The Phnom Penh Post Search

Search form




Logo of Phnom Penh Post newspaper Phnom Penh Post - ក្រុម​ហ៊ុន​សាច់​ប៉ាតេ ៩៩៩ ផ្ទេរ​ទៅ​ឲ្យ​ជន​ជំនិត ៥ នាក់​គ្រប់​គ្រង

ក្រុម​ហ៊ុន​សាច់​ប៉ាតេ ៩៩៩ ផ្ទេរ​ទៅ​ឲ្យ​ជន​ជំនិត ៥ នាក់​គ្រប់​គ្រង

ឪពុក​ម្តាយ​ឧកញ៉ា ថោង សារ៉ាត ជា​ថៅកែ​សាច់​ប៉ាតេ ៩៩៩ មុន​ពេល​នាំ​ខ្លួន​ទៅ​គុក​ព្រៃ​ស។
ឪពុក​ម្តាយ​ឧកញ៉ា ថោង សារ៉ាត ជា​ថៅកែ​សាច់​ប៉ាតេ ៩៩៩ មុន​ពេល​នាំ​ខ្លួន​ទៅ​គុក​ព្រៃ​ស។ ផា លីណា

ក្រុម​ហ៊ុន​សាច់​ប៉ាតេ ៩៩៩ ផ្ទេរ​ទៅ​ឲ្យ​ជន​ជំនិត ៥ នាក់​គ្រប់​គ្រង

ភ្នំពេញៈ ក្រុម​ហ៊ុន​សាច់​ប៉ាតេ ៩៩៩ ដែល​មាន​នាយក​គឺ​អ្នក​ស្រី កែវ សារី និង​លោក ថោង ចំរើន ម្តាយ​និង​ឪពុក​របស់​លោក​ឧកញ៉ា ថោង សារ៉ាត់ ដែល​រង​ការ​ចោទ​ប្រកាន់​ពាក់ព័ន្ធ​នឹង​ឃាតកម្ម​គ្រោង​ទុក​ជា​មុន បាន​ប្រកាស​ផ្ទេរ​សិទ្ធិ​ចាត់ចែង​និង​គ្រប់​គ្រង​ក្រុម​ហ៊ុន​នេះ ទៅ​ឲ្យ​មនុស្ស​ជំនិត ៥​នាក់ ក្នុង​នោះ​មាន​ជនជាតិ​ខ្មែរ​បី​នាក់ និង​ជនជាតិ​វៀតណាម​ចំនួន​ពីរ​នាក់។

តាម​លិខិត​ផ្ទេរ​សិទ្ធិ ចុះ​ថ្ងៃ ទី៦ ខែ​ធ្នូ ឆ្នាំ​២០១៤ នេះ ដែល​ចុះ​ហត្ថលេខា​ទទួល​ស្គាល់​បាន​ឃើញ ដោយ​មេធាវី​លោក ហេ ជីវអេង បាន​ឲ្យ​ដឹង​ថា ក្រុម​ហ៊ុន​សាច់​ប៉ាតេ ៩៩៩ នឹង​ត្រូវ​ផ្ទេរ​ទៅ​ក្រោម​ការ​គ្រប់​គ្រង​របស់​ឈ្មោះ ព្យុះ ចិន្តា ភេទ​ស្រី អាយុ ៣៧​ឆ្នាំ ជា​ជនជាតិ​ខ្មែរ និង​ក្រោម​ការ​ជួយ​គ្រប់​គ្រង​បន្ថែម​ដោយ​ឈ្មោះ មឿន សំណាង, យិង ទុន ហើយ​និង​ជនជាតិ​វៀតណាម​ឈ្មោះ Pham Thi My Chau និង Nguyen Dinh Tuan។

លោក​មេធាវី ហេ ជីវអេង បាន​ឲ្យ​ដឹង​ថា លិខិត​នោះ ត្រូវ​បាន​ធ្វើ​ឡើង​ក្នុង​ដំណាក់​កាល​ព្រះ​រាជអាជ្ញា កាល​ពី​ថ្ងៃ ទី៦ ខែ​ធ្នូ ក្រោយ​ពី​សាមី​ខ្លួន អ្នក​ស្រី កែវ សារី និង​លោក ថោង ចំរើន ក៏​ដូច​ជា ភរិយា និង​ប្អូន​ប្រុស​លោក ថោង សារ៉ាត់ ត្រូវ​បាន​ឃាត់​ខ្លួន​សាក​សួរ​ដោយ​ចៅក្រម​ស៊ើប​អង្កេត​នៃ​សាលា​ដំបូង​រាជធានី​ភ្នំពេញ។

