.jpg)
តំបន់កសិទេសចរណ៍របស់ក្រុមហ៊ុន កាស៊ីង នៅក្នុងស្រុកប្រាសាទសំបូរ ខេត្តកំពង់ធំ។ រូបថត សហការី
ខេត្តកំពង់ធំៈ ក្រុមហ៊ុន កាស៊ីង ឯ.ក KASING CO.,LTD សហការជាមួយក្រុមហ៊ុន I LAON D&C Co., LTD របស់វិនិយោគិនកូរ៉េបានអភិវឌ្ឍតំបន់កសិទេសចរណ៍លើផ្ទៃដីជាង ៥០០ ហិកតា នៅស្រុកប្រាសាទសំបូរ ដើម្បីលើកកម្ពស់វិស័យកសិកម្ម និងចូលរួមអភិវឌ្ឍសេដ្ឋកិច្ច សង្គម ប្រកបដោយចីរភាព។
ប្រធានក្រុមប្រឹក្សាភិបាលក្រុមហ៊ុន កាស៊ីង ឯ.ក (KASING CO,.LTD.) លោក ហង្ស សុធី បានឱ្យដឹងថា តំបន់កសិទេសចរណ៍ថ្មីនេះគ្រោងធ្វើឡើងជាលក្ខណៈទេសចរណ៍បែបកសិកម្ម ដែលអាចនឹងមានការរៀបចំជាដំណើរកម្សាន្តនៅដើមឆ្នាំ ២០២១ ក្នុងការនាំទេសចរក្នុងស្រុកទៅកម្សាន្ត និងចូលទៅមើលដល់ក្នុងចម្ការផ្សេងៗរបស់ពលរដ្ឋក៏ដូចជាសហគមន៍ផងដែរ។
លោក សុធី ថ្លែងថា៖ «ទេសចរណ៍ក្នុងស្រុកយើងអាចទៅលេងនៅក្នុងតំបន់កសិទេសចរណ៍ ហើយភ្ជាប់ជាមួយការចូលទៅមើលចម្ការរបស់ប្រជាជនរស់នៅតំបន់នោះថែមទៀត ដើម្បីមើលអ្នកណាដាំអីបានខ្លះ។ យើងនាំឱ្យពួកគាត់ជាអ្នកទេសចរចូលទៅមើលហើយអាចទិញផ្ទាល់បាន»។
បើតាមលោក សុធី គោលបំណងសំខាន់ក្នុងការកែច្នៃបង្កើតឱ្យមានតំបន់កសិទេសចរណ៍នេះគឺដើម្បីឆ្លើយតបទៅប្រជាពលរដ្ឋជាអ្នកទេសចរក្នុងស្រុក ដែលទៅលេងកម្សាន្តនៅតំបន់ប្រាសាទសំបូរព្រៃគុក តំបន់ភ្នំសន្ទុក ទឹកធ្លាក់ធ្នួសតាព្រហ្ម និងតំបន់ផ្សេងៗទៀតក្នុងខេត្តកំពង់ធំ ឆ្លងកាត់តំបន់កសិទេសចរណ៍អាចចូលទិញផ្លែឈើ ឬបន្លែផ្សេងៗ ត្រឡប់ទៅផ្ទះវិញ។
បើតាមលោក សុធី គម្រោងដែលផ្តោតលើវិស័យកសិកម្ម និងកសិទេសចរណ៍នេះមានដាំដំណាំមួយចំនួនដូចជា ស្វាយ ដូង ពោត សណ្តែក និងបង្កើតរោងចក្រផលិតជី និងរោងចក្រកែច្នៃផ្លែស្វាយ បង្កើតតំបន់ទេសចរណ៍ ដើម្បីលើកស្ទួយវិស័យកសិកម្ម និងជំរុញឱ្យមានការកែច្នៃទិន្នផលកសិកម្មឱ្យទៅជាផលិតផលសម្រេចដើម្បីផ្គត់ផ្គង់តម្រូវការក្នុងស្រុក និងអាចឈានទៅរកការនាំចេញទៅក្រៅប្រទេស ព្រមទាំងជួយបង្កើនការងារដល់ពលរដ្ឋក្នុងតំបន់ដើម្បីបញ្ចៀសការធ្វើចំណាកស្រុកផងដែរ។
