.jpg)
ក្រុមហ៊ុន ស៊ីភី ខេមបូឌា ទទួលបានវិញ្ញាបនបត្របញ្ជាក់គុណភាពអន្តរជាតិ GMP និង HACCP កាលពីថ្ងៃសុក្រកន្លងទៅ។
ក្រុមហ៊ុន ស៊ី.ភី. ខេមបូឌា ចំកាត់ ត្រូវបានធានារ៉ាប់រង និងទទួលស្គាល់ប្រព័ន្ធអនុវត្តផលិតកម្មល្អ (GMP) និងប្រព័ន្ធវិភាគគ្រោះថ្នាក់នៅចំណុចត្រួតពិនិត្យសំខាន់ (HACCP) តាមស្តង់ដាអន្តរជាតិ និងបានត្រៀមខ្លួនរួចជាស្រេចក្នុងការលើកកម្ពស់ ប្រព័ន្ធស្តង់ដាផលិតចំណីអាហារដែលមានគុណភាព និងសុវត្ថិភាពឈានមុខគេនៅកម្ពុជា។
ដោយត្រូវបានបង្កើតឡើងនៅក្នុងព្រះរាជាណាចក្រកម្ពុជាអស់រយៈពេល ២៥ ឆ្នាំ ក្រុមហ៊ុន ស៊ីភី ខេមបូឌា ចំកាត់ បានឈានដល់សមិទ្ធផលដ៏សំខាន់ថ្មីមួយ កាលពីថ្ងៃទី ៥ ខែកុម្ភៈកន្លងទៅ នៅពេលដែលក្រុមហ៊ុនផលិត និងកែច្នៃចំណីអាហារដ៏ល្បីមួយនេះទទួលបានធានារ៉ាប់រង និង ទទួលស្គាល់ប្រព័ន្ធអនុវត្តផលិតកម្មល្អ (GMP) និងប្រព័ន្ធវិភាគគ្រោះថ្នាក់នៅចំណុចត្រួតពិនិត្យសំខាន់ (HACCP)។
នៅក្នុងសុន្ទរកថាអបអរសាទររបស់ឯកអគ្គរាជទូតថៃប្រចាំកម្ពុជា ឯកឧត្តម Panyarak Poolthup មានប្រសាសន៍ថា៖ «ក្រុមហ៊ុន ស៊ីភី ខេមបូឌា បានពុះពារគ្រប់ឧបសគ្គក្នុងការអភិវឌ្ឍប្រព័ន្ធផលិតចំណីអាហារឱ្យកាន់តែល្អប្រសើរឡើង ដែលជាផ្នែកមួយក្នុងការជួយលើកកម្ពស់ស្តង់ដាការផលិត និងការបរិភោគនៅកម្ពុជា»។
ឯកឧត្តមបន្ថែមថា៖ «ការទទួលបាននូវប្រព័ន្ធស្តង់ដានេះជាគ្រឿងសម្គាល់មួយដែលបញ្ជាក់ពីស្តង់ដាផលិតផលចំណីអាហាររបស់ក្រុមហ៊ុន ស៊ីភី ខេមបូឌា ដែលមានគុណភាព ដើម្បីចែកចាយដល់ប្រជាជនកម្ពុជាហើយ ថែមទាំងជួយដល់ផលិតផលថៃនៅកម្ពុជាឱ្យមានការពេញនិយម និងមានទំនុកចិត្តខ្លាំងឡើងៗ ហើយការទទួលបាននូវវិញ្ញាបនបត្រ GMP & HACCP លើកនេះជាសមិទ្ធផលដ៏ធំធេងមួយរបស់ CP ដែលទទួលបានជោគជ័យក្នុងការប្រតិបត្តិអាជីវកម្មមួយនេះឱ្យកាន់តែរីកចម្រើនឡើងនាពេលអនាគត មិនតែប៉ុណ្ណោះបានជួយពង្រឹងចំណងមិត្តភាពរវាងថៃ និងកម្ពុជាឱ្យមានភាពរឹងមាំយូរអង្វែង»។
ចក្ខុវិស័យដែលឆ្ពោះទៅរក “ផ្ទះបាយពិភពលោក” ក្រុមហ៊ុនផ្តោតទៅលើការអភិវឌ្ឍអាជីវកម្មប្រកបដោយនិរន្តរភាព ដោយផ្តោតលើសសរស្តម្ភចំនួន ៣ គឺផ្តល់អត្ថប្រយោជន៍ដល់ដល់ប្រទេសជាតិ ដល់ប្រជាជន និងដល់ក្រុមហ៊ុន។
