The Phnom Penh Post Search

Search form




Logo of Phnom Penh Post newspaper Phnom Penh Post - ក្រុមហ៊ុន​ដឹក​ជញ្ជូន​ភ្នំពេញ​សូរិយា​គ្រោង​ប្តឹង​អតីត​បុគ្គលិក​ដែល​បណ្តេញ​ចេញ

ក្រុមហ៊ុន​ដឹក​ជញ្ជូន​ភ្នំពេញ​សូរិយា​គ្រោង​ប្តឹង​អតីត​បុគ្គលិក​ដែល​បណ្តេញ​ចេញ

ក្រុមហ៊ុន​ដឹក​ជញ្ជូន​ភ្នំពេញ​សូរិយា​គ្រោង​ប្តឹង​អតីត​បុគ្គលិក​ដែល​បណ្តេញ​ចេញ

ភ្នំពេញៈ ក្រុម​ហ៊ុន​ភ្នំពេញ​សូរិយា ដឹក​អ្នក​ដំណើរ​គ្រោង​នឹង​ដាក់​ពាក្យ​បណ្តឹង​ទៅ​សាលា​ដំបូង​រាជធានី​ភ្នំពេញ​ឆាប់ៗ​ខាង​មុខ​នេះ​ដោយ​ស្នើ​ឲ្យ​មាន​ការ​អន្តរាគមន៍​ទាក់​ទង​នឹង​អតីត​អ្នក​បើក​បរ​ចំនួន ១៧ នាក់​តែង​តែ​ធ្វើ​ការ​រំខាន​ដល់​មុខ​ជំនួញ​របស់​ក្រុម​ហ៊ុន ខណៈ​ពេល​ដែល​ពួក​គេ​បាន​ចាប់​ផ្តើម​ការ​តវ៉ា​សា​ជា​ថ្មី​ម្តង​ទៀត​ទាំង​កណ្តាល​ភ្លៀង​កាល​ពីថ្ងៃ​អាទិត្យ​ម្សិល​មិញ​នេះ។

លោក ច័ន្ទ សុផាន់ណា អគ្គ​នាយក​របស់​ក្រុម​ហ៊ុន​ភ្នំពេញ​សូរិយា ដឹក​អ្នក​ដំណើរ​បាន​និយាយ​កាល​ពី​ថ្ងៃ​ម្សិល​មិញ​ថា ក្រុម​ហ៊ុន​លោក​ប្រហែល​នឹង​ធ្វើ​ការ​ដាក់​ពាក្យ​បណ្តឹង​ទៅ​តុលាការ​ដោយ​ស្នើ​សុំ​ឲ្យ​មាន​អន្តរាគមន៍​ទៅ​ដល់​សកម្មភាព​របស់​ក្រុម​អ្នក​តវ៉ា​ដែល​តែង​តែ​ធ្វើ​ការ​រំខាន​មក​ដល់​ការងារ​រក​ស៊ី​របស់​ក្រុម​ហ៊ុន​នេះ។ លោក​បាន​ថ្លែង​ថា៖ «ពួក​គេ​តែង​តែ​និយាយ​ថា គោរព​ច្បាប់ ពួក​គាត់​ធ្វើ​ត្រូវ​ច្បាប់ ប៉ុន្តែ​ពួក​គេ​មិន​បាន​គិត​ពី​ផល​ប៉ះពាល់​មក​លើ​ក្រុម​ហ៊ុន​ខ្ញុំ​ទេ ដោយ​សារ​ពួក​គេ​ឈរ​មុខ​ឡាន​របស់​យើង​មិន​ឲ្យ​ចេញ​ចូល​បាន។ ខ្ញុំ​មិន​ប្រកែក​តវ៉ា​ជាមួយ​នឹង​ពួក​គាត់​ទេ ប៉ុន្តែ​គាត់​គួរ​តែ​យល់​ពី​ផល​លំបាក​នៃ​ការ​រក​ស៊ី​របស់​ក្រុម​ហ៊ុន​យើង»។

