កំពង់ស្ពឺ :អាជ្ញាធរខេត្តកំពង់ស្ពឺនឹងអនុញ្ញាតឲ្យក្រុមហ៊ុនរុករករ៉ែឈ្មោះ សុខចាន់លី ធ្វើការខួងយកថ្មម៉ាបឡើងវិញនៅភូមិក្បាលដំរី ឃុំត្រពាំងជោរ ស្រុកឱរ៉ាល់ ប៉ុន្ដែត្រូវបង់ប្រាក់ពិន័យជាង ៥០ លានរៀល ចំពោះការធ្វើសកម្មភាពដោយមិនបានសុំការអនុញ្ញាតពីអាជ្ញាធរមូលដ្ឋានកន្លងមក បន្ទាប់ពីសមត្ថកិច្ចបានឃាត់ខ្លួនកម្មករក្រុមហ៊ុននេះ ៥ នាក់។
លោក វ៉ី សំណាង អភិបាលខេត្តកំពង់ស្ពឺបានថ្លែងពីម្សិលមិញថា ក្រុមហ៊ុនរុករករ៉ែឈ្មោះ សុខ ចាន់លី (SOK CHANLY CO., LTD) មានច្បាប់ត្រឹមត្រូវ ប៉ុន្ដែក្នុងអំឡុងពេលធ្វើសកម្មភាពកន្លងមក ពួកគាត់មិនបានសុំការអនុញ្ញាតពីអាជ្ញាធរមូលដ្ឋាន ឬបង្ហាញលិខិតបញ្ជាក់នានា ទើបសមត្ថកិច្ចបានឃាត់ខ្លួនកម្មកររបស់ក្រុមហ៊ុននេះចំនួន ៥ នាក់យកមកសាកសួរតាមនីតិវិធីច្បាប់។
លោកបន្តថា បន្ទាប់ពីសមត្ថកិច្ចបានឃាត់ខ្លួនកម្មករក្រុមហ៊ុននេះបានឆ្លើយថា ដំបូងឡើយក្រុមហ៊ុនគ្រាន់តែឲ្យពួកគេចុះទៅស្រាវជ្រាវនៅទីតាំងខាងលើនេះជាបណ្ដោះអាសន្ន បើសិនមានរ៉ែដែលគាត់ចង់បាននោះ គាត់នឹងមកសុំច្បាប់ជាផ្លូវការ ដើម្បីទទួលបានសិទ្ធិធ្វើអាជីវកម្មនៅក្នុងតំបន់នោះ។
លោកអភិបាលខេត្តបន្តថាអាជ្ញាធរបានពិន័យក្រុមហ៊ុនប្រមាណជាង ៥០ លានរៀលចំពោះបទល្មើសស្វែងរករ៉ែដោយគ្មានការអនុញ្ញាត។
លោកបញ្ជាក់ថា៖ «ខ្ញុំចង់បញ្ជាក់ថា ក្រុមហ៊ុនហ្នឹងគេមានច្បាប់ត្រឹមត្រូវ ប៉ុន្ដែការទៅខួងថ្មម៉ាបហ្នឹង គឺគាត់ទៅធ្វើតេស្តក្រៅផ្លូវការសិន ហើយធ្វើតេស្តក្រៅផ្លូវការហ្នឹងហើយ ដែលយើងត្រូវពិន័យក្នុង ១ ថ្ងៃ ៥០ ម៉ឺនរៀលក្នុងមនុស្សម្នាក់ហើយគាត់ធ្វើសកម្មភាពជាង ១០ ថ្ងៃ (ដោយមិនបានសុំការអនុញ្ញាតពីអាជ្ញាធរមូលដ្ឋាន)។ អ៊ីចឹងយើងពិន័យរឿងធ្វើតេស្តក្រៅផ្លូវការហ្នឹង»។
លោក នៅ ណាក់ អនុប្រធានមន្ទីរបរិស្ថានខេត្តកំពង់ស្ពឺបានថ្លែងថា បច្ចុប្បន្ននេះអាជ្ញាធរបានផ្អាកសកម្មភាពខួងថ្មម៉ាបរបស់ក្រុមហ៊ុនបណ្ដោះអាសន្នសិន ដើម្បីឲ្យគាត់បង់ប្រាក់ពិន័យក្នុង ១ ថ្ងៃម្នាក់ ៥០ ម៉ឺនរៀលចំពោះការធ្វើសកម្មភាពរយៈពេលជាង ១០ ថ្ងៃដោយគ្មានការអនុញ្ញាត។
