.jpg)
ពិធីប្រគល់សម្ភារដែលត្រូវបានប្រារព្ធធ្វើឡើងនៅការិយាល័យក្រុមហ៊ុន Huawei Cambodia ក្នុងទីក្រុងភ្នំពេញ។ ហេង ជីវ័ន
ក្រុមហ៊ុន Huawei Cambodia កំពុងនាំយកជំនាញទូរគមនាគមន៍របស់ខ្លួនដើម្បីជួយភ្ជាប់ទំនាក់ទំនងរវាងសិស្ស និងគ្រូនៅតំបន់ជនបទក្រោមគម្រោង «Together Narrowing Digital Gaps»។
កាលពីថ្ងៃច័ន្ទកន្លងទៅ ក្រុមហ៊ុនទូរគមនាគមន៍ដ៏ធំរបស់ចិននេះបានផ្តល់កុំព្យូទ័រ រ៉ោតទ័រអ៊ីនធឺណិត និងទូរស័ព្ទ ដល់ដេប៉ាតឺម៉ង់សិក្សាអន្តរជាតិ (DIS) នៅវិទ្យាស្ថានភាសាបរទេសមកពីសាកលវិទ្យាល័យភូមិន្ទភ្នំពេញ។
វាគឺជាផ្នែកមួយនៃកិច្ចខិតខំប្រឹងប្រែងរបស់ក្រុមហ៊ុន Huawei Cambodia ក្នុងការគាំទ្រដល់គម្រោងសហគមន៍ឆ្នាំ ២០២១ ដែលផ្តួចផ្តើមដោយ DIS ដែលជាគម្រោងសាកល្បងដើម្បីគាំទ្រដល់វិទ្យាល័យសុខអានសំរោង និងវិទ្យាល័យហ៊ុនសែនចាន់ថ្នាលនៅក្នុងខេត្តតាកែវ។
លោកបណ្ឌិត នាគ ចាន់ដារិទ្ធ ប្រធាន DIS ក្នុងពិធីប្រគល់សម្ភារដែលបានធ្វើឡើងនៅការិយាល័យក្រុមហ៊ុន Huawei Cambodia ក្នុងរាជធានីភ្នំពេញថ្លែងថា៖ «នៅពេលដែលខ្ញុំជិះកង់ទៅតំបន់ជនបទទាំងនោះ ខ្ញុំឃើញថា មានគ្រូជាង ១០០ នាក់មិនអាចបង្រៀនបានហើយសិស្សចំនួន ២០០០ នាក់ក៏មិនអាចសិក្សាបានទាំងតាមរយៈការមកកាន់សាលារៀនដោយផ្ទាល់ និងការសិក្សាតាមអនឡាញ គឺជាង ១ ឆ្នាំ គិតចាប់តាំងពីការផ្ទុះឡើងនៃជំងឺកូវីដ១៩»។
លោកបណ្ឌិត នាគ ចាន់ដារិទ្ធ (រូបឆ្វេង) និងលោក Dong Yuanpeng ។ ហេង ជីវ័ន
សម្ភារទាំងនេះនឹងជួយសម្រួលដល់លោកគ្រូ-អ្នកគ្រូ និងសិស្សានុសិស្សនៅវិទ្យាល័យទាំង ២ ឱ្យអាចបន្តការសិក្សាកាន់តែមានប្រសិទ្ធភាព ជាពិសេសក្នុងអំឡុងពេលជំងឺកូវីដ១៩ នៅពេលដែលការអប់រំត្រូវបានរំខាន។ ក្រុមហ៊ុន Huawei Cambodia បានប្រគល់សម្ភារបច្ចេកទេសក្នុងនោះរួមមានកុំព្យូទ័រយួរដៃចំនួន ៤ គ្រឿង រ៉ោតទ័រអ៊ីនធឺណិត Huawei ចំនួន ៤ គ្រឿង និងស្មាតហ្វូន Huawei ចំនួន ៥ គ្រឿងសម្រាប់ជួយសម្រួលការបង្រៀន និងការសិក្សាតាមអនឡាញ។
គំនិតផ្តួចផ្តើមគម្រោងគាំទ្រសហគមន៍ឆ្នាំ ២០២១ មានគោលបំណងកាត់បន្ថយគម្លាតប្រព័ន្ធឌីជីថល និងជួយលើកកម្ពស់ចំណេះដឹងឌីជីថលនៅកម្ពុជា។
លោក ចាន់ដារិទ្ធ ដែលជាអ្នកផ្តួចផ្តើមគម្រោងបានបន្ថែមថា៖ «សូម្បីតែគ្រូបង្រៀនមួយចំនួនដែលមានកុំព្យូទ័រផ្ទាល់ខ្លួន ក៏ពួកគាត់មិនអាចបង្រៀនតាមអនឡាញដោយប្រើធនធានដែលមានបានដែរ ពីព្រោះពួកគាត់ខ្វះចំណេះដឹងប្រព័ន្ធឌីជីថល ដែលចាំបាច់ក្នុងការធ្វើឱ្យការបង្រៀន និងការរៀនសូត្ររបស់ពួកគេកាន់តែមានប្រសិទ្ធភាព»។
និស្សិតមកពី DIS នឹងធ្វើទស្សនកិច្ចនៅសាលារៀននោះដើម្បីបណ្តុះបណ្តាលគ្រូ និងសិស្សានុសិស្សអំពីរបៀបបង្រៀន និងរៀនតាមអនឡាញក្នុងអំឡុងពេលជំងឺកូវីដ១៩៕
