.jpg)
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានកាលពីម្សិលមិញ។ រូបថត ហ៊ាន រង្សី
ភ្នំពេញៈ ក្រុមហ៊ុនហ្វេសប៊ុកបានជួយដោះស្រាយទាន់ពេលក្រោយមានជនអនាមិកចូលអុកឡុកហ្វេសប៊ុកផ្លូវការរបស់លោករដ្ឋមន្ត្រីក្រសួងព័ត៌មានលោក ខៀវ កាញារីទ្ធ កាលពីសប្ដាហ៍មុន ក្រោយពេលលោកចែកចាយព័ត៌មានពិតអំពីបញ្ហាព្រំដែនកម្ពុជាជាបន្ដបន្ទាប់ក្នុងខែតុលានេះ។ ជាការឆ្លើយតបលោករដ្ឋមន្ត្រីក៏បានថ្លែងអរគុណចំពោះក្រុមហ៊ុនដែលបានជួយដោះស្រាយបញ្ហាជូនលោក។
លោក ខៀវ កាញារីទ្ធ បានថ្លែងក្នុងសន្និសីទកាសែតពីម្សិលមិញថា នៅអំឡុងបោះឆ្នោតឆ្នាំ ២០១៣ គណនីហ្វេសប៊ុករបស់លោកត្រូវបានជនអនាមិកចូលមកអុកឡុក និងបិទបានម្ដងរួចហើយ ប៉ុន្តែលោកមិនបានស្នើឲ្យក្រុមហ៊ុនហ្វេសប៊ុកជួយទាញយកមកវិញទេ។ ប៉ុន្ដែកាលពីថ្ងៃសុក្រសប្ដាហ៍មុននេះមានជនអនាមិកបានចូលមកអុកឡុកម្ដងទៀត ក្រោយពេលលោកបានចែកចាយព័ត៌មានពិតលើបញ្ហាព្រំដែន និងបញ្ហាដីធ្លីរបស់កម្ពុជាតាមរយៈវីដេអូព័ត៌មានចំនួន ៧ វីដេអូនៅក្នុងខែតុលានេះ។
លោករដ្ឋមន្ដ្រីថ្លែងថា៖ «លើកនេះនៅពេលដែលខ្ញុំបាននិយាយអំពីបញ្ហាព្រំដែន ដោយលើកឡើងជាវីដេអូឃ្លីបចំនួន ៧ ក្នុងនោះបាននិយាយលើចំណុច ២ ដែលសំខាន់ គឺខ្មែរបាត់ដីឬអត់? ដោយយើងបានយកសម្ដីសម្ដេចនាយករដ្ឋមន្ដ្រី ហ៊ុន សែន ដែលធ្លាប់បានពន្យល់រួចហើយថា ខ្មែរមិនត្រឹមតែមិនបាត់ដីទេតែដីឥឡូវវាធំជាងមុន។ មួយទៀតវីដេអូបាននិយាយថា កោះត្រល់បាត់ទៅណា? រឿងនេះយើងក៏បានពន្យល់គ្រប់គ្រាន់ និងការលើកឡើងផ្សេងទៀតរបស់សម្ដេចនាយករដ្ឋមន្ដ្រីទើបធ្វើឲ្យពួកនោះខឹង (ជនអនាមិក) ទើបចូលមកបិទការចែកចាយព័ត៌មានផ្សេងលើហ្វេសប៊ុកខ្ញុំ»។
លោក ខៀវ កាញារីទ្ធ បានបង្ហាញថា ក្រុមជនអនាមិកបានបង្កើតគណនីហ្វេសប៊ុកក្លែងក្លាយជាច្រើនគណនីផ្សេងគ្នារួចចូលមកអុកឡុកគណនីហ្វេសប៊ុករបស់លោករហូតធ្វើឲ្យបច្ចេកវិទ្យាសិប្បនិម្មិតក្រុមហ៊ុនហ្វេសប៊ុកបានកំណត់នៅក្នុងប្រព័ន្ធគ្រប់គ្រងរបស់ហ្វេសប៊ុកស្រាប់ទើបបច្ចេកវិទ្យានោះសម្រេចបិទគណនីរបស់លោកមិនឲ្យបន្ដចែកចាយព័ត៌មានបានទៀតតែម្ដង។
លោករដ្ឋមន្ដ្រីបន្ថែមថា៖ «ខ្ញុំបានទាក់ទងទៅក្រុមហ៊ុនហ្វេសប៊ុកឲ្យជួយបើកហ្វេសប៊ុករបស់ខ្ញុំឲ្យដំណើរការធម្មតាវិញ។ បន្តិចទៀតខ្ញុំនឹងឲ្យក្រុមការងារធ្វើលិខិតផ្ញើទៅក្រុមហ៊ុនហ្វេសប៊ុកដើម្បីលុបចោលទាំងអស់នៅគណនីណាដែលប្រើឈ្មោះខ្ញុំដែលមិនត្រឹមត្រូវ»។
លោកបញ្ជាក់ថា គណនីហ្វេសប៊ុករបស់លោកមាន ២ គឺឈ្មោះ Kanharith Khieu និងឈ្មោះ Kanharith ដោយនៅព្រឹកថ្ងៃចន្ទម្សិលមិញបានបើកដំណើរការជាធម្មតាឡើងវិញហើយ។
ទាក់ទងនឹងបញ្ហាជនអនាមិកអុកឡុកតាមរយៈបណ្ដាញសង្គមផ្សេងៗដូចជាបណ្ដាញសង្គមហ្វេសប៊ុកជាដើមនេះ នាយកដ្ឋានប្រឆាំងបទល្មើសបច្ចេកវិទ្យា និងនាយកដ្ឋានព័ត៌មានវិទ្យានៃក្រសួងមហាផ្ទៃបានជូនដំណឹងជាបន្ដបន្ទាប់ឲ្យពលរដ្ឋមានការប្រុងប្រយ័ត្នចំពោះការប្រើប្រាស់អ៊ីនធឺណិតបន្ទាប់ពីអង្កេតឃើញថា មានជនអនាមិកជាច្រើនបានប្រើវិធីសាស្ដ្រផ្សេងៗជាច្រើន ដើម្បីចូលអុកឡុកតាមប្រព័ន្ធអ៊ីនធឺណិត និងការគំរាមទារប្រាក់តាមប្រព័ន្ធអ៊ីនធឺណិត។
លោក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យាធ្លាប់ប្រាប់ភ្នំពេញប៉ុស្ដិ៍ក្នុងខែតុលានេះថា ដោយសារតែចំណេះដឹងនៃការប្រើប្រាស់ប្រព័ន្ធអ៊ីនធឺណិត និងបណ្ដាញសង្គមនានាដូចជា ហ្វេសប៊ុករបស់ពលរដ្ឋកម្ពុជានៅមានកម្រិតធ្វើឲ្យជនអនាមិកអាចជ្រៀតចូលលួចយកទិន្នន័យទៅប្រើប្រាស់ និងបោកបញ្ឆោតបាន។
លោកថា៖ «ការប្រើប្រាស់ហ្វេសប៊ុកពលរដ្ឋយើងទើបតែចេះប្រើ។ ដូច្នេះការការពាររបស់គាត់នៅមានកម្រិតធ្វើឲ្យជនល្មើសឆ្លៀតឱកាសចូលអុកឡុក ឬទាញយកបាន»៕
