាធិបតេយ្យ មានសេរីភាពក្នុងការជួបជុំ សេរីភាពក្នុងការសម្ដែងមតិ ដែលគួរតែត្រូវបានការពារនិងធានា។ ប៉ុន្តែមិនត្រូវបានអនុញ្ញាតហើយ ក្រោមរូបភាពនៃការរឹតបន្តឹងទៅទៀត»។
នៅក្នុងញត្តិដែលដាក់ទៅទីស្ដីការគណៈរដ្ឋមន្រ្តីនោះ គឺក្រុមស្រ្ដីស្នើសុំចំនួន ៧ ចំណុចទៅកាន់រដ្ឋាភិបាល ដូចជា ការបង្កើតមតេយ្យទារកដ្ឋាន ឬ សហគមន៍ ការបង្កើតជម្រកសុវត្ថិភាពសម្រាប់ស្រ្ដីជួបអំពើហិង្សាក្នុងគ្រួសារ និង ស្រ្ដីបម្រើការងារតាមផ្ទះ ការបញ្ឈប់ការបៀតបៀន និង ហិង្សាផ្លូវភេទលើស្រ្ដីនៅកន្លែងការងារ និង ដោយមិនត្រូវលើកលែង ការបញ្ឈប់ការប្រើប្រាស់អំពើហិង្សាលើស្រ្ដីជាអ្នកការពារសិទ្ធិមនុស្ស កំណែទម្រង់មធ្យោបាយដឹកជញ្ជូនកម្មករក្នុងវិស័យកាត់ដេរ ដើម្បីបញ្ចៀសគ្រោះថ្នាក់ចរាចរណ៍តាមដងផ្លូវ ការកែលម្អលក្ខខណ្ឌការងារ និង ពង្រឹងយន្តការការពារស្រ្ដីអ្នកធ្វើការងារតាមផ្ទះ និងការពង្រឹងយន្តការការពារសិទ្ធិពលករចំណាកស្រុក ស្ដីពីការកេងប្រវ័ញ្ចការងារ ការជួញដូរ និង ទាសភាពសម័យទំនើប។
អ្នកស្រី អ៊ូ ទេពផល្លីន បន្តថា «យើងទាមទារចំណុចទីមួយ ដោយសារកម្មករធ្វើការងារ ឬ នៅក្នុងសេដ្ឋកិច្ចក្រៅប្រព័ន្ធ ពួកគាត់អត់មានអ្នកមើលកូនឱ្យ អ៊ីចឹងគាត់ត្រូវបង្ខំចិត្តដាក់កូននៅរទះអីហ្នឹង ហើយទារកដ្ឋាន យោងតាមច្បាប់ស្ដីពីការងារមានហើយ អ៊ីចឹងតម្រូវឱ្យនយោជកអនុវត្តតាមច្បាប់ការងារ។ ដូចទី៧ ជំរុញយន្តការគឺគាត់ [រដ្ឋាភិបាល] ត្រូវធានាឱ្យមានការត្រួតពិនិត្យ ហើយជាពិសេស ក្រសួងពាក់ព័ន្ធទទួលបន្ទុកផ្នែកបញ្ជូនពលករចំណាកស្រុកទៅ ត្រូវចុះទៅតាមដានត្រួតពិនិត្យ ដើម្បីធានាថា តើពួកគាត់ធ្វើការនៅទីនោះ មានផាសុខភាពអត់ មានប្រព័ន្ធការពារសុខភាព និង សុវត្ថិភាពត្រឹមត្រូវអត់ ប្រាក់ឈ្នួលត្រឹមត្រូវ និងថៅកែមានឥរិយាបទមេចដែរ»។
លោក មេត មាសភក្ដី មន្ត្រីនាំពាក្យសាលារាជធានីភ្នំពេញបញ្ជាក់ថា អាជ្ញាធរសាទរចំពោះការចូលរួមប្រារព្ធទិវាសិទ្ធិនារីអន្តរជាតិ ប៉ុន្តែការហាមឃាត់ដើរដង្ហែរក្បួននេះ ដោយតែពួកគេមិនបានគោរពតាមសេចក្ដីសម្រេចក្នុងកិច្ចប្រជុំរវាងភាគីទាំងពីរ ថាឱ្យអនុវត្តប្រារព្ធទិវាសិទ្ធិនារីនៅតាមទីតាំងរបស់ខ្លួននីមួយៗ និង មិនអនុញ្ញាតឱ្យមានការហែរក្បួនឡើយ។