លោកបន្តថា បន្ទាប់ពីក្រុមហ៊ុនបង់ប្រាក់ពិន័យរួចរាល់ កិច្ចការបន្តនឹងត្រូវប្រគល់ជូនទៅមន្ត្រីជំនាញរ៉ែ និងថាមពល។ លោកបញ្ជាក់ថា៖ «បើគាត់ចង់បន្តការងារអាជីវកម្មគាត់ទៀត គាត់ត្រូវទៅសុំច្បាប់ពីមន្ត្រីជំនាញរ៉ែ និងថាមពល និងអាជ្ញាធរមូលដ្ឋាន ដើម្បីឲ្យគេចេញច្បាប់ ឬគេដឹងឮថា យើងធ្វើអាជីវកម្មហ្នឹង។ បើគាត់ធ្វើអ្វីស្ងាត់ៗបែបនេះគឺច្បាស់ជាខុសច្បាប់ហើយ»។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) ដែលជាអ្នករកឃើញទីតាំងខួងយកថ្មម៉ាបចំនួន ៦ កន្លែងបានឲ្យដឹងពីម្សិលមិញថា ក្រុមហ៊ុនរុករករ៉ែឈ្មោះ សុខចាន់លី មានច្បាប់ត្រឹមតែបណ្ណប៉ាតង់បង់ពន្ធនៅក្រសួងសេដ្ឋកិច្ចប៉ុណ្ណោះ ប៉ុន្ដែគ្មានលិខិតដែលទាក់ទងនឹងការធ្វើអាជីវកម្មខួងថ្មម៉ាបនេះទេ។
លោកថា ច្បាប់របស់ក្រុមហ៊ុននេះមិនទាន់គ្រប់គ្រាន់ក្នុងការធ្វើអាជីវកម្មខួងយកថ្មម៉ាប ឬរ៉ែធម្មជាតិបានទេ ព្រោះគាត់មានតែបណ្ណបង់ពន្ធប៉ាតង់ពីក្រសួងសេដ្ឋកិច្ច និងហិរញ្ញវត្ថុ ប៉ុន្ដែតាមច្បាប់គឺតម្រូវឲ្យគាត់ស្នើសុំច្បាប់ពីមន្ទីរជំនាញ ឬស្ថាប័នជំនាញ ព្រមទាំងអាជ្ញាធរមូលដ្ឋានជាមុនសិន។
លោកបញ្ជាក់ថា៖ «ខ្ញុំបានរកឃើញថា ក្រុមហ៊ុន សុខ ចាន់លី នេះគឺបានធ្វើសកម្មភាពនៅខេត្តកំពង់ឆ្នាំង ក្រចេះ មណ្ឌលគិរី រតនគិរី និងនៅតំបន់ផ្សេងៗមួយចំនួនទៀត ប៉ុន្ដែខ្ញុំមិនទាន់ដឹងថា ទីតាំងដែលគាត់ធ្វើសកម្មភាពនេះបានសុំច្បាប់ដែរ ឬគ្មានសុំច្បាប់ដូចករណីនេះ។ ខ្ញុំនឹងរៀបចំលិខិតដាក់ទៅក្រសួងបរិស្ថាន និងក្រសួងរ៉ែ និងថាមពលដើម្បីចុះធ្វើអធិការកិច្ចទៅលើទីតាំងដែលក្រុមហ៊ុនកំពុងធ្វើសកម្មភាព និងត្រួតពិនិត្យលើក្រុមហ៊ុននេះឲ្យបានត្រឹមត្រូវ»។
លោក ហូ វិចិត្រ រដ្ឋលេខាធិការក្រសួងរ៉ែ និងថាមពលពីម្សិលមិញបានបដិសេធការធ្វើអត្ថាធិប្បាយជុំវិញករណីនេះ ដោយលោកបានបង្វែរសំណួរទៅលោក យស មន្នីរ៉ាត់ វិញ។
ប៉ុន្តែលោក យស មន្នីរ៉ាត់ អគ្គនាយកនៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពលមិនទាន់អាចទាក់ទងសុំការបញ្ជាក់ជុំវិញករណីនេះបានទេ ដោយទូរស័ព្ទរបស់លោកមិនអាចទាក់ទងបានពីម្សិលមិញ។
ចំណែកតំណាងក្រុមហ៊ុនសុខចាន់លីក៏មិនអាចទាក់ទងសុំការបញ្ជាក់ជុំវិញករណីនេះបានដែរ ដោយទូរស័ព្ទចូលប៉ុន្ដែអ្នកទទួលប្រាប់ថា ច្រឡំលេខ។
គួររំឭកថា កម្មករជាជនជាតិខ្មែរ ៣ នាក់ និងវៀតណាម ២ នាក់ ត្រូវបានសមត្ថកិច្ចខេត្តកំពង់ស្ពឺឃាត់ខ្លួនកាលពីថ្ងៃទី ២៥ ខែវិច្ឆិកា ខណៈដែលពួកគេកំពុងខួងយកថ្មម៉ាបនៅភូមិក្បាលដំរី ឃុំត្រពាំងជោរ ស្រុកឱរ៉ាល់ ដោយមិនបានសុំការអនុញ្ញាតពីអាជ្ញាធរមូលដ្ឋាន ក្រោយពីអង្គការមួយបានរាយការណ៍ពីសកម្មភាពរបស់ជនទាំងនេះ៕