ការទទួលបានការទទួលស្គាល់ប្រព័ន្ធគ្រប់គ្រងសុវត្ថិភាពចំណីអាហាររបស់ខ្លួននេះ អាជីវកម្មក្រុមហ៊ុនស៊ីភីគ្របដណ្តប់ជាច្រើនប្រភេទក្នុងនោះ គឺផលិត និងកែច្នៃចំណីអាហារដែលមានស្តង់ដា និងគុណភាពនៅក្នុងចង្វាក់ផលិតកម្មចំណីរបស់ខ្លួន។
លោក Thanachit: គុណភាពគឺតែងតែជាបេះដូងនៃក្រុមហ៊ុនរបស់យើង។
លោក Thanachit Sriboonlue ក្រុមប្រឹក្សាភិបាលរងនៃក្រុមហ៊ុន ស៊ីភី ថ្លែងថា៖ «ការទទួលបានប្រព័ន្ធស្តង់ដាអន្តរជាតិ GMP, HACCP លើកនេះចាត់ទុកជារឿងសំខាន់ក្នុងការជួយលើកស្ទួយប្រព័ន្ធស្តង់ដាផលិតកម្មល្អក្នុងប្រទេសកម្ពុជា ជួយឱ្យប្រជាជនកម្ពុជាអាចចូលទៅរកអាហារដែលមានគុណភាព និងសុវត្ថិភាព ម្យ៉ាងទៀតជួយបង្កើនទំនុកចិត្តដល់ប្រជាជនខ្មែរផងដែរ។ «គុណភាពគឺតែងតែជាបេះដូងនៃក្រុមហ៊ុនរបស់យើង។ វាគឺជាការផ្តោតសំខាន់បំផុតដែលជំរុញដំណើរ ការផលិតផលចំណីអាហារសម្រេចសម្រាប់ការបរិភោគរបស់អតិថិជន»។
«រឿងដែលយើងយកចិត្តទុកដាក់ និងជឿជាក់នោះគឺរឿងគុណភាព និងសុវត្ថិភាពរបស់ចំណីអាហារ ព្រមទាំងប្រព័ន្ធផលិតដែលបានទទួលស្គាល់ដោយប្រព័ន្ធស្តង់ដាអន្តរជាតិ។ ទាំងអស់នេះហើយ គឺធ្វើឡើងដើម្បីបង្កើតទំនុកចិត្តដល់អតិថិជន និងអ្នកប្រើប្រាស់»។
លោក ម៉ៅ ធីរ៉ា ប្រធាននាយកដ្ឋានបញ្ញត្តិកម្មនៃវិទ្យាស្ថានស្តង់ដាកម្ពុជានៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ថ្លែងថា៖ «ក្រុមហ៊ុនស៊ីភីទទួលបាន GMP នេះបានន័យថា រោងចក្ររបស់គាត់មានការអនុវត្តយ៉ាងត្រឹមត្រូវចាប់តាំងពីឃ្លាំងស្តុកវត្ថុធាតុដើម រហូតដល់ផលិតផលសម្រេច។ រាល់ចំណុចនៃការសាងសង់ទាំងឃ្លាំង ទាំងលំហូរចូលនៃចរន្តមនុស្ស លំហូរចេញនៃទឹកកខ្វក់ លំហូរចូលនៃខ្យល់ គឺមានចរន្តច្បាស់លាស់ អនុវត្តនូវអនាម័យ ធានាបាននូវគុណភាព»។
