The Phnom Penh Post Search

Search form




Logo of Phnom Penh Post newspaper Phnom Penh Post - ក្រុមហ៊ុន ១២ ​ត្រូវ​កាត់​បន្ថយ​រយៈពេល​វិនិយោគ

ក្រុមហ៊ុន ១២ ​ត្រូវ​កាត់​បន្ថយ​រយៈពេល​វិនិយោគ

Content image - Phnom Penh Post

ក្រុមហ៊ុន ១២ ​ត្រូវ​កាត់​បន្ថយ​រយៈពេល​វិនិយោគ

ភ្នំពេញៈ រាជ​រដ្ឋាភិបាល​បាន​សម្រេច​កាត់បន្ថយ​រយៈពេល​នៃ​ការ​វិនិយោគ​ដីសម្បទាន​របស់​ក្រុមហ៊ុន​ចំនួន ១២ បន្ថែម​ទៀត​ដែល​ស្ថិត​ក្រោម​ក្របខ័ណ្ឌ​ក្រសួង​បរិស្ថាន​ឲ្យ​​មក​នៅ​ត្រឹម ៥០ ឆ្នាំ​វិញ​ខណៈ​ដែល​ក្រុមហ៊ុន ២ ទៀត​កំពុង​ស្ថិត​ក្នុង​ការ​តាមដាន និង​កែសម្រួល​រយៈពេល​ដូច​គ្នា។

សេចក្តី​ប្រកាស​ព័ត៌មាន​នៃ​លទ្ធផល​ការ​វាយតម្លៃ​ក្រុមហ៊ុន​សម្បទាន​​ដី​សេដ្ឋកិច្ច ១៤ ក្រោម​ក្របខណ្ឌ​ក្រសួង​បរិស្ថាន​ចុះ​ថ្ងៃ​ទី​ ២៦ ខែ​សីហា បាន​ឲ្យ​ដឹង​ថា​ក្រុមហ៊ុន ១២ ដែល​​មាន​ផ្ទៃដី​សរុប ៤១​២៤៤ ​ហិកតា​នៅ​ខេត្ត​ក្រចេះ ឧត្តរមានជ័យ ព្រះវិហារ ត្រូវ​បាន​រាជរដ្ឋាភិបាល​អនុញ្ញាត​ឲ្យ​បន្ត​អនុវត្ត​គម្រោង​លើ​ផ្ទៃ​ដី​ដែល​​បាន​ដោះស្រាយ​ផលប៉ះពាល់​រួច​ដោយ​ត្រូវ​ចុះ​កិច្ចសន្យា​ឡើង​វិញ និង​កាត់បន្ថយ​រយៈពេល​នៃ​ការវិនិយោគ​ពី​មុន​មក​មាន ៩៩ ឆ្នាំ ៨០ ឆ្នាំ និង ៧០ ឆ្នាំ​ឲ្យ​មក​នៅ​ត្រឹម ៥០ ឆ្នាំ​វិញ។

ចំណែកឯ​ក្រុមហ៊ុន ២ ​ទៀត​មាន​ផ្ទៃដី​សរុប ១៧ ៩៩៨ ហិកតា ដែល​ទទួល​បាន​សម្បទាន​ដី​សេដ្ឋកិច្ច​នៅក្នុង​តំបន់​ប្រើប្រាស់​ដោយ​ចីរភាព​នៃ​ឧទ្យាន​ជាតិ​វីរជ័យ​ក្នុង​ខេត្ត​រតនគិរី​ត្រូវ​បាន​អនុញ្ញាត​ឲ្យ​បន្ត​នីតិវិធី​ដោយ​ទុក​រយៈពេល​ ៦ ​ខែ​ដើម្បី​តាមដាន​វឌ្ឍនភាព និង​កែសម្រួល​រយៈពេល​ពី ៧០ ​ឆ្នាំ​មក​នៅ​ត្រឹម ៥០ ឆ្នាំ​វិញ។

