.jpg)
ការប្រមូលសំរាមរបស់ក្រុមហ៊ុនស៊ីនទ្រី ពីម្សិលមិញ។ ហ៊ាន រង្សី
ភ្នំពេញៈ លោក នួន សំណាវុធ អភិបាលរដ្ឋាករស្វយ័តគ្រប់គ្រងសំរាមសំណល់រឹងរាជធានីភ្នំពេញបានឲ្យដឹងថា ក្រុមហ៊ុនចំនួន ៣ ដែលជាប់ក្នុងការដេញថ្លៃលើការផ្ដល់សេវាប្រមូល និងដឹកជញ្ជូនសំរាមសំណល់រឹងនឹងដំណើរការនៅខែកុម្ភៈដើមឆ្នាំក្រោយ ក្រោយពេលចុះកិច្ចព្រមព្រៀមជាមួយរដ្ឋបាលរាជធានីភ្នំពេញដែលត្រូវធ្វើនៅពាក់កណ្តាលខែធ្នូនេះ។
លោក នួន សំណាវុធ បានឱ្យភ្នំពេញប៉ុស្តិ៍ដឹងពីម្សិលមិញថា បន្ទាប់ពីចុះកិច្ចព្រមព្រៀងជាមួយក្រុមហ៊ុនដែលបានជាប់ទាំង ៣ លើការផ្ដល់សេវាប្រមូល និងដឹកជញ្ជូនសំរាមសំណល់រឹងហើយ ក្រុមហ៊ុនទាំង ៣ នោះនឹងចេញប្រតិបត្តិការទៅតាមទីតាំងដែលបានកំណត់ចាប់ពីថ្ងៃទី ១ ខែកុម្ភៈ ឆ្នាំ ២០២១ តទៅ។
លោកបញ្ជាក់ថា៖ «ក្នុងដំណាក់កាលនេះយើងនឹងសម្រេចបាននៅពាក់កណ្តាលខែ ១២ នេះដោយត្រូវមានការចុះកិច្ចសន្យាជាមួយក្រុមហ៊ុនដែលដេញថ្លៃឈ្នះចំនួន ៣ ហើយសេវារបស់យើងនឹងចាប់ផ្តើមប្រតិបត្តិការដោយប្រតិបត្តិករថ្មី ដែលចូលមកផ្តល់សេវានៅថ្ងៃទី ១ ខែកុម្ភៈ ឆ្នាំ ២០២១ គឺយើងនឹងចេញហើយ»។
យ៉ាងណាលោក សំណាវុធ មិនទាន់អាចបញ្ជាក់ពីឈ្មោះក្រុមហ៊ុនទាំង ៣ ដែលនឹងទទួលបានសិទ្ធិផ្ដល់សេវាប្រមូល និងដឹកជញ្ជូនសំរាមសំណល់រឹងនៅទូទាំងរាជធានីនេះទេ ដោយលោកគ្រាន់តែបញ្ជាក់ថា ក្រុមហ៊ុនទាំងនោះត្រូវបានរដ្ឋបាលរាជធានីភ្នំពេញវាយតម្លៃ ជ្រើសរើសក្នុងចំណោមក្រុមហ៊ុនចំនួនទាំង ២០ ដែលបានចូលដេញថ្លៃ។
លោកបន្ថែមថា៖ «ការជ្រើសរើសក្រុមហ៊ុននេះ យើងបានដំណើរការមកដល់ដំណាក់កាលទី ២ ហើយគឺយើងជ្រើសរើសក្រុមហ៊ុនក្នុងការដេញថ្លៃដែលក្រុមហ៊ុនបានដាក់តម្លៃ ហើយយើងមើលទៅលើបច្ចេកទេស និងមើលទៅលើលក្ខខណ្ឌ ដើម្បីឱ្យស្របទៅនឹងលក្ខខណ្ឌរបស់យើង»។
កាលពីថ្ងៃទី ២២ តុលា ឆ្នាំមុន លោកនាយករដ្ឋមន្ត្រី ហ៊ុន សែន បានសម្រេចដកសិទ្ធិប្រមូលសំរាមពីក្រុមហ៊ុនស៊ីនទ្រី ដែលជាក្រុមហ៊ុនតែមួយគត់ទទួលបានសិទ្ធិផ្តាច់មុខក្នុងការផ្ដល់សេវាប្រមូល និងដឹកជញ្ជូនសំរាមសំណល់រឹងនៅទូទាំងរាជធានីភ្នំពេញ។ ក៏ប៉ុន្តែក្រោមហេតុផលថា ក្រុមហ៊ុនស៊ីនទ្រីមិនមានសមត្ថភាពបន្តក្នុងការប្រមូលសំរាមលោក ហ៊ុន សែន ក៏បានសម្រេចឱ្យរដ្ឋបាលរាជធានីភ្នំពេញគ្រប់គ្រងការងារបណ្តោះអាសន្នមុននឹងស្វែងរកក្រុមហ៊ុនថ្មីមកជំនួសបាន។