លោក​បាន​បន្ត​ទាំង​ងឿង​ឆ្ងល់ ចំពោះ​ការ​បញ្ឈប់​បុគ្គលិក​ហាក់​ដូច​ជា​មាន​ការ​ពិបាក​ថា តើ​ក្រុម​ហ៊ុន​នីមួយៗ​មិន​អាច​បញ្ឈប់​បុគ្គលិក​បាន​ទេ​មែន​ទេ? ប្រសិន​បើ​មិន​អាច​បញ្ឈប់​បុគ្គលិក​បាន ចឹង​ក្រុម​ហ៊ុន​នឹង​មិន​អាច​ឈរ​ជើង​បន្ត​ទៀត​បាន​ទេ។ លោក​ថា៖ «យើង​ក៏​បាន​បើក​ផ្លូវ​សម្រាប់​គាត់​ដែរ ដោយ​ធ្វើ​ការ​ពិចារណា​ជាមួយ​គាត់​ម្តង​ទៀត​ប្រសិន​បើ​ក្រុម​ហ៊ុន​មាន​លទ្ធភាព​ទិញ​រថយន្ត​ឡើង​វិញ។ យើង​នៅ​តែ​បន្ត​ធ្វើ​ការ​ដោះ​ស្រាយ​តាម​ច្បាប់​ការងារ»។

ក្រុម​ហ៊ុន​ធ្វើ​ការ​ដោះស្រាយ​ដោយ​ធ្វើ​ការ​បង់​ប្រាក់​ជំនួស​ការ​ទទួល​ការ​យក​គាត់​ធ្វើ​ការ​វិញ ដោយ​គិត​គូរ​តាម​ច្បាប់​ការងារ​ជូន​ពួក​គាត់។

លោក ព្រិត សុអួត មន្រ្តី​ច្បាប់​សហភាព​ការងារ​កម្ពុជា បាន​និយាយ​កាល​ពី​ថ្ងៃ​អាទិត្យ​ថា កូដកម្ម​បន្ត​ធ្វើ​ទៀត​ដោយ​គ្មាន​កាល​កំណត់​ច្បាស់​លាស់​ពី​ការ​បញ្ឈប់ បន្ទាប់​ពី​ការ​ចរចា​កាល​ពី​ថ្ងៃ​សៅរ៍​មិន​មាន​លទ្ធផល។

លោក​បាន​ថ្លែង​ថា៖ «ក្រុម​ហ៊ុន​ចង់​ផ្តល់​ជា​លុយ​ជំនួស​ការ​ទទួល​យក​ចូល​ធ្វើ​ការ ប៉ុន្តែ​អ្នក​ទាំង ១៧ នាក់​មិន​ព្រម​ទទួល​យក​លុយ​ទេ​គឺ​ពួក​គេ​ចង់​បាន​ការងារ​របស់​គេ​វិញ»។

លោក សម្បត្តិ វន ប្រធាន​សហជីព​ដែល​គ្រោង​នឹង​បង្កើត​ក្នុង​ក្រុម​ហ៊ុន​នេះ និង​ជា​តំណាង​អ្នក​បើកបរ​បាន​និយាយ​ថា ពួក​គេ​មិន​មែន​តវ៉ា​ដើម្បី​លុយ​ទេ តែ​ដើម្បី​ការងារ។

លោក​បាន​ថ្លែង​ថា៖ «យើង​តវ៉ា​រហូត​ទាល់​តែ​មាន​ដំណោះស្រាយ​សមរម្យ​សម្រាប់​យើង ហើយ​យើង​តវ៉ា​ជាច្រើន​ខែ​មក​នេះ​មិន​មែន​ដើម្បី​លុយ​ទេ គឺ​ដើម្បី​ការងារ និង​លក្ខខណ្ឌ​ការងារ​ល្អ​ប្រសើរ​សម្រាប់​បុគ្គលិក និង​អ្នក​បើក​បរ​ផ្សេងៗ​ទៀត ប្រសិន​បើ​យើង​អាច​បង្កើត​សហជីព​បាន»។

លោក សម្បត្តិ វន បាន​និយាយ​ទៀត​ថា ក្រុម​លោក​អាច​នឹង​មាន​ការ​ហែ​ជា​ក្បួន​ទៅ​កាន់​ស្ថាប័ន​មួយ​ចំនួន​ដូចជា​ក្រសួង​ការងារ និង​ក្រសួង​សាធារណការ និង​ដឹក​ជញ្ជូន​ជា​ដើម​ដើម្បី​សុំ​អន្តរាគមន៍៕

អត្ថបទគួរចាប់អារម្មណ៍