.jpg)
លោក វេង សាខុន ជួបតំណាងក្រុមហ៊ុនចិន។ រូបថត ក្រសួងកសិកម្ម
ភ្នំពេញ: លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានបង្ហាញការគាំទ្រដល់ក្រុមហ៊ុនចិនឈ្មោះ Khmer Holding Group ដែលកំពុងស្វែងរកការវិនិយោគដាំរុក្ខជាតិឱសថ និងបង្កើតរោងចក្រចម្រាញ់រុក្ខជាតិឱសថនៅកម្ពុជា ដើម្បីចូលរួមប្រើប្រាស់វត្ថុធាតុដើមបង្កើតការងារជូនពលរដ្ឋនៅក្នុងមូលដ្ឋាន។
លោក វេង សាខុន បានជួបពិភាក្សាការងារគម្រោងវិនិយោគដាំដុះរុក្ខជាតិឱសថ ការបង្កើតវិទ្យាស្ថាន និងការបង្កើតរោងចក្រចម្រាញ់រុក្ខជាតិឱសថនៅកម្ពុជាជាមួយតំណាងក្រុមហ៊ុន Khmer Holding Group កាលពីថ្ងៃទី ៦ ខែសីហាដែលគម្រោងនេះនឹងចូលរួមចំណែកកាត់បន្ថយបរិមាណការនាំចូលឱសថពីបរទេស។
លោក សាខុន បានថ្លែងថា៖ «យើងស្វាគមន៍ចំពោះបំណងវិនិយោគបង្កើតវិទ្យាស្ថានស្រាវជ្រាវ ដាំដុះ ធ្វើការចម្រាញ់រុក្ខជាតិឱសថនៅកម្ពុជាសំដៅចូលរួមប្រើប្រាស់វត្ថុធាតុដើម បង្កើតការងារជូនប្រជាពលរដ្ឋនៅមូលដ្ឋាន បង្កើនចំណូល កាត់បន្ថយបរិមាណនាំចូលពីក្រៅប្រទេសដែរ»។
លោក វេង សាខុន បានណែនាំឲ្យក្រុមហ៊ុនសិក្សាឲ្យបានច្បាស់លាស់អំពីទីតាំង និងទំហំផ្ទៃដីដាំដុះរុក្ខជាតិឱសថនេះ ដោយសារគម្រោងវិនិយោគត្រូវបានការគាំទ្រពីរាជរដ្ឋាភិបាលចិន ដូច្នេះក្រុមហ៊ុនត្រូវធ្វើការទំនាក់ទំនងជាមួយស្ថានទូតចិនប្រចាំកម្ពុជា ដើម្បីទទួលបានកំណត់ទូតច្បាស់លាស់ដែលអាចស្នើសុំឲ្យរាជរដ្ឋាភិបាលកម្ពុជាដែលមានក្រសួងកសិកម្ម រុក្ខាប្រមាញ់ និងនេសាទ ផ្តល់កិច្ចសហការឲ្យបានពេញលេញ និងគ្រប់ជ្រុងជ្រោយ។
លោក វេង សាខុន ក៏បានស្នើឲ្យគណ:ប្រតិភូរៀបចំក្រុមការងារបច្ចេកទេស សហការជាមួយរដ្ឋបាលព្រៃឈើ និងអគ្គនាយកដ្ឋានកសិកម្ម ដើម្បីសិក្សាលើលទ្ធភាពនៃកិច្ចសហការជាមួយសហគមន៍ព្រៃឈើ សហគមន៍កសិកម្មក្នុងការដាំដុះ និងពិនិត្យលើក្រុមហ៊ុនសម្បទានដីសេដ្ឋកិច្ចមួយចំនួនដែលមិនទាន់បានធ្វើការអភិវឌ្ឍ ដើម្បីធ្វើជាដៃគូសហការដាំដុះដំណាំរុក្ខជាតិឱសថ។
លោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទពីម្សិលមិញមិនទាន់អាចទាក់ទងសុំការបញ្ជាក់បន្ថែមជុំវិញគម្រោងវិនិយោគដាំដុះរុក្ខជាតិឱសថរបស់ក្រុមហ៊ុនចិននេះបានទេ ដោយទូរស័ព្ទលោកគ្មានអ្នកទទួល។
លោក ឆាវ អ៊ីនទ័រ តំណាងក្រុមហ៊ុន Khmer Holding Group បានថ្លែងក្នុងអំឡុងពេលដឹកនាំប្រតិភូចូលជួបពិភាក្សាកាលពីថ្ងៃទី ៦ ខែសីហានោះដែរថា លោកមានគោលបំណងសំខាន់ ដើម្បីស្នើសុំកិច្ចសហការ និងការគាំទ្រពីក្រសួងកសិកម្ម រុក្ខាប្រមាញ់ និងនេសាទក្នុងការបង្កើតវិទ្យាស្ថានស្រាវជ្រាវ និងបង្កើតរោងចក្រចម្រាញ់រុក្ខជាតិឱសថ និងស្វែងរកផ្ទៃដីដាំដុះរុក្ខជាតិឱសថដែលគម្រោងនេះត្រូវបានទទួលការគាំទ្រថវិកាពីរដ្ឋាភិបាលនៃប្រទេសចិន។
លោកបន្តថា ក្រុមហ៊ុនលោកទទួលយកអនុសាសន៍លោក វេង សាខុន ដែលចាំបាច់ត្រូវតែរៀបចំផែនទីបង្ហាញផ្លូវមួយច្បាស់លាស់មុននឹងឈានទៅរៀបចំឯកសារ MOU ចុះហត្ថលេខារួមគ្នានាពេលខាងមុខ។ លោកថា ត្រង់ចំណុចនេះ ក្រុមការងារក្រុមហ៊ុន Khmer Holding Group បានឯកភាពទាំងស្រុងថា នឹងយកសំណើ និងអនុសាសន៍របស់លោករដ្ឋមន្ត្រីទៅពិចារណាបន្ថែមទៀត។
លោក កែវ អូម៉ាលីស្ស ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទពីម្សិលមិញមិនទាន់អាចទាក់ទងសុំការបញ្ជាក់បន្ថែមបានទេ ដោយលោកបានបិទទូរស័ព្ទ៕