នាយ​ខុន្ទកាល័យ​ក្រសួង​បរិស្ថាន​លោក ស្រ៊ុន ដារិទ្ធិ បាន​ឲ្យ​ដឹង​ថា​គិត​មក​ទល់​ពេល​នេះ​គម្រោង​វិនិយោគ​នៃ​ក្រុមហ៊ុន​ចំនួន ២៨ ហើយ​ដែល​ត្រូវ​បាន​សម្រេច​ឲ្យ​​បន្ត​អនុវត្ត​គម្រោង​លើ​ផ្ទៃ​ដី​ដែល​បាន​​ដោះស្រាយ​ផល​ប៉ះពាល់​រួច​ដោយ​កាត់បន្ថយ​រយៈពេល​នៃ​កិច្ចសន្យា​មក​ត្រឹម ៥០ ឆ្នាំ​។

លោក​ថ្លែង​ទៀត​ថា៖ «គោលការណ៍​កាត់បន្ថយ​មក ៥០ ឆ្នាំ​នឹង​ធ្វើ​ទាំងអស់​បើ​តាម​គោលការណ៍​នៅពេល​ដែល​ក្រសួង​កោះ​ហៅ​ក្រុមហ៊ុន​មក​កាត់បន្ថយ​រយៈពេល​គឺ​យើង​នៅ​តែ​រាប់​ដដែល​ចាប់ពី​ក្រុមហ៊ុន​ចុះ​កិច្ចសន្យា​ដំបូង​មក​ឧទាហរណ៍​ក្រុមហ៊ុន ៧០ ឆ្នាំ​បើ​គាត់​ធ្វើ​បាន​ ៥ ​ឆ្នាំ​ហើយ​ចឹង​នៅពេល​យើង​កែ ៥០ ឆ្នាំ​ទៀត​មាន​ន័យ​ថា​គាត់​អាច​បន្ត​បាន​តែ ៤៥ ឆ្នាំ​ទៀត​ទេ​គឺ​រាប់​ចាប់​តាំងពី​ដំណើរការ​ដំបូង​មក​»។

តាមរយៈ​សេចក្តី​ប្រកាស​ព័ត៌មាន​ក្រសួង​បរិស្ថាន​បាន​ពិនិត្យ និង​វាយតម្លៃ​គម្រោង​វិនិយោគ​អភិវឌ្ឍន៍​ទាំងអស់​ចំនួន​សរុប ១១៣ ដែល​មាន​ផ្ទៃដី​សរុប ៦១០ ២៩៦,៧៥ ហិកតា ដែល​ក្នុង​នោះ​គម្រោង​ចំនួន ៩០ ត្រូវ​ដាក់​ឆ្លង​​អង្គប្រជុំ​គណៈកម្មការ​អន្តរក្រសួង​ដើម្បី​ពិភាក្សា និង​​លើក​សំណើ​ជូន​ប្រមុខ​រាជរដ្ឋាភិបាល​ក្នុង​ការ​ពិភាក្សា និង​លើក​សំណើ​ជូន​ប្រមុខ​រដ្ឋាភិបាល​លោក ហ៊ុន សែន ​សម្រេច​ដែល​ជា​លទ្ធផល​គម្រោង​របស់​​ក្រុមហ៊ុន​ចំនួន ២៣ លើ​ផ្ទៃដី​សរុប ៩០៦៨២ ហិកតា​ត្រូវ​បាន​​រាជរដ្ឋាភិបាល​សម្រេច​និរាករណ៍ (ដកហូត) សិទ្ធិ​វិនិយោគ​ក្រោយ​រក​ឃើញ​ថា​ក្រុមហ៊ុន​ទាំង​នោះ​មិន​បាន​គោរព​តាម​គោលការណ៍ និង​នីតិវិធី​នានា​ដែល​បាន​កំណត់​។

