.jpg)
កម្មករប្រមូលផ្តុំគ្នានៅមុខរោងចក្រ W&D កាលពីម្សិលមិញ។ ផា លីណា
ភ្នំពេញៈ ម្ចាស់រោងចក្រកាត់ដេរ W&D ដែលស្ថិតនៅក្នុងសង្កាត់ស្ទឹងមានជ័យទី ៣ ប្រកាន់ជំហរមិនទទួលយកកម្មករប្រមាណ ១ ២០០ នាក់ ដែលខ្លួនបានបញ្ឈប់ពីការងារកាលពីថ្ងៃទី ៤ ខែមករា ឲ្យចូលធ្វើការវិញនោះទេ បើទោះបីជាកម្មករនៅតែបន្តធ្វើការតវ៉ានៅមុខរោងចក្រ កាលពីម្សិលមិញក៏ដោយ។
កាលពីថ្ងៃទី ៤ ខែមករា ឆ្នាំ ២០១៩ ក្រុមហ៊ុន W&D បានសម្រេចលុបឈ្មោះកម្មករ និយោជិតប្រមាណ ១២០០ នាក់ ដោយសំអាងថា កម្មករមិនព្រមចូលធ្វើការតាមដីកាសម្រេចចាត់ចែងបណ្តោះអាសន្នរបស់សាលាដំបូងរាជធានីភ្នំពេញ ដែលតម្រូវឲ្យកម្មករបញ្ឈប់ការធ្វើកូដកម្ម និងចូលធ្វើការវិញក្នុងរយៈពេល ៤៨ ម៉ោង។ ការឈានដល់មានការសម្រេចពីតុលាការនេះ គឺធ្វើឡើងបន្ទាប់ពីភាគីក្រុមហ៊ុនបានដាក់ពាក្យប្តឹងទៅតុលាការនៅពេលដែលការចរចារវាងភាគីកម្មករ និងក្រុមហ៊ុន មិនទទួលបានជោគជ័យពីក្រុមប្រឹក្សាអាជ្ញាកណ្តាល។
លោក តាំង ម៉េង មេធាវីតំណាងឲ្យក្រុមហ៊ុន W&D បានប្រាប់ភ្នំពេញប៉ុស្តិ៍កាលពីម្សិលមិញថា ការបញ្ឈប់កម្មករនេះគឺក្រុមហ៊ុនធ្វើទៅតាមច្បាប់ ព្រោះតែកម្មករ មិនអនុវត្តតាមនីតិវិធីរបស់តុលាការ។ លោកអះអាងថា ក្រុមហ៊ុននឹងមិនទទួលយកកម្មករដែលបានបញ្ឈប់ទាំងនោះ ឲ្យមកធ្វើការវិញនោះទេ ព្រោះអ្វីដែលកម្មករបានធ្វើចំពោះក្រុមហ៊ុន គឺជាកំហុសធ្ងន់។
លោកក៏ឲ្យដឹងដែរថា ចំពោះការទាមទារប្រាក់អតីតភាពការងាររបស់កម្មករ ភាគីក្រុមហ៊ុន ក៏គ្មានគោលការណ៍ផ្តល់ឲ្យនោះដែរ គឺរោងចក្រនឹងបើកប្រាក់ខែចុងក្រោយសម្រាប់កម្មករតែប៉ុណ្ណោះ។ លោកថ្លែងថា៖ «ការមិនព្រមរបស់កម្មករ គឺរឿងរបស់ពួកគាត់តែរោងចក្រ បានអនុវត្តតាមច្បាប់ បើពួកគាត់មិនព្រម (ទទួលប្រាក់ខែចុងក្រោយ) គឺផុតកាតព្វកិច្ចរបស់រោងចក្រហើយ»។
មេធាវីតំណាងរោងចក្ររូបនេះ បញ្ជាក់ថា ចំពោះការប្រកាសឲ្យកម្មករមកបើកប្រាក់ខែចុងក្រោយនៅថ្ងៃទី ៨ មករាម្សិលមិញ ក៏មិនទាន់អាចធ្វើបានដែរ ព្រោះតែភាគីរោងចក្រ មិនទាន់អាចរៀបចំកញ្ចប់ថវិកាទាន់ពេល ដែលជាហេតុត្រូវលើកទៅថ្ងៃក្រោយ។
ការតវ៉ាទាមទារប្រាក់អតីតភាពការងាររបស់កម្មករនេះ បានកើតមានឡើងតាំងពីថ្ងៃទី ២៤ ខែធ្នូ ឆ្នាំ ២០១៨ មក ដោយក្នុងនោះកម្មករ កម្មការិនី បានប្រមូលផ្តុំគ្នាតវ៉ានៅមុខរោងចក្ររបស់ខ្លួន រហូតឈានដល់បិទផ្លូវ ២១៧ កាលពីថ្ងៃទី ៥ មករា ឆ្នាំ ២០១៩ ដោយសារតែគ្មានដំណោះស្រាយ ហើយនៅថ្ងៃទី ៨ មករា ម្សិលមិញនេះ កម្មករដែលត្រូវបានរោងចក្រ បញ្ឈប់ នៅតែបន្តប្រមូលផ្តុំគ្នានៅមុខរោងចក្រ និងព្រមានថា បើមិនមានដំណោះស្រាយ ដែលខ្លួនអាចទទួលយកបាននោះទេ នឹងនៅតែបន្តតវ៉ាទៀត។
