ក្រចេះ/ស្ទឹងត្រែងៈ នាយកប្រតិបត្តិក្រុមហ៊ុនស៊ីងបាយអូថេក អះអាងថា ក្រុមហ៊ុនគ្រោងដាំកូនឈើ ១០ លានដើមលើផ្ទៃដីជិត ១ ម៉ឺនហិកតាបន្ថែមទៀត ក្នុងរយៈពេល ៤ ខែ គិតចាប់ពីខែឧសភាដល់ខែសីហា ឆ្នាំ ២០២១ នៅខេត្តក្រចេះ និងស្ទឹងត្រែង ខណៈក្រុមហ៊ុនកំពុងរកដៃគូសហការដាំបន្ថែមទៀត។ នេះបើតាមរបាយការណ៍ដែលភ្នំពេញប៉ុស្ដិ៍ទទួលបានកាលពីថ្ងៃ ២៥ ឧសភា។
លោក លី ឈូឆាង នាយកប្រតិបត្តិក្រុមហ៊ុនស៊ីងបាយអូថេកបានបញ្ជាក់ក្នុងរបាយការណ៍នេះថា ក្នុងរយៈពេល ៤ ខែគិតចាប់ពីខែឧសភាដល់ខែសីហាឆ្នាំ ២០២១ ក្រុមហ៊ុនគ្រោងដាំកូនដើមប្រេងខ្យល់ឱ្យបានប្រមាណ ១០ លានដើមនៅលើផ្ទៃដីទំហំ ៨ ៥០០ ហិកតា។ តាមផែនការគ្រោងទុក ការដាំដុះជំហានទី ១ គ្រោងបញ្ចប់ក្នុងឆ្នាំ ២០២៥ ខាងមុខលើផ្ទៃដីប្រមាណ ១០ ម៉ឺនហិកតាដែលស្មើនឹងកូនឈើប្រមាណពី ១០០ លានដើម ទៅ ១២០ លានដើម។
លោក លូ ឈូឆាង បានឱ្យដឹងថា៖ «ក្រុមហ៊ុននឹងបង្កើនល្បឿននៃការដាំដុះដោយក្នុងឆ្នាំ ២០២១ នេះ ដាំឱ្យបាន ១០ លានដើម និងបង្កើនបន្ថែមនៅឆ្នាំបន្ទាប់ ដើម្បីឆ្លើយតបទៅនឹងតម្រូវការទីផ្សារប្រើប្រាស់ឈើក្នុងវិស័យឧស្សាហកម្មកែច្នៃឈើដែលបច្ចុប្បន្នកម្ពុជាកំពុងត្រូវការខ្លាំង ជាពិសេសនៅក្នុងវិស័យសំណង់» ។
បើតាមលោក លូ ឈូឆាង ចាប់ពីឆ្នាំ ២០១៨ ដល់ឆ្នាំ ២០២០ ក្រុមហ៊ុនបានដាំកូនឈើប្រភេទប្រេងខ្យល់បានប្រមាណ ៣,៦ លានដើមរួចហើយ ដែលជាការចាប់ផ្តើមដំបូង។ លោកថា រហូតមកទល់ពេលនេះ ក្រុមហ៊ុនដាំកូនឈើលើដីបានចំនួនជាង ៥ ០០០ ហិកតាលើផ្ទៃដីសរុប ៣៤ ០០៧ ហិកតា ដែលក្រុមហ៊ុនបានទទួលសិទ្ធិប្រើប្រាស់ដីព្រៃរេចរឹលរបស់រដ្ឋនៅលើដីស្ថានីយផ្សព្វផ្សាយ និងស្តារព្រៃឈើបឹងចារនៅក្នុងខេត្តក្រចេះ និងខេត្តស្ទឹងត្រែង។
លោកបានបញ្ជាក់ថា ក្រុមហ៊ុនក៏បាននិងកំពុងប្រឹងប្រែងក្នុងការអភិវឌ្ឍដាំចម្ការឈើសម្រាប់បម្រើវិស័យឧស្សាហកម្មឈើកែច្នៃនៅកម្ពុជាផងដែរ ដោយពេលនេះកំពុងខិតខំពិភាក្សាជាមួយពលរដ្ឋ និងសហគមន៍ដែលមានដីទំនេរនៅតំបន់នោះ ដើម្បីសហការដាំកូនឈើជាលក្ខណៈដៃគូដែលអាចបង្កើតការងារ និងបង្កើនជីវភាពជូនពលរដ្ឋ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងថា រាជរដ្ឋាភិបាលកម្ពុជាបាននិងកំពុងតែជំរុញឱ្យមានការវិនិយោគដាំចម្ការឈើឱ្យបានច្រើនដើម្បីបង្កើនភាពបៃតង និងបង្កើតប្រភពឈើសម្រាប់ប្រើប្រាស់ប្រកបដោយនិរន្តរភាព។
