ផ្លូវបេតុងប្រវែង ៧០ គីឡូម៉ែត្រ នៅលើតំបន់អភិវឌ្ឍន៍ក្រុងកោះរ៉ុង ខេត្តព្រះសីហនុ ត្រូវបានក្រុមហ៊ុន Royal Group Koh Rong Development Company របស់អ្នកឧកញ៉ា គិត ម៉េង ចុះហត្ថលេខាលើកិច្ចព្រមព្រៀងសាងសង់ជាមួយក្រុមហ៊ុន Sinohydro Corporation Limited នាថ្ងៃនេះ ដោយចំណាយថវិកាចំនួន ៣៥ លានដុល្លារ និងប្រើរយៈពេល ១៦ ខែ។
ពិធីចុះហត្ថលេខានេះ ធ្វើឡើងនៅសណ្ឋាគារ Goddess of Liberty Hotel & Resort ក្នុងខេត្តព្រះសីហនុ ដោយមានការចូលរួមពីលោក គួច ចំរើន អភិបាលខេត្តព្រះសីហនុ អ្នកឧកញ៉ា គិត ម៉េង អគ្គនាយកក្រុមហ៊ុន Royal Group លោក ជា វុទ្ធី អគ្គលេខាធិការរងនៃក្រុមប្រឹក្សាអភិវឌ្ឍន៍កម្ពុជា (CDC) និងមានការចូលរួមពីអភិបាលរងខេត្ត អភិបាលក្រុង ប្រធានមន្ទីរស្ថាប័នពាក់ព័ន្ធ ព្រមទាំងមន្ត្រីសាលាខេត្តព្រះសីហនុជាច្រើនរូបទៀត។
លោក គួច ចំរើន អភិបាលខេត្តព្រះសីហនុ ថ្លែងក្នុងពិធីនោះថា ការចុះហត្ថលេខានាពេលនេះ គឺជាការបង្ហាញនូវការអនុវត្តគម្រោងដ៏ជាក់លាក់មួយរបស់ក្រុមហ៊ុន Royal Group។ ការកសាងផ្លូវបេតុងថ្មីៗនេះ មិនមែនជាការចាប់ផ្ដើម ហើយក៏មិនមែនជាការបញ្ចប់ដែរ។ ប៉ុន្ដែវាជាការអនុវត្តគម្រោងមួយដែលចាប់ផ្ដើមតាំងដើមរហូតដល់បច្ចុប្បន្ន ហើយក្រុមហ៊ុននៅតែបន្តធ្វើការកសាងនូវហេដ្ឋានរចនាសម្ព័ន្ធនានាបន្ថែមទៀត ដូចជា សណ្ឋាគារ រោងចក្រអគ្គិសនី ព្រលានយន្តហោះ និងផ្លូវសំខាន់ៗដែលបម្រើឲ្យគោលដៅទេសចរណ៍។
លោកបញ្ជាក់ថា៖ «យើងនៅតែមានសេចក្ដីត្រូវការអភិវឌ្ឍន៍នូវហេដ្ឋារចនាសម្ព័ន្ធជាច្រើនទៀត ជាពិសេសយើងត្រូវគិតគូរពីការធ្វើអាងប្រព្រឹត្តកម្មទឹកស្អាង ឬទឹកកខ្វក់នៅក្នុងតំបន់ ដើម្បីគ្រប់គ្រងអនាម័យបរិស្ថានកោះរ៉ុងកាន់តែស្អាតថែមទៀត។ ក្រុមហ៊ុន Sinohydro គួរតែដកស្រង់បទពិសោធន៍ពីគម្រោងធ្វើផ្លូវចំនួន ៣៤ ខ្សែ របស់រដ្ឋបាលខេត្តព្រះសីហនុកំពុងធ្វើនេះ ព្រោះខ្ញុំចង់ឲ្យក្រុមហ៊ុនអនុវត្តគម្រោងឲ្យដូចផ្លូវដែលយើងកំពុងធ្វើស្រាប់នេះ»។
លោកអភិបាលខេត្តបន្តថា លោកចង់ឃើញសមិទ្ធផលផ្លូវប្រវែង ៧០ គីឡូម៉ែត្រនេះធ្វើរួចរាល់តាមពេលវេលាកំណត់នៅក្នុងកិច្ចព្រមព្រៀងនេះ ដើម្បីរួមចំណែកអភិវឌ្ឍន៍វិស័យទេសចរណ៍ផ្ដល់ការងារជូនពលរដ្ឋខ្មែរ ទាក់ទាញអ្នកវិនិយោគជាតិ-អន្តរជាតិបន្ថែមទៀត។ ជាពិសេសទាក់ទាញចំណាប់អារម្មណ៍ភ្ញៀវបរទេសកាន់តែខ្លាំង។
