ក្រុមហ៊ុនអាកាសចរណ៍ខេមបូឌា អ៊ែរវ៉េ ទទួលបានការកោតសរសើរ ចំពោះការផ្តល់យន្តហោះ ៣ គ្រឿងសម្រាប់ដឹកជញ្ជូនម៉ាស់ និង បរិក្ខារពេទ្យទៅកាន់ប្រទេសមីយ៉ាន់ម៉ា
ឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាល តំណាងដ៏ខ្ពស់ខ្ពស់របស់លោកនាយករដ្ឋមន្រ្តី ហ៊ុន សែន កាលពីថ្ងៃទី ២៦ ខែវិច្ឆិកា បានដឹកនាំគណៈប្រតិភូកម្ពុជាចំនួន ១៣ នាក់ទៅកាន់ប្រទេស មីយ៉ាន់ម៉ា ដើម្បីនាំយកម៉ាសនិងបរិក្ខាពេទ្យទៅប្រគល់ជូនប្រទេស មីយ់ាន់ម៉ា។
យន្តហោះពិសេស ៣ គ្រឿងរបស់ក្រុមហ៊ុនអាកាសចរណ៍ខេមបូឌា អ៊ែរវ៉េ បានចេញដំណើរពីព្រលានយន្តហោះអន្តរជាតិភ្នំពេញ និងបានចុះចតនៅរដ្ឋធានីណៃពិដោ (Naypyidaw) នៃប្រទេស មីយ៉ាន់ម៉ា ដោយបានដឹកម៉ាស់ចំនួន ២ លាន ២ សែន និងបរិក្ខារវេជ្ជសាស្ត្រសរុប ១២ មុខផ្សេងទៀតទៅជូនរដ្ឋាភិបាល មីយ៉ាន់ម៉ា។
លោកស្រី ជាំង អុីហ្វៃ នាយកគ្រប់គ្រងក្រុមហ៊ុនអាកាសចរណ៍ខេមបូឌា អ៊ែរវ៉េ បានជួបសម្តែងការគួរសមជាមួយឯកឧត្តមនាយឧត្តមសេនីយ៍ បណ្ឌិត ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអាកាសចរស៊ីវិល កាលពីថ្ងៃទី ២៧ ខែវិច្ឆិកា។
លោកស្រី ជាំង ក៏បានទទួលលិខិតថ្លែងអំណរគុណពីរាជរដ្ឋាភិបាលកម្ពុជា ដែលបានផ្តល់យន្តហោះ ៣ គ្រឿងសម្រាប់ដឹកជញ្ជូនម៉ាស់ និងបរិក្ខារពេទ្យដើម្បីប្រយុទ្ធប្រឆាំងជំងឺកូវីដ ១៩ ទៅកាន់ប្រទេសមីយ៉ាន់ម៉ានេះផងដែរ។
ឯកឧត្តមនាយឧត្តមសេនីយ៍ បណ្ឌិត ម៉ៅ ហាវណ្ណាល់ មានប្រសាសន៍ថា លោកនាយករដ្ឋមន្រ្តី ហ៊ុន សែន ក៏បានសម្តែងការកោតសរសើរដោយស្មោះចំពោះក្រុមហ៊ុនអាកាសចរណ៍ខេមបូឌាអ៊ែរវ៉េ ដែលបានជួយឧបត្ថម្ភការហោះហើរជាមនុស្សធម៌នេះ។
ឯកឧត្តមបានបន្ថែមថា ជាមួយនឹងឧស្សាហកម្មអាកាសចរណ៍ស៊ីវិលដែលបានរងផលប៉ះពាល់ដោយសារការរាតត្បាតជាសកលនៃជំងឺកូវីដ១៩ រដ្ឋបាលអាកាសចរណ៍ស៊ីវិលនិងក្រុមហ៊ុនអាកាសចរណ៍ចាំបាច់ត្រូវធ្វើការរួមគ្នាដើម្បីជម្នះឧបសគ្គនេះ។
លោកស្រី ជាំង បានថ្លែងថា គោលបំណងរបស់ក្រុមហ៊ុនអាកាសចរណ៍ខេមបូឌាអ៊ែរវ៉េ គឺក្លាយជាអ្នកនាំមុខគេនៅក្នុងព្រះរាជាណាចក្រក្នុងការចូលរួមបម្រើដល់ប្រជាជន និង រដ្ឋាភិបាលកម្ពុជា។
លោកស្រី ជាំង មានប្រសាសន៍ថា៖ «ក្រុមហ៊ុនអាកាសចរណ៍ខេមបូឌា អ៊ែរវ៉េ សូមថ្លែងអំណរគុណយ៉ាងជ្រាលជ្រៅ ចំពោះការគាំទ្រ និង ជំនួយពីរដ្ឋាភិបាល។ ក្រុមហ៊ុនអាកាសចរណ៍មួយនេះតែងតែសហការជាមួយរដ្ឋបាលអាកាសចរណ៍ស៊ីវិល ដើម្បីបង្កើតអនាគតឲ្យកាន់តែភ្លឺស្វាងសម្រាប់ឧស្សាហកម្មអាកាសចរណ៍ស៊ីវិលនៅកម្ពុជា»៕