លោក​មេធាវី ហេ ជីវអេង បាន​បន្ត​ឲ្យ​ដឹង​ថា៖ «អ្នក​ទាំង ៥​នាក់ នោះ គឺជា​មនុស្ស​ជំនិត​របស់​ឪពុក​ម្តាយ​លោក ថោង សារ៉ាត់ ដែល​ត្រូវ​បាន​ចាត់​តាំង​ឲ្យ​បន្ត​ការងារ​គ្រប់​គ្រង​ក្រុមហ៊ុន និង​បុគ្គលិក លុះ​ត្រា​ណា​មាន​ការ​ស្នើ​ផ្លាស់​ប្តូរ​ពី​សាមី​ខ្លួន​វិញ។ លិខិត​ផ្ទេរ​សិទ្ធិ ត្រូវ​បាន​ធ្វើ​មុន​ពេល​ភរិយា​និង​ប្អូន​ប្រុស​លោក ថោង សារ៉ាត់ ត្រូវ​បាន​ដោះ​លែង​វិញ​ទៅ​ទៀត ហើយ​ត្រូវ​បាន​ចម្លង​ជូន​ភាគី​ពាក់​ព័ន្ធ​ផង​ដែរ»។

ការ​ផ្ទេរ​សិទ្ធិ​ក្នុង​ដំណាក់​កាល​នេះ បង្ក​ការ​សង្ស័យ​ដល់​ពាណិជ្ជ​ករ​មួយ​ចំនួន ដោយ​មិន​ដឹង​ថា ជា​ការ​ផ្ទេរ​ដោយ​ស្រប​ច្បាប់​ឬ​យ៉ាង​ណា​ទេ ខណៈ​នៅ​ក្នុង​ដំណាក់​កាល​សាក​សួរ​បែប​នេះ។

ប៉ុន្តែ​បើ​តាម​លោក សុក សំអឿន អ្នក​ជំនាញ​ផ្នែក​ច្បាប់​នៃ​ក្រុម​អង្គការ​ក្រុម​អ្នក​ច្បាប់​ការពារ​សិទ្ធិ​កម្ពុជា លិខិត​ផ្ទេរ​សិទ្ធិ​នេះ គឺ​ស្រប​តាម​លក្ខខណ្ឌ​ច្បាប់ ហើយ​មិន​មែន​មាន​ន័យ​ថា ជា​ការ​ផ្ទេរ​ទ្រព្យ​សម្បត្តិ​នោះ​ទេ។

លោក សុក សំអឿន មាន​ប្រសាសន៍​ថា៖ «បើ​ទោះ​ជា​នៅ ក្នុង​ដំណាក់​កាល​ចោទ​របស់​ព្រះ​រាជ​អាជ្ញា​ក៏ដោយ ក៏​ជន​ជាប់​សង្ស័យ​មាន​សិទ្ធិ​ក្នុង​ការ​ផ្ទេរ​សិទ្ធិ​គ្រប់​គ្រង​ក្រុម​ហ៊ុន ដើម្បី​ដំណើរ​ការងារ​របស់​ខ្លួន​តាម​ប្រក្រតី រហូត​ដល់​បញ្ហា​ត្រូវ​បាន​រក​ឃើញ​ការ​ពិត ឬ​ត្រូវ​បាន​ដោះ​ស្រាយ»។

កាល​ពី​ថ្ងៃ​ចន្ទ​កន្លង​ទៅ ខ្សែ​អាត់​សំឡេង​មាន​រយៈ​ពេល​ជិត ៧ នាទី ដែល​ត្រូវ​បាន​បញ្ជាក់​ទទួល​ស្គាល់​ដោយ​បុគ្គលិក​ម្នាក់​របស់​ក្រុម​ហ៊ុន​បុរី ៩៩៩ ជា​របស់​លោក​ឧកញ៉ា ថោង សារ៉ាត់ ដែរ ក៏​បាន​លើក​ឡើង​ថា ប្រាក់​ក្នុង​ធនាគារ​របស់​ក្រុម​គ្រួសារ​លោក គឺ​ត្រូវ​បាន​បង្កក ហើយ​គ្រួសារ​លោក កំពុង​ជួប​បញ្ហា​លើ​ជីវភាព។

