.jpg)
ដើមដូង និងដំណាំផ្សេងៗរបស់ពលរដ្ឋត្រូវបានក្រុមហ៊ុនចិន UDG ឈូសបំផ្លាញចោល។ រូបថត សហការី
កោះកុងៈ បុគ្គលិករបស់ក្រុមហ៊ុន Union Development Group បានប្រើគ្រឿងចក្រឈូសរំលំដើមឈើ និងបំផ្លាញផលដំណាំរបស់ប្រជាពលរដ្ឋចំនួន ៧ គ្រួសារដែលបានបដិសេធមិនទទួលយកសំណងពីក្រុមហ៊ុនអភិវឌ្ឍរបស់ចិននេះនៅក្នុងស្រុកគិរីសាគរខេត្តកោះកុងកាលពីថ្ងៃអង្គារ។
អ្នកស្រី ផឿង លួន អាយុ ៤៥ ឆ្នាំជាអ្នកភូមិម្នាក់ដែលបានរស់នៅលើផ្ទៃដី ២,៥ ហិកតា ក្នុងឃុំកោះស្តេចចាប់តាំងពីការបញ្ចប់របបខ្មែរក្រហមក្នុងឆ្នាំ ១៩៧៩ មកបានថ្លែងថា អាប៊ុលទាំងនោះបានឈូសឆាយរំលំដើមដូង ដើមស្វាយ ដើមអម្ពិល របស់ប្រជាពលរដ្ឋ និងបានគំរាមបំផ្លាញអ្វីៗបន្ថែមទៀត។
អ្នកស្រី បានថ្លែងបន្តថា៖ «កាលពីឆ្នាំមុនក្រុមហ៊ុនបានផ្តល់សំណងដល់ខ្ញុំចំនួន ៣ ម៉ឺនដុល្លារ ប៉ុន្តែខ្ញុំមិនទទួលយក»។ អ្នកស្រីបញ្ជាក់ថា៖ «ពួកគេនិយាយថា មិនមានឱកាសសម្រាប់ខ្ញុំទទួលបានច្រើនជាងនេះទៀតទេ។ ប៉ុន្តែខ្ញុំមិនទទួលយកដោយសារជីវភាពរបស់យើង ផ្អែកលើដីនេះ វាផ្តល់នូវដំណាំ ផ្លែឈើដល់យើង ហើយខ្ញុំអាចធ្វើការនេសាទបានហើយដីនេះត្រូវបានផ្តល់ឲ្យខ្ញុំដោយឪពុកម្តាយរបស់ខ្ញុំ»។
ប៉ុន្តែទោះយ៉ាងណាអ្នកស្រី លួន មិនបានធ្វើប្លង់កាន់កាប់ដីធ្លីរបស់អ្នកស្រីទេ។
គ្មាននរណាម្នាក់នៅក្រុមហ៊ុន UDG បានលើកទូរស័ព្ទទេកាលពីថ្ងៃពុធ ហើយអ្នកនាំពាក្យក្រុមហ៊ុនអ្នកស្រី Bella Zhang មិនបានឆ្លើយតបនឹងសំណើសុំអត្ថាធិប្បាយ។
ក្រុមហ៊ុនចិន UDG កំពុងសាងសង់កន្លែងទេសចរណ៍ដ៏ធំមួយដែលមានតម្លៃប្រមាណ ៣,៨ ពាន់លានដុល្លារតាមបណ្តោយឆ្នេរដោយបង្កឲ្យមានជម្លោះដីធ្លី ជាមួយប្រជាពលរដ្ឋរាប់រយគ្រួសារ។
កាលពីខែកុម្ភៈប្រជាពលរដ្ឋចំនួន ១៤ គ្រួសារក្នុងឃុំចំនួនពីរជាប់នោះ បានដាក់ពាក្យបណ្តឹងប្រឆាំងនឹងសន្តិសុខរបស់ក្រុមហ៊ុន UDG ពីបទដុតដំណាំរបស់ពួកគេ និងខ្ទមមួយចំនួនរបស់ពួកគេ។
អធិការរងស្រុកគិរីសាគរលោក គីម សុជាតិ បានបញ្ជាក់ថាកម្លាំងរបស់យើង បាននៅកន្លែងកើតហេតុ ប៉ុន្តែបានថ្លែងថាក្រុមហ៊ុន «គ្រាន់តែឈូសឆាយដីរបស់គ្រួសារដែលបានទទួលសំណងរួចហើយ»។
ទោះយ៉ាងណាក្តីលោក ញៀប អឿន មន្ត្រីសម្របសម្រួលរបស់អង្គការសិទ្ធិមនុស្សអាដហុកប្រចាំខេត្តកោះកុងបានថ្លែងថា គ្មានប្រជាពលរដ្ឋណាមួយក្នុងចំណោមគ្រួសារទាំងនោះបានទទួលយកសំណងនោះទេ។
លោកបានថ្លែងបន្តថាតំណាងក្រុមហ៊ុនបានទុកពេលឲ្យប្រជារដ្ឋរយៈពេល ៣ ថ្ងៃដើម្បីចាកចេញ បើមិនដូច្នោះទេនឹងប្រឈមមុខនឹងការរុះរើផ្ទះផងដែរ៕ PS