តាមរយៈ​ទិន្នន័យ​សង្ខេប​បង្ហាញ​ដោយ​អ្នក​នាំ​ពាក្យ និង​ជា​អនុរដ្ឋលេខាធិការ​ក្រសួង​កសិកម្ម រុក្ខាប្រមាញ់ និង​នេសាទ លោក អ៊ាង សុផល្លែត គិត​ត្រឹម​ថ្ងៃ​ទី ៥ ខែ​សីហា ក្រុមហ៊ុន​ចំនួន ៧៧ ត្រូវ​បាន​គណៈកម្មការ​អន្តរ​ក្រសួង ត្រួត​ពិនិត្យ និង​វាយតម្លៃ​ហើយ​ក្នុង​ក្របខ័ណ្ឌ​ដី​សម្បទាន​សេដ្ឋកិច្ច​ក្រសួង​កសិកម្ម​ក្នុង​នោះ​ក្រុមហ៊ុន​ចំនួន ១០ ត្រូវ​បាន​និរាករណ៍​ក្រុមហ៊ុន ៦ ត្រូវ​បាន​ឲ្យ​សម្រួល​ផ្ទៃដី​ក្រុមហ៊ុន ៥៤ ត្រូវ​បាន​អនុញ្ញាត​ឲ្យ​បន្ត​នីតិវិធី និង​ក្រុមហ៊ុន ៧ ត្រូវ​បាន​ទុក​ពេល​ឲ្យ​ពី ៦ ខែ ទៅ ១ ឆ្នាំ​ដើម្បី​បន្ត​នីតិវិធី (ស្ថិត​ក្រោម​ការ​តាមដាន)។ យ៉ាង​ណា​ក៏ដោយ​លោក​មិន​បាន​បញ្ជាក់​ថា​តើ​បច្ចុប្បន្ន​នេះ​ក្រុមហ៊ុន​ប៉ុន្មាន​ត្រូវ​បាន​កាត់បន្ថយ​រយៈពេល​វិនិយោគ​មក​ត្រឹម ៥០ ឆ្នាំ​នៅ​ឡើយ​ទេ។

បើ​តាម​លោក សុផល្លែត លើក​ឡើង​កន្លង​ទៅ​នៅក្នុង​ក្របខណ្ឌ​ក្រសួង​កសិកម្ម​មាន​ក្រុមហ៊ុន​សរុប​ចំនួន ១២២ មាន​​ផ្ទៃដី​សរុប​ចន្លោះ​ពី ១,២ ​លាន​ហិកតា ទៅ ១,៣ លាន​ហិកតា​ដែល​បាន​ទទួល​ការ​អនុញ្ញាត និង​ចុះ​កិច្ចសន្យា​ជាមួយ​រដ្ឋាភិបាល​ក្នុង​ការ​អភិវឌ្ឍ​វិនិយោគ។

តាមរយៈ​គោលការណ៍​ថ្មី​បន្ទាប់ពី​រកឃើញ​ថា​ក្រុមហ៊ុន​ខ្លះ​មាន​ភាព​យឺតយ៉ាវ និង​ខ្លះ​មិន​ដំណើរការ​រាជរដ្ឋាភិបាល​កម្ពុជា​បាន​សម្រេច​កាត់បន្ថយ​រយៈពេល​​នៃ​ការ​អនុវត្ត​គម្រោង​វិនិយោគ​អភិវឌ្ឍន៍​សម្បទាន​ដី​សេដ្ឋកិច្ច​ទាំង​អស់​មក​នៅ​ត្រឹម​យ៉ាង​យូរ ៥០ ឆ្នាំ​ទាំង​ក្នុង​ក្របខណ្ឌ​ក្រសួង​បរិស្ថាន និង​ក្រសួង​កសិកម្ម​ហើយ​កាលពី​ថ្ងៃ​ទី ២៨ ខែ​កក្កដា​កន្លង​ទៅ​ក្រុមហ៊ុន​វិនិយោគ​ចំនួន ១៦ ដែល​មាន​ផ្ទៃដី​សរុប​ចំនួន ៩៦ ០៩៨ ហិកតា​ត្រូវ​បាន​បន្ថយ​រយៈពេល​វិនិយោគ​មក​ត្រឹម​ ៥០ ​ឆ្នាំ​វិញ​៕

អត្ថបទគួរចាប់អារម្មណ៍