ពាក់​ព័ន្ធ​នឹង​រឿង​នេះ លោក សុក សំអឿន យល់​ឃើញ​ថា ប្រសិន​បើ​មាន​រឿង​បែប​នេះ​មែន​នោះ ​វា​គឺជា​ទង្វើ​ខុស​នឹង​គោល​ការណ៍​ច្បាប់​មួយ ហើយ​តុលាការ​មិន​មាន​សិទ្ធិ​ក្នុង​ការ​បង្កក​ប្រាក់​របស់​ជន​ជាប់​ចោទ​នោះ​ទេ ព្រោះ​ការ​ធ្វើ​បែប​នេះ នាំ​ឲ្យ​រាំង​ស្ទះ​ដល់​ការ​ដំណើរ​ការ​ការងារ​របស់​ពួក​គេ ស្រប​ពេល​ដែល​ពិរុទ្ធភាព មិន​ទាន់​ត្រូវ​បាន​កំណត់​ជាក់​លាក់​នៅ​ឡើយ។

ក្រៅ​ពី​ក្រុម​ហ៊ុន​សាច់​ប៉ាតេ ៩៩៩ ឪពុក​ម្តាយ និង​លោក ថោង សារ៉ាត់ ក៏​ជា​ម្ចាស់​ក្រុម​ហ៊ុន​បុរី ៩៩៩ ផង​ដែរ ដែល​បច្ចុប្បន្ន​ក្រុម​ហ៊ុន​បុរី​នេះ ត្រូវ​បាន​បុគ្គលិក​អះអាង​ថា កំពុង​ដំណើរ​ការ​តាម​ធម្មតា។ ប៉ុន្តែ​ទោះ​ជា​យ៉ាង​ណា អតិថិជន​ដែល​ជាវ​ផ្ទះ​ក្នុង​បុរី​នេះ​នៅ​តែ​មាន​ក្តី​បារម្ភ​ដដែល ខណៈ​សំណង់​ខ្លះ​របស់​ក្រុម​ហ៊ុន​នេះ​បាន​ផ្អាក ហើយ​អ្នក​ទទួល​ខុស​ត្រូវ​បន្ត​មិន​ទាន់​ត្រូវ​បាន​ប្រកាស​ជា​សាធារណៈ​នោះ។

ជុំវិញ​ឃាតកម្ម​លើ​លោក ឧកញ៉ា អ៊ឹង ម៉េងជឺ ដែល​មេ​ខ្លោង​នៃ​ឃាតកម្ម​នេះ ត្រូវ​បាន​តុលាការ​ចោទ​ថា ជា​ឧកញ៉ា ថោង សារ៉ាត់ នោះ រហូត​មក​ទល់​ពេល​នេះ​បាន​កំពុង​គេច​ខ្លួន​នៅ​ឡើយ​ខណៈ​ដែល​ឪពុក​ម្តាយ​និង​អង្គរក្ស ៤ នាក់​របស់​លោក​កំពុង​ជាប់​ឃុំ​បណ្តោះ​អាសន្ន​នៅ​ពន្ធនាគារ​ព្រៃ​ស​រង់​ចាំ​សវនាការ។

អ្នក​នាំ​ពាក្យ​អគ្គ​ស្នង​ការ​នគរបាល​ជាតិ​លោក គៀត ច័ន្ទថារិទ្ធ បាន​ឲ្យ​ដឹង​ថា សមត្ថកិច្ច​កំពុង​ស្វែង​រក​លោក ថោង សារ៉ាត់ ដោយ​សង្ឃឹម​ថា នឹង​អាច​រក​ឃើញ​ឆាប់ៗ​នេះ​ដើម្បី​បំភ្លឺ​ជុំវិញ​បញ្ហា​នេះ។

លោក​បន្ត​ថា៖ «ខ្ញុំ​មិន​ស្គាល់​លោក ថោង សារ៉ាត់ ទេ ហើយ​ខ្សែ​អាត់​សំឡេង​នោះ បើ​តាម​ខ្ញុំ ក៏​មិន​ដឹង​ដែរ តែ​ជំនាញ​យើង​នឹង​ស្រាវជ្រាវ​ពី​សំឡេង​បុរស​នោះ»៕

អត្ថបទគួរចាប់អារម្មណ៍