អ្នកស្រី ស្រី នាង ធ្វើការក្នុងរោងចក្រនេះជាង ៥ ឆ្នាំមកហើយ បាននិយាយខណៈអង្គុយផ្តុំគ្នានៅមុខច្រកចូលរោងចក្រថា បើគ្មានដំណោះស្រាយទេ ពួកកម្មករនឹងបន្តការតវ៉ាបន្តទៀត ព្រោះថា អ្វីដែលកម្មករចង់បាន គឺដំណោះស្រាយដែលអាចទទួលយកបាន។
ស្ត្រីសម្បុរខ្មៅស្រអែម វ័យជាង ៣០ ឆ្នាំ និងត្រូវទទួលបន្ទុកចិញ្ចឹមកូន ៣ នាក់តែម្នាក់ឯងរូបនេះ និយាយបន្តថា៖ «បើគ្មានដំណោះស្រាយនៅធ្វើអ៊ីចឹងទៀតទៅ បើគេមិនទាន់គិតអ្វីឱ្យយើងផង ហើយបើគេបញ្ឈប់ គេគិតឲ្យយើងឲ្យអស់មក តែនេះគេអត់មានគិតអីឲ្យផង ហើយគេសរសេរបញ្ឈប់ពួកខ្ញុំអ៊ីចឹង។ ក្រុមហ៊ុនត្រូវទូទាត់បន្ថែម ៥ ចំណុច មុននឹងបញ្ឈប់ពួកខ្ញុំបើមិនបានទេ នឹងមិនព្រមដាច់ខាត»។
បើតាមក្រុមកម្មករ ការដែលកម្មករទាមទារឲ្យក្រុមហ៊ុន ទូទាត់ប្រាក់អតីតភាពរបស់ពួកគាត់នេះ ព្រោះតែកម្មករទាំងអស់បារម្ភនៅពេលច្បាប់ថ្មី បានអនុវត្តទៅ ប្រាក់បំណាច់អតីតភាពការងារដែលពួកគាត់មានតាំងពីឆ្នាំ ២០០៨ រហូត ឆ្នាំ ២០១៨ នេះ នឹងត្រូវបាត់បង់ ព្រោះតែកន្លងទៅក្រុមហ៊ុនធ្លាប់បានសន្យាផ្តល់ប្រាក់អតីតភាពការងារនេះ ជូនកម្មករជាច្រើនលើកមកហើយ តែនៅតែមិនដោះស្រាយឲ្យ។
ភ្នំពេញប៉ុស្តិ៍ មិនអាចទាក់ទងលោក ហេង សួរ អ្នកនាំពាក្យក្រសួងការងារ បានទេកាលពីម្សិលមិញ។ ប៉ុន្តែលោកបានថ្លែងកាលពីថ្ងៃចន្ទថា រដ្ឋាភិបាល នឹងមិនធ្វើឲ្យកម្មករណាមួយបាត់បង់ផលប្រយោជន៍នោះទេ ហើយនឹងបន្តចូលរួមដោះស្រាយករណីនេះដោយលោកបញ្ជាក់ថា៖ «រដ្ឋាភិបាលនឹងបញ្ចេញសាច់ប្រាក់ដើម្បីទូទាត់អត្ថប្រយោជន៍ឲ្យបងប្អូនបើមានរោងចក្រណាមួយក្ស័យធន ឬបិទទ្វារដោយម្ចាស់រត់ចោល»។
ប្រធានសហជីពចលនាកម្មករកម្ពុជា លោក ប៉ាវ ស៊ីណា បានសម្តែងការសោកស្តាយចំពោះករណីដែលរោងចក្រមិនព្រមទទួលយកកម្មករឲ្យចូលធ្វើការវិញ និងមិនផ្តល់សំណងត្រឹមត្រូវដល់កម្មករ។ លោក ស៊ីណា យល់ថា បញ្ហានេះអាចជាការរំលោភសិទ្ធិកម្មករធ្ងន់ធ្ងរ។
លោកនិយាយថា ៖ «ដូច្នេះក្រសួងត្រូវតែមានវិធានការក្នុងការដោះស្រាយ ធ្វើម៉េចឲ្យនិយោជក ទទួលយកកម្មករទាំងអស់ចូលធ្វើការវិញ ហើយបន្តរួមគ្នា រកច្រកណាមួយ ដើម្បីដោះស្រាយអាចឲ្យកម្មករទទួលយកបាន»៕