លោក ជា វុទ្ធី អគ្គលេខាធិការរងនៃក្រុមប្រឹក្សាអភិវឌ្ឍន៍កម្ពុជា (CDC) បានថ្លែងថា ទន្ទឹមនឹងការសាងសង់ផ្លូវបេតុង ៧០ គីឡូម៉ែត្រនេះ អ្នកឧកញ៉ា គិត ម៉េង នឹងខិតខំចាប់ផ្តើមអភិវឌ្ឍន៍គម្រោងផ្សេងៗទៀត ដើម្បីប្រែក្លាយកោះរ៉ុង ទៅជាទីក្រុងមួយដ៏ស្រស់បំព្រង។ មានផាសុខភាពល្អតាមបែបធម្មជាតិនៃឆ្នេរខ្សាច់ និងព្រៃព្រឹក្សានៅទីនោះ សំដៅទាក់ទាញឲ្យកាន់តែច្រើនឡើងនូវភ្ញៀវទេសចរជាតិ និងអន្តរជាតិមកទស្សនា និងលំហែរកាយនៅកោះរ៉ុង។
លោកមានប្រសាសន៍ថា៖ «យើងជឿជាក់ថា ខេត្តព្រះសីហនុ នឹងក្លាយជាកន្លែងសេដ្ឋកិច្ចពិសេសពហុបំណងរបស់កម្ពុជានាពេលឆាប់ៗខាងមុខនេះស្របតាមគោលនយោបាយអភិវឌ្ឍន៍សេដ្ឋកិច្ច។ ជាពិសេសខេត្តព្រះសីហនុទាំងមូល នឹងចូលរួមបង្កើតការងារជូនពលរដ្ឋខ្មែរកាន់តែច្រើនថែមទៀត»។
អ្នកឧកញ៉ា គិត ម៉េង អគ្គនាយកក្រុមហ៊ុន Royal Group បានថ្លែងអំណរគុណដល់ស្ថាប័នពាក់ព័ន្ធទាំងអស់ដែលបានចូលរួមចំណែកក្នុងការជំរុញឲ្យមានការស្ថាបនាផ្លូវនៅលើតំបន់អភិវឌ្ឍន៍កោះរ៉ុងនេះ។
លោកបន្តថា បច្ចុប្បន្នក្រុមហ៊ុនបានចាប់ផ្តើមសាងសង់ផ្លូវបេតុង ៧០ គីឡូម៉ែត្រ ហើយនាពេលខាងមុខទៀត ក្រុមហ៊ុននឹងត្រូវសាងសង់រោងចក្រអគ្គិសនី កំពង់ផែ និងព្រលានយន្តហោះនៅលើតំបន់អភិវឌ្ឍន៍កោះរ៉ុងបន្ថែមទៀត។
តាមសេចក្ដីប្រកាសព័ត៌មានរបស់ក្រុមហ៊ុន Royal Group បានឲ្យដឹងនៅថ្ងៃនេះថា ក្នុងកិច្ចព្រមព្រៀងគម្រោងសាងសង់ផ្លូវបេតុងនៅលើតំបន់អភិវឌ្ឍន៍កោះរ៉ុងនេះ ត្រូវចំណាយថវិកាចំនួន ៣៥ លានដុល្លារអាមេរិក នឹងត្រូវបញ្ចប់ការសាងសង់ក្នុងរយៈពេល ១៦ ខែ ស្របតាមផែនការមេអភិវឌ្ឍន៍ហេដ្ឋារចនាសម្ព័ន្ធដែលគណៈកម្មការអន្តរក្រសួងរបស់ក្រុមប្រឹក្សាអភិវឌ្ឍន៍កម្ពុជា បានអនុម័តកាលពីថ្ងៃទី ៩ ខែ តុលា ឆ្នាំ ២០១០។
សេចក្ដីប្រកាសព័ត៌មានបន្តថា ក្រុមហ៊ុន រ៉ូយ៉ាល់ គ្រុប បានចុះហត្ថលេខាជួលកោះរ៉ុង ស្ថិតក្នុងខេត្តព្រះសីហនុ ជាមួយក្រុមប្រឹក្សាអភិវឌ្ឍន៍កម្ពុជា ដែលជាភាគីតំណាងឲ្យរាជរដ្ឋាភិបាលកម្ពុជា នៅថ្ងៃទី ២៨ ខែ កុម្ភៈ ឆ្នាំ ២០០៨ ដើម្បីអភិវឌ្ឍជាតំបន់អភិវឌ្ឍន៍ ពាណិជ្ជកម្ម និងរមណីយដ្ឋានទេសចរណ៍ធម្មជាតិ៕