ភ្នំពេញៈ ក្រុមហ៊ុនដឹកអ្នកដំណើរចំនួន១៤បានសន្យាថានឹងមិនឡើងថ្លៃសំបុត្រដើម្បីសម្រួលដល់ការចំណាយរបស់ពលរដ្ឋក្រីក្រ ជាពិសេសកម្មកររោងចក្រ ខណៈលោកនាយករដ្ឋមន្ត្រី ហ៊ុន សែន និងរដ្ឋមន្ត្រីក្រសួងសាធារណការ និងដឹកជញ្ចូនបានអំពាវនាវជាថ្មីកុំឱ្យរថយន្តឈ្នួលឡើងថ្លៃនៅក្នុងឱកាសបុណ្យភ្ជុំបិណ្ឌនេះ។
នៅក្នុងពិធីចែកសញ្ញាបត្រដល់និស្សិតសាកលវិទ្យាល័យពុទ្ធិសាស្ត្រនៅសណ្ឋាគារសុខាភ្នំពេញកាលពីម្សិលមិញ លោកនាយករដ្ឋមន្ត្រី ហ៊ុន សែន បានអំពាវនាវជាថ្មីកុំឱ្យរថយន្តឈ្នួលឡើងថ្លៃក្នុងឱកាសបុណ្យភ្ជុំបិណ្ឌ និងបានស្នើដល់អ្នកបើកបរគ្រប់រូបត្រូវប្រុងប្រយ័ត្នខ្ពស់នៅពេលបើកបរ ជាពិសេសគោរពច្បាប់ចរាចរណ៍ឲ្យបានត្រឹមត្រូវ។ លោកគូសបញ្ជាក់ថា៖«ខ្ញុំសង្ឃឹមយ៉ាងមុតមាំថានៅរដូវបុណ្យភ្ជុំឆ្នាំនេះ សូមអំពាវនាវចំពោះរថយន្តឈ្នួលទាំងឡាយកុំឡើងថ្លៃ អំពាវនាវអ៊ីចឹង តែគាត់មិនស្តាប់ ហើយយើងវាអត់ឡានជិះអ៊ីចឹងចេះតែជិះទៅ អំពាវនាវឲ្យប្រជាពលរដ្ឋអ្នកបើកបររបស់យើងក្នុងការធ្វើដំណើរទៅទីជិតទីឆ្ងាយដើម្បីចូលរួមភ្ជុំឆ្នាំនេះសូមធ្វើដំណើរដោយប្រុងប្រយ័ត្នកុំឲ្យមានគ្រោះថ្នាក់ចរាចរណ៍...»។
ជាមួយគ្នានេះដែរ ក្នុងជំនួបរវាងរដ្ឋមន្ត្រីក្រសួងសាធារណការនិងដឹកជញ្ជូន លោក ស៊ុន ចាន់ថុល ជាមួយតំណាងក្រុមហ៊ុនដឹកអ្នកដំណើរកាលពីម្សិលមិញមានក្រុមហ៊ុនចំនួន១៤សន្យាថានឹងមិនដំឡើងថ្លៃសំបុត្ររថយន្តឡើយ។ លោកថា៖«ម្សិលមិញនេះ មាន១៤ក្រុមហ៊ុនដែលបានសន្យាប្តេជ្ញាចិត្តចូលរួមតាមការអំពាវនាវរបស់សម្តេច ថាមិនឡើងថ្លៃទេ ក្នុងឱកាសភ្ជុំបិណ្ឌខាងមុខនេះឯង អ៊ីចឹងសូមសារព័ត៌មានជួយផ្សព្វផ្សាយលើកទឹកចិត្តដល់ក្រុមហ៊ុនដែលមិនឡើងថ្លៃ ខ្ញុំមិនយល់ពីមុនមកឱ្យតែដល់ពេលបុណ្យទានចេះតែឡើងថ្លៃ»។ យ៉ាងណាក៏ដោយ ក្រសួងមិនមានចំណាត់ការលើក្រុមហ៊ុនដែលនៅតែឡើងថ្លៃទេ។ លោកថា៖ «រឿងច្បាប់យើងមិនទាន់មានលទ្ធភាពព្រោះជាទីផ្សារសេរីតែយើងគ្រាន់តែអំពាវនាវនិងជួយផ្សព្វផ្សាយដល់ក្រុមហ៊ុនដែលយល់ព្រមមិនឡើងថ្លៃនិងផ្សព្វផ្សាយកុំឱ្យពលរដ្ឋទៅជិះរថយន្តដែលឡើងថ្លៃ»។
