ភ្នំពេញៈ ក្រសួងចំនួន ៤ ចេញប្រកាសអន្តរក្រសួងចំនួន ២ ច្បាប់ដាច់ដោយឡែកពីគ្នាក្នុងការបង្កើតក្រុមអធិការកិច្ចលើវិស័យកម្មន្តសាល និងវិស័យឧស្សាហកម្មទេសចរណ៍ ដែលមន្ត្រីអះអាងថា ជាកំណែទម្រង់ស៊ីជម្រៅមួយរបស់រដ្ឋាភិបាល ដើម្បីពង្រឹងប្រសិទ្ធភាពការងារ តម្លាភាព និងគណនេយ្យភាព។
ប្រកាសអន្តរក្រសួងស្តីពីការបង្កើតក្រុមអធិការកិច្ចអន្តរក្រសួងវិស័យកម្មន្តសាលចុះថ្ងៃទី ២៧ កុម្ភៈ បានឲ្យដឹងថា ប្រកាសនេះបានចុះហត្ថលេខាដោយរដ្ឋមន្ត្រីក្រសួងការងារ រដ្ឋមន្ត្រីក្រសួងបរិស្ថាន និងរដ្ឋមន្ត្រីក្រសួងឧស្សាហកម្ម និងសិប្បកម្មក្នុងគោលបំណងបង្កើតក្រុមអធិការកិច្ចអន្តរក្រសួង ដើម្បីចុះធ្វើអធិការកិច្ចរួមគ្នាក្នុងពេលតែមួយក្នុងទិសដៅត្រួតពិនិត្យការអនុវត្តរបស់សហគ្រាស គ្រឹះស្ថាន នូវបទប្បញ្ញត្តិ និងលិខិតបទដ្ឋានពាក់ព័ន្ធនានាជុំវិញវិស័យនេះ។
ចំណែកប្រកាសអន្តរក្រសួងស្តីពីការបង្កើតក្រុមការងារអធិការកិច្ចអន្តរក្រសួងក្នុងវិស័យឧស្សហកម្មទេសចរណ៍មួយច្បាប់ទៀតចុះថ្ងៃដដែលមានចុះហត្ថលេខារួមគ្នាដោយរដ្ឋមន្ត្រីក្រសួងការងារ បណ្តុះបណ្តាលវិជ្ជាជីវៈ រដ្ឋមន្ត្រីក្រសួងបរិស្ថាន និងរដ្ឋមន្ត្រីក្រសួងទេសចរណ៍បានបញ្ជាក់ដែរថា ក្រុមការងារអន្តរក្រសួងនេះនឹងមានគោលដៅចុះធ្វើអធិការកិច្ចរួមគ្នាក្នុងពេលតែមួយផងដែរ ដើម្បីត្រួតពិនិត្យការអនុវត្តរបស់សហគ្រាស គ្រឹះស្ថាន នូវបទប្បញ្ញត្តិ និងលិខិតបទដ្ឋានពាក់ព័ន្ធនឹងវិស័យការងារ វិស័យឧស្សាហកម្មទេសចរណ៍ និងវិស័យបរិស្ថាន។
ប្រកាសអន្តរក្រសួងទាំង ២ ច្បាប់នោះមានខ្លឹមសារដូចគ្នាថា៖ «និយោជកនៃសហគ្រាស គ្រឹះស្ថានដែលស្ថិតក្រោមដែនអនុវត្តន៍ច្បាប់ដែលពាក់ព័ន្ធនឹងវិស័យទាំងនោះ ត្រូវអនុវត្តការបំពេញបែបបទ និងលក្ខខណ្ឌការងារដែលច្បាប់បានកំណត់ និងត្រូវបង្កលក្ខណៈងាយស្រួលដល់ក្រុមអធិការកិច្ចអន្តរក្រសួង ដើម្បីធ្វើការត្រួតពិនិត្យ»។
លោក ហេង សួរ អ្នកនាំពាក្យក្រសួងការងារបានប្រាប់ភ្នំពេញប៉ុស្តិ៍ពីម្សិលមិញបន្ថែមថា ការចេញប្រកាសអន្តរក្រសួងនេះគឺជាការអនុវត្តតាមស្មារតីនៃលទ្ធផលវេទិការាជរដ្ឋាភិបាលផ្នែកឯកជនលើកទី ១៨ នាថ្ងៃទី ២៩ ខែមីនា ឆ្នាំ ២០១៩ ដែលនៅក្នុងវេទិកានោះលោកនាយករដ្ឋមន្ត្រី ហ៊ុន សែន បានដាក់ចេញនូវកញ្ចប់វិធានការកែទម្រង់ដ៏មុតស្រួចចំនួន ១៥ ចំណុចសំដៅសម្រួលការធ្វើធុរកិច្ច ពង្រឹងភាពប្រកួតប្រជែង និងជំរុញការធ្វើពិពិធកម្មសេដ្ឋកិច្ចកម្ពុជា។
