ភ្នំពេញ៖ ក្រុមហ៊ុនសាជីវកម្មចិន ឈ្មោះ China Great Wall Industry Corporation (CGWIC) បាននិងកំពុងត្រៀមខ្លួនបើកការិយាល័យនៅកម្ពុជា ក្នុងគោលបំណងជំរុញការប្រើប្រាស់ប្រព័ន្ធ GPS សម្រាប់បំពាក់លើមធ្យោបាយដឹកទំនិញក្នុងការធានាសុវត្ថិភាពនៃការដឹកជញ្ជូនក្នុងស្រុក និងក្នុងតំបន់អាស៊ាន។
ក្នុងកិច្ចប្រជុំតាមប្រព័ន្ធវីដេអូពីចម្ងាយជាមួយនាយកក្រុមហ៊ុនសាជីវកម្ម CGWIC កាលពីថ្ងៃទី ១១ ឧសភានេះ លោកទេសរដ្ឋមន្រ្តី ស៊ុន ចាន់ថុល ថ្លែងថា ក្រុមហ៊ុននេះសម្រេចបានជោគជ័យក្នុងការប្រកាសដាក់ឱ្យប្រើប្រាស់ជាផ្លូវការនូវប្រព័ន្ធផ្កាយរណប Beiduo GPS នៅទូទាំងពិភពលោក។
លោកបានឱ្យដឹងទៀតថា ក្រសួងត្រៀមលក្ខណៈជាស្រេចក្នុងការសហការលើការជំរុញការប្រើប្រាស់ប្រព័ន្ធផ្កាយរណប Beidou GPS នៅកម្ពុជា ជាប្រយោជន៍ដល់ការដឹកជញ្ជូន ហើយក៏គ្រោងនឹងលើកយកប្រធានបទនេះ ទៅក្នុងកិច្ចប្រជុំរដ្ឋមន្ត្រីដឹកជញ្ជូនអាស៊ាន កិច្ចប្រជុំរដ្ឋមន្ត្រីដឹកជញ្ជូនអាស៊ានបូកកូរ៉េ កិច្ចប្រជុំរដ្ឋមន្ត្រីដឹកជញ្ជូនអាស៊ានបូកចិន និងកិច្ចប្រជុំរដ្ឋមន្ត្រីដឹកជញ្ជូនអាស៊ានបូកជប៉ុន ដែលកម្ពុជាគ្រោងធ្វើជាម្ចាស់ផ្ទះនៅក្នុងខែវិច្ឆិកា ឆ្នាំ ២០២១ នៅលើទឹកដីអង្គរដោយផ្ទាល់ ប្រសិនបើស្ថានភាពជំងឺកូវីដ ១៩ មានភាពធូរស្រាល។
លោក ស៊ុន ចាន់ថុល បានស្នើឱ្យក្រុមហ៊ុនចិនពន្លឿនការបំពាក់ប្រព័ន្ធ BeiDou GPS ៥៥០ គ្រឿង ដែលបានគ្រោងទុកនោះ ឱ្យបានទាន់ពេលវេលា ដើម្បីក្រសួងអាចយកជាបទពិសោធន៍ និងមានមូលដ្ឋានដើម្បីជំរុញការប្រើប្រាស់នៅកម្ពុជាព្រមទាំងអាចប្រើប្រាស់ដើម្បីពិភាក្សាជាមួយរដ្ឋមន្ត្រីដឹកជញ្ជូនអាស៊ាននាចុងឆ្នាំ ២០២១ ខាងមុខនេះ។
លោកថា៖ « ប្រទេសជិតខាងក្នុងតំបន់អាស៊ានទាំងអស់នឹងចាប់អារម្មណ៍ឈានទៅប្រើប្រព័ន្ធ GPS នេះទាំងអស់គ្នា»។
អ្នកនាំពាក្យក្រសួងសាធារណការ និងដឹកជញ្ជូនលោក គង់ វិមាន ប្រាប់ ភ្នំពេញ ប៉ុស្តិ៍ បន្ថែមថា ក្រុមការងារបច្ចេកទេសទាំងពីរកំពុងសិក្សាលម្អិតទៀត ខណៈការិយាតំណាងរបស់ក្រុមហ៊ុនសាជីវកម្មចិន អាចនឹងបើកនៅកម្ពុជាឆាប់ៗខាងមុខនេះ ឬអាចនៅចុងឆ្នាំ ២០២១។
លោកថា៖ «គម្រោងបំពាក់ប្រព័ន្ធ GPS នេះ ស្ថិតនៅក្នុងការពិភាក្សាជាមួយក្រុមការងារបច្ចេកទេសនៅឡើយទេ ព្រោះត្រូវការពេលវេលា ហើយបើតាមផែនការគ្រោងបើកការិយាល័យនៅកម្ពុជាអាចឆាប់ៗនេះ ឬអាចនៅចុងឆ្នាំ ដោយសារស្ថិតក្នុងដំណាក់កាលពិភាក្សា»។
លោកបានឱ្យដឹងថា ប្រព័ន្ធ GPS នេះ ផ្តោតសំខាន់លើមធ្យោបាយដឹកទំនិញឆ្លងកាត់ព្រំដែន និងនៅក្នុងតំបន់អាស៊ាន ពុំមែនសម្រាប់បំពាក់លើមធ្យោបាយដឹកជញ្ជូនទូទៅឡើយ។
យោងតាមក្រសួងសាធារណការប្រព័ន្ធ Beidou GPS មានសារប្រយោជន៍អាចចូលរួមចំណែកក្នុងការ ស្វែងរកដំណោះស្រាយលើការកាត់បន្ថយគ្រោះថ្នាក់ចរាចរណ៍ ការដឹកជញ្ជូនទំនិញលើសទម្ងន់កម្រិត កំណត់ដោយច្បាប់ ការបើកបរហួសល្បឿនកំណត់ និងការតាមដានយានយន្តមិនចូលទៅក្នុងស្ថានីយថ្លឹងទម្ងន់ជាដើម។
លោក វិមាន អះអាងថា តាមរយៈការប្រើប្រាស់បច្ចេកវិទ្យាខ្ពស់នៃប្រព័ន្ធ BeiDou GPS នឹងផ្តល់ដង្ហើមជីវិតថ្មីទៅក្នុងការអភិវឌ្ឍសេដ្ឋកិច្ច និងសង្គមនៅកម្ពុជាសមស្របជាមួយនឹងយុទ្ធសាស្ត្រចតុកោណ របស់រាជរដ្ឋាភិបាល និងយុទ្ធសាស្ត្រខ្សែក្រវាត់ និងផ្លូវរបស់ប្រទេសចិន ផងដែរ។
CGWIC បានចុះហត្ថលេខាលើអនុស្សរណៈនៃការយោគយល់ស្តីពីការជំរុញ ប្រព័ន្ធ BeiDou GPS បច្ចេកវិទ្យាចាប់រលកសញ្ញាពីចម្ងាយ (Remote Sensing) និងប្រព័ន្ធផែនទីផ្លូវថ្នល់នៅកម្ពុជា កាលពីថ្ងៃទី ២៥ ខែ វិច្ឆិកា ឆ្នាំ ២០២០៕