លោកថ្លែងថា៖ «សារប្រយោជន៍នៃចម្ការឈើ គឺគេអាចយកផលមកប្រើប្រាស់ កែច្នៃ ចាប់តាំងពីគល់រហូតដល់ចុង ហើយវាក៏បានចូលរួមក្នុងការបង្កើតនូវគម្របបៃតង និងដើរតួនាទីសំខាន់ណាស់ជំនួសការប្រើប្រាស់ឈើធម្មជាតិកាត់បន្ថយសម្ពាធលើការប្រើប្រាស់ឈើធម្មជាតិ» ។
បើតាមលោក ភក្ត្រា ចម្ការឈើដាំដែលបាននិងកំពុងរីកដុះដាលនៅកម្ពុជានឹងជួយកាត់បន្ថយការនាំចូលវត្ថុធាតុដើមឈើកែច្នៃពីបរទេស និងបង្កើតប្រភពឈើប្រើប្រាស់ប្រកបដោយនិរន្តរភាពនៅក្នុងស្រុក ខណៈធនធានធម្មជាតិព្រៃឈើបានដើរតួនាទីយ៉ាងសំខាន់ក្នុងការចូលរួមថែរក្សាប្រព័ន្ធអេកូឡូស៊ីនៃភពផែនដីសម្រាប់ពលរដ្ឋនៅលើពិភពលោក។
ក៏ប៉ុន្តែលោក ជា ចំរើន ប្រធានអង្គការថែរក្សាបរិស្ថាន និងកសិកម្មបានថ្លែងថា ការដាំដើមប្រេងខ្យល់មិនអាចការពារបរិស្ថានបានទេ ព្រោះដើមឈើនេះពេលធំឡើងពេញតម្រូវការ គេនឹងកាប់យកទៅប្រើប្រាស់ ហើយការដាំដើមប្រេងខ្យល់នេះទៀតសោតមានការបំផ្លាញធ្ងន់ធ្ងរដល់គុណភាពដី។
លោកថា៖ «កន្លែងណាដែលបានដាំដើមប្រេងខ្យល់ហើយវាអត់អាចទ្រទ្រង់រុក្ខជាតិថ្មីបានទេ ហើយការដាំដើមឈើនេះ មិនបម្រើផលដល់ផ្នែកសេដ្ឋកិច្ចប៉ុន្មានទេ វាប៉ះពាល់ដល់អនាគតរបស់សេដ្ឋកិច្ចខាងកសិកម្ម»។
យ៉ាងណាក្ដី លោក នេត្រ ភក្ត្រា បានអះអាងថា អ្វីដែលបានឮពីមុនអំពីដើមប្រេងខ្យល់គ្រាន់តែជាពាក្យចចាមអារ៉ាម និងការបង្អាក់ឧស្សាហកម្មចម្ការឈើដាំប៉ុណ្ណោះ។ ព្រោះអ្នកជំនាញថា បច្ចុប្បន្ននេះ ជាមួយបច្ចេកវិទ្យាទំនើប វិធីសាស្ត្រផលិត និងការថែទាំតាមកម្រិតស្តង់ដា ការដាំដើមប្រេងខ្យល់ដែលក្រុមហ៊ុនបាននិងកំពុងធ្វើនៅកម្ពុជា មិនបង្កផលប៉ះពាល់ដល់គុណភាពដីនោះទេ។
លោកថ្លែងថា៖ «បណ្តាប្រទេសក្នុងតំបន់ និងប្រទេសអភិវឌ្ឍន៍ក៏បានដាំប្រភេទដើមប្រេងខ្យល់នេះ ដើម្បីបម្រើឱ្យឧស្សាហកម្មឈើកែច្នៃដែរ។ ដើមប្រេងខ្យល់ងាយស្រួលដាំដុះ លូតលាស់លឿន ហើយសាច់ឈើមានគុណភាពល្អដែលនឹងចូលរួមកាត់បន្ថយសម្ពាធលើការប្រើប្រាស់ឈើធម្មជាតិ និងចូលរួមការពារ និងអភិរក្សធនធានធម្មជាតិនៅកម្ពុជា»៕