លោកបញ្ជាក់ថា៖ «ក្រុមអធិការកិច្ចអន្តរក្រសួងនឹងជួយសម្រួលទៅដល់វិស័យឯកជន ដោយសារតែក្រុមអធិការកិច្ចតាមក្រសួងនីមួយៗនឹងចុះទៅរួមគ្នាតែម្តង ដោយនឹងមើលកម្មវត្ថុទាំងអស់គ្នា ហើយអ្វីដែលត្រូវមើល យើងនឹងមើលរួមគ្នាដែលធ្វើឲ្យវិស័យឯកជន គាត់ចំណេញពេលវេលា»។
លោក ហេង សួរ បានបន្ថែមថា ការបង្កើតក្រុមអធិការកិច្ចរួមគ្នានេះគឺមិនមែនបានន័យថា ក្រុមអធិការកិច្ចដែលមានស្រាប់នៅតាមបណ្តាក្រសួងទាំងនោះ ត្រូវលុបចោលនោះទេគឺបានន័យថា ក្រុមអធិការកិច្ចដែលមានស្រាប់នៅតាមក្រសួងទាំងនោះនឹងត្រូវងាកមកសហការរួមគ្នា នៅពេលចុះធ្វើអធិការកិច្ចនៅតាមស្ថាប័នឯកជនម្តងៗក្នុង ១ ឆ្នាំ។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ភ្នំពេញប៉ុស្តិ៍ពីម្សិលមិញដែរថា ការសមាហរណកម្មអង្គភាពផ្ទៃក្នុងរបស់ក្រសួងនីមួយៗ ទៅជាក្រុមអធិការកិច្ចអន្តរស្ថាប័នតែមួយនេះគឺជាការធ្វើកំណែទម្រង់ស៊ីជម្រៅមួយទៀតរបស់ក្រសួងពាក់ព័ន្ធនានានៃរាជរដ្ឋាភិបាល ដើម្បីពង្រឹងប្រសិទ្ធភាពការងារ តម្លាភាព និងគណនេយ្យភាព។
លោកបន្តថា ចាប់ពីខែមេសា ឆ្នាំ ២០២០ តទៅនៅពេលចុះអធិការកិច្ចសាមញ្ញលើសហគ្រាសណាមួយក្នុង ១ ឆ្នាំ គឺមន្ត្រីក្រសួងទាំង ៣ នឹងចុះបំពេញការងាររួមគ្នាតែម្តង។
លោកបន្ថែមថា៖ «ការធ្វើសមាហរណកម្មនេះនឹងកាត់បន្ថយការរំខានពេលវេលារបស់សហគ្រាសគ្រឹះស្ថានក្នុងការទទួលប្រតិភូអធិការកិច្ចដែលពីមុននេះស្ថាប័ននីមួយៗ ចុះធ្វើអធិការកិច្ចផ្សេងៗគ្នាដែលពេលខ្លះកម្មវត្ថុនៃការធ្វើអធិការកិច្ចគឺមានភាពប្រហាក់ប្រហែលគ្នា»។
លោក វ៉ន ណៃ ម្ចាស់សិប្បកម្មផលិតសម្បកដបទឹកសុទ្ធមួយកន្លែងស្ថិតនៅតាមបណ្តាយផ្លូវជាតិលេខ ៣ បានប្រាប់ភ្នំពេញប៉ុស្តិ៍ពីម្សិលមិញថា ការរួមគ្នាចុះមកត្រួតពិនិត្យក្នុងពេលតែមួយបែបនេះគឺជារឿងដែលល្អ សម្រាប់សហគ្រាស។
លោកបន្តថា ការធ្វើយ៉ាងដូច្នេះធ្វើឲ្យលោកចំណេញពេលវេលា ជាពិសេសប្រាក់កាស ព្រោះតែកន្លងទៅក្នុងមួយ ១ ឆ្នាំៗមានមន្ត្រីមកពីស្ថាប័នជាច្រើនខុសៗគ្នាបានចុះមកធ្វើការអធិការកិច្ច។
លោកបន្ថែមថា៖ «ខ្ញុំគ្រាន់តែជាលក្ខណៈសិប្បកម្មខ្នាតតូច តែចុះមកញឹកញាប់ណាស់ដែលមកម្តងម្នាក់ៗ ខុសពេលគ្នាអីអ៊ីចឹងទៅមានខាងបរិស្ថាន ខាងក្រសួងមហាផ្ទៃផង ចុះមកពិនិត្យមើលដល់ទីតាំងរបស់យើង។ ពេលចុះមកម្តងៗ យើងពេលខ្លះចំណាយឲ្យគាត់ដែរតើ ឲ្យលុយចាក់សាំង ចាក់អីទៅវិញ ព្រោះគាត់មក ៤ ទៅ ៥ នាក់ៗ ប៉ុន្តែបើមករួមគ្នាមកតែរួចអ៊ីចឹងគឺស្រួលដែរ យើងចំណាយតែម្តងចប់»៕