.jpg)
លោក ម៉ៅ ភិរុណ អភិបាលខេត្តកណ្ដាលថ្លែងក្នុងកម្មវិធីនាពេលកន្លងមក។ រូបថត ហ្វេសប៊ុកអភិបាលខេត្ត
ភ្នំពេញៈ សាលាដំបូងរាជធានីភ្នំពេញបានចេញដីកាកោះដល់លោក លី សាម៉េត អគ្គនាយករងក្រុមហ៊ុន អេង ឌីប៉ូ អភិវឌ្ឍន៍ ឲ្យចូលមកតុលាការនៅថ្ងៃទី ២២ ខែសីហា មកឆ្លើយបំភ្លឺពីដំណើររឿងបរិហារកេរ្តិ៍ជាសាធារណៈ និងបទប្រមាថ តាមបណ្ដឹងលោក ម៉ៅ ភិរុណ អភិបាលខេត្តកណ្ដាល។ យោងតាមដីកាកោះរបស់លោក ខាំ សុផារី ព្រះរាជអាជ្ញារងដែលបានចុះហត្ថលេខាកាលពីថ្ងៃទី ១០ ខែសីហា។
លោក ម៉ៅ ភិរុណ បានប្រាប់ភ្នំពេញប៉ុស្ដិ៍កាលពីម្សិលមិញថាលោក លី សាម៉េត បានសរសេរបរិហារកេរ្តិ៍ប្រមាថលោកតាមបណ្ដាញសង្គមហ្វេសប៊ុក ខណៈដែលកំពុងនៅក្នុងតំណែងជាអភិបាលខេត្ដបំពេញការងារតាមផ្លូវច្បាប់ ដែលរាជរដ្ឋាភិបាលបានកំណត់ត្រឹមត្រូវ។
លោក ភិរុណ ថ្លែងថា៖ «ការយករឿងការងារទៅបង្ហោះនៅក្នុងបណ្ដាញសង្គមហ្វេសប៊ុកនិយាយបរិហារកេរ្តិ៍ និយាយគំរាមកំហែងមកលើបុគ្គលខ្ញុំ ខ្ញុំសូមជម្រាបថាក្នុងនាមខ្ញុំជាអភិបាលខេត្ដ ខ្ញុំបានបំពេញការងារតាមផ្លូវច្បាប់តាមរយៈរដ្ឋាភិបាល និងមន្ដ្រីជំនាញ។ ដូច្នេះយើងគ្មានជម្រើសអ្វីទេមានតែអនុវត្ដតាមផ្លូវច្បាប់ ចំពោះក្រុមហ៊ុនហ្នឹង ដើម្បីឲ្យក្រុមហ៊ុនហ្នឹងទទួលខុសត្រូវចំពោះមុខច្បាប់។ យើងឃើញហើយដីកាដែលតុលាការគេកោះហៅនោះ។ នេះគ្រាន់តែជារឿងផ្ដើមមួយទេ នៅមិនទាន់អស់រឿងផង។ នេះខ្ញុំគ្រាន់តែប្ដឹងពីបទបរិហារកេរ្តិ៍ និងគំរាមប្រមាថមួយទេ ដែលនិយាយបង្កាច់បង្ខូច និយាយប្រមាថនិយាយតាមតែការនឹកឃើញមិនយល់ពីការងារមិនយល់ពីច្បាប់»។
លោកអភិបាលខេត្តអះអាងថាក្រុមហ៊ុន អេង ឌីប៉ូ អភិវឌ្ឍន៍ ដែលមានលោក លី សាម៉េត ដែលបានតាំងខ្លួនថា ជាអគ្គនាយករងក្រុមហ៊ុននោះគាត់កំពុងតែធ្វើការងារមិនតាមច្បាប់ទេ។ ក្រុមហ៊ុននេះធ្វើការងារតាំងពីដើមទីមកមិនគោរពតាមច្បាប់បែបនេះហើយ ទើបចេះតែមានបញ្ហាគឺគាត់មិនគោរពតាមច្បាប់ដែលរដ្ឋាភិបាលឲ្យអនុវត្ដគាត់មិនធ្វើតាម។
លោក ម៉ៅ ភិរុណ បានអះអាងផងដែរថាក្រុមហ៊ុននេះបានធ្វើសកម្មភាពបំផ្លាញទ្រព្យសម្បត្តិសាធារណៈរបស់រដ្ឋបានឈូសបំផ្លិចបំផ្លាញទ្រព្យសម្បត្តិដែលជាកម្មសិទិ្ធរបស់ប្រជាពលរដ្ឋ ដែលប្រជាពលរដ្ឋមានសិទ្ធិកាន់កាប់អាស្រ័យផលនៅលើផ្ទៃដីរបស់គេ និងចុងក្រោយក្រុមហ៊ុននេះបានប្រឆាំងនឹងរាជរដ្ឋាភិបាលជាបន្ដបន្ទាប់ទៀត។