លោក សុធី បញ្ជាក់ថា ក្រុមហ៊ុន I LAON D&C Co., LTD របស់វិនិយោគិនកូរ៉េ គ្រោងចំណាយថវិកា ៣០ លានដុល្លារក្នុងការសាងសង់រោងចក្រផលិតជី និងរោងចក្រកែច្នៃផ្លែស្វាយដែលការសាងសង់នឹងចាប់ផ្តើមនៅចុងឆ្នាំ២០២១។
លោក សុធី ថ្លែងថា៖ «យើងបានដាំដុះរយៈពេលជាង ៣ ឆ្នាំមកហើយ ហើយគម្រោងនេះផ្នែកខ្លះយើងកំពុងសិក្សាឯផ្នែកខ្លះទៀត យើងបានរៀបចំហើយ។ ចំពោះផ្នែកទេសចរណ៍ឥឡូវនេះ យើងកំពុងរៀបចំជាលក្ខណៈបោះតង់ និងកន្លែងជិះទូកលេងជាដើមដែលផ្នែកនេះអាចដំណើរការបណ្តើរៗនៅដើមឆ្នាំថ្មីខាងមុខ»។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ លោក ប៉ែន វណ្ណរិទ្ធ បានសម្តែងការគាំទ្រចំពោះការវិនិយោគលើវិស័យកសិកម្មពីខាងក្រុមហ៊ុនឯកជន។ លោកសង្ឃឹមថា នៅពេលគម្រោងកសិទេសចរណ៍នេះ ដំណើរការនឹងអាចបង្កការងាយស្រួលដល់ប្រជាពលរដ្ឋឱ្យមានការងារធ្វើអាចរកចំណូលបន្ថែមបានច្រើន។
លោកបញ្ជាក់ថា៖ «យើងគាំទ្រចំពោះការបង្កើតឱ្យមានកសិទេសចរណ៍ ដើម្បីទាក់ទាញភ្ញៀវទេសចរទៅមើល ហើយឱ្យគាត់ដឹងពីការរីកចម្រើនរបស់វិស័យកសិកម្មក្នុងខេត្តផងអ៊ីចឹងទៅ។ មួយវិញទៀតគឺប្រយោជន៍សម្រាប់ប្រជាពលរដ្ឋអាចរកចំណូលបន្ថែមបាន តាមរយៈការងារ ឬដាំដុះដោយខ្លួនឯង»។
លោក សុក រដ្ឋា អ្នកសម្របសម្រួលសមាគមអាដហុក ប្រចាំខេត្តកំពង់ធំ យល់ឃើញថា ការចូលរួមធ្វើការអភិវឌ្ឍក្នុងវិស័យកសិកម្មគឺជារឿងល្អ ព្រោះកម្ពុជាជាប្រទេសដែលផ្តោតសំខាន់ទៅលើវិស័យកសិកម្មជាស្នូល ប៉ុន្តែក្នុងពេលបច្ចុប្បន្នតាមការសង្កេតជាក់ស្តែង ការអភិវឌ្ឍវិស័យកសិកម្មកម្ពុជានៅមានកម្រិតនៅឡើយ បើប្រៀបធៀបនឹងវិស័យផ្សេងៗមួយចំនួនទៀត។
លោក រដ្ឋា ថ្លែងថា៖ «ការចូលរួមរបស់វិស័យឯកជនក៏ដូចជាសហគមន៍ ឬអង្គការអីផ្សេងៗដែលគេធ្វើកិច្ចការងារក្នុងវិស័យកសិកម្ម ខ្ញុំយល់ថា ល្អដែលការដាំដុះ និងចិញ្ចឹមសត្វអីផ្សេងៗហ្នឹង ដើម្បីផ្គត់ផ្គង់ក្នុងស្រុក និងអភិវឌ្ឍនៅមូលដ្ឋានភូមិស្រុកផង ប៉ុន្តែសំខាន់ការអភិវឌ្ឍត្រូវធ្វើយ៉ាងណាឱ្យពលរដ្ឋក្នុងតំបន់ហ្នឹងគាត់ពេញចិត្ត»៕
