គូឡាឡាំពួៈ ក្រុមហ៊ុនអាកាសចរណ៍ម៉ាឡេស៊ីបានថ្លែងកាលពីថ្ងៃពុធថា ខ្លួនបានឃាត់លោក សម រង្ស៊ី ប្រធានស្តីទីនៃអតីតគណបក្សសង្គ្រោះជាតិមិនឲ្យឡើងយន្តហោះចេញពីទីក្រុងគូឡាឡាំពួទៅទីក្រុងហ្សាការតា របស់ប្រទេសឥណ្ឌូនេស៊ីតាមការណែនាំរបស់អាជ្ញាធរឥណ្ឌូនេស៊ី។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Reuters។
លោក សម រង្ស៊ី ដែលរស់នៅនិរទេសដោយខ្លួនឯងនៅក្នុងប្រទេសបារាំង បានស្ថិតនៅក្នុងប្រទេសម៉ាឡេស៊ីតាំងពីចុងសប្តាហ៍មុនបន្ទាប់ពីលោកបានថ្លែងថា លោកគ្រោងត្រឡប់មកប្រទេសកម្ពុជានៅថ្ងៃសៅរ៍ (០៩ វិច្ឆិកា) ដើម្បីតវ៉ាប្រឆាំងនឹងលោកនាយករដ្ឋមន្ត្រី ហ៊ុន សែន។
ក្រុមហ៊ុនអាកាសចរណ៍ម៉ាឡេស៊ីបានថ្លែងនៅក្នុងសេចក្តីថ្លែងការណ៍មួយជាការឆ្លើយតបនឹងសំណួររបស់ទីភ្នាក់ងារសារព័ត៌មាន Reuters អំពីថាតើលោក សម រង្ស៊ី ត្រូវបានហាមឃាត់មិនឲ្យឡើងយន្តហោះឬអត់ថា៖ «ក្រុមហ៊ុនអាកាសចរណ៍ម៉ាឡេស៊ីបានបដិសេធមិនឲ្យអ្នកដំណើររូបនេះឡើងយន្តហោះតាមការណែនាំរបស់អាជ្ញាធរឥណ្ឌូនេស៊ី»៕ PS