តាមរយៈគេហទំព័រហ្វេសប៊ុកមានឈ្មោះជាភាសាខ្មែរថា លី សាម៉េត បានអះអាងកាលពីម្សិលមិញថា លោកអភិបាលខេត្តកណ្តាល ម៉ៅ ភិរុណ បានយកដីក្រុមហ៊ុនទៅលក់ធ្វើរបាយការណ៍កុហកលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដោយបានយកស្នាមមេដៃប្រជាពលរដ្ឋទៅកុហកនាយករដ្ឋមន្ត្រីពេលនេះប្រជាជននៅឃុំកំពង់អុសទាំងមូលដឹងឮអស់ហើយ ហើយប្រជាជនទាំងអស់ព្រមមកធ្វើជាសាក្សីទាំងអស់គ្នា។
សារដដែលបានឲ្យដឹងទៀតថាលោក ម៉ៅ ភិរុណ បានកុហកប្រជាពលរដ្ឋ យកស្នាមមេដៃពួកគាត់ទៅគាំទ្រនាយករដ្ឋមន្ត្រី តែផ្ទុយទៅវិញបានយកស្នាមមេដៃប្រជាជនធ្វើរបាយការណ៍កុហកនាយករដ្ឋមន្ត្រី ហើយយកដីក្រុមហ៊ុនទៅលក់ចែកអ្នកមាន និងឧកញ៉ាមួយចំនួន។
លោក សាម៉េត បានបញ្ជាក់ថា៖ «ខ្ញុំបាទមានភ័ស្តុតាងគ្រប់គ្រាន់មានទាំងវីដេអូឃ្លីបដែលលោក ភិរុណ បានបញ្ជាកូនចៅថ្នាក់ក្រោមឲ្យទៅប្រមូលស្នាមមេដៃប្រជាពលរដ្ឋ»។
ទោះជាយ៉ាងណាក៏ដោយលោក ភិរុណ បានអះអាងថាករណីរឿងប្រមូលស្នាមមេដៃគឺជារឿងមួយផ្សេងទៀត។
លោកថ្លែងថា៖ «តិចទៀតគេសួរហើយ ដែលថាស្នាមមេដៃនោះមានឈ្មោះអីខ្លះ? យកទៅកុហកសម្ដេចតេជោនោះ កុហករឿងអី? ហើយឯកសារណាដែលបានសរសេរថាខ្ញុំបានយកស្នាមមេដៃប្រជាពលរដ្ឋទៅដាក់ឲ្យសម្ដេចតេជោ?»។
ទោះជាយ៉ាងណាក៏ដោយលោក លី សាម៉េត បានសរសេរនៅលើហ្វេសប៊ុករបស់លោកដោយបានថ្លែងថា៖ «ខ្ញុំដឹងអាថ៌កំបាំងច្រើនណាស់ អ្វីដែលខ្ញុំហ៊ាននិយាយ ខ្ញុំបាទនឹងហ៊ានទទួលខុសត្រូវចំពោះមុខច្បាប់ពីព្រោះលោក ម៉ៅ ភិរុណ បានយកដីក្រុមហ៊ុនទៅលក់យ៉ាងពិតប្រាកដមិនអាចប្រកែកបាន។ ទេវតាដឹងឮ មេឃដីដឹងឮ ហើយនៅថ្ងៃទី ១៥ ឬថ្ងៃទី ១៦ សីហានេះខ្ញុំបាទនឹងចេញឃ្លីបវីដេអូ ដើម្បីបញ្ជាក់ពីការពិតចំពោះបុគ្គល លោកអភិបាលខេត្តកណ្តាល លោក ម៉ៅ ភិរុណ តែម្នាក់គត់»។
ហ្វេសប៊ុកលោក លី សាម៉េត បានអះអាងផងដែរថាអ្នកដែលពាក់ព័ន្ធក្នុងដីជម្លោះរបស់ក្រុមហ៊ុនមានដូចជាលោក ភឹម ភីរ៉ា ជាអភិបាលស្រុកល្វាឯម ដែលជាកូនប្រុសរបស់ លោក ម៉ៅ ភិរុណ និងមនុស្សប្រមាណជាង ១៣ នាក់ផ្សេងទៀត។
លោក សាម៉េត មិនបានឆ្លើយតបសារភ្នំពេញប៉ុស្តិ៍ទេកាលពីម្សិលមិញក្នុងការសុំអត្ថាធិប្បាយបន្ថែម៕