ជារឿយៗឱ្យតែដល់រដូវបុណ្យជាតិធំៗលោកនាយករដ្ឋមន្ត្រីតែងតែអំពាវនាវឱ្យម្ចាស់រថយន្តដឹកអ្នកដំណើរកុំឡើងថ្លៃ តែមិនសូវទទួលលទ្ធផលឡើយ ខណៈដែលម្ចាស់ក្រុមហ៊ុននៅតែឡើងថ្លៃដោយអះអាងថា ពេលរដូវបុណ្យទាន ក្រុមហ៊ុនក៏បានឱ្យលុយបន្ថែមម៉ោងដល់អ្នកធ្វើការនៅពេលនោះដែរ។
ប្រធានគ្រប់គ្រងក្រុមហ៊ុនវីរៈប៊ុនថាំ សាខានៅភ្នំពេញលោក នៅ គាវីរៈ ដែលបានបើកដំណើរការជិត១០ឆ្នាំ ថ្លែងថា ការមិនឡើងថ្លៃជាការចូលរួមជួយសង្គម ពិសេសអ្នកក្រីក្របានមួយកម្រិត។ លោកថា៖«យើងចង់ជួយដល់សង្គមខ្លះ ហើយពាក់ព័ន្ធដល់បងប្អូនទូទាំងប្រទេសដែលធ្វើដំណើរទៅគ្រប់ខេត្តក្រុងអ៊ីចឹងកាត់បន្ថយចំណាយ។ បើតាមលោក នៅ គាវីរៈ ប៉ុន្មានឆ្នាំចុងក្រោយនេះក្រុមហ៊ុនលោកមិនបានដំឡើងថ្លៃសំបុត្ររថយន្តទេប៉ុន្តែកាលពីប្រមាណ៥ឆ្នាំមុនគឺដំឡើងថ្លៃក្នុងពេលបុណ្យទាន ដោយសារប្រេងឡើងថ្លៃ។
លោកថា៖ «ពីមុនមកធ្លាប់ឡើងថ្លៃពាក់ព័ន្ធប្រេងថ្លៃ ហើយយើងត្រូវបន្ថែមលុយដល់បុគ្គលិកដែលធ្វើការនៅថ្ងៃបុណ្យ អ៊ីចឹងយើងដំឡើងថ្លៃដែរ តែមួយរយៈចុងក្រោយនេះប្រេងធូរថ្លៃគ្រាន់បើអ៊ីចឹងយើងអត់ដំឡើងថ្លៃទេ»។ ទោះបីជាយ៉ាងនេះក្ដីលោកថា ក្រុមហ៊ុនបានណែនាំអ្នកបើកបររបស់ខ្លួនឱ្យមានការប្រុងប្រយ័ត្នជាងមុន ពិសេសគឺការគោរពចរាចរណ៍ក្នុងពេលបុណ្យទាន។
តាមរបាយការណ៍របស់ក្រសួងសាធារណការបានឱ្យដឹងថា ក្រុមហ៊ុនដឹកអ្នកដំណើរទាំង១៤ ដែលមិនដំឡើងថ្លៃនោះរួមមាន ក្រុមហ៊ុនកាពីតូល ក្រុមហ៊ុនវីរៈប៊ុនថាំ ក្រុមហ៊ុន ថុងសម្បត្តិ ក្រុមហ៊ុនម៉ីហុង ដឹកអ្នកដំណើរ ក្រុមហ៊ុន ផលបូផាន់ត្រេនស្ព័តខូអិលធីឌី, ក្រុមហ៊ុនដាកក្រហម ក្រុមហ៊ុនដឹកអ្នកដំណើរឡារីតា ក្រុមហ៊ុនវ៉ាងរ៉ិច ក្រុមហ៊ុន GIANTIBIS Transport ក្រុមហ៊ុនហ្គោលដេនបាយ័នអ៊ិចប្រេស ក្រុមហ៊ុន រិទ្ធ មុនី ដឹកអ្នកដំណើរ ក្រុមហ៊ុនពន្លឺអង្គរខ្មែរដឹកជញ្ជូន ក្រុមហ៊ុនណាហ្គាត្រេនស្ព័តនិងក្រុមហ៊ុនNATTAKANដឹកអ្នកដំណើរ ជាដើម៕