លោកថា «ទាំងអស់ហ្នឹងបានជំរាបជូនហើយ ទាំងបញ្ហាសណ្ដាប់ធ្នាប់សាធារណៈ សណ្ដាប់ធ្នាប់ចរាចរណ៍ រួមទាំងបញ្ហាសុវត្ថិភាពទាំងអស់ដែលអាជ្ញាធរយើងគិតគូរហើយនៅក្នុងន័យហ្នឹងហើយដែលយើងមិនអនុញ្ញាតជូន ហើយជាក់ស្ដែងសូម្បីសព្វថ្ងៃនេះ ទោះមិនមានសកម្មភាពដើរប្រមូលផ្ដុំផ្សេងៗ ក៏សង្កេតឃើញមានការកកស្ទះដែរ»។
លោក អំ សំអាត ប្រធានគ្រប់គ្រងការិយាល័យឃ្លាំមើលសិទ្ធិមនុស្សរបស់អង្គការលីកាដូយល់ឃើញថា ការរុញច្រានមិនឱ្យក្រុមស្រ្ដីប្រមូលផ្ដុំនិងដើរដង្ហែរក្បួនដែលជាសិទ្ធិធានាដោយរដ្ឋធម្មនុញ្ញ និង ច្បាប់ស្ដីពីការធ្វើបាតុកម្មដោយសន្ដិវិធី គឺជាការរឹតបន្តឹងសិទ្ធិសេរីភាពមួយ។
លោកបញ្ជាក់ថា អាជ្ញាធរគួរតែជួយសម្រួលចរាចរណ៍ឱ្យក្រុមស្រ្ដីទាំងនោះដើរហែរក្បួន ទើបប្រសើរជាង។
លោកថា «ថ្ងៃនេះ គឺថ្ងៃទិវានារីអន្តរជាតិផង ហើយពួកគាត់ប្រារព្ធនូវទិវាទាំងអស់ហ្នឹង ហើយមានការរារាំង ដូច្នោះធ្វើឱ្យប៉ះពាល់សិទ្ធិរបស់ពួកគាត់ ហើយអន្តរជាតិក៏កំពុងរិះគន់លើចំណុចទាំងអស់នេះដែរ»។
លោក ស៊ឹង សែនករុណា មន្រ្តីសម្របសម្រួលអង្គការអាដហុកបានថ្លែងដែរថា ការលើកឡើងអំពីបញ្ហាចរាចរណ៍ដើម្បីរារាំងមិនឱ្យក្រុមស្រ្ដីទាំងនោះដើរដង្ហែរក្បួន គឺជាលេសមួយប៉ុណ្ណោះ ហើយកន្លងមក ឧត្តមស្នងការអង្គការសហប្រជាជាតិក៏ធ្លាប់ណែនាំដើម្បីជំរុញឱ្យពលរដ្ឋទទួលបានសិទ្ធិជួបជុំ ប្រមូលផ្ដុំសម្ដែងមតិដែរ ប្រសិនបើការជួបជុំនោះមិនបានធ្វើឱ្យមានបញ្ហាធ្ងន់ធ្ងរ ដូចជា គ្រោះថ្នាក់ ឬ ចលាចលនៅក្នុងសង្គម។
លោកថា «យើងទៅមើលបាតុកម្មនៅក្នុងប្រទេសលោកសេរីយើងឃើញហើយ ក្រុមប៉ូលិសរបស់ពួកគេជួយរៀបចំសម្រួលចរាចរណ៍ដើម្បីឱ្យពលរដ្ឋគេហ្នឹង បានធ្វើបាតុកម្មដាក់ញត្តិតាមស្ថាប័នទៅទៀត។ ពេលខ្លះពលករខ្មែរនៅប្រទេសកូរ៉េមិនមែនជាជនជាតិគេផង ប៉ុន្តែជួយសម្រួលឱ្យពួកគាត់ដាក់ញត្តិ អ៊ីចឹងយើងឃើញថា វាតួនាទីរបស់សមត្ថកិច្ច ដើម្បីសម្រួលឱ្យពួកគាត់បានដាក់ញត្តិ ដើម្បីឱ្យដល់ស្ថាប័នទាំងនោះបានដឹងពីរឿងរ៉ាវដែលពួកគេចង់បានផង»។
អង្គការសហប្រជាជាតិបានប្រារព្ធទិវាសិទ្ធិនារីអន្តរជាតិក្នុងឆ្នាំ ២០១៩ នេះ ក្រោមប្រធានបទ «គិតស្មើរភាពគ្នា បង្កើតភាពវៃឆ្លាត និង ច្នៃប្រឌិតសម្រាប់ឱ្យមានការផ្លាស់ប្ដូរ»។ លើសពីនេះ ត្រូវចូលរួមគាំទ្រចំពោះស្រ្ដីដែលកំពុងព្យាយាមយកឈ្នះឧបសគ្គ ដើម្បីបង្កើតឱ្យមានពិភពលោកកាន់តែប្រសើរមួយសម្រាប់មនុស្សទាំងអស់គ្នា៕