ភ្នំពេញៈ ក្រុមហ៊ុនបញ្ជាទិញផលិតផលម៉ាក Adidas បានភ្ជាប់ករណីកម្មករដួលសន្លប់នៅរោងចក្រមួយក្នុងរាជធានីភ្នំពេញដែលខ្លួនបញ្ជាទិញទៅនឹងកត្តាចិត្តសាស្ត្រពិសេសផ្ដោតលើ «បញ្ហាអាហារូបត្ថម្ភ» ខណៈខ្លួនមិនដឹងអំពីឧប្បត្តិហេតុនាកាលពីអតីតកាលនៃ «បាតុភូត» នេះបន្ទាប់ពីមានកម្មករដួលសន្លប់ជាច្រើននាពេលថ្មីៗនេះ ។
លោក Andre Mendes អ្នកនាំពាក្យក្រុមហ៊ុន Adidas បានថ្លែងថានៅពេលករណីដួលសន្លប់ជាច្រើននៅតាមរោងចក្រផ្គត់ផ្គង់ក្នុងប្រទេសកម្ពុជាត្រូវបានរាយការណ៍ពីអតីតកាល វាត្រូវបានបង្កឡើងដោយបញ្ហាផ្លូវចិត្តដែលភ្ជាប់ជាមួយស្រេ្តស និងកត្តាដទៃៗទៀតពាក់ព័ន្ធរាងកាយ ប៉ុន្តែក៏មានបញ្ហាអាហារូបត្ថម្ភផងដែរ។
លោកបានសរសេរតាមអ៊ីមែលថា៖ «នៅផ្នែករបស់យើងពេលណាយើងបានឃើញឧប្បត្តិហេតុបែបនេះយើងដោះស្រាយវាដោយផ្អែកលើមូលដ្ឋានវិទ្យាសាស្ត្រដោយស្វែងរកការកំណត់ជាមុនសិនថា តើមានលក្ខខណ្ឌបរិស្ថាន ឬមុខរបរណាមួយដែលបានបង្កឲ្យកម្មករដួលសន្លប់ ឬបង្ហាញរូបសញ្ញាវេជ្ជសាស្ត្រដទៃទៀត»។ ប៉ុន្តែលោកថាវាមិនដឹងទេថា តើអ្នកផ្គត់ផ្គង់របស់ Adidas បានផ្តល់អាហារដល់កម្មករឬអត់?
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានថ្លែងថារោងចក្រតែ ២ ប៉ុណ្ណោះគឺរោងចក្រ Top Summit Garment Inc ក្នុងខេត្តកណ្តាល និងរោងចក្រ Sabrina Cambodia Garment Manufacturing ក្នុងខេត្តកំពង់ស្ពឺបាននិងកំពុងផ្តល់អាហារសុខភាពមួយពេលក្នុងមួយថ្ងៃដល់កម្មករអស់ពេលជិត ២ ឆ្នាំហើយតាមកិច្ចសន្យាជាមួយក្រុមហ៊ុនផ្គត់ផ្គង់អាហារឈ្មោះ Hagar។ លោកថាជាលទ្ធផលរោងចក្រទាំងនោះបានជួយកែលម្អអាហារូបត្ថម្ភ ហើយមិនឃើញកម្មករដួលសន្លប់ទេ។
លោកបានថ្លែងថា៖ «វាជាប្រភេទនៃការដោះស្រាយបញ្ហា»។ ទោះយ៉ាងណាលោក ធន់ បានអះអាងថាក្រៅពីរោងចក្រទាំង ២ នេះមិនមានរោងចក្រច្រើនទេដែលផ្តល់អាហារដល់កម្មករ។ ក្រុមហ៊ុនមានភាពស្ទាក់ស្ទើរព្រោះក្រុមហ៊ុននឹងចំណាយច្រើនក្នុងការផ្តល់អាហារ។
លោកបានបន្តទៀតថា៖ «ពួកគេមិនចង់ចំណាយលុយពួកគេទេ»។ លោកបានបន្ថែមថាវាមានតម្រូវការឲ្យមានការបង្កើតយន្តការគ្រប់គ្រងសារធាតុគីមី ដែលពេលខ្លះក៏ជាហេតុផលនៅពីក្រោយការដួលសន្លប់ផងដែរ។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា មិនបានឆ្លើយតបចំពោះការស្នើសុំអត្ថាធិប្បាយទេនៅមុនម៉ោងបោះពុម្ពផ្សាយកាសែតកាលពីម្សិលមិញ៕ PS