«ចំពោះ HACCP គឺជាប្រព័ន្ធមួយដែលផ្តោតទៅលើការពិនិត្យយ៉ាងហ្មត់ចត់នៃចំណុចដែលអាចបង្កើតហានិភ័យដល់ខ្សែចង្វាក់ផលិតកម្ម ដូច្នេះនៅពេលដែលក្រុមហ៊ុនស៊ីភីទទួលបានវិញ្ញាបនបត្រទាំង ២ នេះកាន់តែបញ្ជាក់ថា ក្រុមហ៊ុននេះបានគ្រប់គ្រងផលិតផលរបស់ខ្លួនមានការយកចិត្តទុកដាក់ និងប្រុងប្រយ័ត្នបំផុតដែលធានាបាននូវគុណភាព និងសុវត្ថិភាពសម្រាប់អ្នកប្រើប្រាស់។ ខ្ញុំសង្ឃឹមថា ក្រុមហ៊ុននឹងអនុវត្ត ហើយធានាបាននូវគុណភាព សុវត្ថិភាពម្ហូបអាហារ ហើយសង្ឃឹមថាក្រុមហ៊ុនផ្សេងទៀត និងព្យាយាមអនុវត្តតាមក្រុមហ៊ុន ស៊ីភី ដែរ»។
លោក នៅ ស៊ីណាត បុគ្គលិកជំនាញ ស្រាវជ្រាវ និងអភិវឌ្ឍន៍ ផលិតផលអាហារប្រែរូបក៏បានលើកឡើងថា៖ «ក្នុងនាមជាអ្នកបម្រើការងារនៅក្នុងក្រុមហ៊ុនស៊ីភី ខ្ញុំរីករាយណាស់ដែលក្រុមហ៊ុនទទួលបានវិញ្ញាបនបត្រ GMP និង HACCP នៅថ្ងៃនេះ។ យើងបានខិតខំប្រឹងប្រែងយ៉ាងខ្លាំងដើម្បីទទួលបានសមិទ្ធផលដូចថ្ងៃនេះ។ សម្រាប់ចង្វាក់នៃការផលិត គឺយើងមានការកែប្រែច្រើនដើម្បីធ្វើឱ្យប្រាកដថា ផលិតផលដែលយើងផលិតចេញមក គឺមានគុណភាព និងសុវត្ថិភាពសម្រាប់ប្រជាជនក្នុងប្រទេសកម្ពុជា»។
ក្នុងនោះលោក ហេង ម៉េង ឃាង ដែលជាអាជីវករក៏បានលើកឡើងថា៖ «ខ្ញុំធ្វើអាជីវកម្មជាមួយក្រុមហ៊ុន ស៊ីភី អស់រយៈពេល ៦ ឆ្នាំហើយហើយការទទួលស្គាល់នេះបានផ្តល់អត្ថប្រយោជន៍ច្រើនដល់អាជីវកម្មរបស់ខ្ញុំ។ ផលិតផលរបស់ ស៊ីភី គឺផលិតឡើងតម្រូវរសជាតិអាស៊ី ហើយអតិថិជនតែងតែលើកឡើងថា ផលិតផលស៊ីភីគឺមានរសជាតិឈ្ងុយឆ្ងាញ់ ការវេចខ្ចប់បានល្អ»។
អត្ថប្រយោជន៍នៃការទទួលបាន GMP និង HACCP និងជួយកសាងទំនុកចិត្តអតិថិជនកាន់តែខ្លាំង ក៏ដូចជាផ្តល់និរន្តរភាពដល់ក្រុមហ៊ុន។ ការឈានឆ្ពោះទៅមុខនេះ ក្រុមហ៊ុនបានប្តេជ្ញាចិត្តបន្តធ្វើការស្រាវជ្រាវបន្ថែមទៀត និងផលិតនូវផលិតផលចំណីអាហារដែលមានគុណភាពខ្ពស់ និងរសជាតិឈ្ងុយឆ្ងាញ់ រួមទាំងការអភិវឌ្ឍផលិតផលថ្មីៗដើម្បីបំពេញតាមចំណង់ចំណូលចិត្ត និងតម្រូវការរបស់អ្នកប្រើប្រាស់គ្រប់វ័យនៅក្នុងព្រះរាជាណាចក្រកម្ពុជា។
ក្រុមហ៊ុន ស៊ីភី ខេមបូឌា ប្រតិបត្តិការអាជីវកម្ម កសិឧស្សាហកម្មចំណីអាហារគ្រប់ប្រភេទឈានមុខគេនៅកម្ពុជាក្នុងនោះចែកជា ៣ ប្រភេទធំៗមានអាជីវកម្មផលិតចំណីសត្វ ចិញ្ចឹមសត្វ និងអាជីវកម្មចំណីអាហារ ព្រមទាំងអាជីវកម្មលក់រាយជាច្រើនទៀត៕
