កំពង់ស្ពឺៈ ក្រុមហ៊ុនចម្ការអំពៅឈ្មោះអេច (H) ដែលជាសាខាក្រុមហ៊ុនភ្នំពេញស៊ូហ្គើរបានផ្ដល់ប្រាក់ ១ លានរៀលថ្លៃបូជាសពកម្មការិនីម្នាក់ បន្ទាប់ពីត្រូវម៉ាស៊ីនកាត់ដើមអំពៅកាប់គាត់ស្លាប់កាលពីថ្ងៃទី ១៥ ធ្នូនៅភូមិត្រពាំងក្រើញ ឃុំប្រាំបីមុំ ស្រុកថ្ពង ខេត្តកំពង់ស្ពឺ។
លោក គឹម យ៉ុន អធិការរងស្រុកថ្ពងប្រាប់ពីម្សិលមិញថា ករណីនេះលោកបានដឹង ប៉ុន្តែថាមិនទាន់បានទទួលរបាយការណ៍ពីការស្លាប់នេះទេ។
លោកថា៖ «រឿងនេះខ្ញុំ្ញឮថាជនរងគ្រោះដាក់កាសស្តាប់ចម្រៀង ហើយគាត់ដេកក្នុងចម្ការអំពៅមិនឮឡានកាត់អំពៅមកដល់»។
បុរសអ្នកភូមិម្នាក់ដែលសុំមិនបញ្ចេញឈ្មោះប្រាប់ថា នារីរងគ្រោះឈ្មោះ អ៊ិត អាយុ ១៨ ឆ្នាំមានបងប្អូន ៥ នាក់។ គាត់កំព្រាឪពុក តែម្តាយឈ្មោះ វ៉ាន់ វន អាយុ ៥០ ឆ្នាំ ឯនារីរងគ្រោះធ្វើការនៅចម្ការអំពៅនោះ។
លោកថា៖ «ខ្ញុំបានចូលរួមបុណ្យសពគាត់ដែរ ហើយខ្ញុំសួរម្តាយនារីរងគ្រោះប្រាប់ខ្ញុំថា ខាងក្រុមហ៊ុនគេឲ្យប្រាក់ ១ លានរៀលថ្លៃមេនធ្វើបុណ្យសព ហើយបុណ្យចប់ទើបក្រុមហ៊ុនគេឲ្យទៅជួបគេម្តងទៀត។ ខ្ញុំឮគ្រួសារសពនិយាយអ៊ីចឹង»។
លោក សឿន ឡាយ ប្រធានសហគមន៍ព្រៃឈើប្រាំបីមុំនៅស្រុកថ្ពងដែរនោះ បានប្រាប់ថានារីរងគ្រោះត្រូវម៉ាស៊ីនកាត់អំពៅកាប់ស្លាប់ ហើយស្រូបចូលក្នុងម៉ាស៊ីន ហើយធ្លាក់លើរថយន្តដឹកអំពៅ។ សាកសពនារីរងគ្រោះត្រូវម៉ាស៊ីនកាត់ដាច់ក្បាលជ្រុះនៅលើដីរីឯជើងដងខ្លួន និងដៃមួយចំហៀងត្រូវម៉ាស៊ីនស្រូបចូលហើយ ទម្លាក់លើរថយន្តដឹកអំពៅ។
លោក ស ម៉ូរ៉ា ប្រធានសហជីពចំណីអាហារ និងសេវាកម្មកម្ពុជាបានថ្លែងថា ធម្មតាពួកគាត់ត្រូវចុះបញ្ជីក្នុងបេឡាជាតិរបបសន្តិសុខសង្គម (បសស) ហើយបើមិនបានចុះបញ្ជីទេ គឺខាងគ្រួសារជនរងគ្រោះត្រូវប្តឹងទារផលប៉ះពាល់នេះជាលក្ខណៈផ្លូវច្បាប់៕