ក្រោយពីការដកសិទ្ធិនេះសាលារាជធានីភ្នំពេញបានសម្រេចបែងចែកការប្រមូលសំរាមនៅរាជធានីភ្នំពេញជា ៣ តំបន់សម្រាប់ឱ្យក្រុមហ៊ុនដែលបានដាក់ពាក្យដេញថ្លៃធ្វើការជ្រើសរើសក្នុងការផ្ដល់សេវាប្រមូល និងដឹកជញ្ជូនសំរាម សំណល់រឹងទៅតាមតំបន់នីមួយៗផងដែរ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានលើកឡើងថា នេះគឺជារូបភាពថ្មីក្នុងការប្រកួតប្រជែងដែលអាចនឹងធ្វើឱ្យការផ្តល់សេវា ជូនពលរដ្ឋបានល្អប្រសើរក្នុងករណីដែលសាលារាជធានីភ្នំពេញបានផ្តល់សិទ្ធិទៅដល់ក្រុមហ៊ុនចំនួន ៣ ធ្វើប្រតិបត្តិការក្នុងការផ្តល់សេវាប្រមូលសំរាមនេះ។
លោកបានបញ្ជាក់ថា៖ «ការប្រមូលសំរាមនេះ គឺជាការផ្តល់សេវារបស់រដ្ឋ ប៉ុន្តែរដ្ឋត្រូវផ្តល់កិច្ចសន្យាដល់ក្រុមហ៊ុនឯកជន ដើម្បីប្រមូលសំរាមក្នុងនាមជារដ្ឋ។ ប្រសិនបើមានក្រុមហ៊ុន ៣ មែន វាជារូបភាពមួយក្នុងការប្រកួតប្រជែងក្នុងការផ្តល់សេវា ព្រោះការប្រកួតប្រជែងនាំឱ្យមានផលច្រើន។ នៅពេលអ្នកផ្តល់សេវាប្រកួតប្រជែងគ្នា នោះអ្នកទទួលផលដូចជាប្រជាពលរដ្ឋ រួមទាំងទីកន្លែងសាធារណៈមួយចំនួននឹងល្អ»។
ជាមួយនឹងការរំពឹងទុកនេះលោក សន ជ័យ ក៏សង្ឃឹមដែរថា នៅពេលក្រុមហ៊ុនទាំង ៣ ទទួលបានការអនុញ្ញាតក្នុងការផ្តល់សេវាប្រមូលសំរាមនេះនឹងធ្វើឱ្យរាជធានីភ្នំពេញទៅជាទីក្រុងស្អាតមួយ ដែលគ្មានសំរាមរាយប៉ាយក្នុងពេលកកស្ទះ ឬរងគ្រោះទឹកជំនន់ផងដែរ។
យោងតាមរបាយការណ៍របស់ក្រសួងបរិស្ថានដែលបានផ្សព្វផ្សាយកាលពីចុងឆ្នាំមុនបង្ហាញថា សំរាមនៅកម្ពុជាក្នុង ១ ថ្ងៃៗមានជាង ១ ម៉ឺនតោន ហើយបើសរុបទៅគឺមានជិត ៤ លានតោនក្នុង ១ ឆ្នាំ។ ក្នុងនោះគ្រាន់តែនៅរាជធានីភ្នំពេញគឺមានសំរាមប្រមាណ ៣ ពាន់តោនក្នុង ១ ថ្ងៃៗ។ សំរាមទាំងនោះមាន ៦៥ ភាគរយជាសំណល់សរីរាង្គ ២០ ភាគរយជាសំណល់ថង់ប្លាស្ទិក និងនៅសេសសល់គឺជាសំណល់រឹង និងសំណល់ប្រភេទផ្សេងទៀត៕
